ಮಾರುಕಟ್ಟೆಗೆ ಗ್ರ್ಯಾಂಡ್ ಎಂಟ್ರಿಕೊಟ್ಟ ರಾಯಲ್ ಎನ್‌ಫೀಲ್ಡ್ ಗೆರಿಲ್ಲಾ 450 ಬೈಕ್; ಬೆಲೆ ಎಷ್ಟು, ಏನಿದೆ ಫೀಚರ್ಸ್?

ಸುದೀರ್ಘ ಕಾಯುವಿಕೆಯ ನಂತರ ರಾಯಲ್ ಎನ್‌ಫೀಲ್ಡ್ ತನ್ನ ಗೆರಿಲ್ಲಾ 450 (Royal Enfield Guerrilla 450) ಬೈಕ್ ಅನ್ನು ಬಿಡುಗಡೆ ಮಾಡಿದೆ. ಇದು 450 ಸಿಸಿ ವಿಭಾಗದಲ್ಲಿ ಇತರ ಕಂಪನಿಗಳ ಹಿಮಾಲಯನ್ 450 ಮತ್ತು 400-450 ಸಿಸಿ ಬೈಕ್‌ಗಳಿಗೆ ಕಠಿಣ ಪೈಪೋಟಿ ನೀಡಲಿದೆ. ಸ್ಪೇನ್‌ನ ಬಾರ್ಸಿಲೋನಾದಲ್ಲಿರುವ ಐಷರ್ ಮೋಟಾರ್ಸ್ ಲಿಮಿಟೆಡ್‌ನ ವ್ಯವಸ್ಥಾಪಕ ನಿರ್ದೇಶಕ ಸಿದ್ಧಾರ್ಥ್ ಲಾಲ್ ಅವರು ಗೆರಿಲ್ಲಾ 450 ಅನ್ನು ಜಾಗತಿಕವಾಗಿ ಬಿಡುಗಡೆ ಮಾಡಿದರು. ಈ ರೋಡ್‌ಸ್ಟರ್ ಬೈಕ್ ಅನ್ನು 2.39 ಲಕ್ಷ ರೂಪಾಯಿಗಳ ಆರಂಭಿಕ ಎಕ್ಸ್ ಶೋರೂಂ ಬೆಲೆಯಲ್ಲಿ ಖರೀದಿಸಬಹುದು.

ರಾಯಲ್ ಎನ್‌ಫೀಲ್ಡ್ ಗೆರಿಲ್ಲಾ 450 ಮೋಟಾರ್‌ಸೈಕಲ್ ಅನ್ನು ಅನಲಾಗ್, ಡ್ಯಾಶ್ ಮತ್ತು ಫ್ಲ್ಯಾಶ್ ಎಂಬ 3 ರೂಪಾಂತರಗಳಲ್ಲಿ ಪರಿಚಯಿಸಿದೆ. ಇದು ವಿವಿಧ ಬಣ್ಣಗಳ ಆಯ್ಕೆಗಳಲ್ಲಿ ಲಭ್ಯವಿದೆ. ಗೆರಿಲ್ಲಾ 450ಯ ಅನಲಾಗ್ ರೂಪಾಂತರವು ಸ್ಮೋಕ್ ಸಿಲ್ವರ್ ಮತ್ತು ಪ್ಲಾಯಾ ಬ್ಲ್ಯಾಕ್‌ನಂತಹ ಬಣ್ಣ ಆಯ್ಕೆಗಳಲ್ಲಿ ಲಭ್ಯವಿದೆ. ಇದರ ಎಕ್ಸ್ ಶೋ ರೂಂ ಬೆಲೆ 2,39,000 ರೂಪಾಯಿ. ಗೆರಿಲ್ಲಾ 450ಯ ಡ್ಯಾಶ್ ರೂಪಾಂತರವು ಪ್ಲೇಯಾ ಬ್ಲಾಕ್ ಮತ್ತು ಗೋಲ್ಡ್ ಡಿಪ್ ಬಣ್ಣದ ಆಯ್ಕೆಗಳಲ್ಲಿ ಲಭ್ಯವಿದ್ದು ಇದರ ಎಕ್ಸ್ ಶೋ ರೂಂ ಬೆಲೆ 2,49,000 ರೂ. ಆಗಿದೆ. ಟಾಪ್ ರೂಪಾಂತರವು ಹಳದಿ ರಿಬ್ಬನ್ ಮತ್ತು ಬ್ರಾವಾ ಬ್ಲೂ ಎರಡು ಬಣ್ಣದ ಆಯ್ಕೆಗಳಲ್ಲಿ ಲಭ್ಯವಿದೆ ಮತ್ತು ಇದರ ಎಕ್ಸ್ ಶೋ ರೂಂ ಬೆಲೆ 2,54,000 ರೂಪಾಯಿ.

ರಾಯಲ್ ಎನ್‌ಫೀಲ್ಡ್ ಗೆರಿಲ್ಲಾ 450 ಆಧುನಿಕ ರೆಟ್ರೋ ಮೋಟಾರ್‌ಸೈಕಲ್‌ನಂತೆ ಕಾಣುತ್ತದೆ. ಡೈನಾಮಿಕ್ ಚಾಸಿಸ್ ಹೊಂದಿರುವ ಈ ಬೈಕ್ ಸ್ಟೆಪ್ಡ್ ಬೆಂಚ್ ಸೀಟ್, 11 ಲೀಟರ್ ಇಂಧನ ಟ್ಯಾಂಕ್, ರೌಂಡ್ ಎಲ್‌ಇಡಿ ಹೆಡ್‌ಲ್ಯಾಂಪ್, ಇಂಟಿಗ್ರೇಟೆಡ್ ಟೈಲ್ ಲ್ಯಾಂಪ್‌ನೊಂದಿಗೆ ಟರ್ನ್ ಇಂಡಿಕೇಟರ್‌ಗಳು, ಅಪ್‌ಸ್ವೆಪ್ಟ್ ಸೈಲೆನ್ಸರ್, ಸ್ಲಿಮ್ ಟೈಲ್ ಸೆಕ್ಷನ್, ಟ್ಯೂಬುಲರ್ ಗ್ರಾಬ್ ಹ್ಯಾಂಡಲ್‌ನಂತಹ ವೈಶಿಷ್ಟ್ಯಗಳನ್ನು ಹೊಂದಿದೆ. ಇದರ ನಿರ್ಮಾಣ ಗುಣಮಟ್ಟವು ಪ್ರೀಮಿಯಂ ಆಗಿದ್ದು ನೋಡಲು ಸಖತ್ ಸ್ಟೈಲಿಶ್ ಆಗಿ ಕಾಣುತ್ತದೆ.

ಅಪ್ಲಿಕೇಶನ್‌ ಜೊತೆಗೆ ಸಂಪರ್ಕ

ಈ ಬೈಕಿನ ಟಾಪ್ ಮತ್ತು ಮಧ್ಯದ ರೂಪಾಂತರಗಳು 4-ಇಂಚಿನ ಇನ್ಫೋಟೈನ್‌ಮೆಂಟ್ ಕ್ಲಸ್ಟರ್ ಅನ್ನು ಹೊಂದಿವೆ. ಇದರಲ್ಲಿ ನೀವು ರಾಯಲ್ ಎನ್‌ಫೀಲ್ಡ್ ಅಪ್ಲಿಕೇಶನ್ ಅನ್ನು ಸಂಪರ್ಕಿಸಬಹುದು ಮತ್ತು ಪ್ರವಾಸಕ್ಕೆ ಸಂಬಂಧಿಸಿದ ಮಾಹಿತಿಯ ಜೊತೆಗೆ ಅನೇಕ ಮಾಹಿತಿ ಪಡೆಯಬಹುದು. ನ್ಯಾವಿಗೇಷನ್, ಮ್ಯೂಸಿಕ್ ಕಂಟ್ರೋಲ್, ಹವಾಮಾನ ಮುನ್ಸೂಚನೆ ಹಾಗೂ ವಾಹನದ ಮಾಹಿತಿ ಸಿಗಲಿದೆ.

ಹಿಮಾಲಯನ್ 450ಯಂತೆ, ರಾಯಲ್ ಎನ್‌ಫೀಲ್ಡ್ ಗೆರಿಲ್ಲಾ 450 ಹೊಸ ಮತ್ತು ಸುಧಾರಿತ 452 ಸಿಸಿ ಸಿಂಗಲ್ ಸಿಲಿಂಡರ್ ಲಿಕ್ವಿಡ್ ಕೂಲ್ಡ್ ಶೆರ್ಪಾ ಎಂಜಿನ್ ಹೊಂದಿದೆ. ಇದು 8,000 ಆರ್‌ಪಿಎಂನಲ್ಲಿ 40 ಪಿಎಸ್ ಗರಿಷ್ಠ ಶಕ್ತಿಯನ್ನು ಮತ್ತು 5,500 ಆರ್ಪಿಎಂನಲ್ಲಿ 40 ನ್ಯೂಟನ್ ಮೀಟರ್‌ಗಳ ಗರಿಷ್ಠ ಟಾರ್ಕ್ ಅನ್ನು ಉತ್ಪಾದಿಸುತ್ತದೆ. 85 ಪ್ರತಿಶತ ಟಾರ್ಕ್ ಅನ್ನು 3000 ಆರ್‌ಪಿಎಂವರೆಗೆ ಸಾಧಿಸಬಹುದು ಎಂದು ಕಂಪನಿ ಹೇಳಿಕೊಂಡಿದೆ. ಇದರಲ್ಲಿ ವಾಟರ್ ಕೂಲ್ಡ್ ಸಿಸ್ಟಮ್ ವೈಶಿಷ್ಟ್ಯವನ್ನು ಸಹ ಒದಗಿಸಲಾಗಿದೆ. ಇದು ತಾಪಮಾನವನ್ನು ನಿಯಂತ್ರಿಸುವ ಇಂಟಿಗ್ರೇಟೆಡ್ ವಾಟರ್ ಪಂಪ್, ಟ್ವಿನ್ ಪಾಸ್ ರೇಡಿಯೇಟರ್ ಬೈಪಾಸ್‌ನಂತಹ ವೈಶಿಷ್ಟ್ಯಗಳನ್ನು ಹೊಂದಿದೆ.

ಇದನ್ನೂ ಓದಿ | ಐಫೋನ್‌ ಮತ್ತು ಆಂಡ್ಯಾಯ್ಡ್‌ ಫೋನ್‌ನಲ್ಲಿ 5G ಆಫ್ ಮಾಡುವುದು ಹೇಗೆ? ಹಂತವಾರು ವಿವರ ಇಲ್ಲಿದೆ

17-17 ಇಂಚಿನ ಫ್ರಂಟ್-ಬ್ಯಾಕ್ ಟ್ಯೂಬ್‌ಲೆಸ್ ಟೈರ್‌ಗಳನ್ನು ಹೊಂದಿದೆ. ಎರಡೂ ಚಕ್ರಗಳು ಡಿಸ್ಕ್ ಬ್ರೇಕ್ ಮತ್ತು 43 ಎಂಎಂ ಟೆಲಿಸ್ಕೋಪಿಕ್ ಫ್ರಂಟ್ ಫೋರ್ಕ್ ಮತ್ತು ಲಿಂಕೇಜ್ ಟೈಪ್ ಮೊನೊಶಾಕ್ ಸಸ್ಪೆನ್ಷನ್ ಅನ್ನು ಹೊಂದಿವೆ. ಈ ಬೈಕ್‌ಗೆ ಅಲ್ಟ್ರಾ ರೆಸ್ಪಾನ್ಸಿವ್ ಮ್ಯಾನೇಜ್‌ಮೆಂಟ್ ಸಿಸ್ಟಮ್ ಮತ್ತು ರೈಡ್ ಬೈ ವೈರ್ ಟೆಕ್ನಾಲಜಿ ಜೊತೆಗೆ ಎರಡು ರೈಡ್ ಮೋಡ್‌ಗಳಾದ ಬಿ ಪರ್ಫಾರ್ಮೆನ್ಸ್ ಮೋಡ್ ಮತ್ತು ಇಕೋ ಮೋಡ್ ಅನ್ನು ಸಹ ಒದಗಿಸಲಾಗಿದೆ.

ರಾಯಲ್ ಎನ್‌ಫೀಲ್ಡ್ ಗೆರಿಲ್ಲಾ 450 ಬುಕಿಂಗ್ ಭಾರತ ಮತ್ತು ವಿದೇಶಗಳಲ್ಲಿ ಈಗಾಗಲೇ ಪ್ರಾರಂಭವಾಗಿದೆ. ಮಾರಾಟವು ಆಗಸ್ಟ್ 1 ರಿಂದ ಶುರುವಾಗುತ್ತದೆ.

ವರದಿ: ವಿನಯ್ ಭಟ್.

ಇನ್ನಷ್ಟು ಟೆಕ್‌ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್‌ ಮಾಡಿ

ಇದನ್ನೂ ಓದಿ | ಬೆರಗುಗೊಳಿಸುವ ಕ್ಯಾಮೆರಾ, ಭರ್ಜರಿ ಬ್ಯಾಟರಿ ಜೊತೆ ಫಾಸ್ಟ್ ಚಾರ್ಜರ್; ಒಂದೇ ದಿನ 2 ಸ್ಮಾರ್ಟ್‌ಫೋನ್ ರಿಲೀಸ್ ಮಾಡಿದ ಹಾನರ್