ಬಚ್ಚನ್​ ದೀವಾರ್ ಸ್ಟೈಲ್‌ನಲ್ಲಿ ಕಾಣಿಸಿಕೊಂಡ ದ್ರಾವಿಡ್; ಹೊಸ ಅವತಾರ ಕಂಡು ಬೆರಗಾದ ಅಭಿಮಾನಿಗಳು, VIDEO

ಏಷ್ಯಾಕಪ್ ಟೂರ್ನಿಯ (Asia Cup 2023) ಬಹುನಿರೀಕ್ಷಿತ ಭಾರತ-ಪಾಕಿಸ್ತಾನ (India vs Pakistan) ಪಂದ್ಯವು ಮಳೆಯಿಂದ ರದ್ದುಗೊಂಡಿತು. ಶ್ರೀಲಂಕಾದ ಪಲ್ಲೆಕೆಲೆ ಕ್ರಿಕೆಟ್ ಮೈದಾನದಲ್ಲಿ ನಡೆದ ಗ್ರೂಪ್ ಬಿ 2ನೇ ಪಂದ್ಯದಲ್ಲಿ ಭಾರತ ತನ್ನ ಮೊದಲ ಇನ್ನಿಂಗ್ಸ್​​ನಲ್ಲಿ 266 ರನ್​ಗಳ ಸವಾಲಿನ ಮೊತ್ತ ಕಲೆ ಹಾಕಿತ್ತು. ಆದರೆ ಇನ್ನೇನು ಪಾಕಿಸ್ತಾನ ಇನ್ನಿಂಗ್ಸ್​ ಆರಂಭಿಸಬೇಕಿತ್ತು ಎನ್ನುವಾಗ ಆರಂಭಗೊಂಡ ಮಳೆ ನಿರಂತರವಾಗಿ ಸುರಿಯತೊಡಗಿತು. ಸತತವಾಗಿ ಮಳೆ ಸುರಿದ ಹಿನ್ನೆಲೆ ಪಂದ್ಯವನ್ನು ರದ್ದುಗೊಳಿಸಲಾಯಿತು.

ಪಂದ್ಯ ರದ್ದಾದ ಹಿನ್ನೆಲೆ ಉಭಯ ತಂಡಗಳು ತಲಾ ಒಂದೊಂದು ಅಂಕ ಪಡೆದುಕೊಂಡಿವೆ. ಮತ್ತೊಂದೆಡೆ ಮೊದಲ ಪಂದ್ಯದಲ್ಲಿ ನೇಪಾಳ ವಿರುದ್ಧ ಗೆದ್ದಿದ್ದ ಪಾಕಿಸ್ತಾನ ಸೂಪರ್-4 ಹಂತಕ್ಕೂ ಪ್ರವೇಶ ನೀಡಿತು. ಇದರ ನಡುವೆ ಭಾರತ ಬ್ಯಾಟರ್​ಗಳು ಸಿಕ್ಕಾಪಟ್ಟೆ ಟ್ರೋಲ್ ಆಗುತ್ತಿದ್ದಾರೆ. ಅಗ್ರ ಕ್ರಮಾಂಕದ ರೋಹಿತ್ ಶರ್ಮಾ, ವಿರಾಟ್ ಕೊಹ್ಲಿ, ಶುಭ್ಮನ್ ಗಿಲ್, ಶ್ರೇಯಸ್ ಅಯ್ಯರ್ ವೈಫಲ್ಯ ಅನುಭವಿಸಿದರು. ಹಾಗಾಗಿ ನಿರೀಕ್ಷೆ ಹುಸಿಗೊಳಿಸಿದ ಹಿನ್ನೆಲೆ ನೆಟ್ಟಿಗರು ಟ್ರೋಲ್ ಮಾಡುತ್ತಿದ್ದಾರೆ.

ಹೊಸ ಅವತಾರದಲ್ಲಿ ದ್ರಾವಿಡ್​

ಇದೆಲ್ಲದರ ನಡುವೆ ಟೀಮ್ ಇಂಡಿಯಾ ಕೋಚ್​ ರಾಹುಲ್ ದ್ರಾವಿಡ್​ (Rahul Dravid) ಹೊಸ ಅವತಾರದಲ್ಲಿ ಕಾಣಿಸಿಕೊಂಡು ಸಾಮಾಜಿಕ ಜಾಲತಾಣವನ್ನು ಶೇಕ್ ಮಾಡುತ್ತಿದ್ದಾರೆ. ಅವರ ಖದರ್ ಲುಕ್​ಗೆ ಫಿದಾ ಆಗಿರುವ ಫ್ಯಾನ್ಸ್​ ವಾರೆವ್ಹಾ ಎನ್ನುತ್ತಿದ್ದಾರೆ. ರಾಜ ಗಾಂಭೀರ್ಯದ ಲುಕ್​ಗೆ ಮನಸೋತ ಅಭಿಮಾನಿಗಳು ಸೋಷಿಯಲ್ ಮೀಡಿಯಾದಲ್ಲಿ ಶೇರ್​ ಮಾಡುತ್ತಿದ್ದು, ಕೊಂಡಾಡುತ್ತಿದ್ದಾರೆ. ಬಗೆಬಗೆ ಕಾಮೆಂಟ್​ಗಳ ಮೂಲಕ ದ್ರಾವಿಡ್​ಗೆ, ಸಿನಿಮಾ ರಂಗಕ್ಕೆ ಬಂದು ಬಿಡಿ ಎಂದು ಸಲಹೆ ನೀಡುತ್ತಿದ್ದಾರೆ.

ಜಾಹೀರಾತಿನಲ್ಲಿ ಬಚ್ಚನ್ ಸ್ಟೈಲ್ ಕಾಪಿ

ಭಾರತದ ಮುಖ್ಯ ಕೋಚ್ ರಾಹುಲ್ ದ್ರಾವಿಡ್ ಅವರು ತಮ್ಮ ಐಕಾನಿಕ್ ಚಿತ್ರ ದೀವಾರ್​​​ನಲ್ಲಿ ಕಾಣಿಸಿಕೊಂಡ ಅಮಿತಾಬ್ ಬಚ್ಚನ್ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಜಾಹೀರಾತು ಗಮನ ಸೆಳೆದಿದೆ. ಜನಪ್ರಿಯ ಸ್ಟೈಲ್​ನಲ್ಲಿ ರಾಹುಲ್​ ದ್ರಾವಿಡ್​ ಕೂಡ ಕಾಣಿಸಿಕೊಂಡು ಗಮನ ಸೆಳೆದಿದ್ದಾರೆ. ಡ್ರೈಪ್ರುಟ್​ ಮತ್ತು ನಟ್ಸ್​ ಕಂಪನಿಯ ಫಾರ್ಮ್ಲಿಯ ಜಾಹೀರಾತಿನಲ್ಲಿ ದ್ರಾವಿಡ್​, ಬಚ್ಚನ್ ಅನುಕರಣೆ ಮಾಡಿದ್ದಾರೆ.

ಶಾಂತ ಮತ್ತು ಸೌಮ್ಯ ಸ್ವಭಾವ ವ್ಯಕ್ತಿತ್ವವನ್ನು ಹೊಂದಿರುವ ರಾಹುಲ್ ದ್ರಾವಿಡ್, ಜಾಹೀರಾತಿನ ಲುಕ್​​ನಲ್ಲಿ ಮಾತ್ರವಲ್ಲದೆ ಧ್ವನಿಯಲ್ಲೂ ಬಚ್ಚನ್​ ಅವರನ್ನೇ ಅನುಕರಣೆ ಮಾಡಿರುವುದು ವಿಶೇಷ ಎನಿಸಿದೆ. ಈ ಜಾಹೀರಾತು ವಿಡಿಯೋ ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗುತ್ತಿದ್ದಂತೆ ಅಭಿಮಾನಿಗಳು ಅಚ್ಚರಿ ವ್ಯಕ್ತಪಡಿಸಿದ್ದಾರೆ. ದ್ರಾವಿಡ್​ ಹಿಂದೆಂದೂ ಕಾಣದ ರೀತಿ ಕಾಣಿಸಿಕೊಂಡಿರುವುದು ವಿಶೇಷ.

ಕ್ರೆಡ್​ ಆ್ಯಪ್​​ನಲ್ಲಿ ದ್ರಾವಿಡ್ ವೀರಾವೇಷ

ಮೈದಾನದಲ್ಲಿ ಸದಾ ತಾಳ್ಮೆಯಿಂದ ಇರುವ ದ್ರಾವಿಡ್ ಕ್ರೆಡ್​ ಆ್ಯಪ್​ಗೆ ನೀಡಿದ ಜಾಹೀರಾತಿನಲ್ಲಿ ಈ ಪಾಟಿ ಕೋಪನಾ ಎನ್ನುವಷ್ಟರ ಮಟ್ಟಿಗೆ ಜನರು ಮೂಗಿನ ಮೇಲೆ ಬೆರಳಿಟ್ಟು ಆಶ್ಚರ್ಯಪಡುವಂತೆ ನಟಿಸಿದ್ದರು. ಟ್ರಾಫಿಕ್​ ಜಾಮ್​ನಲ್ಲಿ ಸಿಲುಕಿಕೊಳ್ಳುವ ದ್ರಾವಿಡ್, ಏಕಾಏಕಿ ಕೋಪಗೊಂಡು, ನಾನು ಇಂದಿರಾನಗರ ಕಾ ಗೂಂಡಾ ಎಂದು ಬ್ಯಾಟ್​ ಹಿಡಿದು ಪಕ್ಕದಲ್ಲಿದ್ದ ಕಾರಿನ ಗಾಜು ಹೊಡೆದು ಹಾಕುತ್ತಾರೆ. ಹಾರ್ನ್​ ಹೊಡೆದವರಿಗೆ ಅವಾಜ್​ ಹಾಕುತ್ತಾರೆ. ಈ ಜಾಹೀರಾತು ಬಿಡುಗಡೆಯಾದಾಗ ಸಂಚಲನ ಸೃಷ್ಟಿಸಿತ್ತು.

ಟಿ20 ವಿಶ್ವಕಪ್​​ನಲ್ಲೂ ಅಗ್ರೆಸ್ಸಿವ್ ಸೆಲೆಬ್ರೇಷನ್

ಕಳೆದ ವರ್ಷ ಟಿ20 ವಿಶ್ವಕಪ್‌ನಲ್ಲಿ ಪಾಕಿಸ್ತಾನ ಎದುರು ಟೀಮ್ ಇಂಡಿಯಾ ರಣರೋಚಕ ಗೆಲುವು ಸಾಧಿಸಿದ ನಂತರ ಡಗೌಟ್​ನಲ್ಲಿದ್ದ ರಾಹುಲ್​ ದ್ರಾವಿಡ್ ಅಗ್ರೆಸ್ಸಿವ್​ ಆಗಿ ಸೆಲೆಬ್ರೇಟ್​ ಮಾಡಿದ್ದರು. ಏಕೆಂದರೆ ಈ ಪಂದ್ಯದಲ್ಲಿ ಭಾರತ ಸೋಲು ಖಚಿತ ಎಂದು ಭಾವಿಸಲಾಗಿತ್ತು. ಆದರೆ ವಿರಾಟ್ ಕೊಹ್ಲಿ ಏಕಾಂಗಿ ಹೋರಾಟ ನಡೆಸಿ ರೋಚಕ ಜಯ ತಂದುಕೊಟ್ಟಿದ್ದರು. ಇಡೀ ಜಗತ್ತೇ ಭಾರತದ ಗೆಲುವು ಸಂಭ್ರಮಿಸಿತ್ತು.