ನಾನು ಇರೋವರೆಗೂ ಅವರನ್ನು ಏನೂ ಮಾಡೋಕೆ ಆಗೊಲ್ಲ; ಲಾರೆನ್ಸ್ ಬಿಷ್ಣೋಯ್ ಟೀಮ್‌ಗೆ ಸಲ್ಮಾನ್ ಖಾನ್ ಬಾಡಿಗಾರ್ಡ್‌ ಶೇರಾ ಸವಾಲು
ಕೃಷ್ಣಮೃಗ ಬೇಟೆ ಪ್ರಕರಣದ ನಂತರ ಲಾರೆನ್ಸ್ ಬಿಷ್ಣೋಯ್ ಹಾಗೂ ತಂಡ ಸಲ್ಮಾನ್ ಖಾನ್‌ಗೆ ಬೆದರಿಕೆ ಒಡ್ಡುತ್ತಾ ಬಂದಿದೆ. ಮಹಾರಾಷ್ಟ್ರ ಮಾಜಿ ಸಚಿವ ಬಾಬಾ ಸಿದ್ದಿಕ್ ಹತ್ಯೆ ನಂತರ ಸಲ್ಮಾನ್‌ಖಾನ್‌ಗೆ ಭದ್ರತೆ ಹೆಚ್ಚಿಸಲಾಗಿದೆ. ಆದರೆ ನಾನು ಇರೋವರೆಗೂ ಭಾಯ್‌ಗೆ ಏನೂ ಮಾಡಲು ಸಾಧ್ಯವಿಲ್ಲವೆಂದು ಸಲ್ಮಾನ್ ಬಾಡಿಗಾರ್ಡ್‌ ಶೇರಾ ಹೇಳಿದ್ದಾರೆ.
ಮಹಾರಾಷ್ಟ್ರ ಮಾಜಿ ಸಚಿವ ಬಾಬಾ ಸಿದ್ದಿಕ್ ಹತ್ಯೆ ನಂತರ ಬಾಲಿವುಡ್ ನಟ ಸಲ್ಮಾನ್ ಖಾನ್‌ಗೆ ಭದ್ರತೆಯನ್ನು ಹೆಚ್ಚಿಸಲಾಗಿದೆ. ಸರ್ಕಾರವು ನಟನಿಗೆ Y+ ಭದ್ರತೆ ನೀಡಿದ್ದು ಸಲ್ಮಾನ್ ಖಾನ್ ಹೋದಲೆಲ್ಲಾ ಪೊಲೀಸ್‌ ಬೆಂಗಾವಲು ವಾಹನ ಅವರನ್ನು ಹಿಂಬಾಲಿಸುತ್ತಿದೆ. ಬಿಗ್‌ಬಾಸ್‌ ಸೆಟ್‌ನಲ್ಲಿ ಕೂಡಾ ಸಲ್ಮಾನ್ ಖಾನ್‌ಗೆ ಭದ್ರತೆಯನ್ನು ಮತ್ತಷ್ಟು ಹೆಚ್ಚಿಸಲಾಗಿದೆ. ಈ ನಡುವೆ ಸಲ್ಮಾನ್ ಖಾನ್ ಬಾಡಿಗಾರ್ಡ್‌ ಶೇರಾ, ನಾನು ಇರುವವರೆಗೂ ನಮ್ಮ ಬಾಸ್‌ ರಕ್ಷಣೆ ನನ್ನದು ಎಂದು ಹೇಳಿಕೊಂಡಿದ್ದಾರೆ.
ಫಾರ್ಮ್‌ಹೌಸ್‌, ಬಿಗ್‌ಬಾಸ್‌ ಸೆಟ್‌ನಲ್ಲಿ ಹೆಚ್ಚಿದ ಭದ್ರತೆ
ಕೃಷ್ಣಮೃಗ ಬೇಟೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಕೆಲವು ವರ್ಷಗಳಿಂದ ಲಾರೆನ್ಸ್ ಬಿಷ್ಣೋಯ್ ಕಡೆಯಿಂದ ಸಲ್ಮಾನ್ ಖಾನ್‌ಗೆ ಬೆದರಿಕೆ ಕರೆ ಬರುತ್ತಲೇ ಇದೆ. ಇದೇ ವರ್ಷ ಜೂನ್‌ನಲ್ಲಿ ಸಲ್ಮಾನ್ ಖಾನ್‌ನನ್ನು ಅವರ ಫಾರ್ಮ್‌ಹೌಸ್‌ ಬಳಿ ಹತ್ಯೆ ಮಾಡುವ ಸಂಚನ್ನು ಪೊಲೀಸರು ವಿಫಲಗೊಳಿಸಿದ್ದರು. ಫಾರ್ಮ್‌ಹೌಸ್‌ಗೆ ಹೋಗುವ ಎಲ್ಲಾ ದಾರಿಗಳಲ್ಲಿ ಬಿಗಿ ಭದ್ರತೆ ನಿಯೋಜಿಸಲಾಗಿದೆ. ಸುತ್ತಮುತ್ತಲೂ ಪ್ರಯಾಣಿಸುವ ವಾಹನಗಳ ತಪಾಸಣೆ ಕೂಡಾ ಮಾಡಲಾಗುತ್ತಿದೆ. ಶನಿವಾರ ಸಲ್ಮಾನ್ ಖಾನ್ ಆಪ್ತ, ಮಾಜಿ ಸಚಿವ ಬಾಬಾ ಸಿದ್ದಿಕ್ ಅವರನ್ನು ಶನಿವಾರ ಮುಂಬೈನಲ್ಲಿ ಹತ್ಯೆ ಮಾಡಲಾಗಿತ್ತು. ಲಾರೆನ್ಸ್ ಬಿಷ್ಣೋಯ್ ಗ್ಯಾಂಗ್, ಬಾಬಾ ಸಿದ್ದಿಕ್ ಹತ್ಯೆಯ ಹೊಣೆಗಾರಿಕೆಯನ್ನು ವಹಿಸಿಕೊಂಡ ನಂತರ ಸಲ್ಮಾನ್ ಖಾನ್‌ಗೆ ಭದ್ರತೆ ಹೆಚ್ಚಿಸಲಾಗಿದೆ.
ಲಾರೆನ್ಸ್ ಬಿಷ್ಣೋಯ್ ಟೀಮ್‌ಗೆ ಶೇರಾ ಸವಾಲು
ಸಲ್ಮಾನ್ ಖಾನ್ ಬಾಡಿಗಾರ್ಡ್‌ ಶೇರಾ, ಈ ವಿಚಾರವಾಗಿ ಮಾತನಾಡಿದ್ದು ನಾನು ಇರುವರೆಗೂ ನಮ್ಮ ಭಾಯ್‌ಗೆ ಏನೂ ಆಗುವುದಿಲ್ಲ. ಅವರನ್ನು ಕಾಪಾಡುವ ಜವಾಬ್ದಾರಿ ನನ್ನದು ಎಂದು ಲಾರೆನ್ಸ್ ಬಿಷ್ಣೋಯ್ ಟೀಮ್‌ಗೆ ಚಾಲೆಂಜ್‌ ಮಾಡಿದ್ದಾರೆ. ಸಲ್ಮಾನ್ ಖಾನ್‌ಗೆ ಶೇರಾ ಮಾತ್ರವಲ್ಲ ಅನೇಕ ಬಾಡಿಗಾರ್ಡ್‌ಗಳಿದ್ದಾರೆ. ಅವರಲ್ಲಿ ಶೇರಾ ಪ್ರಮುಖವಾದವರು. ಈತ ಹೆಸರಿಗೆ ತಕ್ಕಂತೆ ಶೇರ್‌ನಂತೆ ಇದ್ದಾರೆ. ಅಜಾನುಬಾಹು ಶೇರಾಗೆ ಸೋಷಿಯಲ್‌ ಮೀಡಿಯಾದಲ್ಲಿ ಕೂಡಾ ಸಾಕಷ್ಟು ಫಾಲೋವರ್‌ಗಳಿದ್ದಾರೆ. ಈತನ ನಿಜ ಹೆಸರು ಗುರ್ಮೀತ್ ಸಿಂಗ್ ಜಾಲಿ. 1995 ರಲ್ಲಿ ಸಲ್ಮಾನ್ ಅವರ ಅಂಗರಕ್ಷಕರಾಗಿ ಶೇರಾ ನೇಮಕಗೊಂಡರು. ಟೈಗರ್ ಸೆಕ್ಯುರಿಟಿ ಎಂಬ ಹೆಸರಿನ ತಮ್ಮದೇ ಆದ ಭದ್ರತಾ ಕಂಪನಿಯನ್ನು ಶೇರಾ ನಡೆಸುತ್ತಿದ್ದಾರೆ.
29 ವರ್ಷಗಳಿಂದ ಸಲ್ಮಾನ್ ಖಾನ್‌ಗೆ ಬಾಡಿಗಾರ್ಡ್‌ ಆಗಿರುವ ಶೇರಾ
ಸಲ್ಮಾನ್ ಹೋದಲ್ಲಿ ಬಂದಲ್ಲಿ ಶೇರಾ ಅವರ ಜೊತೆ ಇರುತ್ತಾರೆ. ನಾನು ಬದುಕಿರುವರೆಗೂ ಭಾಯ್‌ಗೆ ನಾನು ಸೆಕ್ಯೂರಿಟಿ ಆಗಿರುತ್ತೇನೆ ಎಂದು ಶೇರಾ ಅನೇಕ ಸಂದರ್ಶನಗಳಲ್ಲಿ ಹೇಳಿಕೊಂಡಿದ್ದಾರೆ. ಇದಕ್ಕಾಗಿ ಸಲ್ಮಾನ್ ಖಾನ್, ಶೇರಾಗೆ ಲಕ್ಷಾಂತರ ರೂ. ಸಂಬಳವನ್ನೂ ನೀಡುತ್ತಿದ್ದಾರೆ. ಶೇರಾ, ಸಲ್ಮಾನ್ ಖಾನ್‌ಗೆ ಅಂಗರಕ್ಷಕ ಆಗಿ ಮಾತ್ರವಲ್ಲ, ಒಡಹುಟ್ಟಿದ ಸಹೋದರನಂತೆ ಇದ್ದಾರೆ. ಸಲ್ಮಾನ್ ಖಾನ್ ಅವರನ್ನು ಸೋಹೈಲ್ ಖಾನ್ ಮೂಲಕ ಕಾರ್ಯಕ್ರಮವೊಂದರಲ್ಲಿ ಭೇಟಿಯಾದೆ. ಸ್ಟೇಜ್ ಶೋ ಒಂದರಲ್ಲಿ ಸಮಸ್ಯೆ ಇದ್ದ ಕಾರಣ ಸೊಹೈಲ್ ಖಾನ್, ಸಹೋದರ ಸಲ್ಮಾನ್ ಖಾನ್‌ಗೆ ಭದ್ರತೆ ನೀಡುವಂತೆ ಮನವಿ ಮಾಡಿದ್ದರು. ನಂತರ ನೀನು ಸಲ್ಮಾನ್ ಭಾಯ್ ಜೊತೆ ಯಾಕೆ ಇರಬಾರದು?' ಎಂದು ಕೇಳಿದರು. ನಾನೂ ಒಪ್ಪಿಕೊಂಡೆ. ಆರಂಭದಲ್ಲಿ, ನಾನು ಅವರೊಂದಿಗೆ ಹೊರಗೆ ಕಾರ್ಯಕ್ರಮಗಳಿಗೆ ಮಾತ್ರ ಹೋಗಿ ಬರುತ್ತಿದ್ದೆ. ಆದರೆ ಈಗ ಆ ರೀತಿ ಅಲ್ಲ, ಅವರೊಂದಿಗೆ ನಾನು ಸದಾ ಇರುತ್ತೇನೆ. ನನಗೆ ಅವರು ಸ್ವಂತ ಅಣ್ಣನಿಗಿಂತಲೂ ಹೆಚ್ಚು ಎಂದು ಶೇರಾ ಹೇಳಿಕೊಂಡಿದ್ದಾರೆ.
