Bagheera Collection Day 1: ಬಾಕ್ಸ್‌ ಆಫೀಸ್‌ನಲ್ಲಿ ಗೆದ್ದನಾ ಬಘೀರ? ಮೊದಲ ದಿನದ ಗಳಿಕೆ ಎಷ್ಟು? ಇಲ್ಲಿದೆ ಕಲೆಕ್ಷನ್‌ ಲೆಕ್ಕಾಚಾರ

Bagheera Box Office Collection Day 1: ದೀಪಾವಳಿ ಧಮಾಕಾ ಎಂಬಂತೆ, ಚಿತ್ರಮಂದಿರಗಳಲ್ಲಿ ಒಂದಲ್ಲ ಎರಡಲ್ಲ ಹಲವು ಬಿಗ್‌ ಬಜೆಟ್‌ನ ಸಿನಿಮಾಗಳು ಚಿತ್ರಮಂದಿರಕ್ಕೆ ದಾಂಗುಡಿ ಇಟ್ಟಿವೆ. ಪರಭಾಷೆಗಳ ಸಿನಿಮಾಗಳ ಜತೆಗೆ ಕನ್ನಡದಿಂದ ಸ್ಪರ್ಧೆಗಿಳಿದಿದ್ದು ರೋರಿಂಗ್‌ ಸ್ಟಾರ್‌ ಶ್ರೀಮುರಳಿ ನಟನೆಯ ಬಘೀರ ಸಿನಿಮಾ. ಆರಂಭದಿಂದಲೂ ಹೈಪ್‌ ಕ್ರಿಯೆಟ್‌ ಮಾಡಿದ್ದ ಬಘೀರ ಸಿನಿಮಾ, ಅದಕ್ಕೆ ತಕ್ಕಂತೆ ಪ್ರೇಕ್ಷಕರಿಂದ ಬಹುಪರಾಕ್‌ ಪಡೆದುಕೊಂಡಿದೆ. ಸೂಪರ್‌ ಹೀರೋ ಕಾನ್ಸೆಪ್ಟ್‌ನ ಈ ಸಿನಿಮಾದಲ್ಲಿ ನಟ ಶ್ರೀಮುರಳಿ ಎರಡು ಶೇಡ್‌ಗಳಲ್ಲಿ ಕಾಣಿಸಿಕೊಂಡು ರಂಜಿಸಿದ್ದಾರೆ.

ಡಾ. ಸೂರಿ ನಿರ್ದೇಶನ

ಡಾ. ಸೂರಿ ನಿರ್ದೇಶನದಲ್ಲಿ ಮೂಡಿಬಂದಿರುವ ಬಘೀರ ಸಿನಿಮಾ ಹಿಂದೆ ಕಥೆಯ ಶಕ್ತಿಯಾಗಿರುವವರು, ನಿರ್ದೇಶಕ ಪ್ರಶಾಂತ್‌ ನೀಲ್.‌ ಎಲ್ಲ ಅಂದುಕೊಂಡಂತೆ ಆಗಿದ್ದರೆ ಈ ಸಿನಿಮಾವನ್ನು ನೀಲ್‌ ನಿರ್ದೇಶಿಸಬೇಕಿತ್ತು. ಆದರೆ, ಅವರ ಕೈಯಲ್ಲಿ ಒಂದಷ್ಟು ಪ್ರಾಜೆಕ್ಟ್‌ಗಳಿದ್ದ ಕಾರಣ, ಅದು ಸಾಧ್ಯವಾಗಲಿಲ್ಲ. ಆಗ ನೀಲ್‌ಗೆ ಕಂಡಿದ್ದೇ ಡಾ. ಸೂರಿ. ತಮ್ಮದೇ ಕೆಜಿಎಫ್‌ ಮತ್ತು ಸಲಾರ್‌ ಸಿನಿಮಾಗಳ ಬರವಣಿಗೆ ವಿಭಾಗದಲ್ಲಿ ಕೆಲಸ ಮಾಡಿದ್ದ ಸೂರಿಗೆ ಚಾನ್ಸ್‌ ಕೊಟ್ಟಿದ್ದರು ಪ್ರಶಾಂತ್‌ ನೀಲ್‌. ಈಗ ಆ ಜವಾಬ್ದಾರಿಯನ್ನು ಅಷ್ಟೇ ನೀಟಾಗಿ ಮಾಡಿದ್ದಾರೆ ಸೂರಿ.

ಇದನ್ನೂ ಓದಿ: ಸಮಾಜ ಕಾಡಾಗಿ ಬದಲಾದಾಗ ನ್ಯಾಯಕ್ಕಾಗಿ ನರಭಕ್ಷಕನಾಗುವ ಈ ಬಘೀರ! ಶ್ರೀಮುರಳಿ ‘ಬಘೀರ’ ಚಿತ್ರವಿಮರ್ಶೆ

ಸ್ಟಾರ್‌ ತಾರಾಬಳಗ

ಹೊಂಬಾಳೆ ಫಿಲಂಸ್‌ ಬ್ಯಾನರ್‌ನಲ್ಲಿ ರಿಚ್‌ ಆಗಿಯೇ ಮೂಡಿಬಂದಿದ್ದ ಬಘೀರ ಸಿನಿಮಾದಲ್ಲಿ ಖಡಕ್‌ ಪೊಲೀಸ್‌ ಪಾತ್ರದಲ್ಲಿ ಶ್ರೀಮುರಳಿ ಎದುರಾಗಿದ್ದಾರೆ. ಇನ್ನೊಂದು ಕಡೆ, ಸಮಾಜಘಾತುಕರನ್ನು ಸೈಲೆಂಟ್‌ ಆಗಿಯೇ ಮಟ್ಟಹಾಕುವ ಬಘೀರನಾಗಿಯೂ ಕಾಣಿಸಿಕೊಂಡು, ನೋಡುಗರ ಹುಬ್ಬೇರಿಸಿದ್ದಾರೆ. ಕಾನ್‌ಸ್ಟೇಬಲ್‌ ಪಾತ್ರಧಾರಿ ರಂಗಾಯಣ ರಘು, ಸಿಬಿಐ ಅಧಿಕಾರಿ ಪ್ರಕಾಶ್‌ ರಾಜ್‌ ಪಾತ್ರಗಳು ಚಿತ್ರದ ಹೈಲೈಟ್. ರಣ ರಾಕ್ಷಸನಂತೆ, ವಿಕಾರ ಮುಖದಲ್ಲಿ ರಾಣಾ ಪಾತ್ರದಲ್ಲಿ ಖಳನ ಗತ್ತು ತೋರಿಸಿದ್ದಾರೆ ಗರುಡ ರಾಮ್.‌

ತೆಲುಗು ನಾಡಿನಲ್ಲೂ ಬಘೀರನ ಘರ್ಜನೆ

ಕರ್ನಾಟಕ ಮಾತ್ರವಲ್ಲದೆ, ತೆಲುಗು ರಾಜ್ಯಗಳಲ್ಲಿಯೂ ಬಘೀರ ಸಿನಿಮಾಕ್ಕೆ ಮೆಚ್ಚುಗೆ ಸಿಕ್ಕಿದೆ. ತೆಲುಗು ಮಂದಿಯೂ ಈ ಸಿನಿಮಾವನ್ನು ಹೊತ್ತು ಮೆರೆಸುತ್ತಿದ್ದಾರೆ. ಕರ್ನಾಟಕದಲ್ಲಿಯೂ ಹೌಸ್‌ ಫುಲ್‌ ಪ್ರದರ್ಶನದ ಜತೆಗೆ ಪಾಸಿಟಿವ್‌ ಟಾಕ್‌ ಹೆಚ್ಚಾಗುತ್ತಿದೆ. ಕಲೆಕ್ಷನ್‌ ಲೆಕ್ಕಾಚಾರ ನೋಡಿದರೆ, ಡಿಸೆಂಟ್‌ ಗಳಿಕೆ ಕಂಡಿದೆ ಎಂದೂ ಹೇಳಲಾಗುತ್ತಿದೆ. ಹಾಗಾದರೆ, ಇಷ್ಟೆಲ್ಲ ಕ್ರೇಜ್‌ ಸೃಷ್ಟಿಸಿಕೊಂಡ ಬಘೀರ ಸಿನಿಮಾ ಮೊದಲ ದಿನದ ಕಲೆಕ್ಷನ್‌ ಎಷ್ಟು? ತೆಲುಗು ರಾಜ್ಯಗಳಿಂದ ಬಂದ ಗಳಿಕೆ ಎಷ್ಟು? ಇಲ್ಲಿದೆ ವಿವರ.

ಇದನ್ನೂ ಓದಿ: ಶ್ರೀಮುರಳಿ ನಟನೆಯ ಬಘೀರ ಸಿನಿಮಾದ ಓಟಿಟಿ ಹಕ್ಕುಗಳನ್ನು ಬಾಚಿಕೊಳ್ತ ನೆಟ್‌ಫ್ಲಿಕ್ಸ್‌; ಆನ್‌ಲೈನ್‌ ಸ್ಟ್ರೀಮಿಂಗ್‌ ಯಾವಾಗ?

ನಿರೀಕ್ಷೆ ಮಟ್ಟಕ್ಕೆ ತಲುಪಿದ್ನಾ ಬಘೀರ?

ಬಘೀರ ಸಿನಿಮಾಕ್ಕೆ ಮೊದಲ ದಿನ ಪ್ರೇಕ್ಷಕರಿಂದ ಮತ್ತು ವಿಮರ್ಶೆ ದೃಷ್ಟಿಯಿಂದ ಒಳ್ಳೆಯ ಟಾಕ್‌ ಸಿಕ್ಕರೂ, ಕಲೆಕ್ಷನ್‌ ವಿಚಾರದಲ್ಲಿ ಅದ್ಯಾಕೋ ಡಬಲ್‌ ಆಗಿಲ್ಲ. ಕಲೆಕ್ಷನ್‌ ವಿಚಾರದಲ್ಲಿ ದೊಡ್ಡ ಓಪನಿಂಗ್‌ ಸಿಗುವ ನಿರೀಕ್ಷೆ ಇತ್ತು. ಅದ್ಯಾಕೂ ಹುಸಿಯಾದಂತಿದೆ. ಸದ್ಯ ಇಂಡಸ್ಟ್ರಿ ಟ್ರೇಡಿಂಗ್ ವೆಬ್‌ ಪೋರ್ಟಲ್ Sacnilk ವರದಿ ಪ್ರಕಾರ, ಬಘೀರ ಸಿನಿಮಾ ಮೊದಲ ದಿನವಾದ ಗುರುವಾರ 2.80 ಕೋಟಿ ಗಳಿಕೆ ಕಂಡಿದೆ ಎಂದು ಹೇಳಿದೆ. ಇತ್ತ ವಿತರಕರ ವಲಯದಿಂದ ಇದೇ ಸಿನಿಮಾ ಕನಿಷ್ಠ 3 ಕೋಟಿಯಿಂದ ಗರಿಷ್ಠ ಮೂರುವರೆ ಕೋಟಿ ಗಳಿಸಿದೆ ಎನ್ನಲಾಗುತ್ತಿದೆ. ಈ ಬಗ್ಗೆ ಇನ್ನಷ್ಟೇ ಚಿತ್ರತಂಡ ಅಧಿಕೃತವಾಗಿ ಕಲೆಕ್ಷನ್‌ ವಿಚಾರವನ್ನು ಘೋಷಿಸಬೇಕಿದೆ.

ಹೇಗಿದೆ ಬಘೀರ ಸಿನಿಮಾ?

ಬಘೀರ ಸಿನಿಮಾ ತೀರಾ ವಿಶೇಷ ಕಥೆಯನ್ನು ಹೊಂದಿದೆ ಎಂದು ಹೇಳುವುದು ತುಸು ಕಷ್ಟ. ಆರ್ಗನ್‌ ಟ್ರೇಡಿಂಗ್‌, ಮಾನವ ಕಳ್ಳಸಾಗಾಣಿಕೆ, ಡ್ರಗ್ಸ್‌, ಭ್ರಷ್ಟಾಚಾರ.. ಹೀಗೆ ಒಂದಷ್ಟು ವಿಚಾರಗಳನ್ನು ಈ ಸಿನಿಮಾದಲ್ಲಿ ನಿರ್ದೇಶಕರು ಟಚ್‌ ಮಾಡಿದ್ದಾರೆ. ಈ ವಿಚಾರಗಳಿಗೆ ಸೂಪರ್‌ ಮ್ಯಾನ್‌ ಅನ್ನೂ ಲೇಬಲ್‌ ಅಂಟಿಸಲಾಗಿದೆ. ಮೇಕಿಂಗ್‌ ವಿಚಾರದಲ್ಲಿ ತುಸು ಹೆಚ್ಚೇ ರಿಚ್‌ ಆಗಿದ್ದಾನೆ ಈ ಬಘೀರ. ಶ್ರೀಮುರಳಿ ಅವರನ್ನು ಗಮನದಲ್ಲಿಟ್ಟುಕೊಂಡೇ ಪ್ರಶಾಂತ್‌ ನೀಲ್‌ ಕೆತ್ತಿದ ಕಥೆಯೇ ಈ ಬಘೀರ. ವ್ಯವಸ್ಥೆಯ ವಿರುದ್ಧ ಎದೆಗೊಟ್ಟು ನಿಲ್ಲುವ ವ್ಯಕ್ತಿಯಾಗಿ ಶ್ರೀಮುರಳಿ ಇಲ್ಲಿ ಕಾಣಿಸಿಗುತ್ತಾರೆ. ಖಾಕಿ ಧರಿಸಿ ತನ್ನ ಕೈಯಿಂದ ಮಾಡಲಾಗದ ಎಷ್ಟೋ ಸಾಹಸಗಳನ್ನು ಮುಖವಾಡ ಧರಿಸಿದ ಬಘೀರ ಮಾಡುತ್ತ ಹೋಗುತ್ತಾನೆ. ಪೂರ್ತಿ ವಿಮರ್ಶೆ ಓದಿ