Bagheera OTT: ಶ್ರೀಮುರಳಿ ನಟನೆಯ ಬಘೀರ ಸಿನಿಮಾದ ಓಟಿಟಿ ಹಕ್ಕುಗಳನ್ನು ಬಾಚಿಕೊಳ್ತ ನೆಟ್‌ಫ್ಲಿಕ್ಸ್‌; ಆನ್‌ಲೈನ್‌ ಸ್ಟ್ರೀಮಿಂಗ್‌ ಯಾವಾಗ?
Bagheera movie ott release date: ಶ್ರೀ ಮುರಳಿ ನಟನೆಯ ಬಘೀರ ಸಿನಿಮಾದ ಓಟಿಟಿ ಬಿಡುಗಡೆ ಕುರಿತು ಸೋಷಿಯಲ್‌ ಮೀಡಿಯಾದಲ್ಲಿ ವದಂತಿ ಹರಿದಾಡುತ್ತಿದೆ. ಈ ಸಿನಿಮಾದ ಓಟಿಟಿ ಹಕ್ಕುಗಳನ್ನು ನೆಟ್‌ಫ್ಲಿಕ್ಸ್‌ ಖರೀದಿಸಿದೆ ಎನ್ನಲಾಗಿದೆ. ಈ ಕುರಿತು ಅಧಿಕೃತ ಮಾಹಿತಿ ಹೊರಬೀಳಬೇಕಿದೆ.
Bagheera movie ott release date: ಹೊಂಬಾಳೆ ಫಿಲ್ಮ್ಸ್‌ನ ಬಘೀರ ಸಿನಿಮಾವನ್ನು ಪ್ರೇಕ್ಷಕರು ಚಿತ್ರಮಂದಿರಗಳಲ್ಲಿ ನೋಡಿ ಸಂಭ್ರಮಿಸುತ್ತಿದ್ದಾರೆ. ಇದೇ ಸಮಯದಲ್ಲಿ ಬಘೀರ ಸಿನಿಮಾದ ಓಟಿಟಿ ಹಕ್ಕುಗಳನ್ನು ನೆಟ್‌ಫ್ಲಿಕ್ಸ್‌ ಬಾಚಿಕೊಂಡಿದೆ ಎಂಬ ಸುದ್ದಿಯೊಂದು ಬಂದಿದೆ. ಫಿಲ್ಮಿಕಾರ್ನರ್‌ ಎಕ್ಸ್‌ ಖಾತೆಯಲ್ಲಿ ಈ ಕುರಿತು ಮಾಹಿತಿ ನೀಡಲಾಗಿದೆ. ನೆಟ್‌ಫ್ಲಿಕ್ಸ್‌ ಈ ಕುರಿತು ಅಧಿಕೃತವಾಗಿ ಇನ್ನಷ್ಟೇ ತಿಳಿಸಬೇಕಿದೆ. ಸೂರಿ ನಿರ್ದೇಶನದ ಈ ಸಿನಿಮಾ ಓಟಿಟಿಯಲ್ಲಿ ಯಾವಾಗ ಸ್ಟ್ರೀಮಿಂಗ್‌ ಆಗಲಿದೆ ಎಂಬ ಕುತೂಹಲವೂ ಓಟಿಟಿ ಅಭಿಮಾನಿಗಳಲ್ಲಿ ಮೂಡಿದೆ.
ಬಘೀರ ಸಿನಿಮಾ ಓಟಿಟಿ ರಿಲೀಸ್‌
ಶ್ರೀಮುರಳಿ, ರುಕ್ಮಿಣಿ ವಸಂತ್‌, ಪ್ರಕಾಶ್ ರಾಜ್. ರಂಗಾಯಣ ರಘು. ಅಚ್ಯುತ್ ಕುಮಾರ್. ಗರುಡ ರಾಮ ಮುಂತಾದವರು ನಟಿಸಿರುವ ಬಘೀರ ಸಿನಿಮಾದ ಓಟಿಟಿ ಹಕ್ಕುಗಳನ್ನು ನೆಟ್‌ಫ್ಲಿಕ್ಸ್‌ ಬಾಚಿಕೊಂಡಿದೆ ಎಂದು ವರದಿಯಾಗಿದೆ. ನಿರ್ದೇಶಕ ಪ್ರಶಾಂತ್‌ ನೀಲ್‌ ಬಘೀರ ಸಿನಿಮಾವು ಕನ್ನಡ ಮತ್ತು ತೆಲುಗಿನಲ್ಲಿ ಬಿಡುಗಡೆಯಾಗಿತ್ತು. ಹಿಂದಿ ಮತ್ತು ತಮಿಳಿನಲ್ಲಿ ಬೇರೆ ಪ್ರಮುಖ ಸಿನಿಮಾಗಳು ಬಿಡುಗಡೆಯಾಗುವ ಕಾರಣ ಮೊದಲ ವಾರ ಹಿಂದಿ, ತಮಿಳಿನಲ್ಲಿ ಬಘೀರ ಸಿನಿಮಾವನ್ನು ಬಿಡುಗಡೆ ಮಾಡಲಾಗಿಲ್ಲ. ಬಿ. ಅಜನೀಶ್ ಲೋಕನಾಥ್ ಸಂಗೀತ ಮತ್ತು ವಿಜಯ್ ಕಿರಗಂದೂರು ನಿರ್ಮಾಣ ಮಾಡಿರುವ ಬಘೀರ ಸಿನಿಮಾವನ್ನು ಎಷ್ಟು ಕೋಟಿಗೆ ನೆಟ್‌ಫ್ಲಿಕ್ಸ್‌ ಬಾಚಿಕೊಂಡಿದೆ ಎಂಬ ವಿವರ ಇನ್ನಷ್ಟೇ ಲಭಿಸಬೇಕಿದೆ. ಈ ಕುರಿತು ನೆಟ್‌ಫ್ಲಿಕ್ಸ್‌ ಕಡೆಯಿಂದ ಅಧಿಕೃತವಾಗಿ ಮಾಹಿತಿ ಹೊರಬರಬೇಕಿದೆ. ಬಘೀರ ಚಿತ್ರತಂಡವೂ ಈ ಕುರಿತು ಯಾವುದೇ ಮಾಹಿತಿಯನ್ನು ಸದ್ಯ ನೀಡಿಲ್ಲ. ಸಿನಿಮಾವು ಥಿಯೇಟರ್‌ನಲ್ಲಿದ್ದಾಗ ಓಟಿಟಿ ವಿವರವನ್ನು ಕೆಲವೊಂದು ಕನ್ನಡ ಸಿನಿಮಾ ನಿರ್ಮಾಪಕರು ಪ್ರಕಟಿಸಿದೆ ಇರುವ ಬೆಳವಣಿಗೆ ಈ ಹಿಂದೆ ನಡೆದಿದೆ. ಓಟಿಟಿ ವಿವರ ನೀಡಿದರೆ "ಓಟಿಟಿಗೆ ಬಂದ ಮೇಲೆ ನೋಡಿದರಾಯ್ತು" ಎಂದು ಜನರು ಥಿಯೇಟರ್‌ಗೆ ಬಾರದೆ ಇರಬಹುದು ಎಂಬ ಆತಂಕ ಇದಕ್ಕೆ ಪ್ರಮುಖ ಕಾರಣ ಎನ್ನಲಾಗುತ್ತಿದೆ.
ಬಘೀರ ಸಿನಿಮಾವನ್ನು ನೆಟ್‌ಫ್ಲಿಕ್ಸ್‌ ಖರೀದಿಸಿದೆ ಎಂದಾದರೆ ಇದು ಶುಭ ಸುದ್ದಿಯೆಂದೇ ಹೇಳಬೇಕು. ಪ್ರಮುಖ ಓಟಿಟಿಗಳು ಇತ್ತೀಚೆಗೆ ಕನ್ನಡ ಸಿನಿಮಾಗಳ ಕುರಿತು ಅಸಡ್ಡೆ ಹೊಂದಿವೆ ಎಂಬ ಚರ್ಚೆ ನಡೆಯುತ್ತಿರುವಾಗಲೇ ಇತ್ತೀಚಿಗೆ ಕೆಲವು ಕನ್ನಡ ಸಿನಿಮಾಗಳು ಓಟಿಟಿಯತ್ತ ಮುಖ ಮಾಡುತ್ತಿವೆ. ಚಿತ್ರಮಂದಿರಗಳಲ್ಲಿ ಸಿನಿಮಾವೊಂದು ಬಿಡುಗಡೆಯಾದ ಬಳಿಕ ಆ ಸಿನಿಮಾದ ಕುರಿತು ಪಾಸಿಟಿವ್‌ ಮಾತುಗಳು ಕೇಳುತ್ತಿವೆ ಎಂದಾದಗ ಪ್ರಮುಖ ಓಟಿಟಿ ಆಪರೇಟರ್‌ಗಳು ಆ ಚಿತ್ರವನ್ನು ತಮ್ಮದಾಗಿಸಿಕೊಳ್ಳಲು ಮುಂದಾಗುತ್ತಿವೆ. ಇದೀಗ ಬಘೀರ ಸಿನಿಮಾದ ಕುರಿತು ಪಾಸಿಟೀವ್‌ ಟಾಕ್‌ ಶುರುವಾದ ಸಮಯದಲ್ಲಿ ನೆಟ್‌ಫ್ಲಿಕ್ಸ್‌ ಸಂಸ್ಥೆಯು ಬಘೀರ ಸಿನಿಮಾದ ಓಟಿಟಿ ಹಕ್ಕುಗಳನ್ನು ಪಡೆದುಕೊಂಡಿದೆ ಎಂಬ ಸುದ್ದಿ ಬಂದಿದೆ.
ಬಘೀರ ಸಿನಿಮಾದ ಓಟಿಟಿ ಬಿಡುಗಡೆ ದಿನಾಂಕ
ಬಘೀರ ಸಿನಿಮಾದ ಓಟಿಟಿ ಬಿಡುಗಡೆ ದಿನಾಂಕ ಇನ್ನೂ ಪ್ರಕಟವಾಗಿಲ್ಲ. ಸಾಮಾನ್ಯವಾಗಿ ಥಿಯೇಟರ್‌ ಬಿಡುಗಡೆಯ ಒಂದು ತಿಂಗಳ ಬಳಿಕ ಓಟಿಟಿಯಲ್ಲಿ ಸಿನಿಮಾಗಳನ್ನು ಸ್ಟ್ರೀಮಿಂಗ್‌ ಮಾಡಲಾಗುತ್ತದೆ. ಈ ರೀತಿಯಾದರೆ ನವೆಂಬರ್‌ 31ಕ್ಕೆ ಅಥವಾ ಡಿಸೆಂಬರ್‌ ಮೊದಲ ವಾರದಲ್ಲಿ ಓಟಿಟಿಯಲ್ಲಿ ಬಘೀರ ಬಿಡುಗಡೆಯಾಗುವ ನಿರೀಕ್ಷೆಯಿದೆ. ಎಲ್ಲಾದರೂ ಚಿತ್ರಮಂದಿರಗಳಲ್ಲಿ ಉತ್ತಮವಾಗಿ ಪ್ರತಿಕ್ರಿಯೆ ಬರುತ್ತಿದ್ದರೆ ಓಟಿಟಿ ಬಿಡುಗಡೆ ದಿನಾಂಕ ಇನ್ನಷ್ಟು ವಿಳಂಬವಾಗಬಹುದು. ಇದೇ ಸಮಯದಲ್ಲಿ ಓಟಿಟಿ ಸ್ಟ್ರೀಮಿಂಗ್‌ ಪಡೆದ ಸಂಸ್ಥೆಯೊಂದಿಗಿನ ಡೀಲ್‌ಗೆ ತಕ್ಕಂತೆ ಬಿಡುಗಡೆ ದಿನಾಂಕ ಇರಲಿದೆ.
ಬಘೀರ ಸಿನಿಮಾದ ಕುರಿತು ಪಾಸಿಟೀವ್‌ ಟಾಕ್‌
ಬಘೀರ ಸಿನಿಮಾ ಅಕ್ಟೋಬರ್‌ 31ರಂದು ಅಂದರೆ ಇಂದು ಬಿಡುಗಡೆಯಾಗಿದೆ. ಇಂದು ಬೆಳಗ್ಗೆ ಈ ಸಿನಿಮಾ ನೋಡಿರುವ ಪ್ರೇಕ್ಷಕರು ಈ ಚಿತ್ರದ ಕುರಿತು ಸಕಾರಾತ್ಮಕ ಅಭಿಪ್ರಾಯ ವ್ಯಕ್ತಪಡಿಸುತ್ತಿದ್ದಾರೆ. ಈಗಾಗಲೇ ಹಿಂದೂಸ್ತಾನ್ ಟೈಮ್ಸ್ ಕನ್ನಡ ಈ ಚಿತ್ರದ ವಿಮರ್ಶೆ ಪ್ರಕಟಿಸಿದೆ.
ಬಘೀರ ಸಿನಿಮಾದ ಕಥೆ
ಇದು ಸೂಪರ್‌ ಹೀರೋ ಕಥೆ ಹೊಂದಿದೆ. ವೇದಾಂತ ಎಂಬ ಬಾಲಕ ಸೂಪರ್‌ಹೀರೋ ಆಗಬೇಕೆಂದು ಕನಸು ಕಾಣುತ್ತಾನೆ. ಐಪಿಎಸ್‌ ಪಾಸ್‌ ಮಾಡಿ ಪೊಲೀಸ್‌ ಆಗುತ್ತಾನೆ. ಖಾಕಿ ಹಾಕಿ ಹೀರೋನಂತೆ ಇರಲು ವ್ಯವಸ್ಥೆ ಬಿಡುವುದಿಲ್ಲ. ಹೀಗಾಗಿ ಮುಖವಾಡ ಹಾಕಿ ಸೂಪರ್‌ಹೀರೋ ಆಗಿ ಶತ್ರುಗಳನ್ನು ಸದೆ ಬಡಿಯುತ್ತಾನೆ. ಖಾಕಿ ಉಡುಗೆಯಲ್ಲಿರುವ ನಾಯಕ, ಬಘೀರ ಅವತಾರದಲ್ಲಿ ಶತ್ರುಗಳ ಸದೆ ಬಡಿಯುತ್ತಾನೆ.
