ಮಾರ್ಟಿನ್‌ ಭಾಗ 2 ಯಾವಾಗ ರಿಲೀಸ್‌? ಅಭಿಮಾನಿಗಳ ಆಸೆಗೆ ನಿರ್ದೇಶಕ ಎಪಿ ಅರ್ಜುನ್ ಹೇಳಿದ್ದೇನು?
ಧ್ರುವಸರ್ಜಾ ಅಭಿನಯದ ಮಾರ್ಟಿನ್‌ ಚಿತ್ರವನ್ನು ಸಿನಿಪ್ರಿಯರು ಅಪ್ಪಿ ಒಪ್ಪಿಕೊಂಡಿದ್ದಾರೆ. ಕರ್ನಾಟಕ ಮಾತ್ರವಲ್ಲದೆ ಆಂಧ್ರ ಪ್ರದೇಶದಿಂದಲೂ ಚಿತ್ರಕ್ಕೆ ಒಳ್ಳೆ ಪ್ರತಿಕ್ರಿಯೆ ಬಂದಿದೆ. ಇದರ ಬಗ್ಗೆ ನಿರ್ದೇಶಕ ಎಪಿ ಅರ್ಜುನ್ ಸಂತೋಷ ವ್ಯಕ್ತಪಡಿಸಿದ್ದಾರೆ. ಮಾರ್ಟಿನ್‌ 2 ಬಗ್ಗೆ ಕೂಡಾ ಮಾತನಾಡಿದ್ದಾರೆ.
ಧ್ರುವ ಸರ್ಜಾ ಬಹುನಿರೀಕ್ಷಿತ ಪ್ಯಾನ್‌ ಇಂಡಿಯಾ ಸಿನಿಮಾ ಮಾರ್ಟಿನ್‌ ತೆರೆ ಕಂಡಿದೆ. ಸಿನಿಮಾಭಿಮಾನಿಗಳು ಚಿತ್ರವನ್ನು ಅದ್ದೂರಿಯಾಗಿ ಬರಮಾಡಿಕೊಂಡಿದ್ದಾರೆ. ಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆ ಕೂಡಾ ದೊರೆಯುತ್ತಿದೆ. ಈ ಸಿನಿಮಾ ಮತ್ತೊಂದು ಕೆಜಿಎಫ್‌ ಆಗೋದ್ರಲ್ಲಿ ನೋ ಡೌಟ್‌. ಇದು ಧ್ರುವ ಕರಿಯರ್‌ನಲ್ಲೇ ಅತ್ಯದ್ಭುತ ಸಿನಿಮಾ ಆಗೋದು ಪಕ್ಕಾ ಅಂತ ಸಿನಿಮಾ ನೋಡಿದವರು ಹೇಳ್ತಿದ್ದಾರೆ.
ಮಾರ್ಟಿನ್‌ಗೆ ಅಭಿಮಾನಿಗಳಿಂದ ಗ್ರ್ಯಾಂಡ್‌ ವೆಲ್ಕಮ್
ಜನರು ಸಿನಿಮಾಗೆ ಗ್ರ್ಯಾಂಡ್‌ ವೆಲ್ಕಮ್ ನೀಡಿದ್ದಕ್ಕೆ ಶುಕ್ರವಾರ ಧ್ರುವ ಸರ್ಜಾ ಸಂತೋಷ ವ್ಯಕ್ತಪಡಿಸಿದ್ದರು. ನಾನು ಅಭಿಮಾನಿಗಳನ್ನೇ ನಂಬಿದ್ದೇನೆ, ಅವರೇ ನಮ್ಮ ಚಿತ್ರವನ್ನು ಗೆಲ್ಲಿಸಬೇಕು ಎಂದಿದ್ದರು. ನಂತರ ನರ್ತಕಿ ಥಿಯೇಟರ್‌ಗೆ ಭೇಟಿ ನೀಡಿ, ಕಿಕ್ಕಿರಿದು ನೆರೆದಿದ್ದ ಅಭಿಮಾನಿಗಳ ಮುಂದೆ ಒಂದೆರಡು ಸ್ಟೆಪ್‌ ಹಾಕಿ, ಕೈ ಮುಗಿದು ಧನ್ಯವಾದ ಅರ್ಪಿಸಿದ್ದರು. ಇದೀಗ ನಿರ್ದೇಶಕ ಎಪಿ ಅರ್ಜುನ್ ಕೂಡಾ ಚಿತ್ರಕ್ಕೆ ಅಭಿಮಾನಿಗಳಿಂದ ದೊರೆತ ರೆಸ್ಪಾನ್ಸ್‌ ಬಗ್ಗೆ ಖುಷಿಯಿಂದ ಮಾತನಾಡಿದ್ದಾರೆ.
ನನಗೆ ಆಗುತ್ತಿರುವ ಖುಷಿಯನ್ನು ಹೇಳಿಕೊಳ್ಳಲಾಗುತ್ತಿಲ್ಲ ಎಂದ ಎಪಿ ಅರ್ಜುನ್
ಜನರು ನಮ್ಮ ಚಿತ್ರವನ್ನು ಪ್ರೀತಿಯಿಂದ ಬರಮಾಡಿಕೊಂಡಿದ್ದಾರೆ. ಆಯುಧಪೂಜೆ ದಿನವೇ ನಮಗೆ ಗೆಲುಗು ತಂದುಕೊಟ್ಟಿದ್ದಾರೆ. ಆಂಧ್ರದಲ್ಲಿ ಚಿತ್ರವನ್ನು ಕೊಂಡಾಡಿದ್ದಾರೆ. ಅಲ್ಲಿ ಇಷ್ಟು ಒಳ್ಳೆ ರೆಸ್ಪಾನ್ಸ್‌ ದೊರೆಯುತ್ತದೆ ಎಂದು ನಾನು ಕನಸಿನಲ್ಲಿಯೂ ಅಂದುಕೊಂಡಿರಲಿಲ್ಲ. ಮನಸ್ತಾಪ ಎಲ್ಲಾ ಹಳೆಯ ಮಾತು, ಈಗ ಸಿನಿಮಾ ರಿಲೀಸ್‌ ಆಗಿದೆ ಅಷ್ಟೇ. ಎಲ್ಲಾ ಕಡೆ ಹೌಸ್‌ಫುಲ್‌ ಆಗಿದೆ, ಕರ್ನಾಟಕ, ಹೈದರಾಬಾದ್‌ನಲ್ಲಂತೂ ಎಕ್ಸ್ಟ್ರಾರ್ಡಿನರಿ ರಿಪೋರ್ಟ್‌ ಬಂದಿದೆ. ತಮಿಳುನಾಡಿನಲ್ಲೂ ಜನರು ಚಿತ್ರದ ಬಗ್ಗೆ ಒಳ್ಳೆ ಮಾತನಾಡಿದ್ದಾರೆ. ಜಪಾನ್‌ , ಕೊರಿಯಾದಲ್ಲಿ ಮುಂದಿನ ವಾರ ರಿಲೀಸ್‌ ಆಗುತ್ತಿದೆ. ನಾನು ಕೊಟ್ಟಿರೋ ದುಡ್ಡು ಮೊದಲ 20 ನಿಮಿಷದ ಫೈಟ್‌ಗೆ ಸರಿ ಆಯ್ತು ಎಂದು ಹಲವರು ಮಾತನಾಡಿಕೊಂಡಿದ್ದನ್ನು ಕೇಳಿದ್ದೇನೆ. ಇದೆಲ್ಲವನ್ನೂ ಕೇಳುತ್ತಿದ್ದರೆ ಬಹಳ ಖುಷಿಯಾಗುತ್ತಿದೆ. ನನಗೆ ಆಗುತ್ತಿರುವ ಖುಷಿಯನ್ನು ಎಕ್ಸ್‌ಪ್ರೆಸ್‌ ಮಾಡಲು ಆಗ್ತಿಲ್ಲ.
ಮಾರ್ಟಿನ್‌ 2 ಬಗ್ಗೆ ಶೀಘ್ರದಲ್ಲೇ ಅಪ್‌ಡೇಟ್‌ ನೀಡಲಿದ್ದೇವೆ
ಇಂದು ಕರ್ನಾಟಕದಲ್ಲಿ 1700 ಶೋ ಆಗಿದೆ. ಎಪಿ ಅರ್ಜುನ್, ಧ್ರುವ ಕಾಂಬಿನೇಷನ್‌ ಹೇಗಿರುತ್ತೆ ಅಂತ ಕರ್ನಾಟಕ ಜನರಿಗೆ ಗೊತ್ತು. ಆದರೆ ಹೊರ ರಾಜ್ಯದವರಿಗೆ ಗೊತ್ತಿಲ್ಲ. ಅವರಿಂದ ಏನು ಪ್ರತಿಕ್ರಿಯೆ ಬರುತ್ತೆ ಅಂತ ತಿಳಿಯಲು ಮೊದಲು ಅಲ್ಲಿಗೆ ನಾವು ಪೇಯ್ಡ್‌ ಪ್ರೀಮಿಯರ್‌ ಕೊಟ್ಟಿದ್ದೆವು ಅದನ್ನು ಹೊರತುಪಡಿಸಿ ಬೇರೆ ಉದ್ದೇಶ ಇಲ್ಲ ಎಂದು ಅರ್ಜುನ್ ಮಾತನಾಡಿದ್ದಾರೆ. ಮಾರ್ಟಿನ್‌ ಭಾಗ 2 ಬಗ್ಗೆ ಪ್ರತಿಕ್ರಿಯಿಸಿದ ನಿರ್ದೇಶಕ ಅರ್ಜುನ್, ಧ್ರುವ ಸರ್ಜಾ ಬೇರೆ ಬೇರೆ ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದಾರೆ. ಅದೆಲ್ಲವನ್ನೂ ನೋಡಿಕೊಂಡು ಸೀಕ್ವೆಲ್‌ ಬರುತ್ತಾ ಇಲ್ಲವೋ ಅನ್ನೋದನ್ನು ನಿರ್ಧರಿಸುತ್ತೇವೆ ಎಂದು ಅರ್ಜುನ್ ಹೇಳಿದ್ದಾರೆ.
ಉದಯ್‌ ಕೆ ಮೆಹ್ತಾ ನಿರ್ಮಾಣದ ಚಿತ್ರ
ವಾಸವಿ ಎಂಟರ್‌ಪ್ರೈಸಸ್‌, ಉದಯ್‌ ಕೆ ಮೆಹ್ತಾ ಪ್ರೊಡಕ್ಷನ್ಸ್‌ ಬ್ಯಾನರ್‌ ಅಡಿ ಉದಯ್‌ ಕೆ ಮೆಹ್ತಾ ಮಾರ್ಟಿನ್‌ ಚಿತ್ರವನ್ನು ನಿರ್ಮಾಣ ಮಾಡಿದ್ದಾರೆ. ಚಿತ್ರದ ಹಾಡುಗಳಿಗೆ ಮಣಿ ಶರ್ಮಾ ಸಂಗೀತ ನೀಡಿದ್ದು, ರವಿ ಬಸ್ರೂರ್‌ ಹಿನ್ನೆಲೆ ಸಂಗೀತ ನೀಡಿದ್ದಾರೆ. 150 ಕೋಟಿ ರೂ. ಬಜೆಟ್‌ನಲ್ಲಿ ಸಿನಿಮಾ ತಯಾರಾಗಿದೆ. ಧ್ರುವ ಸರ್ಜಾಗೆ ವೈಭವಿ ಶಾಂಡಿಲ್ಯ ನಾಯಕಿಯಾಗಿ ನಟಿಸಿದ್ದಾರೆ. ಅನ್ಷೇಷಿ ಜೈನ್‌ ಹಾಡೊಂದರಲ್ಲಿ ಕುಣಿದಿದ್ದಾರೆ. ಸುಕ್ರುತಾ ವಾಘ್ಲೆ , ಚಿಕ್ಕಣ್ಣ, ಸಾಧು ಕೋಕಿಲ , ಮಾಳವಿಕಾ ಅವಿನಾಶ್‌, ಅಚ್ಯುತ್‌ ಕುಮಾರ್ ಹಾಗೂ ಇನ್ನಿತರರು ಚಿತ್ರದಲ್ಲಿ ನಟಿಸಿದ್ದಾರೆ.
