ಹೊಸ ಸಿನಿಮಾ ಅನೌನ್ಸ್‌ ಮಾಡಿದ ಹೊಂಬಾಳೆ ಫಿಲ್ಮ್ಸ್‌; ಮತ್ತೆ ಪ್ರಭಾಸ್‌ ಜೊತೆಯಾಗ್ತಿದ್ದಾರಾ ವಿಜಯ್‌ ಕಿರಗಂದೂರು?
ವಿಜಯ್‌ ಕಿರಗಂದೂರು ಒಡೆತನದ ಹೊಂಬಾಳೆ ಫಿಲ್ಮ್ಸ್‌ ಹೊಸ ಸಿನಿಮಾ ಘೋಷಿಸಿದೆ. ಜೊತೆಗೆ ಪೋಸ್ಟರ್‌ ಒಂದನ್ನು ಹಂಚಿಕೊಂಡಿದೆ. ಶನಿವಾರ ಮಧ್ಯಾಹ್ನ 3:33ಕ್ಕೆ ಚಿತ್ರದ ಫಸ್ಟ್‌ಲುಕ್‌ ಬಿಡುಗಡೆ ಮಾಡುವುದಾಗಿ ಹೇಳಿಕೊಂಡಿದೆ. ಬಹುಶ: ಇದು ಪ್ರಭಾಸ್‌ ಹೊಸ ಸಿನಿಮಾ ಇರಬಹುದು ಎನ್ನಲಾಗುತ್ತಿದೆ.
ಕನ್ನಡ ಚಿತ್ರರಂಗಕ್ಕೆ ಅನೇಕ ಬ್ಲಾಕ್‌ ಬಸ್ಟರ್‌ ಸಿನಿಮಾಗಳನ್ನು ನೀಡಿರುವ ವಿಜಯ್‌ ಕಿರಗಂದೂರು ಒಡೆತನದ ಹೊಂಬಾಳೆ ಫಿಲ್ಮ್ಸ್‌ , ಹೊಸ ಸಿನಿಮಾವನ್ನು ಅನೌನ್ಸ್‌ ಮಾಡಿದೆ. ಹೊಂಬಾಳೆ ಫಿಲ್ಮ್ಸ್‌ ತನ್ನ ಅಧಿಕೃತ ಸೋಷಿಯಲ್‌ ಮೀಡಿಯಾ ಖಾತೆಯಲ್ಲಿ ಶುಕ್ರವಾರ ಈ ವಿಚಾರವನ್ನು ರಿವೀಲ್‌ ಮಾಡಿದ್ದು ಸಂಸ್ಥೆ ಹಂಚಿಕೊಂಡಿರುವ ಪೋಸ್ಟರ್‌ ಕುತೂಹಲ ಕೆರಳಿಸಿದೆ.
ನವೆಂಬರ್‌ 16ಕ್ಕೆ ಫಸ್ಟ್‌ ಲುಕ್‌ ರಿಲೀಸ್
ಹೊಂಬಾಳೆ ಫಿಲ್ಮ್ಸ್‌ ಹಂಚಿಕೊಂಡಿರುವ ಪೋಸ್ಟರ್‌ನಲ್ಲಿ ಹನುಮಂತನ ಕೈಗಳನ್ನು ತೋರಿಸಲಾಗಿದೆ. ಮಣಿಕಟ್ಟಿನಲ್ಲಿ ಕೆಂಪು ಮಣಿ ಇರುವ ದೊಡ್ಡ ಬಳೆ ಇದೆ. ಉದ್ದ ಉಗುರುಗಳನ್ನು ತೋರಿಸಲಾಗಿದೆ. ನಂಬಿಕೆಗೆ ಸವಾಲು ಎದುರಾದಾಗ ಅವನು ಪ್ರತ್ಯಕ್ಷನಾಗುತ್ತಾನೆ ಎಂದು ಪೋಸ್ಟರ್‌ನಲ್ಲಿ ಬರೆಯಲಾಗಿದೆ. ಜೊತೆಗೆ ನವೆಂಬರ್‌ 16 ಮಧ್ಯಾಹ್ನ 3:33ಕ್ಕೆ ಫಸ್ಟ್‌ ಲುಕ್‌ ರಿಲೀಸ್ ಮಾಡಲಾಗುವುದು ಎಂದು ತಿಳಿಸಲಾಗಿದೆ. ಅಶ್ವಿನ್‌ ಕುಮಾರ್ ಈ ಚಿತ್ರವನ್ನು ನಿರ್ದೇಶನ ಮಾಡುತ್ತಿದ್ದು ಸಿನಿಮಾ ಹಿಂದಿ, ಕನ್ನಡ, ತೆಲುಗು, ತಮಿಳು ಹಾಗೂ ಮಲಯಾಳಂ ಭಾಷೆಗಳಲ್ಲಿ ತಯಾರಾಗುತ್ತಿದೆ. ಈ ಪೋಸ್ಟರ್‌ ನೋಡುತ್ತಿದ್ದರೆ ಹೊಂಬಾಳೆ ಫಿಲ್ಮ್ಸ್‌ ಮತ್ತೆ ಪ್ರಭಾಸ್‌ ಜೊತೆ ಸಿನಿಮಾ ಮಾಡಲಿದ್ಯಾ ಎಂಬ ಕುತೂಹಲ ಶುರುವಾಗಿದೆ.
ಪ್ರಭಾಸ್‌ ಜೊತೆ 3 ಹೊಸ ಸಿನಿಮಾಗಳು
ಇತ್ತೀಚೆಗೆ ವಿಜಯ್‌ ಕಿರಗಂದೂರು ಪ್ರಭಾಸ್‌ ಜೊತೆ 3 ಹೊಸ ಸಿನಿಮಾಗಳನ್ನು ಅನೌನ್ಸ್‌ ಮಾಡಿತ್ತು. ಈಗ ಘೋಷಣೆ ಮಾಡಿರುವುದು ಈಗಾಗಲೇ ತಿಳಿಸಿರುವ ಮೂರು ಸಿನಿಮಾಗಳಲ್ಲಿ ಒಂದಾಗಿದ್ದು, ಅದರಲ್ಲಿ ಪ್ರಭಾಸ್‌ ಹನುಮಂತನ ಪಾತ್ರ ಮಾಡುತ್ತಿರಬಹುದಾ ಎಂಬ ಕುತೂಹಲ ಹೆಚ್ಚಾಗುತ್ತಿದೆ. ಅಥವಾ ಇದು ಹೊಸ ಸಿನಿಮಾ ಇರಬಹುದಾ ಅನ್ನೋದು ಇಂದು ಮಧ್ಯಾಹ್ನ ಪೋಸ್ಟರ್‌ ರಿಲೀಸ್ ಆದ ನಂತರ ತಿಳಿಯಲಿದೆ. ಪೋಸ್ಟರ್‌ ನೋಡಿ ನೆಟ್ಟಿಗರು ನಾನಾ ಕಾಮೆಂಟ್‌ ಮಾಡುತ್ತಿದ್ದಾರೆ. ಅದು ಹನುಮಂತನ ಪಾತ್ರ ಅಲ್ಲ, ಉಗ್ರನರಸಿಂಹ ಭಕ್ತ ಪ್ರಹ್ಲಾದನ ಭಕ್ತಿಗೆ ಮೆಚ್ಚಿ ಕಂಬದಿಂದ ಹೊರ ಬರುತ್ತಾನೆ. ಬಹುಶ: ಇದು ಅದೇ ಸಿನಿಮಾ ಇರಬಹುದು ಎನ್ನುತ್ತಿದ್ದಾರೆ. ಒಟ್ಟಿನಲ್ಲಿ ಇಂದು ರಿಲೀಸ್ ಆಗುತ್ತಿರುವ ಪೋಸ್ಟರ್‌ ನೋಡಲು, ಹೀರೋ ಯಾರೆಂದು ತಿಳಿಯಲು ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ.
2012ರಲ್ಲಿ ಆರಂಭವಾದ ಹೊಂಬಾಳೆ ಫಿಲ್ಮ್ಸ್‌
2012ರಲ್ಲಿ ವಿಜಯ್‌ ಕಿರಗಂದೂರು ಹಾಗೂ ಚೆಲುವೆಗೌಡ ಜೊತೆ ಸೇರಿ ಹೊಂಬಾಳೆ ಫಿಲ್ಮ್ಸ್‌ ಆರಂಭಿಸಿದರು. 2014ರಲ್ಲಿ ಮೊದಲ ಬಾರಿಗೆ ನಿನ್ನಿಂದಲೇ ಸಿನಿಮಾ ಮಾಡಿದರು. ಈ ಚಿತ್ರದಲ್ಲಿ ಪುನೀತ್‌ ರಾಜ್‌ಕುಮಾರ್‌, ಎರಿಕಾ ಫರ್ನಾಂಡಿಸ್‌ ಜೊತೆಯಾಗಿ ನಟಿಸಿದ್ದರು. ಇದುವರೆಗೂ ಮಾಸ್ಟರ್‌ ಪೀಸ್‌, ರಾಜಕುಮಾರ್‌, ಕೆಜಿಎಫ್‌ , ಕೆಜಿಎಫ್‌ 2, ಯುವರತ್ನ, ಕಾಂತಾರ, ರಾಘವೇಂದ್ರ ಸ್ಟೋರ್ಸ್‌, ಧೂಮಂ, ಸಲಾರ್‌, ಯುವ, ರಘುತಾತ, ಬಘೀರ ಸಿನಿಮಾಗಳು ಈ ಸಂಸ್ಥೆ ಮೂಲಕ ತಯಾರಾಗಿವೆ. ಸದ್ಯಕ್ಕೆ ಕಾಂತಾರ ಪ್ರೀಕ್ವೆಲ್‌ ಚಿತ್ರೀಕರಣ ನಡೆಯುತ್ತಿದೆ. ಕನ್ನಡದ ಜೊತೆಗೆ ಹಿಂದಿ, ತೆಲುಗು, ತಮಿಳು , ಮಲಯಾಳಂ ಭಾಷೆಗಳಲ್ಲಿ ಹೊಂಬಾಳೆ ಸಂಸ್ಥೆಯಿಂದ ಸಿನಿಮಾ ನಿರ್ಮಾಣವಾಗಿದೆ.
