ಭೈರತಿ ರಣಗಲ್ ಹೊಸ ಟೀಸರ್ ರಿಲೀಸ್; ಡೈಲಾಗ್‌ ಹೇಳದೆ ಆಕ್ಷನ್‌ನಿಂದಲೇ ಅಬ್ಬರಿಸಿದ ಕರುನಾಡ ಚಕ್ರವರ್ತಿ ಶಿವರಾಜ್ಕುಮಾರ್
ಮಫ್ತಿ ಖ್ಯಾತಿಯ ನರ್ತನ್‌ ನಿರ್ದೇಶನದ ಭೈರತಿ ರಣಗಲ್ ಸಿನಿಮಾ 2ನೇ ಟೀಸರ್ ರಿಲೀಸ್ ಆಗಿದೆ. ಚಿತ್ರದಲ್ಲಿ ಕರುನಾಡ ಚಕ್ರವರ್ತಿ ಶಿವರಾಜ್ಕುಮಾರ್ ಮಾಸ್‌ ಅವತಾರ ತಾಳಿದ್ದಾರೆ. ಚಿತ್ರವನ್ನು ಶಿವಣ್ಣ ಪತ್ನಿ ಗೀತಾ ಶಿವರಾಜ್ಕುಮಾರ್ ನಿರ್ಮಾಣ ಮಾಡಿದ್ದಾರೆ. ಸಿನಿಮಾ ನವೆಂಬರ್‌ 15ರಂದು ತೆರೆ ಕಾಣುತ್ತಿದೆ.
ಹ್ಯಾಟ್ರಿಕ್‌ ಹೀರೋ ಶಿವರಾಜ್ಕುಮಾರ್ ನಟನೆಯ ಭೈರತಿ ರಣಗಲ್ ಚಿತ್ರದ 2ನೇ ಟೀಸರ್ ರಿಲೀಸ್ ಆಗಿದೆ. ಚಿತ್ರತಂಡ ನಿನ್ನೆ ಸಂಜೆ ಹೊಸ ಟೀಸರ್ ಹಂಚಿಕೊಂಡಿದೆ. 3 ತಿಂಗಳ ಹಿಂದೆ ಮೊದಲ ಟೀಸರ್ ರಿಲೀಸ್ ಆಗಿತ್ತು. ಈಗ ಬಿಡುಗಡೆ ಆಗಿರುವ ಹೊಸ ಟೀಸರ್ ಇಂಟರ್‌ನೆಟ್‌ನಲ್ಲಿ ಕಿಚ್ಚು ಹೊತ್ತಿಸಿದೆ.
ಲಾಂಗ್‌ ಹಿಡಿದ ಲಾಯರ್‌ ಭೈರತಿ ರಣಗಲ್
1:09 ನಿಮಿಷದ ಟೀಸರ್‌ನಲ್ಲಿ ಒಂದೂ ಡೈಲಾಗ್‌ ಇಲ್ಲ, ಆದರೆ ಆಕ್ಷನ್‌ ಒಂದೇ ಎಲ್ಲದಕ್ಕೂ ಉತ್ತರ ನೀಡುತ್ತಿದೆ. ಟೀಸರ್‌ನಲ್ಲಿ ಶಿವಣ್ಣ ಲಾಂಗ್‌ ಹಿಡಿದು ಆರ್ಭಟಿಸಿದ್ದಾರೆ. ಜನರಿಗೆ ನ್ಯಾಯ ಕೊಡಿಸುವ ಲಾಯರ್‌ ಆಗಿ, ದುಷ್ಟರನ್ನು ಶಿಕ್ಷಿಸುವ ನಾಯಕನಾಗಿ ಕಾಣಿಸಿಕೊಂಡಿದ್ದಾರೆ. ಜನರ ನೋವು, ರಾಜಕೀಯ, ಕಷ್ಟದಲ್ಲಿರುವವರಿಗೆ ಭೈರತಿ ರಣಗಲ್ ಮಿಡಿಯುವ ದೃಶ್ಯ, ಮಾಫಿಯಾ, ಆಕ್ಷನ್‌ ಎಲ್ಲವೂ ಈ ಟೀಸರ್‌ನಲ್ಲಿದೆ. ಟೀಸರ್ ನೋಡಿದವರು ಮತ್ತೆ ತೆರೆ ಮೇಲೆ ಶಿವಣ್ಣನ ಆಕ್ಷನ್‌ ನೋಡಲು ಕಾಯುತ್ತಿದ್ದಾರೆ. ಆನಂದ್‌ ಆಡಿಯೋ ಯೂಟ್ಯೂಬ್‌ ಮೂಲಕ ಭೈರತಿ ರಣಗಲ್ ಟೀಸರ್ ರಿಲೀಸ್ ಆಗಿದೆ. ಒಂದು ರಾತ್ರಿಯಲ್ಲೇ 5 ಲಕ್ಷಕ್ಕೂ ಹೆಚ್ಚು ಜನ ಟೀಸರ್ ನೋಡಿ ಇಷ್ಟಪಟ್ಟಿದ್ದಾರೆ.
ಸಿನಿಮಾಗಾಗಿ ಎದುರು ನೋಡುತ್ತಿರುವ ಅಭಿಮಾನಿಗಳು
ನಮ್ಮ ಅಪ್ಪನ ಕಾಲದಲ್ಲೂ ಶಿವಣ್ಣನೆ ಹೀರೋ ನಮ್ಮ ಕಾಲದಲ್ಲೂ ಶಿವಣ್ಣನೆ ಹೀರೋ, ಒಂದೊಳ್ಳೆ ಸಿನಿಮಾ ನೀಡುವುದರಲ್ಲಿ ನಮ್ಮ ಶಿವಣ್ಣ ನಂಬರ್ 1, ಈ ಸಿನಿಮಾ ಬ್ಲಾಕ್‌ ಬಸ್ಟರ್‌ ಆಗೋದು ಪಕ್ಕಾ, ಭೈರತಿ ರಣಗಲ್ ಚಿತ್ರವನ್ನು ಫಸ್ಟ್‌ ಡೇ ಫಸ್ಟ್‌ ಶೋ ನೋಡೋದು ಪಕ್ಕಾ ಎಂದೆಲ್ಲಾ ಅಭಿಮಾನಿಗಳು ಕಾಮೆಂಟ್‌ ಮಾಡುತ್ತಿದ್ದಾರೆ. 2017ರಲ್ಲಿ ತೆರೆ ಕಂಡಿದ್ದ ಮಫ್ತಿ ಚಿತ್ರದಲ್ಲಿ ಶಿವರಾಜ್ಕುಮಾರ್ ಭೈರತಿ ರಣಗಲ್ ಪಾತ್ರದಲ್ಲಿ ನಟಿಸಿದ್ದರು. ಈ ಸಿನಿಮಾ ಹಾಗೂ ಪಾತ್ರಕ್ಕೆ ದೊರೆತ ಮನ್ನಣೆಯಿಂದ ನಿರ್ದೇಶಕ ನರ್ತನ್‌ ಭೈರತಿ ರಣಗಲ್ ಹೆಸರಿನಲ್ಲೇ ಸಿನಿಮಾ ಮಾಡಲು ನಿರ್ಧರಿಸಿ ಈಗ ಚಿತ್ರವನ್ನು ಪ್ರೇಕ್ಷಕರ ಮುಂದೆ ಇಡಲು ಹೊರಟಿದ್ದಾರೆ. ಮಫ್ತಿ ಚಿತ್ರದಲ್ಲಿ ಶಿವಣ್ಣ ಧರಿಸಿದ್ದ ಕಾಸ್ಟ್ಯೂಮ್‌ ಇಲ್ಲೂ ಮುಂದುವರೆದಿದೆ.
ನವೆಂಬರ್‌ 15ಕ್ಕೆ ಭೈರತಿ ರಣಗಲ್ ರಿಲೀಸ್
ಭೈರತಿ ರಣಗಲ್ ಚಿತ್ರವನ್ನು ಗೀತಾ ಪಿಕ್ಚರ್ಸ್‌ ಬ್ಯಾನರ್‌ ಅಡಿಯಲ್ಲಿ ಶಿವಣ್ಣ ಪತ್ರಿ ಗೀತಾ ಶಿವರಾಜ್ಕುಮಾರ್ ನಿರ್ಮಾಣ ಮಾಡಿದ್ದಾರೆ. ಮಫ್ತಿ ಚಿತ್ರವನ್ನು ನಿರ್ದೇಶಿಸಿದ್ದ ನರ್ತನ್‌, ಈ ಚಿತ್ರಕ್ಕೆ ಕಥೆ ಬರೆದು ನಿರ್ದೇಶನ ಮಾಡಿದ್ದಾರೆ. ಚಿತ್ರದ ಹಾಡುಗಳಿಗೆ ರವಿ ಬಸ್ರೂರ್‌ ಸಂಗೀತ ನೀಡಿದ್ದಾರೆ. ಚಿತ್ರದಲ್ಲಿ ಶಿವರಾಜ್ಕುಮಾರ್, ಶ್ರೀಮುರಳಿ, ರುಕ್ಮಿಣಿ ವಸಂತ್‌, ರಾಹುಲ್‌ ಬೋಸ್‌, ನಾನಾ ಪಾಟೇಕರ್‌, ಯೋಗಿಬಾಬು, ಛಾಯಾಸಿಂಗ್‌, ದೇವರಾಜ್‌, ವಸಿಷ್ಠ ಸಿಂಹ ಹಾಗೂ ಇನ್ನಿತರರು ನಟಿಸಿದ್ದಾರೆ. ಸಿನಿಮಾ ನವೆಂಬರ್‌ 15ಕ್ಕೆ ತೆರೆ ಕಾಣುತ್ತಿದೆ.
