Shankar Nag Birthday: ತೆರೆಮೇಲೆ ಮತ್ತೆ ಶಂಕರ್‌ನಾಗ್‌ ‘ಸಾಂಗ್ಲಿಯಾನ 2​’!; ಬಿಡುಗಡೆಯ ದಿನಾಂಕ ಹೀಗಿದೆ..

ದಶಕಗಳ ಹಿಂದೆ ತೆರೆಕಂಡ ಸಿನಿಮಾಗಳು ಹೊಸ ರೂಪಪಡೆದುಕೊಂಡು ಬಿಡುಗಡೆ ಆದ ಉದಾಹರಣೆಗಳು ಸಾಕಷ್ಟಿವೆ. ಡಾ. ರಾಜ್‌, ವಿಷ್ಣುವರ್ಧನ್‌ ಸೇರಿ ಹಲವು ನಟರ ಎಪಿಕ್‌ ಸಿನಿಮಾಗಳು ಬೆಳ್ಳಿತೆರೆ ಮೇಲೆ ಮತ್ತೆ ಅಬ್ಬರಿಸಿವೆ. ದೊಡ್ಡ ಮಟ್ಟದ ಹೈಪ್‌ ಸೃಷ್ಟಿಸಿ ಒಳ್ಳೆ ಕಲೆಕ್ಷನ್‌ ಸಹ ಮಾಡಿವೆ. ಇದೀಗ ಶಂಕರ್‌ನಾಗ್‌ ನಟಿಸಿದ ಸಿನಿಮಾ ಸಹ ಮರು ಬಿಡುಗಡೆ ಆಗುತ್ತಿದೆ.

ಇಂದು (ನ. 9) ಶಂಕರ್‌ನಾಗ್‌ ಅವರ ಜನ್ಮದಿನ. ಕನ್ನಡ ಸಿನಿಮಾರಂಗದ ಬಗ್ಗೆ 30 ವರ್ಷಗಳ ಹಿಂದೆಯೇ ದೊಡ್ಡ ಕನಸು ಕಂಡಿದ್ದ ಈ ನಟ, ಒಂದು ವೇಳೆ ಈಗ ಇದ್ದಿದ್ದರೆ ಅವರಿಗೆ 68 ವರ್ಷ ತುಂಬುತ್ತಿತ್ತು. ಇದೀಗ ಅವರ ಬರ್ತ್‌ಡೇ ಸಂದರ್ಭದಲ್ಲಿ ಅವರ ನೆನಪನ್ನು ಮತ್ತಷ್ಟು ಗಾಢವಾಗಿಸಲು ಅವರ ಸಿನಿಮಾ ಬಿಡುಗಡೆ ಮಾಡಲಾಗುತ್ತಿದೆ.

ಶಂಕರ್ ನಾಗ್ ಪೊಲೀಸ್ ಅಧಿಕಾರಿಯಾಗಿ ಅಭಿನಯಿಸಿದ್ದ ಸೂಪರ್ ಹಿಟ್ ಸಿನಿಮಾಗಳಲ್ಲಿ ಸಾಂಗ್ಲಿಯಾನ ಸಹ ಒಂದು. ಅದೇ ಚಿತ್ರದ ಸೀಕ್ವೆಲ್‌ ‘ಸಾಂಗ್ಲಿಯಾನ 2​’ ಸಿನಿಮಾ ಇದೀಗ ಮತ್ತೊಮ್ಮೆ ತೆರೆ ಕಾಣುತ್ತಿದೆ. 1990 ರಲ್ಲಿ ಬಿಡುಗಡೆಯಾಗಿದ್ದ ‘ಸಾಂಗ್ಲಿಯಾನ 2​’ ಚಿತ್ರದಲ್ಲಿ ಭವ್ಯಾ ನಾಯಕಿಯಾಗಿ ಅಭಿನಯಿಸಿದ್ದರು. ಇದೇ ಸಿನಿಮಾ ತೆಲುಗಿನಲ್ಲಿ ಡಬ್ ಆಗಿ 'ಪೊಲೀಸ್ ಬೆಲ್ಟ್' ಹೆಸರಿನಲ್ಲಿ ರಿಲೀಸ್ ಆಗಿತ್ತು.

‘ಸಾಂಗ್ಲಿಯಾನ’ ಸಿನಿಮಾ ನಿರ್ದೇಶಿಸಿದ್ದ ಪಿ. ನಂಜುಡಪ್ಪ ಸಾಂಗ್ಲಿಯಾನ ಸಿನಿಮಾದ ಸೀಕ್ವೆಲ್‌ಗೂ ನಿರ್ದೇಶನ ಮಾಡಿದ್ದರು. ದಕ್ಷ ಪೊಲೀಸ್ ಅಧಿಕಾರಿ ಹೆಚ್ ಟಿ ಸಾಂಗ್ಲಿಯಾನ ಅವರ ಜೀವನದ ಕುರಿತ ಸಿನಿಮಾ ಇದಾಗಿದ್ದು, ಸ್ವರ್ಣಗಿರಿ ಮೂವೀಸ್ ಬ್ಯಾನರ್ ಅಡಿಯಲ್ಲಿ ಕೃಷ್ಣರಾಜು ಹಾಗೂ ಸ್ನೇಹಿತರು ನಿರ್ಮಾಣ ಮಾಡಿದ್ದರು. ಇದೀಗ ಕೆ. ಆರ್ ಕಂಬೈನ್ ಹಾಗೂ ಮಾರ್ಸ್ ಡಿಸ್ಟ್ರಿಬ್ಯೂಟರ್ಸ್ ಚಿತ್ರವನ್ನು ರಾಜ್ಯಾದ್ಯಂತ ಬಿಡುಗಡೆ ಮಾಡುತ್ತಿದ್ದಾರೆ.

ಚಿತ್ರದಲ್ಲಿ ಡೈನಾಮಿಕ್ ಹೀರೋ ದೇವರಾಜ್ ವಿಲನ್ ಆಗಿ ಕಾಣಿಸಿಕೊಂಡಿದ್ದು, ಅಶೋಕ್, ಮುಖ್ಯಮಂತ್ರಿ ಚಂದ್ರು, ವಜ್ರಮುನಿ, ಮಾಸ್ಟರ್ ಮಂಜುನಾಥ್ ಸೇರಿ ದೊಡ್ಡ ತಾರಾ ಬಳಗವೇ ಚಿತ್ರದಲ್ಲಿದೆ. ಹಂಸಲೇಖ ಅವರು ಚಿತ್ರಕ್ಕೆ ಸಾಹಿತ್ಯ ಹಾಗೂ ಸಂಗೀತ ನೀಡಿದ್ದು, ಹಾಡುಗಳು ಇಂದಿಗೂ ಸೂಪರ್‌ ಹಿಟ್. ಸಿನಿಮಾ ಮತ್ತೊಮ್ಮೆ ಥಿಯೇಟರ್ ಗಳಲ್ಲಿ ಬಿಡುಗಡೆಯಾಗುತ್ತಿರುವುದು ಅಭಿಮಾನಿಗಳಿಗೆಲ್ಲ ಸಂತಸ ತಂದಿದೆ.