Vivo Y300: ವಾಹ್‌, ಹೊಸ ವಿವೋ ವೈ300 ಬಿಡುಗಡೆ, ಆರಂಭಿಕ ದರ 21,999 ರೂ, ಹೀಗಿದೆ ನೋಡಿ ಈ ಸ್ಮಾರ್ಟ್ಫೋನ್
Vivo Y300: ಸ್ನ್ಯಾಪ್‌ಡ್ರ್ಯಾಗನ್‌ 4 ಜೆನ್‌ 2 ಚಿಪ್‌ಸೆಟ್‌ ಹೊಂದಿರುವ, 5,000 ಎಂಎಎಚ್‌ ಬ್ಯಾಟರಿ ಪ್ಯಾಕ್‌ ಹೊಂದಿರುವ ಹೊಸ ವಿವೋ ವೈ300 ಸ್ಮಾರ್ಟ್ಫೋನ್ ಭಾರತದಲ್ಲಿ ಬಿಡುಗಡೆಯಾಗಿದೆ. ಇದು 128 ಜಿಬಿ ಮತ್ತು 256 ಜಿಬಿ ಸ್ಟೋರೇಜ್‌ ಆಯ್ಕೆಗಳಲ್ಲಿ ಲಭ್ಯ.
Vivo Y300: ಕಳೆದ ತಿಂಗಳು ಭಾರತದಲ್ಲಿ ವಿವೋ ವೈ 300 ಪ್ಲಸ್‌ ಬಿಡುಗಡೆಯಾಗಿತ್ತು. ಇದೀಗ ಈ ಫೋನ್‌ನ ಸ್ಟ್ರ್ಯಾಂಡರ್ಡ್‌ ಆವೃತ್ತಿ ವಿವೋ ವೈ300 5ಜಿ (Vivo Y300 5G) ಬಿಡುಗಡೆಯಾಗಿದೆ. ಸ್ನ್ಯಾಪ್‌ಡ್ರ್ಯಾಗನ್‌ 4 ಜೆನ್‌ 2 ಚಿಪ್‌ಸೆಟ್‌ ಹೊಂದಿರುವ, 5,000 ಎಂಎಎಚ್‌ ಬ್ಯಾಟರಿ ಪ್ಯಾಕ್‌ ಹೊಂದಿರುವ ಸ್ಮಾರ್ಟ್ಫೋನ್ ಇದಾಗಿದೆ. ಇದು 128 ಜಿಬಿ ಮತ್ತು 256 ಜಿಬಿ ಸ್ಟೋರೇಜ್‌ ಆಯ್ಕೆಗಳಲ್ಲಿ ಲಭ್ಯವಿರಲಿದೆ. ಇದರ ಆರಂಭಿಕ ದರ 21,999 ರೂ ಇದೆ. ಈ ಸ್ಮಾರ್ಟ್‌ಫೋನ್‌ನಲ್ಲಿ ಸೋನಿ IMX882 ಮುಖ್ಯಕ್ಯಾಮೆರಾ ಇದೆ. ಇದು ಎಐ ಔರಾ ಲೈಟ್ ಮತ್ತು 2ಎಕ್ಸ್‌ ಪೋಟ್ರೇಯಟ್‌ ಫೀಚರ್‌ ಹೊಂದಿದೆ. ಈ ಫೀಚರ್‌ ನೆರವಿನಿಂದ ಬಳಕೆದಾರರು ಶಾರ್ಪ್‌, ನೈಸರ್ಗಿಕವಾಗಿ, ಸಹಜವಾಗಿ ಕಾಣುವ ಪೋಟ್ರಾಯೆಟ್‌ಗಳನ್ನು ಕ್ಲಿಕ್ಕಿಸಬಹುದು ಎಂದು ವಿವೋ ಹೇಳಿದೆ. ಈ ಸ್ಮಾರ್ಟ್‌ಫೋನ್‌ನಲ್ಲಿ ಸುಧಾರಿತ ಎಐ ಕ್ಯಾಮೆರಾ ಫೀಚರ್‌ಗಳು ಇವೆ. ಅಂದರೆ, ಎಐ ಇರೇಸ್‌, ಎಐ ಫೋಟೋ ಎನ್‌ಹೆನ್ಸ್‌ ಫೀಚರ್‌ಗಳು ಇವೆ. ಈ ಮೂಲಕ ಸುಂದರವಾದ, ಸ್ಪಷ್ಟವಾದ ಫೋಟೋ ಕ್ಲಿಕ್ಕಿಸಬಹುದಾಗಿದೆ.
ವಿವೋ ವೈ300 5ಜಿ: ದರ ಮತ್ತು ಲಭ್ಯತೆ
ಇದು ಮೂರು ಬಣ್ಣಗಳಲ್ಲಿ ಲಭ್ಯವಿರಲಿದೆ. ಅಂದರೆ, ಟೈಟಾನಿಯಂ ಸಿಲ್ವರ್, ಎಮರಾಲ್ಡ್ ಗ್ರೀನ್ ಮತ್ತು ಫ್ಯಾಂಟಮ್ ಪರ್ಪಲ್ ಬಣ್ಣಗಳಲ್ಲಿ ದೊರಕಲಿದೆ. 8GB+128GB ವರ್ಷನ್‌ ದರ 21,999 (ತೆರಿಗೆಗಳನ್ನು ಒಳಗೊಂಡಂತೆ) ರೂಪಾಯಿ ಇದೆ. 8GB + 256GB ವರ್ಷನ್‌ ದರ 23,999 (ತೆರಿಗೆಗಳನ್ನು ಒಳಗೊಂಡಂತೆ) ರೂಪಾಯಿ ಇದೆ.
ಗ್ರಾಹಕರು ನವೆಂಬರ್ 26, 2024ರಿಂದ ವಿವೋ ಇಂಡಿಯಾ ಇ-ಸ್ಟೋರ್, ಫ್ಲಿಪ್‌ಕಾರ್ಟ್, ಅಮೆಜಾನ್ ಮತ್ತು ಎಲ್ಲಾ ಪಾಲುದಾರ ಚಿಲ್ಲರೆ ಅಂಗಡಿಗಳಲ್ಲಿ ಈ ಸ್ಮಾರ್ಟ್ಫೋನ್ ಖರೀದಿಸಬಹುದು. ವಿವೋ ವೈ 300 ಮುಂಗಡ ಬುಕಿಂಗ್ ನವೆಂಬರ್ 21ರಿಂದ ಪ್ರಾರಂಭವಾಗುತ್ತದೆ.
ಈ ಸ್ಮಾರ್ಟ್ಫೋನ್ ಖರೀದಿಗೆ ಹಲವು ಆಫರ್‌ಗಳು ಲಭ್ಯವಿದೆಯಂತೆ. ಎಸ್‌ಬಿಐ ಕಾರ್ಡ್, ಐಡಿಎಫ್‌ಸಿ ಫಸ್ಟ್ ಬ್ಯಾಂಕ್, ಕೋಟಕ್ ಮಹೀಂದ್ರಾ ಬ್ಯಾಂಕ್, ಯೆಸ್ ಬ್ಯಾಂಕ್, ಬಿಒಬಿ ಕಾರ್ಡ್, ಫೆಡರಲ್ ಬ್ಯಾಂಕ್ ಮತ್ತು ಇತರ ಬ್ಯಾಂಕಿಂಗ್ ಪಾಲುದಾರರನ್ನು ಬಳಸಿಕೊಂಡು ಖರೀದಿಸಿದರೆ ಒಂದಿಷ್ಟು ಡಿಸ್ಕೌಂಟ್‌ ದೊರಕಲಿದೆ. ಇವುಗಳ ಮೂಲಕ ಖರೀದಿಸಿದರೆ ತಕ್ಷಣ 2000 ರೂಪಾಯಿ ಕ್ಯಾಶ್‌ಬ್ಯಾಕ್‌ ಅಥವಾ ದಿನಕ್ಕೆ 43 ರೂಪಾಯಿಯ ಇಎಂಐ ಆಫರ್‌ ದೊರಕಲಿದೆ.
ಇಷ್ಟು ಮಾತ್ರವಲ್ಲದೆ ವೈ300 ಜತೆ ವಿವೋ ಟಿಡಬ್ಲ್ಯುಎಸ್‌ 3ಇ ಖರೀದಿಸಿದರೆ, Vivo TWS 3e ನಿಮಗೆ ಕೇವಲ 1499 ರೂಗಳ ರಿಯಾಯಿತಿ ದರದಲ್ಲಿ ದೊರಕಲಿದೆ. ಈ ಆಫರ್‌ ನವೆಂಬರ್ 21 ರಿಂದ ನವೆಂಬರ್ 30, 2024 ರವರೆಗೆ ಮಾತ್ರ ಇರುತ್ತದೆ. ಫ್ಲಿಪ್‌ಕಾರ್ಟ್, ಅಮೆಜಾನ್ ಮತ್ತು ಇನ್-ಸ್ಟೋರ್‌ನಲ್ಲಿ ಮಾತ್ರ ಪಡೆಯಬಹುದು. ಈ ಆಫರ್‌ ವಿವೋ ಇ-ಸ್ಟೋರ್‌ನಲ್ಲಿ ಇರುವುದಿಲ್ಲ.
ಹೇಗಿದೆ ಹೊಸ ವಿವೋ ವೈ300 5ಜಿ?
ಇದು ಹೆಚ್ಚು ಹೊಳೆಯು ಲೋಹದಂತಹ ಚೌಕಟ್ಟಿನೊಂದಿಗೆ ನಯವಾದ ವಿನ್ಯಾಸ ಹೊಂದಿದೆ. ಟೈಟಾನಿಯಂ ಸಿಲ್ವರ್ ಆವೃತ್ತಿಯು ಟೈಟಾನಿಯಂನ ಸಂಸ್ಕರಿಸಿದ ಲುಕ್‌ ಹೊಂದಿದೆ. ಫ್ಲ್ಯಾಷ್‌ಲೈಟ್‌ ಹಾಕಿದಾಗ ಅದು ಬೆರಗುಗೊಳಿಸುವ ವಜ್ರದಂತೆ ಹೊಳೆಯುತ್ತದೆ. ಎಮರಾಲ್ಡ್ ಗ್ರೀನ್ ಮತ್ತು ಫ್ಯಾಂಟಮ್ ಪರ್ಪಲ್ ವಿನ್ಯಾಸ ಕೂಡ ಆಕರ್ಷಕವಾಗಿದೆ.
ಈ ಸ್ಮಾರ್ಟ್ಫೋನ್ 6.67-ಇಂಚಿನ ಅಮೊಲೆಡ್‌ ಪಂಚ್-ಹೋಲ್ ಡಿಸ್‌ಪ್ಲೇ ಹೊಂದಿದೆ. ಇದು 120Hz ರಿಫ್ರೆಶ್ ದರ ಹೊಂದಿದೆ. ಇದು 50-ಮೆಗಾಪಿಕ್ಸೆಲ್ ಸೋನಿ IMX882 ಮುಖ್ಯ ಕ್ಯಾಮೆರಾ ಮತ್ತು 2-ಮೆಗಾಪಿಕ್ಸೆಲ್ ಬೊಕೆ ಕ್ಯಾಮೆರಾವನ್ನು ಒಳಗೊಂಡಿರುವ ಡ್ಯುಯಲ್ ಕ್ಯಾಮೆರಾ ಸೆಟ್-ಅಪ್ ಅನ್ನು ಹೊಂದಿದೆ. ಇದು 2x ಪೋರ್ಟ್ರೇಟ್ ಮೋಡ್, ಎಐ ಔರಾ ಲೈಟ್, ಎಐ ಸೂಪರ್‌ಮೂನ್, ಸೂಪರ್ ನೈಟ್ ಅಲ್ಗಾರಿದಮ್ ಮತ್ತು ಸ್ಟೈಲಿಶ್ ನೈಟ್ ಸೇರಿದಂತೆ ಹಲವು ಫೀಚರ್‌ಗಳನ್ನು ಹೊಂದಿದೆ.
