ಪದಕ ಗೆಲ್ಲುವ ನೆಚ್ಚಿನವರಾಗಿ ಪ್ಯಾರಿಸ್ ಒಲಂಪಿಕ್ಸ್ಗೆ ಅರ್ಹತೆ ಪಡೆಯದ ಭಾರತದ ಸ್ಟಾರ್ ಕ್ರೀಡಾಪಟುಗಳು
Paris Olympics 2024: ಟೋಕಿಯೊ ಒಲಿಂಪಿಕ್ಸ್ನಲ್ಲಿ ಪದಕ ಗೆದ್ದಿದ್ದ ಇಬ್ಬರು ಸೇರಿ ಪ್ರಮುಖ ಕ್ರೀಡಾಪಟುಗಳು ಪ್ಯಾರಿಸ್ ಒಲಿಂಪಿಕ್ಸ್ಗೆ ಅರ್ಹತೆ ಪಡೆಯಲು ವಿಫಲರಾಗಿದ್ದಾರೆ. ಅವರ ಪಟ್ಟಿ ಇಂತಿದೆ.
ಜುಲೈ 26 ರಿಂದ ಪ್ಯಾರಿಸ್ ಒಲಿಂಪಿಕ್ಸ್ ಕ್ರೀಡಾಕೂಟದಲ್ಲಿ ಭಾರತದ ಪರ 117 ಕ್ರೀಡಾಪಟುಗಳು ಪಾಲ್ಗೊಳ್ಳಲಿದ್ದಾರೆ. ಟೊಕಿಯೊ ಒಲಿಂಪಿಕ್ಸ್ನಲ್ಲಿ ಭಾಗವಹಿಸಿದ್ದ ಕ್ರೀಡಾಪಟುಗಳ ಸಂಖ್ಯೆಗಿಂತಲೂ ಈ ಬಾರಿ ಕಡಿಮೆ. ಕಳೆದ ಒಲಿಂಪಿಕ್ಸ್ನಲ್ಲಿ 7 ಮೆಡಲ್ಸ್ ಗೆದ್ದ ಭಾರತ, ಈ ಬಾರಿ ಅದರ ಸಂಖ್ಯೆ ಎರಡಂಕಿ ದಾಟಿಸುವ ಧ್ಯೇಯ ಹೊಂದಿದೆ. ಆದರೆ ಪ್ಯಾರಿಸ್ ಒಲಿಂಪಿಕ್ಸ್ಗೆ ಟಿಕೆಟ್ ಪಡೆಯಲು ವಿಫಲರಾದ ಟಾಪ್-5 ತಾರಾ ಕ್ರೀಡಾಪಟುಗಳು ಯಾರು ಎಂಬುದನ್ನು ಈ ಮುಂದೆ ನೋಡಿ.
ಕಿಡಂಬಿ ಶ್ರೀಕಾಂತ್: ವಿಶ್ವದ ಮಾಜಿ ನಂಬರ್ 1 ಬ್ಯಾಡ್ಮಿಂಟನ್ ಆಟಗಾರ ಕಿಡಂಬಿ ಶ್ರೀಕಾಂತ್ ಸತತ 2ನೇ ಬಾರಿಗೆ ಒಲಿಂಪಿಕ್ಸ್ಗೆ ಅರ್ಹತೆ ಪಡೆಯಲು ವಿಫಲರಾಗಿದ್ದಾರೆ. ಶ್ರೀಕಾಂತ್ ಕಳೆದ ಆಲ್ ಇಂಗ್ಲೆಂಡ್ ಓಪನ್ ಸೇರಿದಂತೆ 11 ಬಿಡಬ್ಲ್ಯೂಎಫ್ ವರ್ಲ್ಡ್ ಟೂರ್ಗಳ ಪೈಕಿ 10 ರಲ್ಲಿ ಮೊದಲ ಅಥವಾ 2ನೇ ಸುತ್ತುಗಳಲ್ಲೇ ಸೋತಿದ್ದಾರೆ. ಹಾಗಾಗಿ ಒಲಿಂಪಿಕ್ಸ್ಗೆ ಅರ್ಹತೆ ಪಡೆಯಲು ನಿಗದಿಪಡಿಸಿದ್ದ ಕನಿಷ್ಠ 16ರ ರೊಳಗಿನ ರ್ಯಾಂಕಿಂಗ್ ಪಟ್ಟಿಯಿಂದ ಅವಕಾಶ ಪಡೆಯಲು ವಿಫಲರಾಗಿದ್ದರು. ಒಂದು ವೇಳೆ ಅವರು ಈ ಸಾಧನೆ ಮಾಡಿದ್ದರೆ, ಪುರುಷರ ಸಿಂಗಲ್ಸ್ನಲ್ಲಿ ಸ್ಪರ್ಧಿಸಬಲ್ಲ ಎರಡನೇ ಆಟಗಾರ ಆಗುತ್ತಿದ್ದರು. ಎಚ್ಎಸ್ ಪ್ರಣಯ್ ಮಾತ್ರ ಸಿಂಗಲ್ಸ್ನಲ್ಲಿ ಆಯ್ಕೆಯಾಗಿದ್ದಾರೆ.
ಬಜರಂಗ್ ಪೂನಿಯಾ: 2020ರ ಟೊಕಿಯೊ ಒಲಿಂಪಿಕ್ಸ್ನಲ್ಲಿ 65 ಕೆಜಿ ವಿಭಾಗದಲ್ಲಿ ಕಂಚಿನ ಪದಕ ಗೆದ್ದಿದ್ದ ಬಜರಂಗ್ ಪೂನಿಯಾ, ಈ ವರ್ ಮಾರ್ಚ್ನಲ್ಲಿ ನಡೆದ ಆಯ್ಕೆ ಟ್ರಯಲ್ಸ್ನಲ್ಲಿ ನಿರಾಸೆ ಅನುಭವಿಸಿದರು. ಈ ಬಾರಿ ಚಿನ್ನ ಗೆಲ್ಲುವ ಪ್ರಮುಖ ಆಟಗಾರ ಆಗಿದ್ದ ಪೂನಿಯಾ, ಟ್ರಯಲ್ಸ್ನಲ್ಲಿ ಪುರುಷರ ಫ್ರೀಸ್ಟೈಲ್ 65 ಕೆಜಿ ಸೆಮಿಫೈನಲ್ನಲ್ಲಿ ರೋಹಿತ್ ಕುಮಾರ್ ವಿರುದ್ಧ 1-9 ಅಂತರದಿಂದ ಮುಖಭಂಗಕ್ಕೆ ಒಳಗಾಗಿದ್ದರು. ಹೀಗಾಗಿ ಒಲಿಂಪಿಕ್ ಅರ್ಹತಾ ಪಂದ್ಯಗಳ ನಂತರ ಮತ್ತೆ ಟ್ರಯಲ್ ನಡೆಸದಿರಲು ಡಬ್ಲ್ಯುಎಫ್ಐ ನಿರ್ಧರಿಸಿದ ಕಾರಣ ಪೂನಿಯಾ ಕನಸು ಭಗ್ನಗೊಂಡಿತು. ಡಬ್ಲ್ಯುಎಫ್ಐ ಮಾಜಿ ಅಧ್ಯಕ್ಷ ಬ್ರಿಜ್ ಭೂಷಣ್ ವಿರುದ್ಧ ಪ್ರತಿಭಟನೆಯಲ್ಲಿ ಪೂನಿಯಾ ಭಾಗವಹಿಸಿದ್ರು.
ರವಿ ದಹಿಯಾ: ಟೊಕಿಯೊ ಒಲಿಂಪಿಕ್ಸ್-2020ರಲ್ಲಿ ಭಾರತದ 2ನೇ ಬೆಳ್ಳಿ ಪದಕ ವಿಜೇತ ಕುಸ್ತಿಪಟು ಎಂಬ ಹೆಗ್ಗಳಿಕೆಗೆ ಪಾತ್ರರಾದ ರವಿ ದಹಿಯಾ, ಏಷ್ಯನ್ ಒಲಿಂಪಿಕ್ ಅರ್ಹತಾ ಪಂದ್ಯಗಳಿಗೆ ಈ ವರ್ಷದ ಮಾರ್ಚ್ನಲ್ಲಿ ನಡೆದ ಆಯ್ಕೆ ಟ್ರಯಲ್ಸ್ನಲ್ಲಿ ಸೋತು ನಿರಾಸೆ ಅನುಭವಿಸಿದರು. ದೀರ್ಘಕಾಲದ ಗಾಯದಿಂದ ಹಿಂತಿರುಗುತ್ತಿದ್ದ ದಹಿಯಾ, ಅಮನ್ ಶೆಹ್ರಾವತ್ ವಿರುದ್ಧ ಸೋತು ಶರಣಾಗಿದ್ದರು. ಆದರೆ, 2023ರಲ್ಲಿ ಸ್ಪರ್ಧಿಸಿದ ಪ್ರತಿ ಟೂರ್ನಿಯಲ್ಲೂ ಸೋತಿದ್ದ ಅಮನ್ ಶೆಹ್ರಾವತ್ 57 ಕೆಜಿ ಪುರುಷರ ಫ್ರೀಸ್ಟೈಲ್ನಲ್ಲಿ ಗೆದ್ದು ಅವಕಾಶ ಪಡೆದರು.
ಮುರಳಿ ಶ್ರೀಶಂಕರ್: ಕಳೆದ ವರ್ಷ ಥೈಲ್ಯಾಂಡ್ನ ಬ್ಯಾಂಕಾಕ್ನಲ್ಲಿ ಜರುಗಿದ ಏಷ್ಯನ್ ಅಥ್ಲೆಟಿಕ್ಸ್ ಚಾಂಪಿಯನ್ಶಿಪ್-2023ರಲ್ಲಿ ಪುರುಷರ ಒಲಿಂಪಿಕ್ಸ್ ಲಾಂಗ್ ಜಂಪ್ ಅರ್ಹತಾ ಮಾನದಂಡದ 8.27 ಮೀಟರ್ ಜಿಗಿದಿದ್ದ ಮುರಳಿ ಶ್ರೀಶಂಕರ್ ಒಲಿಂಪಿಕ್ಸ್ಗೆ ಆಯ್ಕೆಯಾಗಿದ್ದರು. ಕೂಟದಲ್ಲಿ ಅವರು 8.27 ಮೀಟರ್ ದೂರ ಜಿಗಿದು ಬೆಳ್ಳಿ ಪದಕ ಗೆದ್ದಿದ್ದರು. ಆದಾಗ್ಯೂ, ಈ ವರ್ಷದ ಏಪ್ರಿಲ್ನಲ್ಲಿ ಅಭ್ಯಾಸದ ನಡೆಸುತ್ತಿದ್ದ ವೇಳೆ ಗಾಯಗೊಂಡು 2024ರ ಪ್ಯಾರಿಸ್ ಒಲಿಂಪಿಕ್ಸ್ನಿಂದ ಹೊರ ಬಿದ್ದರು.
ಅಭಾ ಖತುವಾ: ಪ್ಯಾರಿಸ್ ಒಲಿಂಪಿಕ್ಸ್ಗೆ ಅರ್ಹತೆ ಪಡೆದುಕೊಂಡಿದ್ದ ಶಾಟ್ ಪುಟ್ ಸ್ಪರ್ಧಿ ಅಭಾ ಖತುವಾ ಅವರ ಹೆಸರು ಅಂತಿಮ ಪಟ್ಟಿಯಲ್ಲಿಲ್ಲ. ಇತ್ತೀಚೆಗೆ ಪ್ರಕಟವಾದ 117 ಕ್ರೀಡಾಪಟುಗಳ ಪಟ್ಟಿಯಲ್ಲಿ ಅಭಾ ಹೆಸರು ಕಾಣೆಯಾಗಿದೆ. ಅವರ ಹೆಸರನ್ನು ಏಕೆ ತೆಗೆದುಹಾಕಲಾಗಿದೆ ಎಂಬುದಕ್ಕೆ ಸ್ಪಷ್ಟ ಉತ್ತರವಿಲ್ಲ.
ಮಹಿಳಾ ಹಾಕಿ ತಂಡ: ಟೊಕಿಯೊ ಒಲಿಂಪಿಕ್ಸ್ ನಂತರ ನಾಯಕಿ ರಾಣಿ ರಾಂಪಾಲ್ ಅವರನ್ನು ಕೋಚ್ ಜನ್ನೆಕ್ ಸ್ಕೋಪ್ಮನ್ ಅವರು ತಂಡದಿಂದ ಹೊರಗಿಟ್ಟರು. ಇದು ಹಾಕಿ ತಂಡದಲ್ಲಿ ಪ್ರಕ್ಷುಬ್ಧ ವಾತಾವರಣ ಉಂಟಾಗಲು ಕಾರಣವಾಯಿತು. ಏಷ್ಯನ್ ಗೇಮ್ಸ್ನಲ್ಲಿ ಚಿನ್ನ ಕಳೆದುಕೊಂಡಿದ್ದ ಭಾರತ ಮಹಿಳಾ ಹಾಕಿ ತಂಡ, ಪ್ಯಾರಿಸ್ಗೆ ಟಿಕೆಟ್ ಕಾಯ್ದಿರಿಸಲು ಒಲಿಂಪಿಕ್ ಅರ್ಹತಾ ಪಂದ್ಯ ಎದುರಿಸಿತು. ಆದರೂ, ಭಾರತ ತಂಡವು ಜರ್ಮನಿ ವಿರುದ್ಧ ಪೆನಾಲ್ಟಿ ಶೂಟೌಟ್ನಲ್ಲಿ ಸೋತು ಒಲಿಂಪಿಕ್ಸ್ಗೆ ಅರ್ಹತೆ ಪಡೆಯಲು ವಿಫಲವಾಯಿತು. ಈ ಅರ್ಹತಾ ಸುತ್ತಿನಲ್ಲಿ ಅಗ್ರ-3 ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿತ್ತು. ಇದರೊಂದಿಗೆ ಒಲಿಂಪಿಕ್ಸ್ ಕನಸು ಭಗ್ನಗೊಂಡಿತು.
