US Open 2023: ಯುಎಸ್​ ಓಪನ್ ಫೈನಲ್ ಪ್ರವೇಶಿಸಿದ ಜೋಕೋವಿಕ್-ಮೆಡ್ವೆಡೆವ್, ಸೋತು ಹೊರಬಿದ್ದ ಅಲ್ಕರಾಜ್-ಶೆಲ್ಟನ್

ಯುಎಸ್​ ಓಪನ್​ 2023 ಟೂರ್ನಿಯು (US Open 2023) ಅಂತಿಮ ಹಂತದ ಘಟ್ಟಕ್ಕೆ ತಲುಪಿದೆ. ತಡರಾತ್ರಿ ನಡೆದ ಸೆಮಿಫೈನಲ್ಸ್​​ ಹೋರಾಟದಲ್ಲಿ ಗೆದ್ದ ಘಟಾನುಘಟಿ ಆಟಗಾರರು ಫೈನಲ್​ ಪ್ರವೇಶಿಸಿದ್ದಾರೆ. ಜುಲೈನಲ್ಲಿ ವಿಂಬಲ್ಡನ್ ಗೆದ್ದ​, ಹಾಲಿ ಯುಎಸ್ ಓಪನ್ ಚಾಂಪಿಯನ್​ ಕಾರ್ಲೋಸ್ ಅಲ್ಕರಾಜ್ (Carlos Alcaraz) ಸೆಮೀಸ್​​ನಲ್ಲಿ ಮುಗ್ಗರಿಸಿ ಹೊರ ಬಿದ್ದರೆ, ಸರ್ಬಿಯಾದ ದಿಗ್ಗಜ ನೋವಾಕ್ ಜೋಕೋವಿಕ್ (Novak Djokovic) ಮತ್ತೊಂದು ಫೈನಲ್​ಗೇರಿದ್ದು ದಾಖಲೆಯ 24ನೇ ಗ್ರ್ಯಾಂಡ್​ ಸ್ಲಾಮ್​ ಮೇಲೆ ಕಣ್ಣಿಟ್ಟಿದ್ದಾರೆ.

ಅಲ್ಕರಾಜ್​ಗೆ ಸೋಲು, 2021ರ ನಂತರ ಮೆಡ್ವೆಡೆವ್ ಫೈನಲ್​ಗೆ

ಮತ್ತೊಂದು ಟ್ರೋಫಿಯ ಕನಸಿನಲ್ಲಿದ್ದ ಕಾರ್ಲೋಸ್​ ಅಲ್ಕರಾಜ್​ಗೆ ರಷ್ಯಾದ ಡೇನಿಯಲ್ ಮೆಡ್ವೆಡೆವ್ (Daniil Medvedev) ಸೋಲಿನ ಶಾಕ್ ನೀಡಿದ್ದಾರೆ. ಮೊದಲ ಸೆಮಿಫೈನಲ್​ನಲ್ಲಿ ಆರ್ಥರ್ ಆಶೆ ಕ್ರೀಡಾಂಗಣದಲ್ಲಿ ನಡೆದ ರಣರೋಚಕ ಪಂದ್ಯದಲ್ಲಿ ಅಲ್ಕರಾಜ್​ರನ್ನು 7-6(3), 6-1, 3-6, 6-3 ಅಂತರದಲ್ಲಿ ಸೋಲಿಸಿದ ಮೆಡ್ವೆಡೆವ್​, 2019, 2021ರ ನಂತರ ಫೈನಲ್​ಗೇರಿದ್ದಾರೆ. ವಿಶೇಷ ಅಂದರೆ ಮತ್ತೆ ಫೈನಲ್​​ನಲ್ಲಿ ಜೋಕೋವಿಕ್​ರನ್ನು ಎದುರಿಸಲಿದ್ದಾರೆ.

24ನೇ ಗ್ರ್ಯಾಂಡ್​ ಸ್ಲ್ಯಾಮ್​ ಮೇಲೆ ಜೋಕೋವಿಕ್ ಕಣ್ಣು

ನೋವಾಕ್ ಜೋಕೋವಿಕ್ ಇದೀಗ ದಾಖಲೆಯ ಗ್ರ್ಯಾಂಡ್​ ಸ್ಲ್ಯಾಮ್ ಮೇಲೆ ಕಣ್ಣಿಟ್ಟಿದ್ದಾರೆ. ಆರ್ಥರ್ ಆಶೆ ಕ್ರೀಡಾಂಗಣದಲ್ಲಿ ನಡೆದ 2ನೇ ಸೆಮಿಫೈನಲ್​ ಪಂದ್ಯದಲ್ಲಿ ಜೋಕೋವಿಕ್, ಅಮೆರಿಕದ ಬೆನ್​ ಶೆಲ್ಟನ್​ರನ್ನು (Ben Shelton) ಸೋಲಿಸಿ ಮತ್ತೊಮ್ಮೆ ಫೈನಲ್​ ಪ್ರವೇಶಿಸಿದ್ದಾರೆ. 6-3, 6-2, 7-6 (7-4) ಅಂತರದಲ್ಲಿ ಜಯಿಸಿದ ನೋವಾಕ್, ಇದೀಗ ದಾಖಲೆಯ 24ನೇ ಪ್ರಶಸ್ತಿ ಗೆಲ್ಲುವತ್ತ ಚಿತ್ತಹರಿಸಿದ್ದಾರೆ. ಫೈನಲ್​ನಲ್ಲಿ ಮೆಡ್ವೆಡೆವ್​ರನ್ನು ಎದುರಿಸಲಿದ್ದಾರೆ. ಅಲ್ಲದೆ, 4ನೇ ಯುಎಸ್ ಓಪನ್ ಪ್ರಶಸ್ತಿ ಜಯಿಸಲು ಸಜ್ಜಾಗಿದ್ದಾರೆ.

ಮತ್ತೆ ಮೆಡ್ವೆಡೆವ್-ಜೋಕೋವಿಕ್ ಸೆಣಸಾಟ

2021ರ ಯುಎಸ್​ ಓಪನ್​ ಫೈನಲ್​ನಲ್ಲಿ ಮುಖಾಮುಖಿಯಾಗಿದ್ದ ಜೋಡಿಯೇ ಈ ಬಾರಿಯ ಟೂರ್ನಿಯ ಫೈನಲ್​​​​ನಲ್ಲೂ ಸೆಣಸಾಟ ನಡೆಸುತ್ತಿರುವುದು ವಿಶೇಷ. ನೋವಾಕ್-ಮೆಡ್ವೆಡೆವ್ (Daniil Medvedev vs Novak Djokovic) ಅವರು ಈ ಬಾರಿ ಫೈನಲ್​​ನಲ್ಲಿ ಪ್ರಶಸ್ತಿಗಾಗಿ ಕಾದಾಟ ನಡೆಸಲಿದ್ದಾರೆ. 2021ರ ಫೈನಲ್​​ನಲ್ಲಿ ಮೆಡ್ವೆಡೆವ್, ಜೋಕೋವಿಕ್ ಅವರನ್ನು ಸೋಲಿಸಿದ್ದರು. ಇದೀಗ ಸೇಡು ತೀರಿಸಿಕೊಳ್ಳಲು ಜೋಕೋವಿಕ್​​ ಸಿದ್ಧರಾಗಿದ್ದಾರೆ. ಅಲ್ಲದೆ, 24ನೇ ಗ್ರ್ಯಾಂಡ್ ಸ್ಲಾಮ್ ಗೆದ್ದು ವಿಶ್ವ ದಾಖಲೆ ಬರೆಯಲು ಸಜ್ಜಾಗಿದ್ದಾರೆ. ಇಬ್ಬರಿಬ್ಬರ ನಡುವಿನ ಸೆಣಸಾಟ ಸೆಪ್ಟೆಂಬರ್ 11ರಂದು ನಡೆಯಲಿದೆ. ಈ ಜೋಡಿ 14 ಬಾರಿ ಮುಖಾಮುಖಿಯಾಗಿದ್ದು, ಜೋಕೋವಿಕ್ 9 ಸಲ, ಮೆಡ್ವೆಡೆವ್ 5 ಬಾರಿ ಜಯಿಸಿದ್ದಾರೆ.

ಹಾಲಿ ಚಾಂಪಿಯನ್​​ಗೆ ಶಾಕ್

2022ರ ಯುಎಸ್​ ಓಪನ್ ಫೈನಲ್​ನಲ್ಲಿ ಅಲ್ಕರಾಜ್ ಚಾಂಪಿಯನ್​ ಆಗಿದ್ದರು. ಅಂದು ಕ್ಯಾಸ್ಪರ್​ ರುಡ್ ಎದುರು ಫೈನಲ್​​ನಲ್ಲಿ ರೋಚಕ ಗೆಲುವು ಸಾಧಿಸಿದ್ದರು. ಚೊಚ್ಚಲ ಯುಎಸ್ ಓಪನ್ ಟೂರ್ನಿಗೆ ಮುತ್ತಿಕ್ಕಿದ್ದರು. 4-6, 6-2, 6-7, 3-6​ ಸೆಟ್​ಗಳಿಂದ ಫೈನಲ್​​ನಲ್ಲಿ ಅಲ್ಕರಾಜ್ ಜಯಿಸಿದ್ದರು. ಆದರೆ ಈ ಬಾರಿ ತಮ್ಮ ಹಾಲಿ ಚಾಂಪಿಯನ್ ಪಟ್ಟವನ್ನು ಉಳಿಸಿಕೊಳ್ಳುವಲ್ಲಿ ವಿಫಲರಾದರು.

ಸಬಲೆಂಕಾ ಫೈನಲ್​ಗೆ

ಇನ್ನು ಮಹಿಳೆಯರ ಸಿಂಗಲ್ಸ್​ ವಿಭಾಗದ ಫೈನಲ್​ಗೆ ಬೆಲಾರಸ್​ನ ಅರೀನಾ ಸಬಲೆಂಕಾ ಮತ್ತು ಅಮೆರಿಕದ ಕೊಕೊ ಗೌಫ್ (Aryna Sabalenka vs Co Co gauff) ಫೈನಲ್​ ಪ್ರವೇಶಿಸಿದ್ದಾರೆ. ಅಮೆರಿಕದ ಮ್ಯಾಡಿಸನ್ ಕೀಸ್ ಅವರನ್ನು ಸೆಮಿಫೈನಲ್​ನಲ್ಲಿ ಸಬಲೆಂಕಾ ಸೋಲಿಸಿದರು. ಮತ್ತೊಂದು ಸೆಮೀಸ್​ನಲ್ಲಿ ಕರೋಲಿನಾ ಮುಚೋವಾರನ್ನು ಗೌಫ್ ಸೋಲಿಸಿ ಫೈನಲ್ ಪ್ರವೇಶಿಸಿದ್ದಾರೆ.