IPL Auction 2025: ಐಪಿಎಲ್ ಹರಾಜಿಗೂ ಮುನ್ನವೇ ಆರ್‌ಸಿಬಿಗೆ ನಾಲ್ವರು ಆಟಗಾರರನ್ನು ಹೆಸರಿಸಿದ ಡಿವಿಲಿಯರ್ಸ್
ಐಪಿಎಲ್ ಹರಾಜು 2025: ಮುಂದಿನ ಐಪಿಎಲ್ ಟೂರ್ನಿಗೆ 2024ರ ನವೆಂಬರ್‌ನಲ್ಲಿ ಹರಾಜು ಪ್ರಕ್ರಿಯೆ ನಡೆಯಲಿದೆ. ಇದಕ್ಕೂ ಮುನ್ನವೇ ಆರ್‌ಸಿಬಿ ಖರೀದಿಸಲೇಬೇಕಾದ ನಾಲ್ವರು ಆಟಗಾರರ ಹೆಸರನ್ನು ಆರ್‌ಸಿಬಿಯ ಮಾಜಿ ಆಟಗಾರ ಎಬಿ ಡಿವಿಲಿಯರ್ಸ್ ಸೂಚಿಸಿದ್ದಾರೆ. ಆ ನಾಲ್ವರು ಆಟಗಾರರು ಯಾರು ಎಂಬುದನ್ನು ನೋಡೋಣ.
ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2025 ರ ಮೆಗಾ ಹರಾಜು 2024ರ ನವೆಂಬರ್ 24 ಮತ್ತು 25 ರಂದು ಸೌದಿ ಅರೇಬಿಯಾದ ಜೆಡ್ಡಾದಲ್ಲಿ ನಡೆಯಲಿದೆ. ಇದೇ ಮೊದಲ ಬಾರಿಗೆ ಭಾನುವಾರ ಮತ್ತು ಸೋಮವಾರ ಐಪಿಎಲ್ ಮೆಗಾ ಹರಾಜು ನಡೆಯಲಿದೆ. ಮುಂದಿನ ವರ್ಷದ ಐಪಿಎಲ್ ಟೂರ್ನಿಗಾಗಿ ಇದೇ ತಿಂಗಳು ನಡೆಯುತ್ತಿರುವ ಹರಾಜಿಗೂ ಮುನ್ನವೇ ರಾಯಲ್ ಚಾಲೆಂಜರ್ಸ್ ಬೆಂಗಳೂರು-ಆರ್‌ಸಿಬಿ ತಂಡ ಯಾವೆಲ್ಲಾ ಆಟಗಾರರನ್ನು ಖರೀದಿಸಬೇಕು ಎಂಬುದನ್ನು ಎಬಿಡಿ ಬಹಿರಂಗಪಡಿಸಿದ್ದಾರೆ. ಆರ್‌ಸಿಬಿಯ ಮಾಜಿ ಆಟಗಾರರೂ ಆಗಿರುವ ಎಬಿ ಡಿವಿಲಿಯರ್ಸ್ ಹೆಸರಿಸಿರುವ ನಾಲ್ವರು ಆಟಗಾರರನ್ನು ತಿಳಿಯೋಣ.
ಯುಜ್ವೇಂದ್ರ ಚಾಹಲ್ ಅವರನ್ನು ಮರಳಿ ಕರೆತರುವುದು ತಂಡದ ಆದ್ಯತೆಯಾಗಿರಬೇಕು ಎಂದು ಎಬಿ ಡಿವಿಲಿಯರ್ಸ್ ಹೇಳಿದ್ದಾರೆ. ಲೆಗ್ ಸ್ಪಿನ್ನರ್ ಎಂದಿಗೂ ಫ್ರಾಂಚೈಸಿಯನ್ನು ತೊರೆಯಬಾರದು ಎಂದಿದ್ದಾರೆ. ಎಬಿ ಡಿವಿಲಿಯರ್ಸ್ ತಮ್ಮ ಯೂಟ್ಯೂಬ್ ಚಾನೆಲ್‌ನಲ್ಲಿ ಮಾತನಾಡಿ, "ಒಳ್ಳೆಯ ಸುದ್ದಿಯೆಂದರೆ ನಮ್ಮಲ್ಲಿ ಇನ್ನೂ ಕೊಹ್ಲಿ ಇದ್ದಾರೆ. ಹರಾಜಿಗಾಗಿ ನಾವು ಹೆಚ್ಚು ಹಣವನ್ನು ಖರ್ಚು ಮಾಡಿರಲಿಲ್ಲ. ಆರ್‌ಸಿಬಿ ಬಳಿ ಸಾಕಷ್ಟು ಹಣವಿದೆ. 83 ಕೋಟಿ ಖರ್ಚು ಮಾಡಬೇಕಾಗಿದೆ, ಇದು ಅದ್ಭುತವಾಗಿದೆ. "
ತಂಡಕ್ಕೆ ವಿಶ್ವದರ್ಜೆಯ ಸ್ಪಿನ್ನರ್‌ಗಳು ಬೇಕು. ಯುಜ್ವೇಂದ್ರ ಚಾಹಲ್ ಅವರನ್ನು ಮರಳಿ ತಂಡಕ್ಕೆ ಕರೆತನ್ನಿ. ತಿರುಗಾಡುವುದನ್ನು ನಿಲ್ಲಿಸಿ. ಚಾಹಲ್ ಅವರನ್ನು ಅರ್ಹವಾದ ಆರ್‌ಸಿಬಿ ಸೇರಿಸಿಕೊಳ್ಳಿ. ಈ ಮೊದಲು ಈ ಸ್ಪಿನ್ನರ್ ತಂಡದಿಂದ ಹೋಗಬಾರದಿತ್ತು. ಆರ್‌ಸಿಬಿ ಅಶ್ವಿನ್ ಅವರನ್ನೂ ತೆಗೆದುಕೊಳ್ಳಬಹುದು. ನಾನು ವಾಷಿಂಗ್ಟನ್ ಸುಂದರ್ ಅವರನ್ನು ಇಷ್ಟಪಡುತ್ತೇನೆ. ಆದರೆ ಅಶ್ವಿನ್‌ಗೆ ಸಾಕಷ್ಟು ಅನುಭವವಿದೆ. ಅವರಿಂದ ಏನಾಗುತ್ತದೆ ಎಂದು ನಿಮಗೆ ತಿಳಿದಿದೆ. ಆತ ಬ್ಯಾಟ್‌ನೊಂದಿಗೆ ಉತ್ತಮವಾಗಿ ಕಾರ್ಯನಿರ್ವಹಿಸಬಹುದು. ಆರ್‌ಸಿಬಿಗೆ ಆರ್‌ಆರ್‌ನಿಂದ ಈ ಜೋಡಿಯನ್ನು ನಾವು ಪಡೆದರೆ ಊಹಿಸಿ. ಇವರು ತಮ್ಮ ಆಟವನ್ನು ಚೆನ್ನಾಗಿ ತಿಳಿದಿರುವ ಆಟಗಾರರು. ನಾನು ಅದರ ಬಗ್ಗೆ ತುಂಬಾ ಸಂತೋಷಪಡುತ್ತೇನೆ. ಹೇಗಾದರೂ ಸರಿ ಯುಜ್ವೇಂದ್ರ ಚಾಹಲ್ ನನ್ನ ಮುಖ್ಯ ಆದ್ಯತೆ ಎಂದು ಎಬಿ ಡಿವಿಲಿಯರ್ಸ್ ಹೇಳಿದ್ದಾರೆ.
ಈ ನಾಲ್ವರು ಆಟಗಾರರನ್ನು ಆರ್‌ಸಿಬಿ ಖರೀದಿಸಬೇಕು-ಎಬಿಡಿ
ರಬಾಡ, ಯುಜ್ವೇಂದ್ರ ಚಾಹಲ್ ಹಾಗೂ ರವಿಚಂದ್ರನ್ ಅಶ್ವಿನ್ ಬಗ್ಗೆ ಯೋಚಿಸಬಹುದು. ಈ ಮೂರನ್ನು ಆರ್‌ಸಿಬಿಗೆ ಸೇರಿಸಿ. ನಾವು ಅಲ್ಲಿ ಪಂದ್ಯಾವಳಿಯನ್ನು ಗೆಲ್ಲುವ ಬೌಲಿಂಗ್ ದಾಳಿಯ ಬಗ್ಗೆ ಮಾತನಾಡುತ್ತಿದ್ದೇವೆ. ನನ್ನ ಬಳಿ ನಾಲ್ಕು ಆದ್ಯತೆಯ ಆಟಗಾರರ ಪಟ್ಟಿ ಇದೆ. ಯುಜ್ವೇಂದ್ರ ಚಾಹಲ್, ಕಗಿಸೊ ರಬಾಡ, ಭುವನೇಶ್ವರ್ ಕುಮಾರ್ ಹಾಗೂ ಆರ್ ಅಶ್ವಿನ್. ಈ ಆಟಗಾರರಿಗಾಗಿ ಹೆಚ್ಚಿನ ಹಣ ಖರ್ಚು ಮಾಡಬಹುದು. ಹರಾಜಿನಲ್ಲಿ ಉಳಿದ ಮೊತ್ತದಿಂದ ಇತರೆ ಯೋಜನೆಯನ್ನು ಮಾಡಬಹುದು. ಅದರ ಬಗ್ಗೆ ಹೆಚ್ಚು ಗಮನ ಹರಿಸಬೇಕು ಎಂದಿದ್ದಾರೆ.
ಹರಾಜಿಗೆ ಮುಂಚಿತವಾಗಿ ರಾಜಸ್ಥಾನ್ ರಾಯಲ್ಸ್ ಅಶ್ವಿನ್ ಮತ್ತು ಚಾಹಲ್ ಅವರನ್ನು ಬಿಡುಗಡೆ ಮಾಡಿದೆ. ಫ್ರಾಂಚೈಸಿ 6 ಆಟಗಾರರನ್ನು ಉಳಿಸಿಕೊಂಡಿದೆ. ಐಪಿಎಲ್‌ನಲ್ಲಿ 200 ವಿಕೆಟ್ ಪಡೆದ ಮೊದಲ ಆಟಗಾರ, ಚಾಹಲ್ 2014 ರಿಂದ 2021 ರವರೆಗೆ ಆರ್‌ಸಿಬಿಯ ಅವಿಭಾಜ್ಯ ಅಂಗವಾಗಿದ್ದರು. ಲೆಗ್ ಸ್ಪಿನ್ನರ್ ಬೆಂಗಳೂರಿನ ಪರಿಸ್ಥಿತಿಗಳನ್ನು ಚೆನ್ನಾಗಿ ಅರ್ಥಮಾಡಿಕೊಂಡಿದ್ದಾರೆ. ಆದರೆ, ಕಳೆದ ಕೆಲವು ವರ್ಷಗಳಿಂದ ರಾಜಸ್ಥಾನದ ಭಾಗವಾಗಿದ್ದರು. ನವೆಂಬರ್ 24 ಮತ್ತು 25 ರಂದು ಸೌದಿ ಅರೇಬಿಯಾದ ಜೆಡ್ಡಾದಲ್ಲಿ ನಡೆಯಲಿದೆ. ಎರಡು ದಿನಗಳ ಮೆಗಾ ಈವೆಂಟ್ ಈ ಹಿಂದೆ ರಿಯಾದ್‌ನಲ್ಲಿ ನಡೆಯಬೇಕಿತ್ತು, ಆದರೆ ಈಗ ಕೊನೆಯ ಕ್ಷಣದಲ್ಲಿ ಜೆಡ್ಡಾಗೆ ಸ್ಥಳಾಂತರಿಸಲಾಗಿದೆ. ಕೆಎಲ್ ರಾಹುಲ್, ಶ್ರೇಯಲ್ ಅಯ್ಯರ್, ರಿಷಭ್ ಪಂಥ್ ಸೇರಿದಂತೆ ಬಲಿಷ್ಠ ಆಟಗಾರರು ಈ ಬಾರಿಯ ಹರಾಜಿಗೆ ಲಭ್ಯವಿದ್ದಾರೆ. ಐಪಿಎಲ್ ಹರಾಜಿನಲ್ಲಿ ಯಾವ ತಂಡ ಯಾವ ಆಟಗಾರರನ್ನು ಖರೀದಿಸಲಿದ್ದಾರೆ ಎಂಬುದನ್ನು ಕುತೂಹಲ ಮೂಡಿಸಿದೆ.
