M G Ramachandran Tattoo: ಖ್ಯಾತ ತಮಿಳು ನಟನ ಎದೆ ಮೇಲೆ ಎಂಜಿಆರ್‌ ಟ್ಯಾಟೂ..ವೈರಲ್‌ ಆಯ್ತು ಫೋಟೋ
ಸಿನಿಮಾ ಬಿಟ್ಟು ರಾಜಕೀಯಕ್ಕೆ ಬಂದ ನಂತರವೂ ಕೋಟ್ಯಂತರ ಮಂದಿ ಎಂಜಿಆರ್‌ ಅವರನ್ನು ಫಾಲೋ ಮಾಡುತ್ತಿದ್ದರು. ಬಹುತೇಕ ಅಭಿಮಾನಿಗಳ ಎದೆಯೊಳಗೆ ಎಂಜಿಆರ್‌ ಇಂದಿಗೂ ನೆಲೆಸಿದ್ದಾರೆ. ಈ ನಡುವೆ ಖ್ಯಾತ ತಮಿಳು ಹೀರೋ ವಿಶಾಲ್‌, ತಮ್ಮ ಎದೆ ಮೇಲೆ ಎಂಜಿಆರ್‌ ಟ್ಯಾಟೂ ಹಾಕಿಸಿಕೊಂಡಿದ್ದಾರೆ.
ಸಿನಿಮಾ ನಟರ ಹೆಸರು, ಸಿನಿಮಾ ಹೆಸರುಗಳು, ಅವರ ಫೋಟೋಗಳನ್ನು ಮೈ ಮೇಲೆ ಹಚ್ಚೆ ಹಾಕಿಸಿಕೊಳ್ಳುವ ಅಭಿಮಾನಿಗಳನ್ನು ನೋಡಿದ್ದೇವೆ. ಇಲ್ಲಿ ಖ್ಯಾತ ಸಿನಿಮಾ ಹೀರೋ ಒಬ್ಬರು ತಮ್ಮ ಮೆಚ್ಚಿನ ಹಿರಿಯ ನಟರೊಬ್ಬರ ಫೋಟೋವನ್ನು ತಮ್ಮ ಎದೆಯ ಮೇಲೆ ಟ್ಯಾಟೂ ಹಾಕಿಸಿಕೊಂಡು ಗಮನ ಸೆಳೆದಿದ್ದಾರೆ.
ಎಂಜಿಆರ್‌ ಎಂದೇ ಹೆಸರಾಗಿರುವ ತಮಿಳಿನ ಖ್ಯಾತ ನಟ ಎಂ.ಜಿ. ರಾಮಚಂದ್ರನ್‌ ಸಿನಿಮಾ ಮೂಲಕ ಕೋಟ್ಯಂತರ ಅಭಿಮಾನಿಗಳನ್ನು ಸಂಪಾದಿಸಿದರು. ಅಲ್ಲದೆ ರಾಜಕೀಯಕ್ಕೂ ಎಂಟ್ರಿ ಕೊಟ್ಟು ಸುಮಾರು 10 ವರ್ಷಗಳ ಕಾಲ ತಮಿಳುನಾಡಿನ ಮುಖ್ಯಮಂತ್ರಿಯಾಗಿ ಅಧಿಕಾರ ನಡೆಸಿದ್ದರು. ಕಪ್ಪು ಕನ್ನಡಕ, ತಲೆ ಮೇಲಿನ ಬಿಳಿ ಟೋಪಿ ಅವರಿಗೆ ಭೂಷಣ ಎನ್ನುವಂತಿತ್ತು. ಸಿನಿಮಾ ಬಿಟ್ಟು ರಾಜಕೀಯಕ್ಕೆ ಬಂದ ನಂತರವೂ ಕೋಟ್ಯಂತರ ಮಂದಿ ಅವರನ್ನು ಫಾಲೋ ಮಾಡುತ್ತಿದ್ದರು. ಬಹುತೇಕ ಅಭಿಮಾನಿಗಳ ಎದೆಯೊಳಗೆ ಎಂಜಿಆರ್‌ ಇಂದಿಗೂ ನೆಲೆಸಿದ್ದಾರೆ. ಈ ನಡುವೆ ಖ್ಯಾತ ತಮಿಳು ಹೀರೋ ವಿಶಾಲ್‌, ತಮ್ಮ ಎದೆ ಮೇಲೆ ಎಂಜಿಆರ್‌ ಟ್ಯಾಟೂ ಹಾಕಿಸಿಕೊಂಡಿದ್ದಾರೆ.
ಅಂದಹಾಗೆ ವಿಶಾಲ್‌ ಎಂಜಿಆರ್‌ ಅವರ ಮೇಲಿನ ಪ್ರೀತಿಯಿಂದ ಈ ರೀತಿ ಟ್ಯಾಟೂ ಹಾಕಿಸಿಕೊಂಡಿದ್ದಾರೋ ಅಥವಾ ತಮ್ಮ ಮುಂಬರುವ ಸಿನಿಮಾ 'ಮಾರ್ಕ್‌ ಆಂಟೋನಿ' ಚಿತ್ರಕ್ಕಾಗಿ ಈ ಹಚ್ಚೆ ಹಾಕಿಸಿಕೊಂಡಿದ್ದಾರೋ ಎಂಬುದು ಮಾತ್ರ ಗೊತ್ತಿಲ್ಲ. ಇದಕ್ಕೂ ಮುನ್ನ ವಿಶಾಲ್‌, ತಾವು ಎಂಜಿಆರ್‌ ಅವರ ದೊಡ್ಡ ಅಭಿಮಾನಿ ಎಂದು ಅನೇಕ ವೇದಿಕೆಗಳಲ್ಲಿ ಹೇಳಿರುವುದನ್ನು ಕೇಳಿದ್ದೇವೆ. ಒಟ್ಟಿನಲ್ಲಿ ಈ ಫೋಟೋ ಮಾತ್ರ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್‌ ಆಗ್ತಿರೋದಂತೂ ನಿಜ. ಈ ಫೋಟೋವನ್ನು ವಿಶಾಲ್‌, ಕ್ಯಾರವಾನ್‌ನಲ್ಲಿದ್ದಾಗ ತೆಗೆದದ್ದು ಎನ್ನಲಾಗುತ್ತಿದೆ.
ವಿಶಾಲ್‌ ಸಿನಿಮಾಗಳ ಬಗ್ಗೆ ಹೇಳುವುದಾದರೆ ಕಳೆದ ವರ್ಷ ಡಿಸೆಂಬರ್‌ನಲ್ಲಿ ಅವರ 'ಲಾಠಿ' ಸಿನಿಮಾ ತೆರೆ ಕಂಡಿತ್ತು. ಚಿತ್ರವನ್ನು ವಿನೋದ್‌ ಕುಮಾರ್‌ ನಿರ್ದೇಶಿಸಿದ್ದರು. ಸದ್ಯಕ್ಕೆ ವಿಶಾಲ್‌ 'ಮಾರ್ಕ್‌ ಆಂಟೋನಿ' ಹಾಗೂ 'ತುಪ್ಪರಿವಾಲನ್‌ 2' ಸಿನಿಮಾಗಳಲ್ಲಿ ಬ್ಯುಸಿ ಇದ್ದಾರೆ. ಮಾರ್ಕ್‌ ಆಂಟೋನಿ, ಆಕ್ಷನ್‌ ಥ್ರಿಲ್ಲರ್‌ ಸಿನಿಮಾವಾಗಿದ್ದು ಅಧಿಕ್‌ ರವಿಚಂದ್ರನ್‌ ನಿರ್ದೇಶಿಸುತ್ತಿದ್ದಾರೆ. 'ತುಪ್ಪರಿವಾಲನ್‌ 2' ಚಿತ್ರವನ್ನು ವಿಶಾಲ್‌ ನಿರ್ದೇಶಿಸುತ್ತಿದ್ದಾರೆ. ಇದು ವಿಶಾಲ್‌ ಆಕ್ಷನ್‌ ಕಟ್‌ ಹೇಳುತ್ತಿರುವ ಮೊದಲ ಸಿನಿಮಾ.
ತಮಿಳು ನಟಿಯೊಂದಿಗೆ ವಿಶಾಲ್‌ ಮದುವೆ ಸುದ್ದಿ
ವಿಶಾಲ್‌, ತಮಿಳು ನಟಿ ಅಭಿನಯ ಅವರನ್ನು ಪ್ರೀತಿಸುತ್ತಿದ್ದು ಇಬ್ಬರೂ ಮದುವೆಯಾಗಲಿದ್ದಾರೆ ಎಂಬ ಮಾತು ಬಹಳ ದಿನಗಳಿಂದ ಕೇಳಿ ಬರುತ್ತಿದೆ. ಇದಕ್ಕೂ ಮುನ್ನ ನಟ ವಿಶಾಲ್‌ ಮತ್ತು ತಮಿಳು ನಟಿ ವರಲಕ್ಷ್ಮಿ ಶರತ್‌ಕುಮಾರ್‌ ಇಬ್ಬರೂ ಪ್ರೀತಿಸುತ್ತಿದ್ದಾರೆ, ಇಬ್ಬರೂ ಮದುವೆಯಾಗುತ್ತಾರೆ ಎಂಬ ಸುದ್ದಿ ಹರಿದಾಡಿತ್ತು. ಆದರೆ ಈ ಸುದ್ದಿ ನಿಜವಾಗಲಿಲ್ಲ. ಇದಾದ ನಂತರ ಹೈದರಾಬಾದ್‌ ಮೂಲದ ಯುವತಿಯೊಬ್ಬರನ್ನು ಮದುವೆಯಾಗಲಿದ್ದಾರೆ ಎನ್ನಲಾತ್ತು. ಆಕೆಯೊಂದಿಗೆ ನಿಶ್ಚಿತಾರ್ಥ ಮಾಡಿಕೊಂಡರೂ ಮದುವೆಗೂ ಮುನ್ನ ಈ ನಿಶ್ಚಿತಾರ್ಥ ರದ್ದಾಗಿತ್ತು. ಆದರೆ ಇದೀಗ ವಿಶಾಲ್‌, ನಟಿ ಅಭಿನಯ ಅವರನ್ನು ಪ್ರೀತಿಸುತ್ತಿದ್ದು ಇಬ್ಬರೂ ಶೀಘ್ರದಲ್ಲೇ ಮದುವೆಯಾಗುತ್ತಿದ್ದಾರೆ ಎಂಬ ಸುದ್ದಿ ಹರಿದಾಡುತ್ತಿದೆ.
ಅಭಿನಯ ಮಾತು ಬಾರದ, ಕಿವಿ ಕೇಳದ ಹುಡುಗಿ. 2008ರಲ್ಲಿ 'ನೇನಿಂತೇ' ತೆಲುಗು ಚಿತ್ರದ ಮೂಲಕ ಚಿತ್ರರಂಗಕ್ಕೆ ಬಂದ ಈ ಹುಡುಗಿ ನಂತರ ಅನೇಕ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಕನ್ನಡದ 'ಹುಡುಗರು' ಚಿತ್ರದಲ್ಲಿ ಪುನೀತ್‌ ರಾಜ್‌ಕುಮಾರ್‌ ತಂಗಿಯಾಗಿ ನಟಿಸಿದ್ದ ಈ ಚೆಲುವೆ, ನಂತರ ಕಿಚ್ಚು, ಆಟೋ ರಾಮಣ್ಣ ಸಿನಿಮಾಗಳಲ್ಲಿ ಕೂಡಾ ನಟಿಸಿದ್ದಾರೆ. ತೆಲುಗಿನ ಕಿಂಗ್‌, ಶಂಭೋ ಶಿವ ಶಂಭೋ, ದಮ್ಮು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ತಮಿಳಿನ ನಾಡೋಡಿಗಳ್‌, ಈಶನ್‌, ವೀರಮ್‌, ಪೂಜಾರಿ, ಕುಟ್ರಮ್‌ 23 ಸಿನಿಮಾಗಲ್ಲಿ ನಟಿಸಿದ್ದಾರೆ. ಹಿಂದಿ ಹಾಗೂ ಮಲಯಾಳಂ ಸಿನಿಮಾಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಆದರೆ ಈ ಲವ್‌ ಅಥವಾ ಮದುವೆ ವಿಚಾರದ ಬಗ್ಗೆ ಅಭಿನಯ ಆಗಲೀ ಹಾಗೂ ವಿಶಾಲ್‌ ಆಗಲೀ ಪ್ರತಿಕ್ರಿಯಿಸಿಲ್ಲ.
