Kantara Chapter 1: ಬಿಗ್‌ ಅಪ್‌ಡೇಟ್‌ ಕೊಟ್ಟ ಹೊಂಬಾಳೆ ಫಿಲಂಸ್‌ ; ರಿಷಬ್‌ ಶೆಟ್ಟಿಯ ಕಾಂತಾರ ಚಾಪ್ಟರ್‌ 1 ಬಿಡುಗಡೆ ದಿನಾಂಕ ಹೀಗಿದೆ
Kantara Chapter 1 Release Date: ಬಹುನಿರೀಕ್ಷಿತ ಕಾಂತಾರ ಚಾಪ್ಟರ್‌ 1 ಚಿತ್ರದ ಬಿಡುಗಡೆ ದಿನಾಂಕ ಘೋಷಣೆ ಆಗಿದೆ. ರಿಷಬ್‌ ಶೆಟ್ಟಿ ನಾಯಕನಾಗಿ ನಟಿಸುವುದರ ಜತೆಗೆ, ನಿರ್ದೇಶಕನಾಗಿಯೂ ಕೆಲಸ ಮಾಡುತ್ತಿರುವ ಈ ಸಿನಿಮಾವನ್ನು ಹೊಂಬಾಳೆ ಫಿಲಂಸ್‌ ನಿರ್ಮಾಣ ಮಾಡುತ್ತಿದೆ.
Kantara Part 1: ಕಾಂತಾರ ಸಿನಿಮಾದ ಯಶಸ್ಸಿನ ಬಳಿಕ ಕಾಂತಾರ ಚಾಪ್ಟರ್‌ 1 ಚಿತ್ರ ಘೋಷಣೆ ಮಾಡಿದ್ದ ಹೊಂಬಾಳೆ ಫಿಲಂಸ್‌, ಈಗ ಅದೇ ಚಿತ್ರದ ಶೂಟಿಂಗ್‌ನಲ್ಲಿ ಬಿಜಿಯಾಗಿದೆ. ಈ ನಡುವೆ ಚಿತ್ರದ ನಾಯಕ ಮತ್ತು ನಿರ್ದೇಶಕ ರಿಷಬ್‌ ಶೆಟ್ಟಿ ಈಗಾಗಲೇ ಕುಂದಾಪುರದ ಕೆರಾಡಿಯಲ್ಲಿ ಅದ್ದೂರಿ ಸೆಟ್‌ ಹಾಕಿ ಚಿತ್ರೀಕರಣ ನಡೆಸುತ್ತಿದ್ದಾರೆ. ಹೀಗಿರುವಾಗಲೇ ಇದೇ ಸಿನಿಮಾದಿಂದ ಈಗ ಬ್ರೇಕಿಂಗ್‌ ಸುದ್ದಿಯೊಂದು ಹೊರಬಂದಿದೆ. ಈ ಸಿನಿಮಾದ ಬಿಡುಗಡೆ ಯಾವಾಗ ಎಂಬ ಕೌತುಕವನ್ನು ಹೊರಗೆಡವಿದೆ. ಅಂದಹಾಗೆ ಈ ಸಿನಿಮಾ 2025ರ ಅಕ್ಟೋಬರ್‌ 2ರಂದು ಬಿಡುಗಡೆ ಆಗಲಿದೆ.
ಕೆರಾಡಿಯಲ್ಲಿ ಕದಂಬ ಸಾಮ್ರಾಜ್ಯ
ಹೊಂಬಾಳೆ ಫಿಲಂಸ್‌ ಈಗಾಗಲೇ ಕನ್ನಡದ ಸಾಕಷ್ಟು ಸಿನಿಮಾಗಳನ್ನು ನಿರ್ಮಾಣ ಮಾಡಿದೆ. ಆ ಪೈಕಿ ಕಾಂತಾರ ಸಿನಿಮಾ ಸಹ ಒಂದು. ಈಗ ಅದೇ ಸಿನಿಮಾದ ಚಾಪ್ಟರ್‌ 1 ನಿರ್ಮಾಣದಲ್ಲಿ ತೊಡಗಿರುವ ಸಂಸ್ಥೆ, ಈ ಚಿತ್ರಕ್ಕೂ ನೂರಾರು ಕೋಟಿ ಹಣ ಹಾಕುತ್ತಿದೆ. ಅದಕ್ಕೆ ತಕ್ಕಂತೆ, ದೊಡ್ಡ ಕ್ಯಾನ್ವಾಸ್‌ನಲ್ಲಿಯೇ ಸಿನಿಮಾ ನಿರ್ಮಾಣವಾಗುತ್ತಿದೆ. ಕುಂದಾಪುರದ ಕೆರಾಡಿಯಲ್ಲಿ ಐತಿಹಾಸಿಕ ಕದಂಬ ಸಾಮ್ರಾಜ್ಯವನ್ನೇ ಹೋಲುವ ಸೆಟ್‌ ನಿರ್ಮಾಣ ಮಾಡಲಾಗಿದೆ. ಜತೆಗೆ ನಾಯಕ ಮತ್ತು ನಿರ್ದೇಶಕ ರಿಷಬ್‌ ಶೆಟ್ಟಿ ಈ ಸಿನಿಮಾ ಸಲುವಾಗಿ ಕೇರಳದ ಸಮರ ಕಲೆ ಕಲರಿಪಯಟ್ಟು ತರಬೇತಿ ಪಡೆದಿದ್ದಾರೆ.
ಕಾಂತಾರ ಸಿನಿಮಾ ಕೇವಲ 16 ಕೋಟಿ ಬಜೆಟ್‌ನಲ್ಲಿ ನಿರ್ಮಾಣವಾಗಿತ್ತು. ಹೀಗೆ ನಿರ್ಮಾಣವಾದ ಸಿನಿಮಾ ಯಾವುದೇ ಪ್ಯಾನ್‌ ಇಂಡಿಯಾ ಬಗ್ಗೆ ಕನಸಲ್ಲೂ ಊಹಿಸಿರಲಿಲ್ಲ. ಕರ್ನಾಟಕದಲ್ಲಿ ಕನ್ನಡಿಗರು ಈ ಸಿನಿಮಾವನ್ನು ಎತ್ತಿ ಮೆರೆಸುತ್ತಿದ್ದಂತೆ, ಪರಭಾಷಿಕರೂ ಈ ಸಿನಿಮಾಕ್ಕೆ ಅದೇ ಪ್ರೀತಿ ತೋರಿಸಿದರು. ತಾನೇ ತಾನಾಗಿಯೇ ಈ ಸಿನಿಮಾ ಪ್ಯಾನ್‌ ಇಂಡಿಯಾ ಪಟ್ಟವನ್ನು ಅಲಂಕರಿಸಿತು. ಪರಭಾಷೆಗಳಿಗೆ ಡಬ್‌ ಆಗಿ, ನೂರಾರು ಕೋಟಿ ಬಾಚಿಕೊಂಡಿತು. ಒಟ್ಟಾರೆಯಾಗಿ 400 ಪ್ಲಸ್‌ ಕೋಟಿ ಗಳಿಕೆ ಕಂಡು, ಹೊಸ ದಾಖಲೆ ಬರೆಯಿತು.
ಹೀಗೆ ಈ ಸಿನಿಮಾ ಹಿಟ್ ಆಗುತ್ತಿದ್ದಂತೆ, ಇದೇ ಸಿನಿಮಾದ ಸೀಕ್ವೆಲ್‌ ಅಥವಾ ಪ್ರೀಕ್ವೆಲ್‌ ಬಗ್ಗೆಯೂ ಚರ್ಚೆ ಶುರುವಾಯ್ತು. ಇದೇ ಕಾಂತಾರದ ಪ್ರೀಕ್ವೆಲ್‌ ಘೋಷಣೆ ಆಯ್ತು. ಕಳೆದ ವರ್ಷದ ನವೆಂಬರ್‌ 27ರಂದು ಚಿತ್ರದ ಫಸ್ಟ್‌ ಲುಕ್‌ ಜತೆಗೆ ಮೋಷನ್‌ ಪೋಸ್ಟರ್‌ ಸಹ ಬಿಡುಗಡೆ ಆಯ್ತು. ದೊಡ್ಡ ಮಟ್ಟದ ಮೆಚ್ಚುಗೆಯೂ ಸಿಕ್ತು. ಈಗ ಈ ಸಿನಿಮಾ ಮೇಲೆ ಕೇವಲ ಕನ್ನಡಿಗರ ಕಣ್ಣಿಲ್ಲ, ಇಡೀ ಭಾರತವೇ ಈ ಸಿನಿಮಾ ಸಲುವಾಗಿ ಕಾಯುತ್ತಿದೆ. ಹೀಗಿರುವಾಗಲೇ ಇದೇ ಚಿತ್ರದ ಅಧಿಕೃತ ಬಿಡುಗಡೆ ದಿನಾಂಕವನ್ನು ಘೋಷಣೆ ಆಗಿದೆ.
