Thalaivar 170: ರಜನಿಕಾಂತ್ ಮುಂದಿನ ಚಿತ್ರಕ್ಕೆ ಫಹಾದ್‌ ಫಾಸಿಲ್‌ ರಾಣಾ ದಗ್ಗುಬಾಟಿ ಎಂಟ್ರಿ, ಇಲ್ಲಿದೆ ತಲೈವರ್ 170 ಅಪ್‌ಡೇಟ್‌
Thalaivar 170updates: ಸೂಪರ್‌ ಸ್ಟಾರ್‌ ರಜನಿಕಾಂತ್ ಅವರ ಮುಂದಿನ ಚಿತ್ರ ತಲೈವರ್ 170ಗೆ ಫಹಾದ್‌ ಫಾಸಿಲ್‌ ರಾಣಾ ದಗ್ಗುಬಾಟಿ ಸೇರಿದಂತೆ ಹಲವು ಪ್ರಮುಖ ನಟರ ಸೇರ್ಪಡೆಯಾಗಿದ್ದಾರೆ. ಮಂಜು ವಾರಿಯರ್, ರಿತಿಕಾ ಸಿಂಗ್ ಮತ್ತು ದುಶಾರಾ ವಿಜಯನ್ ಮುಂತಾದ ನಟರು ತಲೈವರ್ ತಂಡದಲ್ಲಿದ್ದಾರೆ.
ಬೆಂಗಳೂರು: ಸೂಪರ್ಸ್ಟಾರ್ ರಜನಿಕಾಂತ್ ಮುಂದಿನ ಚಿತ್ರ ತಲೈವರ್ 170 ಚಿತ್ರಕ್ಕೆ ಪ್ರಮುಖ ನಟರ ಸೇರ್ಪಡೆಯಾಗುತ್ತಿದೆ. ಇದೀಗ ಮಲಯಾಳದ ಪ್ರಮುಖ ನಟ ಫಹಾದ್‌ ಫಾಸಿಲ್‌ ತಲೈವಾರ್‌ ಚಿತ್ರದಲ್ಲಿ ನಟಿಸಲಿದ್ದಾರೆ ಎಂಬ ಸುದ್ದಿ ಬಂದಿದೆ. ಇದಕ್ಕೂ ಮೊದಲು ಈ ಚಿತ್ರಕ್ಕೆ ರಾಣಾ ದಗ್ಗುಬಾಟಿ ಅವರು ಆಗಮಿಸುವ ಕುರಿತು ಸುದ್ದಿಯಾಗಿತ್ತು. ಈ ಕುರಿತು ಈಗಾಗಲೇ ಲೈಕಾ ಪ್ರೊಡಕ್ಷನ್‌ ಸಂಸ್ಥೆಯು ಸೋಷಿಯಲ್‌ ಮೀಡಿಯಾದಲ್ಲಿ ಅಪ್‌ಡೇಟ್‌ ನೀಡಿದೆ.
"ತಲೈವಾರ್‌ 170 ಚಿತ್ರಕ್ಕೆ ಬಹುಮುಖ ಪ್ರತಿಭೆ ಫಹದ್‌ ಫಾಸಿಲ್‌ ಅವರನ್ನು ಸ್ವಾಗತಿಸುತ್ತಿದ್ದೇವೆ. ಇವರ ಶಕ್ತಿಯು ಸೇರ್ಪಡೆಯು ಚಿತ್ರಕ್ಕೆ ಹೊಸ ಖದರ್‌ ನೀಡುತ್ತಿದೆ" ಎಂದು ಲೈಕಾ ಪ್ರೊಡಕ್ಷನ್‌ ಸಂಸ್ಥೆ ಸೋಷಿಯಲ್‌ ಮೀಡಿಯಾದಲ್ಲಿ ಬರೆದಿದ್ದಾರೆ. ಇದೇ ರೀತಿ ಕಪ್ಪು ಶರ್ಟ್‌ನಲ್ಲಿರುವ ನಟನ ಬ್ಲ್ಯಾಕ್‌ವೈಟ್‌ ಫೋಟೋವನ್ನು ಸಹ ಶೇರ್‌ ಮಾಡಿದೆ.
ಈ ಹೊಸ ಬೆಳವಣಿಗೆಯ ಕುರಿತು ಫಹಾದ್‌ ಅಭಿಮಾನಿಗಳು ಖುಷಿಯನ್ನು ಹಂಚಿಕೊಂಡಿದ್ದಾರೆ. "ಅದ್ಭುತ ತಂಡ, ಈಗ ಈ ಚಿತ್ರದ ತಂಡ ಇನ್ನಷ್ಟು ದೊಡ್ಡದಾಗಿದೆ. ಫಹಾದ್‌, ರಾಣಾ ಮತ್ತು ತಲೈವರ್ ಒಂದೇ ಪರದೆಯಲ್ಲಿ ಕಾಣಿಸುವುದು ನಿಜಕ್ಕೂ ಅದ್ಭುತ. ಬಹುಶಃ ಇದು ನನ್ನ ಜೀವನದ ಸುಂದರ ಚಿತ್ರವಾಗಲಿದೆ" ಎಂದು ಅಭಿಮಾನಿಯೊಬ್ಬರು ಬರೆದುಕೊಂಡಿದ್ದಾರೆ. "ಅದ್ಭುತ ತಂಡ ಕಟ್ಟಿದ್ದೀರಾ, ಅಭಿನಂದನೆಗಳು ಲೈಕಾ ಪ್ರೊಡಕ್ಷನ್‌" ಎಂದು ಇನ್ನೊಬ್ಬರು ಬರೆದಿದ್ದಾರೆ.
ಇದಕ್ಕೂ ಈ ಹಿಂದೆ ಬಾಹುಬಲಿ ನಟ ರಾಣಾ ದಗ್ಗುಬಟ್ಟಿ, ಮಂಜು ವಾರಿಯರ್, ರಿತಿಕಾ ಸಿಂಗ್ ಮತ್ತು ದುಶಾರಾ ವಿಜಯನ್ ಈ ಸಿನಿಮಾ ತಂಡಕ್ಕೆ ಸೇರ್ಪಡೆಯಾಗಿದ್ದರು. "ಡ್ಯಾಮ್‌, ನನಗೆ ನನ್ನ ಕಣ್ಣೀರು ನೋಡಲು ಸಾಧ್ಯವಾಗುತ್ತಿಲ್ಲ. ರಜನಿ ಸರ್‌ ಮತ್ತು ಇತರೆ ನಟರ ಜತೆ ಪರದೆ ಹಂಚಿಕೊಳ್ಳುವ ಅವಕಾಶಕ್ಕಾಗಿ ಅಪಾರವಾಗಿ ಕೃತಜ್ಞನಾಗಿದ್ದೇನೆ" ಎಂದು ರಿತಿಕಾ ಸಿಂಗ್ ಪೋಸ್ಟ್‌ ಮಾಡಿದ್ದಾರೆ.
ಜೈಲರ್ ಚಿತ್ರದಲ್ಲಿ ರಜನಿಕಾಂತ್ ಜೊತೆ, ಲಿಯೋದಲ್ಲಿ ವಿಜಯ್ ಜೊತೆ ಮತ್ತು ಇತ್ತೀಚೆಗಷ್ಟೇ ಶಾರುಖ್ ಖಾನ್ ಜೊತೆ ಜವಾನ್ ಚಿತ್ರದಲ್ಲಿ ಕೆಲಸ ಮಾಡಿದ್ದ ಅನಿರುದ್ಧ್ ರವಿಚಂದರ್ ಅವರು ಚಿತ್ರದ ಸಂಗೀತ ನಿರ್ದೇಶಕರಾಗಿ ಸೇರ್ಪಡೆಯಾಗಿದ್ದಾರೆ. ಟಿಜೆ ಜ್ಞಾನವೇಲು ಅವರು ಈ ಚಿತ್ರದ ನಿರ್ದೇಶಕರಾಗಿದ್ದಾರೆ. ಈ ಹಿಂದೆ ಸೂರ್ಯ ಅಭಿನಯದ ಜೈಭೀಮ್‌ನಂತಹ ಸಿನಿಮಾಗಳನ್ನು ಮಾಡಿದ್ದಾರೆ.
ಹೀಗಾಗಿ ರಜನಿಕಾಂತ್ ಅವರ ಮುಂದಿನ ಸಿನಿಮಾ ತಲೈವರ್ 171 ಸಿನಿಮಾದ ಕುರಿತು ನಿರೀಕ್ಷೆ ಹೆಚ್ಚಾಗಿದೆ. ಮಾಸ್ಟರ್‌, ಕೃತಿ, ವಿಕ್ರಮ್‌, ಲಿಯೋ ಚಿತ್ರಗಳಿಗೆ ಹೆಸರುವಾಸಿಯಾದ ಲೋಕೇಶ್‌ ಕನಕರಾಜ್‌ ಈ ಸಿನಿಮಾವನ್ನು ನಿರ್ದೇಶಿಸಲಿದ್ದಾರೆ.
ರಜನಿಕಾಂತ್ ಕೊನೆಯ ಬಾರಿಗೆ ಆಕ್ಷನ್ ಚಿತ್ರ ಜೈಲರ್ ನಲ್ಲಿ ಕಾಣಿಸಿಕೊಂಡಿದ್ದರು. ನೆಲ್ಸನ್ ದಿಲೀಪ್‌ಕುಮಾರ್ ನಿರ್ದೇಶನದ, ಜೈಲರ್ ಆಗಸ್ಟ್ 10 ರಂದು ವಿಶ್ವದಾದ್ಯಂತ ಬಿಡುಗಡೆಯಾಗಿತ್ತು. ಸೆಪ್ಟೆಂಬರ್‌ನಲ್ಲಿ ಇದು ಜಗತ್ತಿನಾದ್ಯಂತ 650 ಕೋಟಿ ರೂಪಾಯಿಗಿಂತ ಹೆಚ್ಚು ಗಳಿಕೆ ಮಾಡಿದೆ.
ರಜನಿಕಾಂತ್ ಅವರ ಜೈಲರ್ ಚಿತ್ರದಲ್ಲಿ ವಸಂತ ರವಿ, ತಮನ್ನಾ ಭಾಟಿಯಾ, ಯೋಗಿ ಬಾಬು, ರಮ್ಯಾ ಕೃಷ್ಣನ್ ಮತ್ತು ವಿನಾಯಕನ್ ಕೂಡ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಈ ಚಿತ್ರವು ಕನ್ನಡದ ಸೂಪರ್ಸ್ಟಾರ್ ಮತ್ತು ದಿವಂಗತ ನಟ ರಾಜ್‌ಕುಮಾರ್ ಅವರ ಪುತ್ರ ಶಿವ ರಾಜ್‌ಕುಮಾರ್ ಅವರ ಮೊದಲ ತಮಿಳು ಚಿತ್ರವಾಗಿದೆ. ಜೈಲರ್ ಚಿತ್ರದಲ್ಲಿ ಶಿವಣ್ಣನ ನಟನೆಗೆ ಸಾಕಷ್ಟು ಮೆಚ್ಚುಗೆ ವ್ಯಕ್ತವಾಗಿತ್ತು.
