Malayalam OTT: ಒಟಿಟಿಗೆ ಬರ್ತಿದೆ ಮಲಯಾಳಂನ ಐ ಆಮ್ ಕಾದಲನ್ ಸಿನಿಮಾ; ಸೈಬರ್ ಕ್ರೈಂ ಕಥೆಯಲ್ಲಿ ಪ್ರೇಮಲು ಹೀರೋ ನಸ್ಲೀನ್
Malayalam OTT: ಪ್ರೇಮಲು ಖ್ಯಾತಿಯ ನಸ್ಲೀನ್ ಅವರ 'ಐ ಆಮ್ ಕಥಾಲಾನ್' ಸಿನಿಮಾ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾದ ಒಂದು ತಿಂಗಳೊಳಗೆ ಒಟಿಟಿಗೆ ಬರಲು ಸಜ್ಜಾಗಿದೆ. ಈ ಚಿತ್ರವು ಡಿಸೆಂಬರ್ ಮೊದಲ ವಾರದಲ್ಲಿ ಒಟಿಟಿಯಲ್ಲಿ ಪ್ರಸಾರವಾಗಲಿದೆ. ಈ ಚಿತ್ರವು ಸೈಬರ್ ಕ್ರೈಮ್ ಥ್ರಿಲ್ಲರ್ ಎಳೆಯ ಕಥೆ ಹೊಂದಿದೆ.
Malayalam OTT Movie: ಪ್ರೇಮಲು ಚಿತ್ರದ ಮೂಲಕ ನಾಯಕನಾಗಿ ತಮ್ಮ ವೃತ್ತಿಜೀವನದ ಮೊದಲ ಬ್ಲಾಕ್ ಬಸ್ಟರ್ ಕೊಟ್ಟಿದ್ದಾರೆ ಮಲಯಾಳಂ ನಟ ನಸ್ಲೀನ್. ಲವ್‌ಸ್ಟೋರಿ ಜತೆಗೆ ಜೀವನದ ಬಗ್ಗೆ ಸ್ಪಷ್ಟತೆ ಇಲ್ಲದ ಯುವಕನಾಗಿ ಇಂದಿನ ಯುವಕರ ಮನಸ್ಸನ್ನು ಪ್ರತಿಬಿಂಬಿಸುವ ಪಾತ್ರದಲ್ಲಿ ಕಾಣಿಸಿಕೊಂಡು ಗಮನ ಸೆಳೆದಿದ್ದರು ನಟ ನಸ್ಲೀನ್. ಈ ಚಿತ್ರದಲ್ಲಿ ನಸ್ಲೀನ್ ಮತ್ತು ಮಮಿತಾ ಬೈಜು ಅವರ ಕೆಮಿಸ್ಟ್ರಿ ಪ್ರೇಕ್ಷಕರನ್ನು ಆಕರ್ಷಿಶಿಸಿತ್ತು. ಕೇವಲ 3 ಕೋಟಿ ರೂ.ಗಳ ಬಜೆಟ್‌ನಲ್ಲಿ ನಿರ್ಮಿಸಲಾದ ಪ್ರೇಮಲು ಸಿನಿಮಾ 130 ಕೋಟಿ ಗಳಿಸಿ ಸೂಪರ್‌ ಹಿಟ್‌ ಎನಿಸಿಕೊಂಡಿತ್ತು. ಈ ಸಿನಿಮಾವನ್ನು ಗಿರೀಶ್ ಎ.ಡಿ ನಿರ್ದೇಶಿಸಿದ್ದರು.
ಸೈಬರ್ ಕ್ರೈಮ್ ಥ್ರಿಲ್ಲರ್ ...
ಈಗ ಇದೇ ನಟ ಮತ್ತು ನಿರ್ದೇಶಕ ಜೋಡಿ ಸೈಬರ್ ಕ್ರೈಂ ಥ್ರಿಲ್ಲರ್ ಶೈಲಿಯ ಐ ಆಮ್ ಕಾದಲನ್ ಸಿನಿಮಾ ಮೂಲಕ ನವೆಂಬರ್‌ 7ರಂದು ಚಿತ್ರಮಂದಿರಕ್ಕೆ ಆಗಮಿಸಿತ್ತು. ಪ್ರೇಕ್ಷಕರಿಂದ ಮಿಶ್ರ ಪ್ರತಿಕ್ರಿಯೆ ಪಡೆದ ಈ ಸಿನಿಮಾ ಕಲೆಕ್ಷನ್‌ ವಿಚಾರದಲ್ಲಿಯೂ ಡಿಸೆಂಟ್‌ ಗಳಿಕೆ ಕಂಡಿತ್ತು. ಅಷ್ಟಕ್ಕೂ ಪ್ರೇಮಲು ಚಿತ್ರಕ್ಕೂ ಮುನ್ನ ನಾಯಕ ನಸ್ಲೀನ್ ಮತ್ತು ನಿರ್ದೇಶಕ ಗಿರೀಶ್ ಐ ಆಮ್ ಕಥಾಲನ್ ಸಿನಿಮಾ ಕೈಗೆತ್ತಿಕೊಂಡಿದ್ದರು. ಆದರೆ, ಕಾರಣಾಂತರಗಳಿಂದ ಆ ಸಿನಿಮಾ ಮುಂದೂಡಲ್ಪಟ್ಟಿತ್ತು. ಪ್ರೇಮಲು ಸಿನಿಮಾ ತೆರೆಕಂಡ ಬಳಿಕ ಕಾದಲನ್ ಸಿನಿಮಾದ ಬಾಕಿ ಕೆಲಸಗಳನ್ನು ಮುಗಿಸಿಕೊಂಡು, ನ. 7ರಂದು ರಿಲೀಸ್‌ ಆಗಿತ್ತು. ಸೈಬರ್ ಕ್ರೈಮ್ ಥ್ರಿಲ್ಲರ್ ಪ್ರೇಮಕಥೆಯಲ್ಲಿ ಅನೀಶ್ಮಾ ಅನಿಲ್ ಕುಮಾರ್ ನಾಯಕಿಯಾಗಿ ನಟಿಸಿದ್ದಾರೆ.
ಒಂದು ತಿಂಗಳ ಅವಧಿಯಲ್ಲಿ ಒಟಿಟಿಗೆ
ಪ್ರೇಮಲು ಸಿನಿಮಾದ ಕ್ರೇಜ್‌ನಿಂದಾಗಿ ಐ ಆಮ್ ಕಾದಲನ್ ಸಿನಿಮಾ ಬಿಡುಗಡೆಗೆ ಮುನ್ನವೇ ಭಾರಿ ನಿರೀಕ್ಷೆಗಳನ್ನು ಹುಟ್ಟುಹಾಕಿತ್ತು. ಆದರೆ, ಐ ಆಮ್ ಕಾದಲನ್ ಸಿನಿಮಾ ನಿರೀಕ್ಷಿತ ಗಳಿಕೆ ಕಾಣಲಿಲ್ಲ. ಚಿತ್ರದಲ್ಲಿ ಸೈಬರ್ ಕ್ರೈಮ್ ಹಿನ್ನೆಲೆಯ ತಿರುವುಗಳು ಮತ್ತು ನಾಯಕ ನಸ್ಲೀನ್ ಪಾತ್ರವು ಪ್ರೇಕ್ಷಕರನ್ನು ಆಕರ್ಷಿಸಿತ್ತು. ಐ ಆಮ್ ಕಥಾಲನ್ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾದ ಒಂದು ತಿಂಗಳೊಳಗೆ ಒಟಿಟಿಗೆ ಬರಲು ಸಜ್ಜಾಗಿದೆ. ಐ ಆಮ್ ಕಾದಲನ್ ಚಿತ್ರವು ಡಿಸೆಂಬರ್ ಮೊದಲ ವಾರದಲ್ಲಿ ಮನೋರಮಾ ಮ್ಯಾಕ್ಸ್ ಒಟಿಟಿಯಲ್ಲಿ ಪ್ರಸಾರವಾಗಲಿದೆ. ಮಲಯಾಳಂ ಆವೃತ್ತಿ ಮಾತ್ರ ಬಿಡುಗಡೆಯಾಗಲಿದೆ ಎನ್ನಲಾಗುತ್ತಿದೆ. ಒಟಿಟಿ ಬಿಡುಗಡೆಯ ದಿನಾಂಕದ ಬಗ್ಗೆ ಅಧಿಕೃತ ಘೋಷಣೆ ಇನ್ನಷ್ಟೇ ಆಗಬೇಕಿದೆ.
ಐ ಆಮ್ ಕಾದಲನ್ ಕಥೆ ಏನು?
ವಿಷ್ಣು (ನಸ್ಲೀನ್) ಎಂಜಿನಿಯರಿಂಗ್ ಮುಗಿಸಿದ ವಿದ್ಯಾರ್ಥಿ. ಅನೇಕ ಬ್ಯಾಕ್‌ಲಾಗ್‌ಗಳು ಇರುವುದರಿಂದ ಕೆಲಸ ಇಲ್ಲದೇ ಅಲೆಯುತ್ತಿರುತ್ತಾನೆ. ಈ ನಡುವೆ ತನ್ನ ಕಾಲೇಜು ದಿನಗಳಿಂದಲೂ ಶಿಲ್ಪಾ (ಅನೀಶ್ಮಾ) ಎಂಬಾಕೆಯನ್ನು ಪ್ರೀತಿಸುತ್ತಿರುತ್ತಾನೆ. ಇತ್ತ ಶಿಲ್ಪಾ ತನ್ನ ತಂದೆಯ ಫೈನಾನ್ಸ್ ಕಂಪನಿಯಲ್ಲಿ ಕೆಲಸ ಮಾಡುತ್ತಿರುತ್ತಾಳೆ. ಇತ್ತ ವಿಷ್ಣು ಹ್ಯಾಕಿಂಗ್‌ನಲ್ಲಿ ನಿಪುಣ. ಶಿಲ್ಪಾಳ ಇನ್ಸ್ಟಾಗ್ರಾಮ್ ಖಾತೆ ಹ್ಯಾಕ್ ಮಾಡಿ ಸಿಕ್ಕಿಬಿದ್ದಿರುತ್ತಾನೆ.
ಹೀಗಿರುವಾಗಲೇ ಅದೇ ಸಮಯದಲ್ಲಿ, ವಿಷ್ಣುವಿನ ತಂದೆಗೆ ಚಿಟ್ ಫಂಡ್ ಕಂಪನಿಯಲ್ಲಿ ಹಣ ವಂಚಿಸಲಾಗುತ್ತದೆ. ಆತನಿಗೆ ಮೋಸಗಾರ ಎಂದು ಹಣೆಪಟ್ಟಿ ಕಟ್ಟುವುದರ ಜತೆಗೆ ಅವಮಾನವನ್ನು ಮಾಡುತ್ತಾರೆ. ಅಪ್ಪನಿಗೆ ಹೀಗಾಯ್ತಲ್ಲ ಎಂದು ವಿಷ್ಣು, ಚಿಟ್ ಫಂಡ್ ಕಂಪನಿಯಿಂದ ತಂದೆ ಕಳೆದುಕೊಂಡ ಹಣವನ್ನು ತನ್ನ ಹ್ಯಾಕಿಂಗ್ ಬುದ್ಧಿ ಉಪಯೋಗಿಸಿ ಹೇಗೆ ಹಣ ಪಡೆಯುತ್ತಾನೆ? ಮತ್ತೊಂದು ಕಡೆ ಶಿಲ್ಪಾಳ ಪ್ರೀತಿಯನ್ನು ಹೇಗೆ ಗಿಟ್ಟಿಸಿಕೊಳ್ಳುತ್ತಾನೆ ಎಂಬುದು ಚಿತ್ರದ ಕಥೆ.
ಪ್ರೇಮಲು ಚಿತ್ರಕ್ಕೂ ಮೊದಲು...
ಪ್ರೇಮಲು ಸಿನಿಮಾಗಿಂತ ಮೊದಲು ಅಂದರೆ 2022ರಲ್ಲಿ 'ಐ ಆಮ್ ಕಾದಲನ್' ಚಿತ್ರದ ಚಿತ್ರೀಕರಣ ಪ್ರಾರಂಭವಾಯಿತು. ಪ್ರೇಮಲು ಸಿನಿಮಾ ಕಾರಣದಿಂದಾಗಿ ಚಿತ್ರದ ಚಿತ್ರೀಕರಣವನ್ನು ದೀರ್ಘಕಾಲದವರೆಗೆ ಮುಂದೂಡಲಾಗಿತ್ತು. ಸಿದ್ಧಾರ್ಥ್ ಪ್ರದೀಪ್ 'ಐ ಆಮ್ ಕಾದಲನ್' ಚಿತ್ರಕ್ಕೆ ಸಂಗೀತ ಸಂಯೋಜಿಸಿದ್ದಾರೆ. ನ. 7ರಂದು ಈ ಸಿನಿಮಾ ಚಿತ್ರಮಂದಿರದಲ್ಲಿ ತೆರೆಕಂಡಿತ್ತು.
