Jailer Web Series: ಓಟಿಟಿಗೆ ಬಂತು ನೋಡಿ ಸೂಪರ್ಸ್ಟಾರ್ ರಜನಿಕಾಂತ್ ನಟನೆಯ ‘ಜೈಲರ್ ಅನ್‌ಲಾಕ್ಡ್’ ವೆಬ್ ಸೀರೀಸ್
Jailer Web Series: ರಜನಿಕಾಂತ್ ಅಭಿನಯದ ಜೈಲರ್ ಸಿನಿಮಾದ ಮೇಲೆ ಸಾಕ್ಷ್ಯಚಿತ್ರ ವೆಬ್ ಸಿರೀಸ್ ಬಂದಿದೆ. ಜೈಲರ್ ಅನ್‌ಲಾಕ್ಡ್ ಹೆಸರಿನೊಂದಿಗೆ ಬಿಡುಗಡೆಯಾದ ಈ ವೆಬ್ಸಿರೀಸ್ ಸನ್ ನೆಕ್ಸ್ಟ್ ಒಟಿಟಿಯಲ್ಲಿ ಸ್ಟ್ರೀಮ್ ಆಗುತ್ತಿದೆ.
ಸೂಪರ್ ಸ್ಟಾರ್ ರಜನಿಕಾಂತ್ ಅಭಿನಯದ ಜೈಲರ್ ಸಿನಿಮಾದ ಮೇಲೆ ವೆಬ್ ಸೀರೀಸ್ ಬಂದಿದೆ. ಆಗಸ್ಟ್ 16ರ ಶುಕ್ರವಾರ ಸನ್ನೆಕ್ಸ್ಟ್ ಒಟಿಟಿ ವೇದಿಕೆಯಲ್ಲಿ ಜೈಲರ್ ಅನ್‌ಲಾಕ್ಡ್ ಎಂಬ ಸಾಕ್ಷ್ಯಚಿತ್ರ ಬಿಡುಗಡೆ ಆಗಿದೆ. ಈ ಸೀರೀಸ್ ಒಟ್ಟು 3 ಸಂಚಿಕೆಗಳೊಂದಿಗೆ 91 ನಿಮಿಷಗಳ ರನ್ಟೈಮ್ನೊಂದಿಗೆ ಸ್ಟ್ರೀಮಿಂಗ್ ಆಗುತ್ತಿದೆ. ಈ ಸಾಕ್ಷ್ಯಚಿತ್ರ ಸೀರೀಸ್ನ ಪೋಸ್ಟರ್ ಅನ್ನು ಸನ್ನೆಕ್ಸ್ಟ್ ಟ್ವಿಟರ್‌ನಲ್ಲಿ ಹಂಚಿಕೊಂಡಿದೆ. ಈ ಪೋಸ್ಟರ್‌ನಲ್ಲಿ ರಜನಿಕಾಂತ್ ಜೊತೆಗೆ ನಿರ್ದೇಶಕ ನೆಲ್ಸನ್ ಮತ್ತು ಸಂಗೀತ ನಿರ್ದೇಶಕ ಅನಿರುದ್ಧ್ ಕಾಣಿಸಿಕೊಂಡಿದ್ದಾರೆ.
ಈ ಡಾಕ್ಯುಮೆಂಟರಿ ಸೀರೀಸ್ನಲ್ಲಿ ಜೈಲರ್ ಚಿತ್ರದ ಪ್ರಮುಖ ಅಂಶಗಳು, ಬಾಕ್ಸಾಫೀಸ್ ದಾಖಲೆಗಳ ಜೊತೆಗೆ ಟೆಕ್ಸಿಷಿಯನ್ಸ್ ಸಂದರ್ಶಗಳಿವೆ. ನಿರ್ದೇಶಕ ನೆಲ್ಸನ್ ದಿಲೀಪ್ ಕುಮಾರ್, ಸಂಗೀತ ನಿರ್ದೇಶಕ ಅನಿರುದ್ದ್ ಮತ್ತು ಚಿತ್ರಕ್ಕೆ ಕೆಲಸ ಮಾಡಿದವರು ತಮ್ಮ ಅನುಭವಗಳನ್ನು ಈ ವೇಳೆ ಹಂಚಿಕೊಂಡಿದ್ದಾರೆ. ರಜನಿಕಾಂತ್ ಅವರೊಂದಿಗೆ ಸಿನಿಮಾ ಮಾಡುವ ಅವಕಾಶ ಸಿಕ್ಕಿದ್ದು ಹೇಗೆ? ನಿರ್ದೇಶಕ ನೆಲ್ಸನ್ ಅವರು ರಜನಿ ಇಮೇಜ್ ಮತ್ತು ಕ್ರೇಜ್‌ಗೆ ತಕ್ಕಂತೆ ಕಥೆ ಬರೆಯಲು ಎದುರಿಸಿದ ಸವಾಲುಗಳ ಬಗ್ಗೆ ಈ ಸಾಕ್ಷ್ಯಚಿತ್ರದಲ್ಲಿ ವಿವರಿಸಿದ್ದಾರೆ.
ಅಲ್ಲದೆ, ಮಲಯಾಳಂ ಸೂಪರ್ಸ್ಟಾರ್ ಮೋಹನ್ ಲಾಲ್ ಮತ್ತು ಕನ್ನಡದ ಸೂಪರ್ ಸ್ಟಾರ್ ಶಿವರಾಜ್ ಕುಮಾರ್ ಅವರನ್ನು ಅತಿಥಿ ಪಾತ್ರಕ್ಕೆ ಒಪ್ಪಿಸಿದ್ದೇಗೆ? ಆದರೆ ಇವರಿಗೂ ಮುನ್ನ ಅತಿಥಿ ಪಾತ್ರಗಳಿಗೆ ಪರಿಗಣಿಸಲಾದ ಇತರ ಕೆಲವು ಸ್ಟಾರ್ ಹೀರೋಗಳ ಹೆಸರನ್ನೂ ನೆಲ್ಸನ್ ಬಹಿರಂಗಪಡಿಸಿದ್ದಾರೆ. ಈ ಸಿರೀಸ್ನಲ್ಲಿ ಸಂದರ್ಶನಗಳು ಮಾತ್ರವಲ್ಲದೆ ಜೈಲರ್ ಚಿತ್ರದ ಮೇಕಿಂಗ್ ದೃಶ್ಯಗಳನ್ನು ತೋರಿಸಲಾಗಿದೆ. ಆಕ್ಷನ್ ಸೀಕ್ವೆನ್ಸ್‌ ಹೇಗೆ ಚಿತ್ರೀಕರಿಸಲಾಗಿದೆ? ತೆರೆಮರೆಯಲ್ಲಿ ಏನೆಲ್ಲಾ ನಡೆಯಿತು ಎಂಬುದನ್ನು ಸಿರೀಸ್ನಲ್ಲಿ ವಿವರವಾಗಿ ತೋರಿಸಲಾಗಿದೆ.
ಜೈಲರ್ 650 ಕೋಟಿ ಕಲೆಕ್ಷನ್
ಜೈಲರ್ ಸಿನಿಮಾ ಬಿಡುಗಡೆಗೊಂಡು ಒಂದು ವರ್ಷ ಕಳೆದಿದೆ. ಆಗಸ್ಟ್ 10, 2023ರಲ್ಲಿ ಸಿನಿಮಾ ಬಿಡುಗಡೆಗೊಂಡಿತ್ತು. ಬಾಕ್ಸಾಫೀಸ್ನಲ್ಲಿ ಧೂಳೆಬ್ಬಿಸಿದ್ದ ಜೈಲರ್, 650 ಕೋಟಿಗೂ ಹೆಚ್ಚು ಕೊಳ್ಳೆ ಹೊಡೆದಿತ್ತು. 2023ರಲ್ಲಿ ಕಾಲಿವುಡ್ನಲ್ಲಿ ಅತಿ ಹೆಚ್ಚು ಕಲೆಕ್ಷನ್ ಮಾಡಿದ ಚಿತ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ತೆಲುಗಿಗೆ ಡಬ್ ಆದ ಈ ಸಿನಿಮಾ 85 ಕೋಟಿ ಕಲೆಕ್ಷನ್ ಮಾಡಿತ್ತು. ರಜನಿ ಜೊತೆಗೆ ಮಿರ್ನಾ ಮೆನನ್, ವಸಂತ್ ರವಿ, ತಮನ್ನಾ ಭಾಟಿಯಾ, ವಿನಾಯಕನ್, ಯೋಗಿ ಬಾಬು, ರಮ್ಯ ಕೃಷ್ಣ, ಜಾಕಿ ಶ್ರಾಫ್, ಸುನಿಲ್ ಸೇರಿದಂತೆ ಪ್ರಮುಖರು ಚಿತ್ರದಲ್ಲಿದ್ದಾರೆ.
ಜೈಲರ್ ಸೀಕ್ವೆಲ್
ಜೈಲರ್ ಚಿತ್ರದಲ್ಲಿ ರಜನಿಕಾಂತ್ ನಟನೆ ಮತ್ತು ಅವರ ಹೀರೋಯಿಸಂ ಅಭಿಮಾನಿಗಳನ್ನು ಆಕರ್ಷಿಸಿತು. ಇದೀಗ ಜೈಲರ್ ಸೀಕ್ವೆಲ್ ಬರುತ್ತಿದೆ. ಜೈಲರ್ ಪಾರ್ಟ್ 2 ಚಿತ್ರವು ಈ ವರ್ಷ ಸೆಟ್ಟೇರಲಿದೆ ಎಂದು ವರದಿಯಾಗಿದೆ. ಸದ್ಯ ರಜನಿಕಾಂತ್ ಜೈ ಭೀಮ್ ಖ್ಯಾತಿಯ ಟಿಜೆ ಜ್ಞಾನವೇಲ್ ನಿರ್ದೇಶನದಲ್ಲಿ ವೆಟ್ಟೈಯಾನ್ ಸಿನಿಮಾ ಮಾಡುತ್ತಿದ್ದಾರೆ. ಇದರಲ್ಲಿ ಅಮಿತಾಬ್ ಬಚ್ಚನ್ ಪ್ರಮುಖ ಪಾತ್ರ ನಿರ್ವಹಿಸುತ್ತಿದ್ದಾರೆ. ವೆಟ್ಟೈಯನ್ ನಂತರ ರಜನಿಕಾಂತ್ ಅವರು ಲೋಕೇಶ್ ಕನಕರಾಜ್ ಜೊತೆ ಸಿನಿಮಾ ಮಾಡಲಿದ್ದಾರೆ.
