ಬಿಗ್‌ ಬಾಸ್‌ ಕನ್ನಡ 11ರ ವಾರದ ಕಥೆ ಕಿಚ್ಚನ ಜತೆ; ಅಚ್ಚರಿಯ ವ್ಯಕ್ತಿಗೆ ಕಿಚ್ಚನ ಚಪ್ಪಾಳೆ, ಎರಡನೇ ವಾರದ ಪಂಚಾಯ್ತಿಯಲ್ಲಿ ಏನೆಲ್ಲ ಆಯ್ತು?
ಬಿಗ್‌ ಬಾಸ್‌ ಕನ್ನಡ 11ರ ಎರಡನೇ ವಾರದ ಕಿಚ್ಚನ ಪಂಚಾಯ್ತಿಯಲ್ಲಿ ಒಂದಷ್ಟು ವಿಶೇಷತೆಗಳು ವೀಕ್ಷಕರಿಗೆ ಸಿಕ್ಕಿವೆ. ಅದೇ ವೀಕ್ಷಕರಿಂದ ಸ್ಪರ್ಧಿಗಳಿಗೂ ಉಡುಗೊರೆಗಳು ಕೈ ಸೇರಿವೆ. ವಿಶೇಷ ವ್ಯಕ್ತಿಗೂ ಈ ವಾರದ ಕಿಚ್ಚನ ಚಪ್ಪಾಳೆ ಸಿಕ್ಕಿದೆ.
Bigg boss Kannada 11: ಬಿಗ್‌ಬಾಸ್‌ ಕನ್ನಡ ಸೀಸನ್‌ 11ರ ಎರಡನೇ ವಾರದ ಕಿಚ್ಚನ ಪಂಚಾಯ್ತಿ ನಡೆದಿದೆ. ಮೊದಲ ವಾರಕ್ಕೆ ಹೋಲಿಸಿದರೆ, ಎರಡನೇ ವಾರ ಮನೆ ಮಂದಿಯ ನಡುವೆ ಮತ್ತಷ್ಟು ಆಪ್ತ ಭಾವ, ಮತ್ತಷ್ಟು ಕಿತ್ತಾಟ ನಡೆದಿದೆ. ಜಗಳ, ಮುನಿಸೂ ಮನೆ ಮಾಡಿದೆ. ಜತೆಗೆ ಈ ವಾರ ಮನೆ ಒಬ್ಬಿಬ್ಬರು ಮಾಡಿದ ಎಡವಟ್ಟಿನಿಂದ ಎಲ್ಲ ಸ್ಪರ್ಧಿಗಳು ಶಿಕ್ಷೆ ಅನುಭವಿಸುವಂತಾಗಿತ್ತು. ಆ ಕಾರಣಕ್ಕೆ ಎಲ್ಲರನ್ನೂ ನಾಮಿನೇಟ್‌ ಮಾಡಿ ಬಿಗ್‌ಬಾಸ್‌ ಆದೇಶಿಸಿದ್ದರು. ಇದೀಗ ಕಿಚ್ಚನ ಆಗಮನವಾಗಿದೆ, ಇಡೀ ವಾರ ಏನೆಲ್ಲ ತಪ್ಪುಗಳು ನಡೆದಿವೆಯೋ, ಅದಕ್ಕೆ ಕಾರಣರಾದ ತಪ್ಪಿತಸ್ತರನ್ನು ಬೆಂಡೆತ್ತಿದ್ದಾರೆ.
ಪರದೆ ಸರಿಸಿ, ಗಾರ್ಡನ್‌ ಏರಿಯಾದಲ್ಲಿ ಏನು ನಡೆಯುತ್ತಿದೆ ನೋಡು ಎಂದು ನರಕವಾಸಿ ಮಾನಸಾಗೆ ಗೋಲ್ಡ್‌ ಸುರೇಶ್‌ ಹೇಳಿದ್ದರು. ಆದರೆ, ಟೀಮ್‌ನ ನಾಯಕಿಯಾಗಿದ್ದ ಗೌತಮಿ ಜಾಧವ್‌, ಮಾನಸಾ ಎಂಬುದು ಗೊತ್ತಿಲ್ಲದೆ, ಅನುಷಾ ರೈ ಅವರನ್ನು ನೇರವಾಗಿ ನಾಮಿನೇಟ್‌ ಮಾಡಿದ್ದರು. ಆದರೆ, ಇದರ ಹಿಂದಿರುವುದು ಯಾರು ಎಂಬುದನ್ನು ಶನಿವಾರದ ಕಿಚ್ಚನ ಪಂಚಾಯ್ತಿಯಲ್ಲಿ ಸುದೀಪ್ ಬಯಲು ಮಾಡಿದ್ದಾರೆ. ಈ ವಿಚಾರದಲ್ಲಿ ಗೋಲ್ಡ್‌ ಸುರೇಶ್‌ ಅವರದ್ದೇ ತಪ್ಪು ಎಂದು ತೋರಿಸಿದ್ದಾರೆ ಸುದೀಪ್.
ಬ್ಲೈಂಡ್ಸ್ ಹಿಂದೆ ಏನು ನಡೆಯುತ್ತಿದೆ ಎಂಬುದನ್ನು ನೋಡಲು ನಿಮಗೆ ಕಣ್ಣಿಲ್ಲವೇ, ಅಲ್ಲಿಯವರೆಗೂ ಹೋಗಲು ನಿಮಗೆ ಕೈ ಕಾಲು ಇಲ್ಲವೇ? ನೀವೇ ಹೋಗಬಹುದಿತ್ತು ಎಂದು ಸುದೀಪ್ ಹೇಳಿದಾಗ, ನಾನೂ ಹೋಗಿ ನೋಡಿದೆ ಎಂದು ಸುರೇಶ್‌ ಪ್ರತ್ಯುತ್ತರ ನೀಡಿದ್ದಾರೆ. ಬಳಿಕ ಗೊತ್ತಿಲ್ಲದೆ ಮಾಡೋದಕ್ಕೆ ಮಿಸ್ಟೇಕ್ ಅಂತೀವಿ. ಗೊತ್ತಿದ್ದೂ ಮಾಡೋದಕ್ಕೆ ಮಿಸ್ಟೇಕ್ ಅನ್ನಲ್ಲ. ಚಾಲೆಂಜಿಂಗ್ ಅಂತೀವಿ. ಅದು ದೊಡ್ಡ ಬ್ಲಂಡರ್. ನಮ್ಮ ಪ್ರೀತಿಗೆ ಭಾಗಿಯಾಗಿ ತಾವೆಲ್ಲರೂ ಚಾಲೆಂಜ್‌ ಮಾಡಬೇಡಿ ಎಂದು ನೇರವಾಗಿಯೇ ತಿರುಗೇಟು ಕೊಟ್ಟಿದ್ದಾರೆ ಸುದೀಪ್.
ವಿಶೇಷ ಉಡುಗೊರೆ ಪಡೆದ ಸ್ಪರ್ಧಿಗಳು..
ಬಿಗ್‌ಬಾಸ್‌ ಸ್ಪರ್ಧಿಗಳಿಗೆ ಈ ವಾರ ಜನರಿಂದ ಒಂದಷ್ಟು ವಿಶೇಷ ಉಡುಗೊರೆಗಳು ಸಿಕ್ಕಿವೆ. ಅನುಷಾ ರೈಗೆ ಚಾರ್ಜರ್‌ ಸಿಕ್ಕರೆ, ಧನರಾಜ್‌ಗೆ ಗಾಳಿ ಹೊಡೆಯುವ ಹ್ಯಾಂಡ್‌ ಪಂಪ್‌, ಭವ್ಯಾ ಗೌಡಗೆ ಕ್ಯಾಲ್ಕುಲೇಟರ್‌ ಸಿಕ್ಕಿದೆ. ತ್ರಿವಿಕ್ರಮ್‌ಗೆ ಸೀಟಿ ಹೊಡೆಯದ ವಿಸಲ್‌ ಸಿಕ್ಕಿದೆ. ಐಶ್ವರ್ಯಾಗೆ ಗೊಂಬೆ, ಹಂಸಾಗೆ ಮೆದುಳು ಮತ್ತು ಬೆಂಡೆಕಾಯಿ, ಜಗದೀಶ್‌ಗೆ ಕೆಂಪು ಬನಿಯನ್‌ ಮತ್ತು ಚಡ್ಡಿ ಸಿಕ್ಕಿದೆ. ಮೋಕ್ಷಿತಾ ಪೈಗೆ ಸಿಹಿ ಮತ್ತು ಖಾರ ಕಳಿಸಿಕೊಡಲಾಗಿದೆ. ಗೋಲ್ಡ್‌ ಸುರೇಶ್‌ಗೆ ಟೋಪಿ, ಧರ್ಮ ಕೀರ್ತಿರಾಜ್‌ಗೆ ಬೈನಾಕ್ಯುಲರ್‌ ಸಿಕ್ಕಿದೆ. ಚೈತ್ರಾ ಕುಂದಾಪುರಗೆ ಇದ್ದಿಲು ಸಿಕ್ಕಿದೆ. ಮಾನಸಾಗೆ ಕನ್ನಡಿ, ರಂಜಿತ್‌ಗೆ ಆಮೆ, ಗೌತಮಿ ಜಾಧವ್‌ಗೆ ಮಾಸ್ಕ್‌ ನೀಡಲಾಗಿದೆ. ಶಿಶಿರ್‌ಗೆ ಹೀರೋ ಸನ್‌ಗ್ಲಾಸ್‌ ಸಿಕ್ಕಿದೆ. ಈ ವಸ್ತುಗಳನ್ನು ಕೊಟ್ಟು ಮಾರ್ಮಿಕವಾಗಿ ಅರ್ಥ ಮಾಡಿಸಿದ್ದಾರೆ ಬಿಗ್‌ಬಾಸ್‌.
ಕಿಚ್ಚನ ಚಪ್ಪಾಳೆ ಸಿಕ್ಕಿದ್ದು ಕಿಚ್ಚನಿಗೆ..
ಸಹಜವಾಗಿ ಬಿಗ್‌ಬಾಸ್‌ ಕನ್ನಡ ಶೋನಲ್ಲಿ ಕಿಚ್ಚನ ಚಪ್ಪಾಳೆ ತುಂಬ ಮಹತ್ವದ್ದು. ಈ ಹಿಂದಿನ ಶೋಗಳಲ್ಲಿ ಕಿಚ್ಚನ ಚಪ್ಪಾಳೆ ಸಿಕ್ಕ ಬಳಿಕ ಎಷ್ಟೋ ಸ್ಪರ್ಧಿಗಳು ಮತ್ತಷ್ಟು ಜೋಷ್‌ನಲ್ಲಿ ಆಟ ಆಡಿದ್ದಾರೆ. ಅದೇ ರೀತಿ ಸೀಸನ್‌ 11 ಶುರುವಾಗಿ ಎರಡು ವಾರಗಳು ಕಳೆದರೂ, ಈವರೆಗೂ ಒಬ್ಬರಿಗೂ ಕಿಚ್ಚನಿಂದ ಚಪ್ಪಾಳೆ ಸಿಕ್ಕಿಲ್ಲ. ಆದರೆ, ತಮಗೆ ತಾವೇ ಚಪ್ಪಾಳೆ ತಟ್ಟಿಕೊಂಡಿದ್ದಾರೆ ಸುದೀಪ್. ನಿಮ್ಮೆಲ್ಲರಿಗೂ ಅರ್ಥ ಮಾಡಿಸುವುದು, ನಿಮ್ಮ ತಪ್ಪು ತಿದ್ದುವುದು, ಮಾರ್ಗದರ್ಶನ ಮಾಡುವುದು ನನಗೆ ಅದು ಸುಲಭದ ಕೆಲಸ ಆಗಿರಲಿಲ್ಲ. ಹಾಗಾಗಿ ಆ ಚಪ್ಪಾಳೆಗೆ ನಾನೇ ಅರ್ಹ ಎನಿಸಿತು ಎಂದು ನನಗೆ ನಾನೇ ಚಪ್ಪಾಳೆ ತಟ್ಟಿಕೊಂಡಿದ್ದೇನೆ ಎಂದರು. ಮತ್ತೊಂದು ಕಡೆ ಈ ವಾರ ಉಗ್ರಂ ಮಂಜು ಅವರ ಬರ್ತ್‌ಡೇ. ಹಾಗಾಗಿ ಆ ಕಾರಣಕ್ಕೆ ಬಿಗ್‌ ಬಾಸ್‌ ಗ್ರ್ಯಾಂಡ್‌ ಓಪನಿಂಗ್‌ ದಿನ ಧರಿಸಿದ ಜಾಕೆಟ್‌ಅನ್ನು ಉಡುಗೊರೆಯಾಗಿ ನೀಡಿದ್ದಾರೆ.
