ಮಕ್ಕಳು ಎಷ್ಟು ಹೊತ್ತು ಇಂಟರ್ನೆಟ್ ಬಳಸ್ತಾರೆ? ಆಧಾರ್ ಆಧರಿತ ಲಾಗಿನ್‌ ವ್ಯವಸ್ಥೆ ಪರಿಚಯಿಸಲು ಮುಂದಾದ ಭಾರತ ಸರ್ಕಾರ
ಮಕ್ಕಳ ಇಂಟರ್ನೆಟ್ ಬಳಕೆ ಕಡಿವಾಣಕ್ಕೆ ಹೊಸ ನೀತಿ ರೂಪಿಸಲು ಸರ್ಕಾರ ಮುಂದಾಗಿದೆ. ಇನ್ನು ಮುಂದೆ ಮಕ್ಕಳ ಇಂಟರ್ನೆಟ್ ಬಳಸಲು ಆಧಾರ್ ಆಧರಿತ ಲಾಗಿನ್‌ ಹಾಗೂ ಪೋಷಕರ ಪರಿಶೀಲನೆಯೂ ಕಡ್ಡಾಯವಾಗಿದೆ.
ಇತ್ತೀಚಿನ ದಿನಗಳಲ್ಲಿ ಮಕ್ಕಳ ಸ್ಕ್ರೀನ್‌ಟೈಮ್‌ ಬಳಕೆ ಹೆಚ್ಚಿದೆ. ಅತಿಯಾದ ಅಂರ್ತಜಾಲದ ಬಳಕೆಯು ಮಕ್ಕಳಲ್ಲಿ ಹಲವು ರೀತಿಯ ಸಮಸ್ಯೆಗಳು ಎದುರಾಗಲು ಕಾರಣವಾಗಿದೆ. ಇಂಟರ್ನೆಟ್ ಬಳಸುವ ಮಕ್ಕಳನ್ನು ಗುರಿಯಾಗಿಸಿಕೊಂಡು ದುರುಪಯೋಗ ಪಡಿಸಿಕೊಳ್ಳುವ ಪ್ರಕರಣಗಳು ವರದಿಯಾಗುತ್ತಿವೆ. ಈ ಎಲ್ಲಾ ಕಾರಣದಿಂದ ಮಕ್ಕಳ ಇಂಟರ್ನೆಟ್ ಬಳಕೆಗೆ ಮಿತಿ ಹೇರಲು ಸರ್ಕಾರವು ಕೆಲವು ನೀತಿಗಳನ್ನು ರೂಪಿಸಲು ಸಜ್ಜಾಗಿದೆ. ಅಲ್ಲದೆ ಈ ಕುರಿತ ಪ್ರಸ್ತಾವನೆಯನ್ನೂ ಮುಂದಿಟ್ಟಿದೆ.
ಮುಂಬರುವ ಡಿಜಿಟಲ್ ಪಸರ್ನಲ್ ಡೇಟಾ ಪ್ರೊಟೆಕ್ಷನ್ ಆಕ್ಟ್ ಮಕ್ಕಳ ಆನ್ಲೈನ್ ಚಟುವಟಿಕೆಗಳಿಗಾಗಿ 2 ಸ್ಟೆಪ್‌ ವೆರಿಫಿಕೇಶನ್‌ ಭಾಗವಾಗಿ ಪೋಷಕರ ಪರಿಶೀಲನೆ ಜೊತೆಗೆ ಆಧಾರ್ ಆಧಾರಿತ ಲಾಗಿನ್‌ ವ್ಯವಸ್ಥೆಯನ್ನು ತರುವ ಪ್ರಸ್ಥಾಪ ಮುಂದಿಟ್ಟಿದೆ.
ಡೇಟಾ ಗೌಪ್ಯತೆ ಮತ್ತು ಭದ್ರತಾ ಸವಾಲುಗಳ ಮೇಲಿನ ಬಹು ನಿರೀಕ್ಷಿತ ಮಸೂದೆಯಲ್ಲಿನ ಈ ಪ್ರಮುಖ ಪ್ರಸ್ತಾವನೆಯು ಆನ್ಲೈನ್ ಸೇವೆಗಳನ್ನು ಬಳಸಲು ಮಕ್ಕಳ ವಯಸ್ಸನ್ನು ಪರಿಶೀಲಿಸಲು ಮತ್ತು ಬಳಕೆಗೆ ಮೊದಲು ಅವರ ಪೋಷಕರ ಒಪ್ಪಿಗೆಯನ್ನು ಪಡೆಯಲು ಆಧಾರ್ ಆಧಾರಿತ ವ್ಯವಸ್ಥೆಯನ್ನು ಬಳಸುವುದನ್ನು ಸೂಚಿಸುತ್ತದೆ.
ಡೇಟಾ ಉಲ್ಲಂಘನೆಯ ಬಗ್ಗೆ ಬಳಕೆದಾರರಿಗೆ ತಿಳಿಸಲು ಟೆಕ್ ಕಂಪನಿಗಳಿಗೆ 2 ಸ್ಟೆಪ್‌ ವೆರಿಫಿಕೇಶನ್‌ ಅಧಿಸೂಚನೆ ಕ್ರಮವನ್ನು ಪರಿಚಯಿಸುವುದನ್ನು ಪ್ರಸ್ತಾವನೆಯು ಹೈಲೈಟ್ ಮಾಡುತ್ತದೆ.
ತಮ್ಮ ಆನ್ಲೈನ್ ವೇದಿಕೆ ಅಪ್ರಾಪ್ತ ವಯಸ್ಸಿನ ಮಕ್ಕಳಿಗೆ ಪ್ರವೇಶ ಕಲ್ಪಿಸುವ ಮುನ್ನ ಕಂಪನಿಗಳು ʼಪೋಷಕರ ಒಪ್ಪಿಗೆ ಪರಿಶೀಲನೆʼ ಸಂಗ್ರಹಿಸುವ ಅಗತ್ಯವಿದೆ ಎಂದು ಕಾಯ್ದೆ ಹೇಳುತ್ತದೆ.
ಆದಾಗ್ಯೂ, ದತ್ತಾಂಶ ಮಸೂದೆಯನ್ನು ಪರಿಚಯಿಸಿದಾಗಿನಿಂದಲೂ ಈ ಪ್ರಸ್ತಾಪವು ಸ್ಥಗಿತವಾಗಿದೆ. ಏಕೆಂದರೆ ಕಾಯ್ದೆಯು ಮಕ್ಕಳ ವಯಸ್ಸಿನ ದೃಢೀಕರಣವನ್ನು ಪ್ಲಾಟ್‌ಫಾರ್ಮ್‌ಗಳು ನಿರ್ವಹಿಸುವ ಮಾರ್ಗಗಳನ್ನು ಸೂಚಿಸುವುದಿಲ್ಲ.
ಈ ಕಳವಳವನ್ನು ಪರಿಹರಿಸಲು, ಎರಡು ಶಿಫಾರಸುಗಳನ್ನು ಮಾಡುವ ಸಾಧ್ಯತೆಯಿದೆ. ಒಂದು ಪೋಷಕರ ಡಿಜಿಲಾಕರ್ ಅಪ್ಲಿಕೇಶನ್ ಅನ್ನು ಬಳಸುವುದು, ಅದರಲ್ಲಿ ಪೋಷಕರ ಆಧಾರ್ ವಿವರಗಳನ್ನು ಆಧರಿಸಿದೆ. ಇನ್ನೊಂದು ಉದ್ಯಮವು ಎಲೆಕ್ಟ್ರಾನಿಕ್ ಟೋಕನ್ ವ್ಯವಸ್ಥೆಯನ್ನು ರಚಿಸಲು ಪ್ರಯತ್ನಿಸಬಹುದು ಎಂದು ಹೇಳಲಾಗುತ್ತಿದೆ.
ಇದು ಆಧಾರ ಆಧಾರಿತ ದೃಢೀಕರಣವಾಗಿರುತ್ತದೆ. ಇದರಲ್ಲಿ ಇಂಟರ್ನೆಟ್ ವೇದಿಕೆಗಳು ಅಥವಾ ಯಾವುದೇ ಕಂಪನಿಗಳು ಬಳಕೆದಾರರ ಆಧಾರ್ ಮಾಹಿತಿಯನ್ನು ತಿಳಿಯಲು ಸಾಧ್ಯವಿಲ್ಲ. ಇದು ಬಳಕೆದಾರರ ವಯಸ್ಸಿನ ಕುರಿತು ಮಾಹಿತಿ ಕೇಳುತ್ತದೆ. ಇದು ಕೇವಲ ಎಸ್ ಅಥವಾ ನೋ ಆಯ್ಕೆಯನ್ನು ಮಾತ್ರ ಕೇಳುತ್ತದೆ ಅಷ್ಟೇ ಎಂದು ಸರ್ಕರಿ ಅಧಿಕಾರಿ ತಿಳಿಸಿದ್ದಾಗಿ ಇಂಡಿಯನ್ಸ್ ವರದಿಯನ್ನು ಉಲ್ಲೇಖಿಸಿದೆ ನ್ಯೂಸ್ 18.
ಕಾಯ್ದೆಯನ್ನು ಕಾರ್ಯರೂಪಕ್ಕೆ ತರಲು ರೂಪಿಸಬೇಕಾದ 25 ನಿಯಮಗಳಲ್ಲಿ ಆಧಾರ್ ಆಧಾರಿತ ಸಮ್ಮತಿಯೂ ಒಂದಾಗಿದೆ ಮತ್ತು ಸರ್ಕಾರವು ಸೂಕ್ತವೆಂದು ಭಾವಿಸುವ ಯಾವುದೇ ನಿಬಂಧನೆಗಾಗಿ ನಿಯಮಗಳನ್ನು ಜಾರಿಗೊಳಿಸಲು ಅಧಿಕಾರವನ್ನು ಹೊಂದಿದೆ.
ಏನಿದು ಡಿಜಿಟಲ್ ಪರ್ಸನಲ್ ಡೇಟಾ ಪ್ರೊಟೆಕ್ಷನ್ ಆಕ್ಟ್
ಆಗಸ್ಟ್‌ನಲ್ಲಿ ಸಂಸತ್ತು ಅಂಗೀಕರಿಸಿದ ಡಿಜಿಟಲ್ ಪರ್ಸನಲ್ ಡಾಟಾ ಪ್ರೊಟೆಕ್ಷನ್ (ಡಿಪಿಡಿಪಿ) ಆಕ್ಟ್, ಡೇಟಾ ಬಳಕೆಗೆ ಸಂಬಂಧಿಸಿದಂತೆ ಬಳಕೆದಾರರ ಹಕ್ಕುಗಳನ್ನು ಸ್ಥಾಪಿಸಲು ಪ್ರಯತ್ನಿಸುತ್ತದೆ ಮತ್ತು ಡೇಟಾವನ್ನು ಸಂಗ್ರಹಿಸುವ ಮತ್ತು ಪ್ರಕ್ರಿಯೆಗೊಳಿಸುವ ಕಂಪನಿ ಅಥವಾ ಸರ್ಕಾರಿ ಏಜೆನ್ಸಿಯ ಜವಾಬ್ದಾರಿಗಳನ್ನು ವಿಧಿಸುತ್ತದೆ.
ಖಾಸಗಿತನದ ಹಕ್ಕಿನ ಭಾಗವಾಗಿ ನಾಗರಿಕರ ಡೇಟಾ ಸಂಗ್ರಹಣೆ, ಸಂಗ್ರಹಣೆ ಮತ್ತು ಪ್ರಕ್ರಿಯೆಗೆ ಸಂಬಂಧಿಸಿದಂತೆ ಇಂಟರ್ನೆಟ್ ಕಂಪನಿಗಳು, ಮೊಬೈಲ್ ಅಪ್ಲಿಕೇಶನ್‌ಗಳು ಮತ್ತು ವ್ಯಾಪಾರ ಸಂಸ್ಥೆಗಳಂತಹ ಘಟಕಗಳನ್ನು ಹೆಚ್ಚು ಜವಾಬ್ದಾರಿಯುತವಾಗಿ ಹಾಗೂ ಅವುಗಳು ಉತ್ತರವಾಗುವ ಗುರಿಯನ್ನು ಇದು ಹೊಂದಿದೆ.
