ಪ್ಯಾರಿಸ್ ಒಲಿಂಪಿಕ್ಸ್​ನಲ್ಲಿ ಸ್ಪರ್ಧಿಸುತ್ತಿರುವ ಭಾರತದ 117 ಕ್ರೀಡಾಪಟುಗಳಿಗೆ ಗುಡ್​ನ್ಯೂಸ್ ಕೊಟ್ಟ ಬಿಸಿಸಿಐ

ಬಹುನಿರೀಕ್ಷಿತ 2024ರ ಪ್ಯಾರಿಸ್ ಒಲಿಂಪಿಕ್ಸ್​​​ ಕ್ರೀಡಾಕೂಟದಲ್ಲಿ ಸ್ಪರ್ಧಿಸುತ್ತಿರುವ ಭಾರತದ 117 ಕ್ರೀಡಾಪಟುಗಳನ್ನು ಬೆಂಬಲಿಸುವ ಸಲುವಾಗಿ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (ಬಿಸಿಸಿಐ) 8.5 ಕೋಟಿ ರೂಪಾಯಿ ನೆರವು ಪ್ರಕಟಿಸಿದೆ. ಜುಲೈ 21ರ ಭಾನುವಾರ ಬಿಸಿಸಿಐ ಕಾರ್ಯದರ್ಶಿ ಜಯ್​ ಶಾ ಅವರು ಭಾರತೀಯ ಒಲಿಂಪಿಕ್ಸ್​ ಸಂಸ್ಥೆಗೆ ಈ ಪ್ರೋತ್ಸಾಹಧನವನ್ನು ಘೋಷಿಸಿದ್ದಾರೆ.

ಭಾರತೀಯ ಕ್ರೀಡಾಪಟುಗಳಿಗೆ ಸೌಲಭ್ಯಗಳು ಕೊರತೆಯಾಗದಂತೆ ನೋಡಿಕೊಳ್ಳಲು ಬಿಸಿಸಿಐ ಈ ಕ್ರಮ ಕೈಗೊಂಡಿದೆ. ಜುಲೈ 26 ರಿಂದ ಪ್ಯಾರಿಸ್‌ನಲ್ಲಿ ಮಹಾಕುಂಭ ಒಲಿಂಪಿಕ್ಸ್ ಆಯೋಜನೆಗೊಳ್ಳಲಿದೆ. ಈ ಕ್ರೀಡಾಕೂಟ ಆಗಸ್ಟ್ 11ರ ತನಕ ಆಯೋಜಿಸಲಾಗಿದೆ. ಕಳೆದ ಬಾರಿ ಒಂದು ಚಿನ್ನ ಸಹಿತ 7 ಪದಕ ಗೆದ್ದಿದ್ದ ಭಾರತ ತಂಡ, 33ನೇ ಆವೃತ್ತಿಯ ಒಲಿಂಪಿಕ್ಸ್​​ನಲ್ಲಿ ಪದಕಗಳ ಸಂಖ್ಯೆ ಎರಡಂಕಿ ಧ್ಯೇಯ ಹೊಂದಿದೆ.

ಬಿಸಿಸಿಐ ಕಾರ್ಯದರ್ಶಿ ಜಯ್ ಶಾ ಅವರು ಎಕ್ಸ್​ ಖಾತೆಯಲ್ಲಿ ಪೋಸ್ಟ್ ಮಾಡಿದ್ದು, ಪ್ಯಾರಿಸ್ ಒಲಿಂಪಿಕ್ಸ್​​ನಲ್ಲಿ ಸ್ಫರ್ಧಿಸುತ್ತಿರುವ ನಮ್ಮ ಅತ್ಯುತ್ತಮ ಕ್ರೀಡಾಪಟುಗಳಿಗೆ ನೆರವಾಗಲು ಬಿಸಿಸಿಐ ನಿರ್ಧರಿಸಿದೆ ಎಂದು ಘೋಷಿಸಲು ನನಗೆ ತುಂಬಾ ಹೆಮ್ಮೆ ಇದೆ. ಈ ಅಭಿಯಾನಕ್ಕೆ ನಾವು ಐಒಎಗೆ 8.5 ಕೋಟಿ ರೂಪಾಯಿ ನೀಡುತ್ತಿದ್ದೇವೆ. ನಮ್ಮ ಇಡೀ ಭಾರತ ತಂಡಕ್ಕೆ ಶುಭಾಶಯಗಳು. ಭಾರತವನ್ನು ಹೆಮ್ಮೆಪಡುವಂತೆ ಮಾಡಿ, ಜೈ ಹಿಂದ್ ಎಂದು ಪೋಸ್ಟ್​ನಲ್ಲಿ ಬರೆದಿದ್ದಾರೆ.

ವಿಶ್ವಕಪ್​​ ಗೆದ್ದವರಿಗೂ ಘೋಷಿಸಿತ್ತು 125 ಕೋಟಿ ಬಹುಮಾನ

ಇದಕ್ಕೂ ಮುನ್ನ ಟಿ20 ವಿಶ್ವಕಪ್ ಜಯಿಸಿದ ಭಾರತ ಕ್ರಿಕೆಟ್ ತಂಡಕ್ಕೆ ಬಿಸಿಸಿಐ 125 ಕೋಟಿ ನೆರವು ಘೋಷಿಸಿತ್ತು. ಬಾರ್ಬಡೋಸ್​​ನಲ್ಲಿ ಜೂನ್ 29ರಂದು ನಡೆದ ಟಿ20 ವಿಶ್ವಕಪ್​​ ಫೈನಲ್​ ಪಂದ್ಯದಲ್ಲಿ ಸೌತ್ ಆಫ್ರಿಕಾ ವಿರುದ್ಧ 7 ರನ್​ಗಳ ಅಂತರದಿಂದ ಟೀಮ್ ಇಂಡಿಯಾ ಗೆದ್ದು ಬೀಗಿತ್ತು. ವಿಶ್ವಕಪ್ ಗೆದ್ದು ದೇಶವನ್ನು ಹೆಮ್ಮೆಪಡುವಂತೆ ಮಾಡಿದ ಭಾರತ ತಂಡ ಮತ್ತು ಸಹಾಯಕ ಸಿಬ್ಬಂದಿಗೆ ಬಿಸಿಸಿಐ 125 ಕೋಟಿ ಬಹುಮಾನ ಘೋಷಿಸಿತ್ತು. 15 ಆಟಗಾರರು ಮತ್ತು ಮಾಜಿ ಮುಖ್ಯ ಕೋಚ್ ರಾಹುಲ್ ದ್ರಾವಿಡ್​ಗೆ ತಲಾ 5 ಕೋಟಿ ಘೋಷಿಸಿತ್ತು.

ಈ ಬಾರಿ ಭಾರತದ 117 ಆಟಗಾರರು ಪ್ಯಾರಿಸ್ ಒಲಿಂಪಿಕ್ಸ್‌ನಲ್ಲಿ ಭಾಗವಹಿಸಲಿದ್ದಾರೆ. ಈ ಪೈಕಿ 47 ಮಹಿಳೆಯರು, 70 ಪುರುಷರ ಕ್ರೀಡಾಪಟುಗಳು ಕ್ರೀಡಾಕೂಟದ ಭಾಗವಾಗಿದ್ದಾರೆ. ಇದಲ್ಲದೆ, 140 ಸಿಬ್ಬಂದಿ ಆಟಗಾರರೊಂದಿಗೆ (67 ಕೋಚ್​​, 72 ಸಹಾಯಕ ಸಿಬ್ಬಂದಿ ) ಪ್ರಯಾಣಿಸಲಿದ್ದಾರೆ. ಟೊಕಿಯೊ ಒಲಿಂಪಿಕ್ಸ್‌ನಲ್ಲಿ ಭಾರತದ ಪರ 121 ಆಟಗಾರರು ಭಾಗವಹಿಸಿದ್ದು, 7 ಪದಕಗಳನ್ನು ಗೆದ್ದಿದ್ದಾರೆ. ಜಾವೆಲಿನ್ ಥ್ರೋನಲ್ಲಿ ನೀರಜ್ ಚೋಪ್ರಾ ಐತಿಹಾಸಿಕ ಚಿನ್ನ ಗೆದ್ದಿದ್ದರು.

ಇದನ್ನೂ ಓದಿ: ಒಲಿಂಪಿಕ್ಸ್​ ಧ್ವಜದಲ್ಲಿರುವ 5 ರಿಂಗ್​​ಗಳ ಅರ್ಥವೇನು; ಅದರ ಇತಿಹಾಸ, ವಿನ್ಯಾಸದ ಕುರಿತು ವಿವರ ಇಲ್ಲಿದೆ

ಯಾವ ಕ್ರೀಡೆಯಲ್ಲಿ ಎಷ್ಟು ಕ್ರೀಡಾಪಟುಗಳು?

ಅಥ್ಲೆಟಿಕ್ಸ್ - 29

ಶೂಟಿಂಗ್ - 21

ಹಾಕಿ - 19

ಟೇಬಲ್-ಟೆನ್ನಿಸ್ - 8

ಬ್ಯಾಡ್ಮಿಂಟನ್ - 7

ಕುಸ್ತಿ - 6

ಬಿಲ್ಲುಗಾರಿಕೆ - 6

ಬಾಕ್ಸಿಂಗ್ - 6

ಗಾಲ್ಫ್ - 4

ಟೆನಿಸ್ - 3

ಸ್ವಿಮ್ಮಿಂಗ್ - 2

ಸೈಲಿಂಗ್ (ನೌಕಾಯಾನ) - 2

ಈಕ್ವೆಸ್ಟ್ರಿಯನ್ (ಕುದುರೆ ಸವಾರಿ) - 1

ಜೂಡೋ - 1

ರೋಯಿಂಗ್ - 1

ವೇಟ್​ ಲಿಫ್ಟಿಂಗ್ - 1

ಇದನ್ನೂ ಓದಿ : ಪ್ಯಾರಿಸ್ ಒಲಿಂಪಿಕ್ಸ್: ಭಾರತದ 117 ಕ್ರೀಡಾಪಟುಗಳು ಸಜ್ಜು, ಸ್ಪರ್ಧಿಗಳು ಮತ್ತು ಆಟದ ವಿವರ ಇಲ್ಲಿದೆ