ಒಗ್ಗರಣೆ ಮಾತ್ರವಲ್ಲ ಕರಿಬೇವಿನಿಂದ ಸಖತ್ ಟೇಸ್ಟಿ ಆಗಿರೋ ಚಟ್ನಿ ಕೂಡ ಮಾಡಬಹುದು; ಅನ್ನಕ್ಕೂ ಇಡ್ಲಿಗೂ ಇದು ಸೂಪರ್ ಕಾಂಬಿನೇಷನ್‌

ಭಾರತೀಯ ಅಡುಗೆಗಳಲ್ಲಿ ಕರಿಬೇವಿಗೆ ಅಗ್ರಸ್ಥಾನವಿದೆ. ಇದು ಒಗ್ಗರಣೆಗೆ ಅತ್ಯವಶ್ಯ. ಆಹಾರದ ಘಮ ಹೆಚ್ಚಿಸುವ ಕರಿಬೇವು ಪೋಷಕಾಂಶಗಳ ಆಗರವೂ ಹೌದು. ಆದರೆ ಕೆಲವರು ಕರಿಬೇವನ್ನು ಬದಿಗೆ ಎತ್ತಿಡುತ್ತಾರೆ. ಕರಿಬೇವಿನ ಸೊಪ್ಪು ತಿಂದರೆ ನಮ್ಮ ಆರೋಗ್ಯಕ್ಕೆ ಬೇಕಾದ ಸಾಕಷ್ಟು ವಿಟಮಿನ್ ಮತ್ತು ಮಿನರಲ್ಸ್‌ಗಳು ಸಿಗುತ್ತವೆ. ಕರಿಬೇವಿನ ಎಲೆಗಳಿಂದ ದೇಹಕ್ಕೆ ಅಸಂಖ್ಯಾತ ಪ್ರಯೋಜನಗಳು ಸಿಗುತ್ತವೆ. ಇದರ ಪ್ರಯೋಜನಗಳು ನೂರಾರು.

ಕರಿಬೇವಿನ ಎಲೆಗಳನ್ನು ತಿನ್ನುವುದರಿಂದ ಕೊಲೆಸ್ಟ್ರಾಲ್ ಕಡಿಮೆಯಾಗುತ್ತದೆ. ಇದು ಜೀರ್ಣಕ್ರಿಯೆಯನ್ನು ನಿಯಂತ್ರಿಸುತ್ತದೆ. ಯಕೃತ್ತನ್ನು ರಕ್ಷಿಸುತ್ತದೆ. ಕೂದಲು ಬೆಳವಣಿಗೆಗೆ ಸಹಾಯ ಮಾಡುತ್ತದೆ. ಕಣ್ಣಿನ ಆರೋಗ್ಯವನ್ನು ಕಾಪಾಡುತ್ತದೆ. ಸೋಂಕುಗಳನ್ನು ತಡೆಯುತ್ತದೆ. ತೂಕ ನಷ್ಟಕ್ಕೆ ಸಹಾಯ ಮಾಡುತ್ತದೆ. ದೇಹದಲ್ಲಿ ರಕ್ತ ಸಂಚಾರವನ್ನು ಹೆಚ್ಚಿಸುತ್ತದೆ. ಗಾಯಗಳು ಬೇಗ ವಾಸಿಯಾಗುವಂತೆ ಮಾಡುತ್ತದೆ. ಇದು ಮಧುಮೇಹ ವಿರೋಧಿ ಗುಣಗಳನ್ನು ಹೊಂದಿದೆ.

ಆಯುರ್ವೇದದಲ್ಲೂ ಕರಿಬೇವಿನ ಎಲೆಗಳನ್ನು ಔಷಧ ರೂಪದಲ್ಲಿ ಬಳಸಲಾಗುತ್ತದೆ. ಇದನ್ನು ಭಾರತ, ಶ್ರೀಲಂಕಾ, ಬಾಂಗ್ಲಾದೇಶ ಮತ್ತು ಅಂಡಮಾನ್ ದ್ವೀಪಗಳಲ್ಲಿ ಹೆಚ್ಚಾಗಿ ಬೆಳೆಯಲಾಗುತ್ತದೆ. ಭಾರತೀಯ ಪಾಕಪದ್ಧತಿಯಲ್ಲಿ ಇದನ್ನು ವ್ಯಾಪಕವಾಗಿ ಬಳಸಲಾಗುತ್ತದೆ.

ಇದನ್ನೂ ಓದಿ: ಬಾಳೆಹೂವನ್ನು ಬೇಡ ಎಂದು ಎಸಿಬೇಡಿ, ಇದರಿಂದ ರುಚಿಯಾದ ಚಟ್ನಿ ಮಾಡಬಹುದು, ಇದು ಟೇಸ್ಟ್‌ಗಷ್ಟೇ ಅಲ್ಲ ಆರೋಗ್ಯಕ್ಕೂ ಬಹಳ ಉತ್ತಮ

ಇಲ್ಲಿಯವರೆಗೆ ನೀವು ಕರಿಬೇವಿನ ಎಲೆಗಳನ್ನು ಒಗ್ಗರಣೆಗೆ ಮಾತ್ರ ಬಳಸಿ ಇರುತ್ತೀರಿ. ಆದರೆ ಇದರಿಂದ ಸಖತ್ ಟೇಸ್ಟಿ ಆಗಿರೋ ಚಟ್ನಿಯನ್ನು ಕೂಡ ಮಾಡಬಹುದು. ಇದನ್ನು ಅನ್ನ, ಚಟ್ನಿ ಜೊತೆ ತಿನ್ನಲು ಸಖತ್ ಆಗಿರುತ್ತೆ. ಹಾಗಾದರೆ ಇದನ್ನು ಮಾಡೋದು ಹೇಗೆ, ಏನೆಲ್ಲಾ ಬೇಕು ಎಂಬ ವಿವರ ಇಲ್ಲಿದೆ.

ಕರಿಬೇವಿನ ಚಟ್ನಿ ರೆಸಿಪಿ

ಬೇಕಾಗುವ ಸಾಮಗ್ರಿಗಳು: ಈರುಳ್ಳಿ - 2, ಶುಂಠಿ - ಸಣ್ಣ ತುಂಡು, ಕರಿಬೇವಿನ ಎಲೆ - ಒಂದು ಕಪ್, ಎಣ್ಣೆ - ಸಾಕಷ್ಟು, ಸಾಸಿವೆ - ಒಂದು ಚಮಚ, ತುಪ್ಪ - ಒಂದು ಚಮಚ, ತುರಿದ ತೆಂಗಿನಕಾಯಿ - ಒಂದು ಚಮಚ, ಒಣ ಮೆಣಸಿನಕಾಯಿ - ಹತ್ತು, ಉಪ್ಪು - ರುಚಿಗೆ

ಇದನ್ನೂ ಓದಿ: ಚಟ್ನಿಯ ಬಣ್ಣ–ರುಚಿ ಹೆಚ್ಚುವಂತೆ ಮಾಡಿ, ಬಹಳ ದಿನಗಳವರೆಗೆ ಕೆಡದಂತೆ ಸಂಗ್ರಹಿಸಿ ಇಡ್ಬೇಕಾ, ಈ ಸಿಂಪಲ್ ಟ್ರಿಕ್ಸ್ ಫಾಲೋ ಮಾಡಿ

ಕರಿಬೇವಿನ ಎಲೆಯ ಚಟ್ನಿ

ಮೊದಲು ಕರಿಬೇವಿನ ಎಲೆಗಳನ್ನು ಸ್ವಚ್ಛವಾಗಿ ತೊಳೆದು ಪಕ್ಕಕ್ಕೆ ಇಡಿ. ಈಗ ಒಂದು ಪಾತ್ರೆಯನ್ನು ಒಲೆಯ ಮೇಲೆ ಇಟ್ಟು ಎಣ್ಣೆ ಹಾಕಿ. ಆ ಎಣ್ಣೆಯಲ್ಲಿ ಕರಿಬೇವಿನ ಸೊಪ್ಪನ್ನು ಹುರಿದುಕೊಳ್ಳಿ. ಅದೇ ಪಾತ್ರೆಗೆ ತೆಂಗಿನತುರಿ ಸೇರಿಸಿ ಹುರಿದುಕೊಳ್ಳಿ. ಒಣ ಮೆಣಸಿನಕಾಯಿಯನ್ನೂ ಹುರಿದುಕೊಳ್ಳಬೇಕು. ನಂತರ ಇದಕ್ಕೆ ಉಪ್ಪು ಸೇರಿಸಿ, ಶುಂಠಿ, ಮಿಶ್ರಣವನ್ನು ಮಿಕ್ಸಿಗೆ ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ. ಈಗ ಒಲೆಯ ಮೇಲೆ ಬಾಣಲಿ ಇಟ್ಟು ಎಣ್ಣೆ ಹಾಕಿ. ಇದಕ್ಕೆ ಸಾಸಿವೆ, ಜೀರಿಗೆ, ಕರಿಬೇವು, ಎರಡು ಒಣಮೆಣಸಿನ ಹಾಗೂ ಉದ್ದಿನಬೇಳೆ ಹಾಕಿ ಒಗ್ಗರಣೆ ತಯಾರಿಸಿ. ಇದನ್ನು ರುಬ್ಬಿಕೊಂಡ ಚಟ್ನಿ ಜೊತೆ ಸೇರಿಸಿ ಮಿಶ್ರಣ ಮಾಡಿ. ಈಗ ನಿಮ್ಮ ಮುಂದೆ ರುಚಿಯಾದ ಕರಿಬೇವಿನ ಚಟ್ನಿ ತಿನ್ನಲು ಸಿದ್ಧ.

ಬಿಸಿ ಅನ್ನದೊಂದಿಗೆ ತಿನ್ನಲು ಈ ಚಟ್ನಿ ಸಖತ್ ಆಗಿರುತ್ತೆ. ಇಡ್ಲಿ, ದೋಸೆ ಜೊತೆ ಕೂಡ ನೆಂಜಿಕೊಂಡು ತಿನ್ನಬಹುದು. ಇದು ಮಕ್ಕಳಿಗೂ ಖಂಡಿತ ಇಷ್ಟವಾಗುತ್ತದೆ. ಆದರೆ ಮಕ್ಕಳಿಗೆ ಮಾಡುವ ಕೊಂಚ ಮೆಣಸು ಕಡಿಮೆ ಹಾಕಿದರೆ ಉತ್ತಮ. ಇದಕ್ಕೆ ಒಣಮೆಣಸಿನ ಬದಲು ಹಸಿಮೆಣಸು ಬೇಕಾದರೂ ಸೇರಿಸಬಹುದು.

ಇದನ್ನೂ ಓದಿ: ಇಡ್ಲಿ, ದೋಸೆ ಜೊತೆ ನೆಂಜಿಕೊಳ್ಳಲು ಏನ್‌ ಮಾಡೋದು ಅನ್ನೋ ಚಿಂತೆ ಬಿಡಿ, ಇಲ್ಲಿವೆ ನೋಡಿ 6 ವಿವಿಧ ಬಗೆಯ ಚಟ್ನಿ ರೆಸಿಪಿ