ಇಂಗ್ಲೆಂಡ್​​ ಬಜ್​ಬಾಲ್​ಗೆ ಭಾರತ ಸ್ಪಿನ್​ ಮಂತ್ರ; ಕುಸಿದ ತಂಡಕ್ಕೆ ರೂಟ್-ಬೈರ್​ಸ್ಟೋ ಆಸರೆ, ಮೊದಲ ಸೆಷನ್​ಗೆ 108/3

ಇಂಗ್ಲೆಂಡ್​ ತಂಡದ ಬಜ್​ಬಾಲ್ ಕಾರ್ಯತಂತ್ರಕ್ಕೆ ಭಾರತದ ಸ್ಪಿನ್ ಮಂತ್ರ ಹಾಕಿದೆ. ಹೊಡಿಬಡಿ ಆಟಕ್ಕೆ ಮುಂದಾದ ಪ್ರವಾಸಿ ತಂಡಕ್ಕೆ ಸ್ಪಿನ್ನರ್​​ಗಳು ಕಡಿವಾಣ ಹಾಕಿದರು. ಉಭಯ ತಂಡಗಳು ಭೋಜನ ವಿರಾಮದ ಅಂತ್ಯಕ್ಕೆ ಸಮಬಲದ ಹೋರಾಟ ನಡೆಸಿವೆ. ವೇಗಿಗಳ ದರ್ಬಾರ್ ನಡೆಯದ ಸ್ಪಿನ್​ ಟ್ರ್ಯಾಕ್​ನಲ್ಲಿ ಅಶ್ವಿನ್, ಮತ್ತೆ ಮಿಂಚಿದ್ದಾರೆ.

ಇದನ್ನೂ ಓದಿ: Explained:​ ಇಂಗ್ಲೆಂಡ್​ನ ಬಜ್​ಬಾಲ್ ಕ್ರಿಕೆಟ್ ಎಂದರೇನು? ಟೆಸ್ಟ್​ ಆಟದ ಮೇಲೆ ಹೇಗೆ ಪ್ರಭಾವ ಬೀರಿದೆ?

ಹೈದರಾಬಾದ್​​ನ ರಾಜೀವ್ ಗಾಂಧಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಮೈದಾನದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿದ ಇಂಗ್ಲೆಂಡ್, ಇನ್ನಿಂಗ್ಸ್ ಆರಂಭದಿಂದಲೇ ಬಿರುಸಿನ ಬ್ಯಾಟಿಂಗ್ ನಡೆಸಿತು. ವೇಗಿಗಳ ಎದುರು ಪ್ರವಾಸಿ ತಂಡದ ಆರಂಭಿಕ ಆಟಗಾರರು ಬೌಂಡರಿಗಳ ಸುರಿಮಳೆಗೈದರು.

ಬ್ಯಾಟಿಂಗ್ ವೇಗಕ್ಕೆ ನಿಯಂತ್ರಣ ಹೇರಿದ ಸ್ಪಿನ್ನರ್ಸ್

ಪ್ರತಿ ಓವರ್​​​ಗೆ 5ರ ಸರಾಸರಿಯಲ್ಲಿ ರನ್ ಕಲೆ ಹಾಕಿದ ಜಾಕ್ ಕ್ರಾವ್ಲಿ ಮತ್ತು ಬೆನ್ ಡಕೆಟ್, ಮೊದಲ ವಿಕೆಟ್​ಗೆ ವೇಗವಾಗಿ 50 ರನ್ ಕಲೆ ಹಾಕಿದರು. ಆ ಬಳಿಕ ಕಣಕ್ಕಿಳಿದ ಸ್ಪಿನ್ನರ್​​ಗಳಾದ ಜಡೇಜಾ ಮತ್ತು ಅಶ್ವಿನ್, ವೇಗದ ಬ್ಯಾಟಿಂಗ್​​ಗೆ ನಿಯಂತ್ರಣ ಹೇರಿದರು. 11.5ನೇ ಓವರ್​​ನಲ್ಲಿ 55 ರನ್ ಗಳಿಸಿದ್ದ ಇಂಗ್ಲೆಂಡ್ ಮೊದಲ ವಿಕೆಟ್ ಕಳೆದುಕೊಂಡಿತು.

39 ಎಸೆತಗಳಲ್ಲಿ 7 ಬೌಂಡರಿ ಸಹಿತ 35 ರನ್ ಚಚ್ಚಿದ್ದ ಡಕೆಟ್, ಅಶ್ವಿನ್ ಬೌಲಿಂಗ್​ನಲ್ಲಿ ಎಲ್​ಬಿ ಬಲೆಗೆ ಬಿದ್ದರು. ಬಳಿಕ ಮೂರು ರನ್​ಗಳ ಅಂತರದಲ್ಲಿ 3ನೇ ಕ್ರಮಾಂಕದಲ್ಲಿ ಬ್ಯಾಟ್​ ಬೀಸಿದ ಓಲ್ಲಿ ಪೋಪ್ ಅವರಿಗೆ ಜಡೇಜಾ ಗೇಟ್​ಪಾಸ್ ನೀಡಿದರು. 1 ರನ್ ಗಳಿಸಿ ಪೋಪ್​ ಔಟಾಗಿ ನಿರ್ಗಮಿಸಿದರು.

ಮತ್ತೆ ಎರಡು ರನ್​ಗಳ ಅಂತರದಲ್ಲಿ ಅಶ್ವಿನ್ ಮತ್ತೊಂದು ಬಲಿ ಪಡೆದರು. ತಂಡದ ಮೊತ್ತ 60 ಆಗಿದ್ದಾಗ ಮತ್ತೊಬ್ಬ ಆರಂಭಿಕ ಆಟಗಾರ ಜಾಕ್ ಕ್ರಾವ್ಲಿ, ಅಶ್ವಿನ್ ಬೌಲಿಂಗ್​ನಲ್ಲಿ ಸಿರಾಜ್​ಗೆ ಕ್ಯಾಚ್ ನೀಗಿ ಹೊರ ನಡೆದರು. ಅವರು 20 ರನ್ ಗಳಿಸಿ ಔಟಾದರು. 60ಕ್ಕೆ 3 ವಿಕೆಟ್​ ಕಳೆದುಕೊಂಡಿದ್ದ ತಂಡಕ್ಕೆ ರೂಟ್ ಮತ್ತು ಬೇರ್​ಸ್ಟೋ ಆಸರೆಯಾಗುತ್ತಿದ್ದಾರೆ.

ಅಜೇಯ 48 ರನ್​ಗಳ ಜೊತೆಯಾಟ

ಸತತ ವಿಕೆಟ್​​ಗಳ ಜೊತೆಯಾದ ಜೋ ರೂಟ್ ಮತ್ತು ಜಾನಿ ಬೈರ್​​ಸ್ಟೋ ಅವರು ಉತ್ತಮ ಇನ್ನಿಂಗ್ಸ್ ಕಟ್ಟುತ್ತಿದ್ದಾರೆ. ಈ ಜೋಡಿ ಅಜೇಯರಾಗಿದ್ದು, ಭೋಜನ ವಿರಾಮಕ್ಕೆ 77 ಎಸೆತಗಳಲ್ಲಿ 48 ರನ್​ಗಳ ಪಾಲುದಾರಿಕೆ ನೀಡಿದ್ದಾರೆ. ಸದ್ಯ ಮೊದಲ ಸೆಷನ್ ಅಂತ್ಯಕ್ಕೆ ಇಂಗ್ಲೆಂಡ್ 28 ಓವರ್​​​ಗಳಲ್ಲಿ 3 ವಿಕೆಟ್ ನಷ್ಟಕ್ಕೆ 108 ರನ್ ಕಲೆ ಹಾಕಿದೆ. ಅಶ್ವಿನ್ 2, ಜಡೇಜಾ 1 ವಿಕೆಟ್ ಪಡೆದಿದ್ದಾರೆ.

ಇದನ್ನೂ ಓದಿ: ಜೇಮ್ಸ್ ಆಂಡರ್ಸನ್ ಕೈಬಿಟ್ಟು ಕೆಟ್ಟಿತೇ ಇಂಗ್ಲೆಂಡ್; ಭಾರತಕ್ಕಾಗುವ ಲಾಭವೇನು, ಆಂಗ್ಲರು ಮಾಡಿಕೊಂಡ ತಪ್ಪುಗಳೇನು?

ಇಂಗ್ಲೆಂಡ್ ಪ್ಲೇಯಿಂಗ್ ಇಲೆವೆನ್

ಝಾಕ್ ಕ್ರಾಲಿ, ಬೆನ್ ಡಕೆಟ್, ಒಲ್ಲಿ ಪೋಪ್, ಜೋ ರೂಟ್, ಜಾನಿ ಬೈರ್‌ಸ್ಟೋ, ಬೆನ್ ಸ್ಟೋಕ್ಸ್ (ನಾಯಕ), ಬೆನ್ ಫೋಕ್ಸ್ (ವಿಕೆಟ್ ಕೀಪರ್), ರೆಹಾನ್ ಅಹ್ಮದ್, ಟಾಮ್ ಹಾರ್ಟ್ಲಿ, ಮಾರ್ಕ್ ವುಡ್, ಜ್ಯಾಕ್ ಲೀಚ್.

ಭಾರತ ಪ್ಲೇಯಿಂಗ್ ಇಲೆವೆನ್

ರೋಹಿತ್ ಶರ್ಮಾ (ನಾಯಕ), ಯಶಸ್ವಿ ಜೈಸ್ವಾಲ್, ಶುಭ್ಮನ್ ಗಿಲ್, ಕೆಎಲ್ ರಾಹುಲ್, ಶ್ರೇಯಸ್ ಅಯ್ಯರ್, ರವೀಂದ್ರ ಜಡೇಜಾ, ಶ್ರೀಕರ್ ಭರತ್ (ವಿಕೆಟ್ ಕೀಪರ್), ರವಿಚಂದ್ರನ್ ಅಶ್ವಿನ್, ಅಕ್ಷರ್ ಪಟೇಲ್, ಜಸ್ಪ್ರೀತ್ ಬುಮ್ರಾ, ಮೊಹಮ್ಮದ್ ಸಿರಾಜ್.

ನೇರ ಪ್ರಸಾರ

ಸ್ಪೋರ್ಟ್ಸ್​​​ 18 ನೆಟ್ವರ್ಕ್​​ ಚಾನೆಲ್​ನಲ್ಲಿ ನೇರ ಪ್ರಸಾರ ಇರಲಿದೆ. ಹಾಗೆಯೇ ಮೊಬೈಲ್ ಅಪ್ಲಿಕೇಷನ್ ಜಿಯೋ ಸಿನಿಮಾದಲ್ಲೂ ಲೈವ್​ಸ್ಟ್ರೀಮಿಂಗ್​ ನೋಡಬಹುದು.

ಉಭಯ ತಂಡಗಳ ನಡುವಿನ ಇತ್ತೀಚಿನ ಟೆಸ್ಟ್ ಫಲಿತಾಂಶ

2021ರಲ್ಲಿ ಭಾರತ ಪ್ರವಾಸ ಕೈಗೊಂಡಿದ್ದ ಇಂಗ್ಲೆಂಡ್, ಪರಾಭವಗೊಂಡಿತ್ತು. 3-1ರಲ್ಲಿ ಸರಣಿಯನ್ನು ಭಾರತ ಗೆದ್ದುಕೊಂಡಿತ್ತು. ಇನ್ನು ಅದೇ ವರ್ಷ ಇಂಗ್ಲೆಂಡ್ ಪ್ರವಾಸ ಕೈಗೊಂಡಿದ್ದ ಭಾರತ ಐದು ಪಂದ್ಯಗಳನ್ನು 2-2ರಲ್ಲಿ ಡ್ರಾಗೊಳಿಸಿತ್ತು. ಇದೀಗ ನಾಯಕ ಬೆನ್​ ಸ್ಟೋಕ್ಸ್ ಮತ್ತು ಕೋಚ್ ಬ್ರೆಂಡನ್ ಮೆಕಲಮ್ ಅವರ ನೇತೃತ್ವದಲ್ಲಿ ಬಜ್​ಬಾಲ್ ಮೂಲಕ ಭಾರತ ತಂಡಕ್ಕೆ ಆಘಾತ ನೀಡಲು ಭರ್ಜರಿ ತಯಾರಿ ನಡೆಸಿದೆ.

ಟೆಸ್ಟ್ ಕ್ರಿಕೆಟ್​ನಲ್ಲಿ ಮುಖಾಮುಖಿ ದಾಖಲೆ

ಒಟ್ಟು ಪಂದ್ಯಗಳು - 131

ಭಾರತ ಗೆಲುವು - 31

ಇಂಗ್ಲೆಂಡ್ ಗೆಲುವು - 50

ಡ್ರಾ ಪಂದ್ಯಗಳು - 50