IPL 2024: ರಾಯಲ್ ಚಾಲೆಂಜರ್ಸ್ ಬೆಂಗಳೂರು ಸೇರಿದ ಮಯಾಂಕ್; ಎಸ್​ಆರ್​ಎಚ್​ಗೆ ಶಹಬಾಜ್ ಅಹ್ಮದ್

ಇಂಡಿಯನ್ ಪ್ರೀಮಿಯರ್ ಲೀಗ್ (Indian Premier League 2024) 2024ರ​ ಟ್ರೇಡಿಂಗ್​ ವಿಂಡೋ (Trading Window IPL 2024) ಇವತ್ತಿಗೆ ಕೊನೆಯಾಗಲಿದೆ. 10 ಫ್ರಾಂಚೈಸಿಗಳು ಆಟಗಾರರನ್ನು ಉಳಿಸಿಕೊಳ್ಳುವ ಮತ್ತು ಬಿಡುಗಡೆ ಮಾಡುವ ಪ್ರಕ್ರಿಯೆ ಇಂದು ಸಂಜೆಯೊಳಗೆ ಕೊನೆಯಾಗಲಿವೆ. ಈ ಮಧ್ಯೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (Royal Challengers Bangalore) ಮತ್ತು ಸನ್​ರೈಸರ್ಸ್ ಹೈದರಾಬಾದ್​ ತಂಡಗಳು (Sunrisers Hyderabad) ತಲಾ ಒಬ್ಬರನ್ನು ಅದಲು ಬದಲು ಮಾಡಿಕೊಂಡಿವೆ.

ಇದನ್ನೂ ಓದಿ: WPL 2024: ಡಬ್ಲ್ಯುಪಿಎಲ್ ಹರಾಜು ದಿನ ಪ್ರಕಟ; ಉಳಿಸಿಕೊಂಡ-ಬಿಡುಗಡೆಯಾದ ಆಟಗಾರ್ತಿಯರ ಪಟ್ಟಿ ಹೀಗಿದೆ

ಮಯಾಂಕ್ ಡಾಗರ್ (ಎಸ್ಆರ್​ಎಸ್​ಚ್) ಮತ್ತು ಶಹಬಾಜ್ ಅಹ್ಮದ್ (ಆರ್​ಸಿಬಿ) ಅವರನ್ನು ಟ್ರೇಡ್​ ಮಾಡಿಕೊಂಡಿವೆ. ಈ ಬಗ್ಗೆ ಅಧಿಕೃತ ಪ್ರಕಟಣೆ ಇಂದು ಪ್ರಕಟವಾಗಲಿದೆ ಎಂದು ಕ್ರಿಕ್​ಬಜ್​ ವರದಿ ತಿಳಿಸಿದೆ. ಹೈದರಾಬಾದ್ ತಂಡವು ಡಾಗರ್ ಅವರನ್ನು ಕಳೆದ ವರ್ಷ​ 1.8 ಕೋಟಿಗೆ ಖರೀದಿಸಿತ್ತು. ಆರ್​​ಸಿಬಿ ತಂಡವು ಶಹಬಾಜ್ ಅವರನ್ನು 2022ರ ಮೆಗಾ ಹರಾಜಿನಲ್ಲಿ 2.4 ಕೋಟಿಗೆ ತನ್ನ ಬುಟ್ಟಿಗೆ ಹಾಕಿಕೊಂಡಿತ್ತು.

ಕಳೆದ ಆವೃತ್ತಿಯಲ್ಲಿ ಇಬ್ಬರೂ ವಿಫಲ

ಎಸ್ಆರ್​ಎಚ್​ ಪರ ಕೇವಲ 3 ಪಂದ್ಯಗಳಲ್ಲಿ ಕಣಕ್ಕಿಳಿದಿರುವ ಡಾಗರ್, ಕಳೆದ ಆವೃತ್ತಿಯಲ್ಲಿ ಮ್ಯಾಜಿಕ್​ ನಡೆಸಲು ವಿಫಲರಾಗಿದ್ದರು. ಇನ್ನು ಶಹಬಾಜ್ 16ನೇ ಆವೃತ್ತಿಯಲ್ಲಿ ಆರ್​ಸಿಬಿ ಪರ 10 ಪಂದ್ಯಗಳಲ್ಲಿ ನಿರೀಕ್ಷಿತ ಪ್ರದರ್ಶನ ನೀಡಿರಲಿಲ್ಲ. ಈ ಋತುವಿನಲ್ಲಿ ಸ್ಪಿನ್ ಆಲ್​ರೌಂಡರ್​ ವನಿಂದು ಹಸರಂಗ ಮತ್ತು ವೇಗಿ ಹರ್ಷಲ್ ಪಟೇಲ್​ರನ್ನು​​ ಬಿಡುಗಡೆ ಮಾಡುವ ಸಾಧ್ಯತೆ ಇದೆ ಎಂದು ನಿರೀಕ್ಷಿಸಲಾಗಿದೆ.

ಶಹಬಾಜ್ ಮತ್ತು ಡಾಗರ್ ಇಬ್ಬರು ಸಹ ನಿಧಾನಗತಿ ಎಡಗೈ ಬೌಲಿಂಗ್​​​ ಮೂಲಕ ಅದ್ಭುತ ಕೌಶಲ್ಯಗಳನ್ನು ಹೊಂದಿದ್ದಾರೆ. ಈ ಟ್ರೇಡಿಂಗ್ ಇಬ್ಬರಿಗೂ ಸಮಾನವಾಗಿದೆ. ಆದರೆ, ಬ್ಯಾಟಿಂಗ್​ನಲ್ಲಿ ಡಾಗರ್​ಗಿಂತ ಶಹಬಾಜ್​ ಹೆಚ್ಚಿನ ಸಾಮರ್ಥ್ಯ ಹೊಂದಿರುವುದು ವಿಶೇಷ. ಆದರೆ ಕಳೆದ ಆವೃತ್ತಿಯಲ್ಲಿ ಇಬ್ಬರಿಂದಲೂ ನಿರೀಕ್ಷಿತ ಪ್ರದರ್ಶನ ಬರದಿದ್ದರೂ, 2024ರ ಆವೃತ್ತಿಯಲ್ಲಿ ಮಿಂಚುವ ವಿಶ್ವಾಸದಲ್ಲಿದ್ದಾರೆ.

ಇದನ್ನೂ ಓದಿ: ಭಾರತದ ಆಟಗಾರರನ್ನು ಹುಟ್ಟಿಸಿದ್ದು ಟ್ರಾವಿಸ್ ಹೆಡ್ ಎಂಬ ಲೇವಡಿ ಪೋಸ್ಟ್; ಮ್ಯಾಕ್ಸ್​ವೆಲ್, ಕಮಿನ್ಸ್ ಅತಿರೇಕ

ಶಹಬಾಜ್​ ಅಹ್ಮದ್ ಈವರೆಗೂ 39 ಐಪಿಎಲ್‌ ಪಂದ್ಯಗಳಲ್ಲಿ ಆಡಿದ್ದಾರೆ. ಈ ಪಂದ್ಯಗಳಿಂದ 321 ರನ್‌, 14 ವಿಕೆಟ್‌ ಪಡೆದಿದ್ದಾರೆ. ಭಾರತೀಯ ಕ್ರಿಕೆಟ್ ಪರ 3 ಏಕದಿನ, 2 ಟಿ20ಐ ಪಂದ್ಯಗಳಲ್ಲಿ ಕಣಕ್ಕಿಳಿದಿದ್ದಾರೆ. ದೇಶಿ ಕ್ರಿಕೆಟ್‌ನಲ್ಲಿ ಪಶ್ಚಿಮ ಬಗಾಂಳ ತಂಡವನ್ನು ಪ್ರತಿನಿಧಿಸುತ್ತಿದ್ದಾರೆ.

ನವೆಂಬರ್‌ 26 ಕೊನೆಯ ದಿನಾಂಕ

ಐಪಿಎಲ್​ನ ಎಲ್ಲಾ 10 ತಂಡಗಳು 17ನೇ ಆವೃತ್ತಿಯ ಟೂರ್ನಿಗೆ ರಿಟೈನ್ ಮತ್ತು ರಿಲೀಸ್​ ಮಾಡುವ ಆಟಗಾರರ ಕೊನೆಯ ಪಟ್ಟಿಯನ್ನು ನವೆಂಬರ್‌ 26 ರೊಳಗೆ ಸಲ್ಲಿಸಬೇಕಿದೆ. ಡಿಸೆಂಬರ್​ 19ರಂದು ದುಬೈನಲ್ಲಿ ಮಿನಿ ಹರಾಜು ಜರುಗಲಿದೆ. ಈ ಹರಾಜಿನಲ್ಲಿ ಎಲ್ಲಾ ಫ್ರಾಂಚೈಸಿಗಳು ತಮ್ಮ ಬೇಡಿಕೆಗೆ ತಕ್ಕಂತೆ ಆಟಗಾರರನ್ನು ಖರೀದಿಸಲು ಯೋಜನೆ ಹಾಕಿಕೊಂಡಿವೆ.