ಬಿಗ್‌ಬಾಸ್‌ ಕನ್ನಡ 11: ನನ್ನ ಎದುರು ಹಾಕಿಕೊಂಡು ಹೇಗೆ ಕಾರ್ಯಕ್ರಮ ನಡೆಸುತ್ತೀರ ನೋಡ್ತೀನಿ; ಬಿಗ್‌ಬಾಸ್‌ಗೆ ಲಾಯರ್ ಜಗದೀಶ್ ಆವಾಜ್‌
ಮೂರನೇ ದಿನದ ಟಾಸ್ಕ್‌ನಲ್ಲಿ ಧನರಾಜ್‌ ಆಚಾರ್‌ ಹಾಗೂ ಮಾನಸಾ ಜೊತೆ ಕಿರಿಕ್‌ ಮಾಡಿಕೊಂಡಿದ್ದ ಲಾಯರ್ ಜಗದೀಶ್ ಈಗ ಬಿಸ್‌ಬಾಸ್‌ಗೆ ಆವಾಜ್‌ ಹಾಕುತ್ತಾರೆ. ಇಲ್ಲಿ ನಡೆಯುತ್ತಿರುವ ಮಾಫಿಯಾವನ್ನು ಬಯಲಿಗೆ ತರುತ್ತೇನೆ, ನನ್ನ ಎದುರು ಹಾಕಿಕೊಂಡು ಹೇಗೆ ಕಾರ್ಯಕ್ರಮ ನಡೆಸುತ್ತೀರಿ ನೋಡುತ್ತೇನೆ ಎಂದು ಆವಾಜ್‌ ಹಾಕಿದ್ದಾರೆ.
ಬಿಗ್‌ಬಾಸ್‌ ಕನ್ನಡ 11: ಮೂರು ದಿನಗಳು ಕಳೆಯುವಷ್ಟರಲ್ಲೇ ಬಿಗ್‌ಬಾಸ್‌ ಮನೆಯಲ್ಲಿ ವಾರ್‌ ಶುರುವಾಗಿದೆ. ನರಕವಾಸಿಗಳು ಸ್ವರ್ಗದಲ್ಲಿರುವವರ ಕೆಲಸ ಮಾಡಿಕೊಡುತ್ತಿದ್ದಾರೆ. ಮೊದಲ ದಿನವೇ ಸಹ ಸ್ಪರ್ಧಿಗಳು ಚೈತ್ರಾ ಕುಂದಾಪುರ ಮೇಲೆ ನಿಯಮ ಉಲ್ಲಂಘನೆ ವಿಚಾರವಾಗಿ ಕೋಪಗೊಂಡಿದ್ದರು. ಇದೀಗ ಲಾಯರ್ ಜಗದೀಶ್ ಟಾಸ್ಕ್‌ ವಿಚಾರವಾಗಿ ಎಲ್ಲರನ್ನೂ ಎದುರು ಹಾಕಿಕೊಂಡಿದ್ದಾರೆ. ಜೊತೆಗೆ ಬಿಗ್‌ಬಾಸ್‌ಗೆ ಆವಾಜ್‌ ಹಾಕಿದ್ದಾರೆ.
ಧನರಾಜ್‌, ಮಾನಸಾ ಜೊತೆ ಲಾಯರ್ ಜಗದೀಶ್ ಕಿರಿಕ್‌
ತಕ್ಕಡಿ ಭಾಗ್ಯಾ ಟಾಸ್ಕ್‌ ನಡೆಯುವಾಗ ಜಗದೀಶ್, ಯಮುನಾ ಶ್ರೀನಿಧಿ ಅವರನ್ನು ಬೀಳಿಸಿದ್ದಕ್ಕೆ ರೆಫ್ರಿ ಧನರಾಜ್‌, ಜಗದೀಶ್ ಅವರನ್ನು ಫೌಲ್‌ ಮಾಡಿದ್ದರು. ಇದೇ ವಿಚಾರವಾಗಿ ಧನ್‌ರಾಜ್‌ ಹಾಗೂ ಜಗದೀಶ್ ನಡುವೆ ಮಾತಿನ ಚಕಮಕಿ ನಡೆದಿತ್ತು. ಬೇಸರಗೊಂಡ ಧನ್‌ರಾಜ್‌ಗೆ ಬಿಗ್‌ಬಾಸ್‌ ಸಮಾಧಾನ ಮಾಡಿದ್ದರು. ನಂತರ ಧನ್‌ರಾಜ್‌ ತಮ್ಮ ಹಾಸ್ಯದ ಮೂಲಕವೇ ಜಗದೀಶ್‌ಗೆ ಉತ್ತರ ಕೊಟ್ಟಿದ್ದರು. ಇದರಿಂದ ಸಹಸ್ಪರ್ಧಿಗಳು ನಗೆಯಲ್ಲಿ ಮುಳುಗಿದ್ದರು. ಎಲ್ಲಾ ತಿಳಿಯಾದ ನಂತರವೂ ಸುಮ್ಮನಿರದ ಜಗದೀಶ್, ಧನರಾಜ್‌ಗೆ ಬಾಡಿ ಶೇಮಿಂಗ್‌ ಮಾಡುತ್ತಾರೆ. ಇದಕ್ಕೆ ಸಹ ಸ್ಪರ್ಧಿಗಳು ಆಕ್ಷೇಪ ವ್ಯಕ್ತಪಡಿಸುತ್ತಾರೆ.
ಧನರಾಜ್‌ ಒಬ್ಬ ಕಾಮಿಡಿ ಪೀಸ್‌ ಎಂದು ಜಗದೀಶ್ ಹೇಳಿದ ಮಾತು ಕೇಳಿ ಮಾನಸಾ ಬೇಸರಗೊಳ್ಳುತ್ತಾರೆ. ದಯವಿಟ್ಟು ಹಾಗೆ ಹೇಳಬೇಡಿ ಸರ್‌, ಎಲ್ಲರಿಗೂ ಒಂದು ಬೆಲೆ ಇರುತ್ತದೆ. ಕಾಮಿಡಿ ಅನ್ನೋದು ಸುಮ್ಮನೆ ಅಲ್ಲ, ನೂರು ಜನರನ್ನು ನಗಿಸುವ ಕಲೆ ಅದು ಎನ್ನುತ್ತಾರೆ, ಆಗ ಜಗದೀಶ್, ಮಾನಸಾ ಕಡೆ ತಿರುಗುತ್ತಾರೆ. ನಿನ್ನನ್ನು ಮೆಚ್ಚಿಸಲು ನಾನು ಬಂದಿಲ್ಲ ಎಂದು ಏಕವಚನದಲ್ಲಿ ಮಾತನಾಡುತ್ತಾರೆ, ಮಾನಸಾ ಕೂಡಾ ರಾಂಗ್‌ ಆಗುತ್ತಾರೆ, ಕೊನೆಗೆ ಜಗದೀಶ್ ಯಾವ ಸೀಮೆ ಹೆಂಗಸು ಅವಳು ಎಂದು ಅಸಭ್ಯ ಪದ ಬಳಕೆ ಮಾಡುತ್ತಾರೆ. ಜಗದೀಶ್ ವರ್ತನೆಗೆ ಎಲ್ಲರಿಗೂ ಬೇಸರವಾಗುತ್ತದೆ, ಮಾನಸಾ ಕಣ್ಣೀರು ಹಾಕುತ್ತಾರೆ.
ಬಿಗ್‌ಬಾಸ್‌ ಹೆಸರು ಹಾಳುಮಾಡದಿದ್ದರೆ ಹೆಸರು ಬದಲಿಸಿಕೊಳ್ಳುವೆ
ಮನೆಯಲ್ಲಿ ಎಲ್ಲಾ ಸ್ಪರ್ಧಿಗಳು ತಮ್ಮ ವಿರುದ್ಧ ತಿರುಗಿಬಿದ್ದಿದ್ದಕ್ಕೆ ಜಗದೀಶ್ ಕ್ಯಾಮರಾ ಮುಂದೆ ಬಂದು ನಾನು ಮನಸ್ಸು ಮಾಡಿದರೆ ನಿಮಗೆಲ್ಲಾ ಹೆಲಿಕಾಪ್ಟರ್‌ನಲ್ಲಿ ಊಟ ತರಿಸ್ತೀನಿ, ನನಗೆ ನಾನೇ ಬಿಗ್‌ ಬಾಸ್‌, ನನಗೆ ಇಲ್ಲಿ ಇರಲು ಇಷ್ಟವಾಗುತ್ತಿಲ್ಲ, ಒಳಗಡೆ ಏನೆಲ್ಲಾ ಮಾಫಿಯಾ ನಡೆಸುತ್ತಿದ್ದೀರಿ ಎಲ್ಲವೂ ಎಕ್ಸ್‌ಪೋಸ್‌ ಆಗುತ್ತೆ, ನಾನು ಸರ್ಕಾರವನ್ನೇ ಅಲುಗಾಡಿಸುತ್ತೇನೆ, ಈ ಕಾರ್ಯಕ್ರಮವನ್ನು ಹಾಳು ಮಾಡಿಲ್ಲ ಅಂದ್ರೆ ನನ್ನ ಹೆಸರನ್ನು ಬೇರೆ ಇಡು, ಯಾರೂ ಇಲ್ಲಿಗೆ ಕಾಲಿಡದಂತೆ ಮಾಡುತ್ತೇನೆ, ನನ್ನನ್ನು ಎದುರು ಹಾಕಿಕೊಂಡು ಕರ್ನಾಟಕದಲ್ಲಿ ಬಿಗ್‌ಬಾಸ್‌ ನಡೆಸುತ್ತೀರಾ? , ನನ್ನನ್ನು ಹೊರಗೆ ಕಳಿಸಿ ಎಂದು ಕ್ಯಾಮರಾಗೆ ಕೈ ತೋರಿಸಿ ಮಾತನಾಡುತ್ತಾರೆ.
ಈ ಪ್ರೋಮೋವನ್ನು ಕಲರ್ಸ್‌ ಕನ್ನಡ ವಾಹಿನಿ ಯಾರು ತಿಳಿಯರು ಲಾಯರ್ ಜಗದೀಶ್ ಪರಾಕ್ರಮ! ಎಂಬ ಕ್ಯಾಪ್ಷನ್‌ ನೀಡಿ ಅಧಿಕೃತ ಸೋಷಿಯಲ್‌ ಮೀಡಿಯಾದಲ್ಲಿ ಹಂಚಿಕೊಂಡಿದೆ.
ವಿಭಾಗ