ಅಡ್ವಾನ್ಸ್‌ ಬುಕ್ಕಿಂಗ್‌ನಲ್ಲಿ ಕೋಟ್ಯಾಂತರ ರೂಪಾಯಿ ಬಾಚಿಕೊಂಡ ಸಿಂಗಂ ಅಗೇನ್‌, ಭೂಲ್‌ ಭುಲ್ಲಯ್ಯಾ 3; ಬಾಲಿವುಡ್‌ ಸಿನಿಮಾಗಳ ಜುಗಲ್‌ಬಂದಿ

ದೀಪಾವಳಿ ಹಬ್ಬದ ಸಮಯದಲ್ಲಿ ದಕ್ಷಿಣ ಭಾರತದಲ್ಲಿ ಹಲವು ಸಿನಿಮಾಗಳು ಬಿಡುಗಡೆಯಾಗಿವೆ. ಇದೇ ಸಮಯದಲ್ಲಿ ನವೆಂಬರ್‌ 1ರಂದು ಬಾಲಿವುಡ್‌ನಲ್ಲೂ ಎರಡು ಪ್ರಮುಖ ಸಿನಿಮಾಗಳು ಬಿಡುಗಡೆಯಾಗುತ್ತಿವೆ. ಸಿಂಗಂ ಅಗೇನ್‌, ಭೂಲ್‌ ಭುಲ್ಲಯ್ಯಾ 3 ಸಿನಿಮಾಗಳು ಬಿಡುಗಡೆಗೆ ಮುನ್ನವೇ ಅಡ್ವಾನ್ಸಡ್‌ ಬುಕ್ಕಿಂಗ್‌ನಲ್ಲಿ ಹಲವು ಕೋಟಿ ರೂಪಾಯಿ ಬಾಚಿಕೊಂಡಿವೆ. ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ನಲ್ಲಿ ಇವೆರಡು ಸಿನಿಮಾಗಳ ನಡುವೆ ಪೈಪೋಟಿ ಇರುವ ಸೂಚನೆಯಿದೆ. ದೀಪಾವಳಿಗೆ ಮುನ್ನ ಯಾವುದೇ ಪ್ರಮುಖ ಸಿನಿಮಾಗಳು ರಿಲೀಸ್‌ ಆಗಿರಲಿಲ್ಲ. ಹಳೆಯ ಸಿನಿಮಾಗಳನ್ನೇ ಮರುಬಿಡುಗಡೆ ಮಾಡಲಾಗುತ್ತಿತ್ತು. ಇದೀಗ ದೀಪಾವಳಿ ಸಂಭ್ರಮದ ಸಮಯದಲ್ಲಿ ಸಿನಿಮಾ ಪ್ರೇಕ್ಷಕರಿಗೆ ಕನ್ನಡದ ಬಘೀರ, ತೆಲುಗಿನ ಲಕ್ಕಿ ಬಾಸ್ಕರ್‌, ತಮಿಳಿನ ಅಮರನ್‌, ಹಿಂದಿಯ ಸಿಂಗಂ ಅಗೇನ್‌, ಭೂಲ್‌ ಭೂಲೈಯಾ 3 ಮುಂತಾದ ಸಿನಿಮಾಗಳು ರಸದೌತಣ ನೀಡಲಿವೆ.

ಮುಂಗಡ ಬಾಕ್ಸ್‌ ಆಫೀಸ್‌ ಕಲೆಕ್ಷನ್‌ ವಿವರ

ಈಗಾಗಲೇ ಭೂಲ್‌ ಭುಲೈಯಾ 3 ಮುಂಗಡ ಕಲೆಕ್ಷನ್‌ ಹೆಚ್ಚಿದೆ. ಒಂದು ದಿನದ ಮೊದಲೇ ಬುಕ್ಕಿಂಗ್‌ ಆರಂಭವಾಗಿರುವುದು ಇದಕ್ಕೆ ಕಾರಣ. ಸಿಂಗಂ ಅಗೇನ್‌ ಕಲೆಕ್ಷನ್‌ನಲ್ಲಿ ಇನ್ನಷ್ಟೇ ಹಿಡಿತ ಸಾಧಿಸುತ್ತಿದೆ. ಗುರುವಾರ ಬೆಳಗ್ಗಿನ ತನಕದ ಲೆಕ್ಕಾಚಾರದ ಆಧಾರದಲ್ಲಿ ಹೇಳುವುದಾದರೆ ರೋಹಿತ್‌ ಶೆಟ್ಟಿ ನಿರ್ದೇಶನದ ಸಿಂಗಂ ಅಗೇನ್‌ ಸಿನಿಮಾವು ಮುಂಗಡ ಬುಕ್ಕಿಂಗ್‌ನಲ್ಲಿ 5.97 ಕೋಟಿ ರೂಪಾಯಿ ಕಲೆಕ್ಷನ್‌ ಮಾಡಿದೆ. ಸಿಂಗಮ್‌ ಎಗೈನ್‌ ಸಿನಿಮಾದ 1,83,666 ಟಿಕೆಟ್‌ಗಳು ಮಾರಾಟವಾಗಿವೆ. ಭೂಲ್‌ ಭುಲೈಯಾ 3 ಸಿನಿಮಾದ ಮುಂಗಡ ಬುಕ್ಕಿಂಗ್‌ ಸಿಂಗಮ್‌ಗಿಂತ ಒಂದು ದಿನ ಮೊದಲೇ ಆರಂಭವಾಗಿದೆ. ಭೂಲ್‌ ಭುಲೈಯಾ 3 ಸಿನಿಮಾವು ಇಲ್ಲಿಯವರೆಗೆ 2,29,558 ಟಿಕೆಟ್‌ಗಳನ್ನು ಮಾರಾಟ ಮಾಡಿದೆ. ಆದರೆ, ಸಿಂಗಂ ಅಗೇನ್‌ ಚಿತ್ರದ ಸ್ಕ್ರೀನ್‌ಗಳ ಸಂಖ್ಯೆ ಹೆಚ್ಚಾಗಿದೆ.

ಭೂಲ್ ಭುಲೈಯಾ 3 ಸಿನಿಮಾದ ಕುರಿತು

ಕಾರ್ತಿಕ್ ಆರ್ಯನ್ ಅವರ 'ಭೂಲ್ ಭುಲೈಯಾ 3' ನವೆಂಬರ್‌ 1ರಂದು ಬಿಡುಗಡೆಯಾಗುತ್ತಿದೆ. ಭೂಲ್‌ ಭುಲ್ಲಯ್ಯಾ 3 ಸಿನಿಮಾ ಸಹ ಟ್ರೇಲರ್‌ ಮೂಲಕವೇ ಕುತೂಹಲ ಮೂಡಿಸಿದೆ. ಅನೀಸ್‌ ಬಜ್ಮಿ ನಿರ್ದೇಶನದಲ್ಲಿ ಮೂಡಿಬಂದಿರುವ ಈ ಸಿನಿಮಾ ಹಾರರ್‌ ಕಾಮಿಡಿ ಶೈಲಿಯಲ್ಲಿದೆ. ಕಾರ್ತಿಕ್‌ ಆರ್ಯನ್‌ ಮುಖ್ಯಪಾತ್ರದಲ್ಲಿ ನಟಿಸಿದ್ದಾರೆ. ವಿದ್ಯಾ ಬಾಲನ್‌, ಮಾಧುರಿ ದೀಕ್ಷಿತ್‌, ತೃಪ್ತಿ ದಿಮ್ರಿ ಸೇರಿ ಇನ್ನೂಹಲವು ಕಲಾವಿದರು ಈ ಚಿತ್ರದಲ್ಲಿ ನಟಿಸಿದ್ದಾರೆ. ಟಿ ಸಿರೀಸ್‌ನ ಭೂಷಣ್‌ ಕುಮಾರ್‌ ಈ ಸಿನಿಮಾ ನಿರ್ಮಾಣ ಮಾಡಿದ್ದಾರೆ.

ಸಿಂಗಂ ಅಗೇನ್‌ ಚಿತ್ರದ ಮಾಹಿತಿ

ಸಿಂಗಂ ಅಗೇನ್‌ (ಸಿಂಘಮ್ ಎಗೇನ್) ಸಿನಿಮಾವು ಬಾಲಿವುಡ್‌ ಆಕ್ಷನ್ ಚಿತ್ರವಾಗಿದ್ದು, ರೋಹಿತ್ ಶೆಟ್ಟಿ ಬರೆದು ನಿರ್ದೇಶಿಸಿದ್ದಾರೆ. ರಿಲಯನ್ಸ್ ಎಂಟರ್‌ಟೈನ್‌ಮೆಂಟ್ , ಜಿಯೋ ಸ್ಟುಡಿಯೋಸ್ ಮತ್ತು ದೇವಗನ್ ಫಿಲ್ಮ್ಸ್ ಜೊತೆಗೆ ರೋಹಿತ್ ಶೆಟ್ಟಿ ಪಿಕ್ಚರ್ಸ್ ಅಡಿಯಲ್ಲಿ ಸಹ ನಿರ್ಮಾಣ ಮಾಡಿದ್ದಾರೆ. ಕರೀನಾ ಕಪೂರ್ ಖಾನ್ , ರಣವೀರ್ ಸಿಂಗ್ , ಅಕ್ಷಯ್ ಕುಮಾರ್ , ದೀಪಿಕಾ ಪಡುಕೋಣೆ , ಟೈಗರ್ ಶ್ರಾಫ್ , ಅರ್ಜುನ್ ಕಪೂರ್ ಮತ್ತು ಜಾಕಿ ಶ್ರಾಫ್ ಜತೆ ಅಜಯ್‌ ದೇವಗನ್‌ ನಟಿಸಿದ್ದಾರೆ. ಇದು ಶೆಟ್ಟಿಯವರ ಕಾಪ್ ಯೂನಿವರ್ಸ್ ಫ್ರಾಂಚೈಸ್‌ನ ಐದನೇ ಕಂತು. ಸಿಂಗಮ್ ರಿಟರ್ನ್ಸ್ (2014) ಸಿನಿಮಾದ ಮುಂದಿನ ಭಾಗವಾಗಿದೆ.