Lineman OTT: ಚಾರ್ಲಿ ನಟನೆಯ ಲೈನ್ಮ್ಯಾನ್ ಸಿನಿಮಾ ಒಟಿಟಿಗೆ ಆಗಮನ, ಯಾವ ಪ್ಲಾಟ್‌ಫಾರ್ಮ್‌, ಕಥೆಯೇನು? ಇಲ್ಲಿದೆ ವಿವರ
Lineman OTT: ಚಾರ್ಲಿ ಮುಖ್ಯಪಾತ್ರದಲ್ಲಿ ನಟಿಸಿರುವ ತಮಿಳು ಸಿನಿಮಾ ಲೈನ್ಮ್ಯಾನ್ ಇದೀಗ ಒಟಿಟಿಗೆ ಆಗಮಿಸಿದೆ. ನೈಜ ಘಟನೆ ಆಧರಿತ ಕಥೆಯನ್ನು ಒಳಗೊಂಡ ಈ ಸಿನಿಮಾವನ್ನು ಆಹಾ ತಮಿಳ್‌ ಒಟಿಟಿ ಪ್ಲಾಟ್‌ಫಾರ್ಮ್‌ನಲ್ಲಿ ವೀಕ್ಷಿಸಬಹುದು.
Lineman OTT ಇತ್ತೀಚೆಗೆ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗಿ ಪ್ರೇಕ್ಷಕರ ಮೆಚ್ಚುಗೆ ಪಡೆದ ತಮಿಳು ಸಿನಿಮಾ ಲೈನ್ಮ್ಯಾನ್ ಇದೀಗ ಒಟಿಟಿಗೆ ಆಗಮಿಸಿದೆ. ಈ ಸಿನಿಮಾವನ್ನು ಆಹಾ ತಮಿಳ್‌ ಒಟಿಟಿಯಲ್ಲಿ ವೀಕ್ಷಿಸಬಹುದು. ಈ ಸಿನಿಮಾದಲ್ಲಿ ಕರೆಂಟ್‌ ಲೈನ್ಮ್ಯಾನ್ ಉದ್ಯೋಗಿಯ ಪಾತ್ರದಲ್ಲಿ ನಟ ಚಾರ್ಲಿ ನಟಿಸಿದ್ದಾರೆ. ಈ ಸಿನಿಮಾದಲ್ಲಿ ಲೈನ್‌ಮ್ಯಾನ್‌ನ ಮಗ ತನ್ನ ಸೌರ ವಿದ್ಯುತ್‌ ಯೋಜನೆಯ ಕುರಿತು ತಿಳಿಸಲು ಮುಖ್ಯಮಂತ್ರಿಯನ್ನು ಭೇಟಿಯಾಗಲು ಪ್ರಯತ್ನಿಸುವ ಕಥೆಯಿದೆ. ಈ ಸ್ಪೂರ್ತಿದಾಯಕ ಸಿನಿಮಾ ನೋಡಬೇಕೆಂದು ಬಯಸುವವರು ಈಗ ಆನ್‌ಲೈನ್‌ನಲ್ಲಿ ವೀಕ್ಷಿಸಬಹುದು.
ವಿನೋತ್ ಶೇಕರ್ ಮತ್ತು ದಿನಕರ್ ಬಾಬು ನಿರ್ಮಾಪಕರಾಗಿರುವ ಈ ಚಿತ್ರವನ್ನು ಉದಯ್ ಕುಮಾರ್ ನಿರ್ದೇಶಿಸಿದ್ದಾರೆ. ವಿಷ್ಣು ಕೆ ರಾಜಾ ಛಾಯಾಗ್ರಹಣವಿದೆ. ದೀಪಕ್ ನಂದಕುಮಾರ್ ಸಂಗೀತ ನೀಡಿದ್ದಾರೆ. ಶಿವರಾಜ್ ಚಿತ್ರದ ಸಂಕಲನಕಾರರು. ಈ ಚಿತ್ರದಲ್ಲಿ ನಟಿ ಅದಿತಿ ಬಾಲನ್ ವಿಶೇಷ ಪಾತ್ರದಲ್ಲಿ ನಟಿಸಿದ್ದಾರೆ.
ಎಲ್ಲಿ ಮತ್ತು ಯಾವಾಗ ವೀಕ್ಷಿಸಬಹುದು?
ಈಗಾಗಲೇ ಹೇಳಿದಂತೆ ಈ ಸಿನಿಮಾ ಅಹಾ ತಮಿಳಿನಲ್ಲಿ ನವೆಂಬರ್‌ 22ರಿಂದ ಸ್ಟ್ರೀಮಿಂಗ್‌ ಆಗುತ್ತಿದೆ.
ಲೈನ್ಮ್ಯಾನ್ ಸಿನಿಮಾದ ಕಥೆಯೇನು?
ಇದು ಲೈನ್‌ಮ್ಯಾನ್‌ಗಳ ಬದುಕಿನ ಕಥೆಯೂ ಹೌದು. ತೂತುಕುಡಿಯ ಹಳ್ಳಿಯೊಂದರಲ್ಲಿ ಜನರು ಉಪ್ಪಿನಕಾಯಿ ತಯಾರಿಸುವ ಕೆಲಸ ಮಾಡುತ್ತಾರೆ. ಇದು ಇವರ ಜೀವನಾಧಾರ ಕೆಲಸ ಎಂದರೂ ತಪ್ಪಾಗದು. ಅದೇ ಊರಿನಲ್ಲಿ ಎಲೆಕ್ಟ್ರಿಕ್ ಲೈನ್ಮ್ಯಾನ್ ಸುಬ್ಬಯ್ಯ (ಚಾರ್ಲಿ) ತನ್ನ ಮಗ ಸೆಂಥಿಲ್‌ನೊಂದಿಗೆ ವಾಸಿಸುತ್ತಾನೆ. ಲೈನ್‌ಮ್ಯಾನ್‌ಗಳ ಜೀವಕ್ಕೆ ಅಪಾಯವಾಗುವುದನ್ನು ಕಡಿಮೆ ಮಾಡಲು ಆತನ ಮಗ ಸೆಂಥಿಲ್ ಸೌರ ವಿದ್ಯುತ್‌ ದೀಪದ ಐಡಿಯಾ ಮಾಡುತ್ತಾನೆ. ಆದರೆ, ಸೆಂಥಿಲ್ ತನ್ನ ಆವಿಷ್ಕಾರವನ್ನು ಸರ್ಕಾರಿ ಅಧಿಕಾರಿಗಳಿಗೆ ತಿಳಿಸಲು ಪ್ರಯತ್ನಿಸಿದಾಗ ಸಾಕಷ್ಟು ಅಡೆತಡೆ ಎದುರಿಸುತ್ತಾನೆ.
ತನ್ನ ಮಗನ ಕನಸು ಈಡೇರಿಸಲು ಪ್ರಯತ್ನಿಸುವ ಬಡ ತಂದೆಯ ಕಥೆಯಾಗಿಯೂ ಇದು ಗಮನ ಸೆಳೆಯುತ್ತದೆ. ತನ್ನ ತಾಯಿಯ ಸಾವಿನ ಬಳಿಕ ಜನರ ಜೀವನ ಸುಧಾರಿಸಲು ಪ್ರಯತ್ನಿಸುವ ಸೆಂಥಿಲ್‌ನ ಕನಸಿಗೆ ಅಪ್ಪನ ಕಥೆಯೂ ಇದಾಗಿದೆ.
ಒಟಿಟಿಯಲ್ಲಿ ಹಲವು ಸಿನಿಮಾಗಳು ಬಿಡುಗಡೆ
ಬಘೀರ: ಇತ್ತೀಚೆಗೆ ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾದ ಬಘೀರ ಇದೀಗ ಒಟಿಟಿಯಲ್ಲಿ ಸ್ಟ್ರೀಮಿಂಗ್‌ ಆಗುತ್ತಿದೆ. ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆಯಾದ ಈ ಸಿನಿಮಾದಲ್ಲಿ ರಾಘವೇಂದ್ರ ರಾಜ್‌ಕುಮಾರ್‌ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಹೊರಗೆ ಭ್ರಷ್ಟ ಪೊಲೀಸ್‌ ಅಧಿಕಾರಿಯಾಗಿ, ಮುಖವಾಡ ಧರಿಸಿ ಸೂಪರ್‌ಹೀರೋ ಆಗಿ ಶತ್ರುಗಳನ್ನು ಸದೆ ಬಡಿಯುವ ಸಿನಿಮಾ ಇದಾಗಿದೆ. ಡಾ. ಸೂರಿ ನಿರ್ದೇಶನ ಮಾಡಿದ್ದರು. ಹೀಗೆ ಚಿತ್ರಮಂದಿರಗಳಲ್ಲಿ ತೆರೆಕಂಡ ಈ ಸಿನಿಮಾ ಕೇವಲ ಮೂರೇ ವಾರಕ್ಕೆ ಒಟಿಟಿಗೆ ಆಗಮಿಸಿದೆ.
ಮಾರ್ಟಿನ್‌: ಧ್ರುವ ಸರ್ಜಾ ದ್ವಿಪಾತ್ರದಲ್ಲಿ ನಟಿಸಿರುವ ಮಾರ್ಟಿನ್‌ ಸಿನಿಮಾ ಅಕ್ಟೋಬರ್‌ 11ರಂದು ಹಲವು ಭಾಷೆಗಳಲ್ಲಿ ಬಿಡುಗಡೆ ಆಗಿತ್ತು. ಇದೀಗ ಈ ಸಿನಿಮಾ ಕೂಡ ಅಮೆಜಾನ್‌ ಪ್ರೈಮ್‌ ವಿಡಿಯೋದಲ್ಲಿ ಬಿಡುಗಡೆಯಾಗಿದೆ.
ವಿಭಾಗ