BBK OTT: ಬಿಗ್‌ಬಾಸ್‌ ಕನ್ನಡಕ್ಕೆ ಭರ್ಜರಿ ಟಿಆರ್‌ಪಿ; ಆರಂಭವಾಗುತ್ತಂತೆ ಬಿಬಿಕೆ ಸೀಸನ್‌ 2 ಒಟಿಟಿ ಆವೃತ್ತಿ
Bigg Boss kannada OTT: ಬಿಗ್‌ಬಾಸ್‌ ಕನ್ನಡ ಸೀಸನ್‌ 10 ಮುಗಿದು ಕೆಲವು ದಿನಗಳಾಗಿವೆಯಷ್ಟೇ. ಇದೀಗ ಬಿಬಿಕೆ ಒಟಿಟಿ ಆವೃತ್ತಿ ಆರಂಭವಾಗಲಿದೆ ಎಂಬ ಗುಸುಗುಸು ಹಬ್ಬಿದೆ. ಬಿಗ್‌ಬಾಸ್‌ಗೆ ಭರ್ಜರಿ ಟಿಆರ್‌ಪಿ ದೊರಕಿರುವುದರಿಂದ ಒಟಿಟಿ ಆವೃತ್ತಿ ಆರಂಭಿಸುವ ಕುರಿತು ಚಿಂತಿಸಲಾಗಿದೆ ಎನ್ನಲಾಗಿದೆ.
ಬೆಂಗಳೂರು: ಬಿಗ್‌ಬಾಸ್‌ ಕನ್ನಡ ಒಟಿಟಿ ಆವೃತ್ತಿಯು ಮುಂದಿನ ದಿನಗಳಲ್ಲಿ ಆರಂಭವಾಗಲಿದೆ ಎಂದು ವರದಿಗಳು ತಿಳಿಸಿವೆ. ಬಿಗ್‌ಬಾಸ್‌ ಮನೆಗೆ ಮತ್ತೆ ಸುಣ್ಣಬಣ್ಣ ಬಳಿಯಲಾಗುತ್ತಿದ್ದು, ಇದು ಒಟಿಟಿ ಆವೃತ್ತಿ ಆರಂಭವಾಗುವ ಸೂಚನೆ ಎನ್ನಲಾಗಿದೆ. ಆದರೆ, ಕಿಚ್ಚ ಸುದೀಪ್‌ ಅವರು ಮ್ಯಾಕ್ಸ್‌ ಚಿತ್ರೀಕರಣದಲ್ಲಿ ಬಿಝಿ ಇದ್ದಾರೆ. ಕೆಸಿಸಿ 10 ಕ್ರಿಕೆಟ್‌ ಪಂದ್ಯಾಟವೂ ಇರುವುದರಿಂದ ಸುದೀಪ್‌ ಸದ್ಯಕ್ಕೆ ಬಿಗ್‌ಬಾಸ್‌ ವೀಕೆಂಡ್‌ ಪಂಚಾಯಿತಿಗೆ ಲಭ್ಯ ಇರುವ ಸಾಧ್ಯತೆ ಇಲ್ಲ.
ಬಿಗ್‌ಬಾಸ್‌ ಕನ್ನಡ ಸೀಸನ್‌ 10ಕ್ಕೆ ಭರ್ಜರಿ ಟಿಆರ್‌ಪಿ ದೊರಕಿರುವುದರಿಂದ ಒಟಿಟಿ ಆವೃತ್ತಿ ಆರಂಭಿಸುವ ಸಾಧ್ಯತೆ ಇದೆ ಎಂದು ಟಿವಿ9 ವರದಿ ತಿಳಿಸಿದೆ. 2022ರಲ್ಲಿ ಕನ್ನಡದ ಮೊದಲ ಬಿಗ್‌ಬಾಸ್‌ ಒಟಿಟಿ ಆವೃತ್ತಿಯು ವೂಟ್‌ ಸೆಲೆಕ್ಟ್‌ನಲ್ಲಿ ಪ್ರಸಾರವಾಗಿತ್ತು. ಬಿಗ್‌ಬಾಸ್‌ ಮಿನಿ ಆವೃತ್ತಿಯಲ್ಲಿ ಹದಿನಾರು ಸ್ಪರ್ಧಿಗಳು ಭಾಗವಹಿಸಿದ್ದರು. ಇವರಲ್ಲಿ ಟಾಪ್‌ 4 ಸ್ಥಾನ ಪಡೆದವರು ನೇರವಾಗಿ ಬಿಗ್‌ಬಾಸ್‌ ಕನ್ನಡ ಸೀಸನ್‌9ಕ್ಕೆ ಎಂಟ್ರಿ ಪಡೆದಿದ್ದರು. ಬಿಗ್‌ಬಾಸ್‌ ಕನ್ನಡ ಒಟಿಟಿ ಸೀಸನ್‌ನಲ್ಲಿ ರೂಪೇಶ್‌ ಶೆಟ್ಟಿ ಗೆಲುವು ಪಡೆದಿದ್ದರು. ಬಿಗ್‌ಬಾಸ್‌ ಕನ್ನಡ ಸೀಸನ್‌ 9 ಟೀವಿ ರಿಯಾಲಿಟಿ ಶೋನಲ್ಲೂ ರೂಪೇಶ್‌ ಶೆಟ್ಟಿ ಗೆಲುವು ಪಡೆದಿದ್ದರು.
ಈ ವರ್ಷ ಬಿಗ್‌ಬಾಸ್‌ ಕನ್ನಡ ಸೀಸನ್‌ 10 ರಿಯಾಲಿಟಿ ಶೋ ಕಲರ್ಸ್‌ ಕನ್ನಡ ಟೀವಿಯಲ್ಲಿ ಮಾತ್ರವಲ್ಲದೆ ಜಿಯೋ ಸಿನಿಮಾ ಒಟಿಟಿಯಲ್ಲೂ ಪ್ರಸಾರವಾಗಿತ್ತು. ದಿನಪೂರ್ತಿ ಅನ್‌ಸೀನ್‌ ಫೂಟೇಜ್‌ಗಳನ್ನು ನೋಡುವ ಅವಕಾಶ ಜಿಯೋ ಸಿನಿಮಾದಲ್ಲಿ ದೊರಕಿತ್ತು. ಜಿಯೋ ಸಿನಿಮಾ ಒಟಿಟಿ ವೇದಿಕೆಯ ಪ್ರಚಾರಕ್ಕೆ ಕಂಪನಿಯು ಹೆಚ್ಚಿನ ಗಮನ ನೀಡುತ್ತಿದೆ. ಉಚಿತ ಮತ್ತು ಪ್ರೀಮಿಯಂ ಎಂಬ ಎರಡು ಆಯ್ಕೆಗಳಲ್ಲಿ ಜಿಯೋ ಸಿನಿಮಾ ಒಟಿಟಿಯನ್ನು ವೀಕ್ಷಿಸಬಹುದು. ಉಚಿತವಾಗಿ ಟೀವಿ ಶೋ ಅಥವಾ ಕೆಲವು ಸಿನಿಮಾಗಳನ್ನು ಜಿಯೋ ಸಿನಿಮಾದಲ್ಲಿ ನೋಡಬೇಕಿದ್ದರೆ ಒಂದಿಷ್ಟು ಜಾಹೀರಾತುಗಳನ್ನು ಸಹಿಸಿಕೊಳ್ಳಬೇಕಾಗುತ್ತದೆ. ಈ ಹಿಂದೆ ವೂಟ್‌ ಒಟಿಟಿಯಲ್ಲಿ ಬಿಗ್‌ಬಾಸ್‌ ಕನ್ನಡ ಒಟಿಟಿ ಆವೃತ್ತಿ ಪ್ರಸಾರವಾಗಿತ್ತು.
ಬಿಗ್‌ಬಾಸ್‌ ಕನ್ನಡ ಒಟಿಟಿ ಆವೃತ್ತಿ ಆರಂಭವಾಗುವ ಕುರಿತು ಜಿಯೋ ಸಿನಿಮಾ ಕಡೆಯಿಂದ ಯಾವುದೇ ಅಪ್‌ಡೇಟ್‌ ಬಂದಿಲ್ಲ. ಜಿಯೋ ಸಿನಿಮಾ ಸೋಷಿಯಲ್‌ ಮೀಡಿಯಾ ಹ್ಯಾಂಡಲ್‌ಗಳಲ್ಲೂ ಯಾವುದೇ ಸಣ್ಣ ಹಿಂಟ್‌ ದೊರಕಿಲ್ಲ. ಮುಂದಿನ ದಿನಗಳಲ್ಲಿ ಈ ಕುರಿತು ಸ್ಪಷ್ಟತೆ ದೊರಕಲಿದೆ. ಈ ಬಾರಿಯ ಬಿಗ್‌ಬಾಸ್‌ ಕನ್ನಡ ಸೀಸನ್‌ 10ರ ಸಂಚಿಕೆಗಳು ಹಲವು ಕಾರಣಗಳಿಂದ ಸುದ್ದಿಯಲ್ಲಿತ್ತು. ಸ್ಪರ್ಧಿಗಳ ಜಗಳ, ಆಟದ ರೀತಿಯು ಚರ್ಚೆಗೆ ಕಾರಣವಾಗಿತ್ತು. ಆದರೆ, ಇದೇ ಸಮಯದಲ್ಲಿ ಬಿಗ್‌ಬಾಸ್‌ಗೆ ಭರ್ಜರಿ ಟಿಆರ್‌ಪಿ ದೊರಕಿತ್ತು.
ಬಿಗ್‌ಬಾಸ್‌ ಕನ್ನಡ ಸೀಸನ್‌ 10ರಲ್ಲಿ ಕಾರ್ತಿಕ್‌ ಗೌಡ ಅವರು ಗೆಲುವು ಪಡೆದಿದ್ದರು. ಮೊದಲ ರನ್ನರ್‌ ಅಪ್‌ ಆಗಿ ಡ್ರೋನ್‌ ಪ್ರತಾಪ್‌, ಎರಡನೇ ರನ್ನರ್‌ ಅಪ್‌ ಆಗಿ ಸಂಗೀತಾ ಗೌಡ ಮತ್ತು ಮೂರನೇ ರನ್ನರ್‌ ಅಪ್‌ ಆಗಿ ವಿನಯ್‌ ಗೌಡ ಹೊರಹೊಮ್ಮಿದ್ದರು. ಕಳೆದ ಬಿಬಿಕೆ ಒಟಿಟಿ ಆವೃತ್ತಿಯಲ್ಲಿ ಸೋನು ಗೌಡ, ರಾಕೇಶ್‌ ಅಡಿಗ, ರೂಪೇಶ್‌ ಶೆಟ್ಟಿ, ಸಾನ್ಯ ಅಯ್ಯರ್‌, ಆಯುವರ್ಧನ್‌ ಗುರೂಜಿ ಮುಂತಾದವರು ಸ್ಪರ್ಧಿಗಳಾಗಿ ಭಾಗವಹಿಸಿದ್ದರು. ಬಳಿಕ ಬಿಗ್‌ಬಾಸ್‌ ಟಿವಿ ಆವೃತ್ತಿ ಆರಂಭವಾಗಿತ್ತು. ಈಗಾಗಲೇ ಬಿಗ್‌ಬಾಸ್‌ ಕನ್ನಡ ಸೀಸನ್‌ 10 ಟಿವಿ ಆವೃತ್ತಿ ಮುಗಿದಿರುವುದರಿಂದ ಒಟಿಟಿ ಆವೃತ್ತಿ ಸ್ವರೂಪ ಬೇರೆ ರೀತಿ ಇರುವ ಸೂಚನೆಯಿದೆ.
