Changes from June 1: ಎಲ್‌ಪಿಜಿ ದರ ಪರಿಷ್ಕರಣೆ ಸೇರಿ ಮಹತ್ವದ ಬದಲಾವಣೆ ನಿರೀಕ್ಷಿಸಿ; ವಿವರ ಓದಿಗೆ ಇಲ್ಲಿ ಕ್ಲಿಕ್ಕಿಸಿ

ಕ್ಯಾಲೆಂಡರ್‌ನಲ್ಲಿ ತಿಂಗಳ ಬದಲಾವಣೆ ಎಂದರೆ ನಿತ್ಯಬದುಕಿನ ಆರ್ಥಿಕತೆ ಮೇಲೆ ಪರಿಣಾಮ ಬೀರುವ ಒಂದಷ್ಟು ಬದಲಾವಣೆ ಎಂಬುದು ಈಗ ವೇದ್ಯ ವಿಚಾರ. ತಿಂಗಳ ಮೊದಲ ದಿನ ಹಲವು ಬದಲಾವಣೆ, ದರ ಪರಿಷ್ಕರಣೆ ನಿಶ್ಚಿತ.

ನಾವು ಈಗ ತಿಂಗಳ ಕೊನೆಯಲ್ಲಿದ್ದೇವೆ. ಇಂದು (ಮೇ 31) ತಿಂಗಳ ಕೊನೆಯ ದಿನ. ನಾಳೆ ಹೊಸ ತಿಂಗಳ ಮೊದಲ ದಿನ (ಜೂನ್‌ 1). ಮೊದಲನೆಯದಾಗಿ, ಎಲ್‌ಪಿಜಿ ಗ್ಯಾಸ್ ಸಿಲಿಂಡರ್‌ನ ದರ ಪರಿಷ್ಕರಣೆ ನಿರೀಕ್ಷಿಸಬಹುದು. ಪಿಎನ್‌ಜಿ, ಸಿಎನ್‌ಜಿ ಬೆಲೆ ಪರಿಷ್ಕರಣೆ ಕೂಡ ನಿರೀಕ್ಷಿತ. ಈ ಬದಲಾವಣೆಗಳು ನೇರವಾಗಿ ಜನರ ಪಾಕೆಟ್ ಮೇಲೆ ಪರಿಣಾಮ ಬೀರುತ್ತವೆ. ಇದಲ್ಲದೆ ಬೇರೇನು ಬದಲಾವಣೆಗಳಾಗಬಹುದು ತಿಳಿಯೋಣ.

LPG, CNG ಮತ್ತು PNG ಬೆಲೆಗಳ ದರ ಪರಿಷ್ಕರಣೆ

ಪ್ರತಿ ತಿಂಗಳು ಮೊದಲ ದಿನ ಸರ್ಕಾರವು LPG, CNG ಮತ್ತು PNG ಬೆಲೆಗಳನ್ನು ಪರಿಷ್ಕರಿಸುವುದು ವಾಡಿಕೆ. ಏಪ್ರಿಲ್ ಮತ್ತು ಮೇ ತಿಂಗಳಲ್ಲಿ ಸರ್ಕಾರಿ ಅನಿಲ ಕಂಪನಿಗಳು 19 ಕೆಜಿ ತೂಕದ ವಾಣಿಜ್ಯ ಗ್ಯಾಸ್ ಸಿಲಿಂಡರ್‌ಗಳ ಬೆಲೆಯನ್ನು ನಿರಂತರವಾಗಿ ಕಡಿತಗೊಳಿಸಿದ್ದವು. ಆದರೆ, 14 ಕೆಜಿ ಸಿಲಿಂಡರ್ ಬೆಲೆಯಲ್ಲಿ ಯಾವುದೇ ಬದಲಾವಣೆಯಾಗಿಲ್ಲ. ಜೂನ್ ತಿಂಗಳಿನಲ್ಲಿ ಸಿಲಿಂಡರ್ ಬೆಲೆಯಲ್ಲಿ ಏನಾದರೂ ಬದಲಾವಣೆಯಾಗಲಿದೆಯೇ ಎಂಬುದು ಸದ್ಯದ ಕುತೂಹಲ.

ಇಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳು ದುಬಾರಿ

ಇಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳು ಜೂನ್ 1 ರಿಂದ ದುಬಾರಿಯಾಗಲಿವೆ. ಭಾರೀ ಕೈಗಾರಿಕೆ ಸಚಿವಾಲಯವು ಮೇ 21 ರಂದು ಇಲೆಕ್ಟ್ರಿಕ್ ದ್ವಿಚಕ್ರ ವಾಹನಗಳಿಗೆ ಸಬ್ಸಿಡಿ ಕಡಿತವನ್ನು ಘೋಷಿಸುವ ಅಧಿಸೂಚನೆಯನ್ನು ಹೊರಡಿಸಿದೆ.

ಈ ಮೊದಲು ಪ್ರತಿ ಕಿಲೋವ್ಯಾಟ್‌ಗೆ 15,000 ರೂಪಾಯಿ ಸಬ್ಸಿಡಿ ನೀಡಲಾಗುತ್ತಿತ್ತು, ಆದರೆ ಈಗ ಅದನ್ನು ಕಿಲೋವ್ಯಾಟ್ ಗಂಟೆಗೆ 10,000 ರೂಪಾಯಿಗೆ ಇಳಿಸಲಾಗಿದೆ. ಜೂನ್‌ನಲ್ಲಿ ಇಲೆಕ್ಟ್ರಿಕ್ ದ್ವಿಚಕ್ರ ವಾಹನವನ್ನು ಖರೀದಿಸಿದರೆ 25,000 ರಿಂದ 30,000 ರೂ.ವರೆಗೆ ಹೆಚ್ಚುವರಿ ವೆಚ್ಚವಾಗುತ್ತದೆ ಎಂದು ತಜ್ಞರು ನಿರೀಕ್ಷಿಸುತ್ತಿರುವುದಕ್ಕೆ ಇದು ಕಾರಣ.

100 ದಿನಗಳು 100 ಪಾವತಿ ಅಭಿಯಾನ

100 ದಿನಗಳು 100 ಪಾವತಿ ಅಭಿಯಾನವು ಜೂನ್‌ನಲ್ಲಿ ಪ್ರಾರಂಭವಾಗುತ್ತದೆ. 100 ದಿನಗಳು 100 ಪಾವತಿ ಅಭಿಯಾನವನ್ನು ಮೇ 12 ರಂದು ಘೋಷಿಸಲಾಗಿದೆ. ಆದ್ದರಿಂದ, ದೇಶದ ಪ್ರತಿ ಜಿಲ್ಲೆಯ ಪ್ರತಿ ಬ್ಯಾಂಕ್‌ನ ಕ್ಲೈಮ್ ಮಾಡದ ಅಗ್ರ ಠೇವಣಿಗಳನ್ನು 100 ದಿನಗಳಲ್ಲಿ ಬ್ಯಾಂಕ್ ಕಂಡುಹಿಡಿಯಬೇಕು. ಅವುಗಳ ವಿಲೇವಾರಿ ಕೂಡ ಮಾಡಬೇಕು.

ಬ್ಯಾಂಕಿಂಗ್ ವ್ಯವಸ್ಥೆಯಲ್ಲಿ ಕ್ಲೈಮ್ ಮಾಡದ ಠೇವಣಿಗಳ ಹೊರೆಯನ್ನು ಕಡಿಮೆ ಮಾಡಲು ಮತ್ತು ಈ ಠೇವಣಿಗಳನ್ನು ಅವರ ನಿಜವಾದ ಮಾಲೀಕರು/ಸಾಲದಾತರಿಗೆ ಹಿಂದಿರುಗಿಸಲು ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಉಪಕ್ರಮವನ್ನು ತೆಗೆದುಕೊಂಡಿದೆ.

ರಫ್ತಿಗೆ ಮುನ್ನ ಕೆಮ್ಮಿನ ಸಿರಪ್ ಪರೀಕ್ಷೆ

ಕೆಮ್ಮಿನ ಸಿರಪ್ ಅನ್ನು ರಫ್ತು ಮಾಡುವ ಮೊದಲು ಪರೀಕ್ಷಿಸಲಾಗುವುದು ಭಾರತದ ಡ್ರಗ್ ಕಂಟ್ರೋಲರ್ ಜನರಲ್ (ಡಿಸಿಜಿಐ) ಕೆಮ್ಮು ಸಿರಪ್ ತಯಾರಿಸುವ ಕಂಪನಿಗಳಿಗೆ ಕೆಮ್ಮಿನ ಸಿರಪ್‌ನ ಮಾದರಿಗಳನ್ನು ಪರೀಕ್ಷಿಸಲು ಕೇಳಿದೆ. ಜೂನ್ 1 ರಿಂದ ರಫ್ತು ಮಾಡುವ ಮೊದಲು ಸಿರಪ್ ಪರೀಕ್ಷೆ ನಡೆಸುವುದನ್ನು ಸರ್ಕಾರ ಕಡ್ಡಾಯಗೊಳಿಸಿದೆ.

ಕೆಮ್ಮು ಸಿರಪ್‌ಗಳ ರಫ್ತುದಾರರು ಉತ್ಪನ್ನವನ್ನು ರಫ್ತು ಮಾಡುವ ಮೊದಲು ಸರ್ಕಾರಿ ಪ್ರಯೋಗಾಲಯದಲ್ಲಿ ಪರೀಕ್ಷೆಗೆ ಒಳಗಾಗಬೇಕಾಗುತ್ತದೆ. ಸಿರಪ್‌ ಸರಿಯಾಗಿದೆ ಎಂಬುದು ದೃಢಪಟ್ಟ ಬಳಿಕವೇ ಸಿರಪ್‌ಗಳನ್ನು ರಫ್ತು ಮಾಡಲು ಅವಕಾಶ ನೀಡಲಾಗುವುದು ಎಂದು ಡೈರೆಕ್ಟರೇಟ್ ಜನರಲ್ ಆಫ್ ಫಾರಿನ್ ಟ್ರೇಡ್ (ಡಿಜಿಎಫ್‌ಟಿ) ಅಧಿಕೃತವಾಗಿ ಹೇಳಿಕೆ ನೀಡಿದೆ.