Tirupati Vaikunta Ekadasi: ತಿರುಪತಿ ವೈಕುಂಠ ಏಕಾದಶಿ ದರ್ಶನ: ಡಿಸೆಂಬರ್‌ 23, 24ರಂದು ಆನ್‌ಲೈನ್‌ ಟಿಕೆಟ್‌ ಬುಕ್ಕಿಂಗ್‌

ಭಾರತದ ಪ್ರಸಿದ್ದ ದೇಗುಲ ದರ್ಶನ ಹಾಗೂ ಭಕ್ತರ ಜನಸಂದಣಿಯ ಕ್ಷೇತ್ರ ತಿರುಪತಿಯಲ್ಲಿ 2025ರ ಜನವರಿಯಲ್ಲಿ ನಡೆಯಲಿರವ ವೈಕುಂಠ ಏಕಾದಶಿ ದರ್ಶನಕ್ಕೆ ಲಕ್ಷಾಂತರ ಭಕ್ತರು ಆಗಮಿಸುತ್ತಾರೆ. ಇದಕ್ಕಾಗಿ ಮುಂಗಡ ಟಿಕೆಟ್‌ ಬುಕ್ಕಿಂಗ್‌ ಕೂಡ ಇರಲಿದೆ. ಭಕ್ತರ ಬೇಡಿಕೆಗೆ ಅನುಗುಣವಾಗಿ ತಿರುಪತಿ ತಿರುಮಲ ದೇವಸ್ಥಾನ ಸಮಿತಿಯು ಟಿಕೆಟ್‌ ಬುಕ್ಕಿಂಗ್‌ ಗೆ ಅವಕಾಶ ಮಾಡಿಕೊಡುತ್ತದೆ. ಈ ವರ್ಷದ ವೈಕುಂಠ ಏಕಾದಶಿಗೆ ದೇವರ ದರ್ಶನಕ್ಕಾಗಿ ಆನ್‌ ಲೈನ್‌ ಬುಕ್ಕಿಂಗ್‌ ಅನ್ನು ಆರಂಭಿಸಲಾಗುತ್ತಿದೆ.ತಿರುಮಲದ ವೆಂಕಟೇಶ್ವರ ದೇವಸ್ಥಾನದಲ್ಲಿ ವೈಕುಂಠ ದ್ವಾರ ದರ್ಶನಕ್ಕಾಗಿ ಆನ್‌ಲೈನ್ ಟೋಕನ್ ಬುಕ್ಕಿಂಗ್ ಡಿಸೆಂಬರ್ 23 ರಂದು ಬೆಳಿಗ್ಗೆ 11 ಗಂಟೆಗೆ ತೆರೆಯಲಿದೆ ಎಂದು ತಿರುಮಲ ತಿರುಪತಿ ದೇವಸ್ಥಾನಮ್ (ಟಿಟಿಡಿ) ಪ್ರಕಟಿಸಿದೆ. ಆದರೆ 300 ರೂಪಾಯಿ ವಿಶೇಷ ಪ್ರವೇಶ ದರ್ಶನ (ಎಸ್‌ಇಡಿ) ಟಿಕೆಟ್‌ಗಳು ಡಿಸೆಂಬರ್ 24 ರಂದು ಬೆಳಿಗ್ಗೆ11 ರಿಂದ ಆನ್‌ಲೈನ್‌ನಲ್ಲಿ ಲಭ್ಯವಿರಲಿದೆ.

ಇದನ್ನೂ ಓದಿರಿ: Mokshada ekadashi 2022 : ವೈಕುಂಠ ಏಕಾದಶಿ ಉಪವಾಸ ಡಿ.3ಕ್ಕಾ ಅಥವಾ 4ಕ್ಕಾ? ಎರಡೂ ದಿನ ಏಕಾದಶಿಯಾ?

ಟಿಕೆಟ್‌ ಬುಕ್ಕಿಂಗ್‌ ಸಮಯ

ವೈಕುಂಠ ಏಕಾದಶಿ ಆಚರಣೆಯ ಭಾಗವಾಗಿ 2025 ರ ಜನವರಿ 10 ರಿಂದ 19ರವರೆಗೆ ಈ ದರ್ಶನ ನಿಗದಿಪಡಿಸಲಾಗಿದೆ. ಗರ್ಭಗುಡಿಯನ್ನು ಸುತ್ತುವರೆದಿರುವ ಪವಿತ್ರ ಮಾರ್ಗವಾದ ವೈಕುಂಠ ದ್ವಾರವು ಈ 10 ದಿನಗಳ ಅವಧಿಯಲ್ಲಿ ಭಕ್ತರಿಗೆ ತೆರೆದಿರುತ್ತದೆ. ಟಿಟಿಡಿ ಕಾರ್ಯನಿರ್ವಾಹಕ ಅಧಿಕಾರಿ (ಇಒ) ಪ್ರಕಾರ, ದರ್ಶನ ಟಿಕೆಟ್‌ಗಳಿಗಾಗಿ ಆನ್‌ಲೈನ್ ಬುಕಿಂಗ್‌ಗಳು ಡಿಸೆಂಬರ್ 23 ರಂದು ಬೆಳಿಗ್ಗೆ 11 ಗಂಟೆಗೆ ಪ್ರಾರಂಭವಾಗುತ್ತದೆ.

ಭಕ್ತರ ಹರಿವನ್ನು ನಿರ್ವಹಿಸಲು, ತಿರುಪತಿಯ ಎಂಟು ಮತ್ತು ತಿರುಮಲದ ಒಂದು ಕೇಂದ್ರದಲ್ಲಿ ಸ್ಲಾಟೆಡ್ ಸರ್ವ ದರ್ಶನ (ಎಸ್‌ಎಸ್‌ಡಿ) ಟೋಕನ್‌ಗಳನ್ನು ವಿತರಿಸಲಾಗುತ್ತದೆ. 300 ರೂಪಾಯಿ ವಿಶೇಷ ಪ್ರವೇಶ ದರ್ಶನ (ಎಸ್‌ಇಡಿ) ಟಿಕೆಟ್‌ಗಳು ಡಿಸೆಂಬರ್ 24 ರಂದು ಬೆಳಿಗ್ಗೆ 11 ಗಂಟೆಯಿಂದ ಆನ್‌ಲೈನ್‌ನಲ್ಲಿ ಲಭ್ಯವಿರುತ್ತವೆ. ಅದೇ ರೀತಿ, ಎಂಆರ್ ಪಲ್ಲಿ, ಜೀವಕೋಣ, ರಾಮನಾಯ್ಡು ಶಾಲೆ, ರಾಮಚಂದ್ರ ಪುಷ್ಕರಿಣಿ, ಇಂದಿರಾ ಮೈದಾನ, ಶ್ರೀನಿವಾಸಂ, ವಿಷ್ಣು ನಿವಾಸ, ತಿರುಪತಿಯ ಭೂದೇವಿ ಕಾಂಪ್ಲೆಕ್ಸ್ ಮತ್ತು ತಿರುಮಲದಲ್ಲಿರುವ ಕೌಸ್ತುಭಂ ಅತಿಥಿಗೃಹಗಳ ಮುಂಗಡ ಕಾಯ್ದಿರಿಸುವಿಕೆಗೂ ಅವಕಾಶ ಇದೆ.

ಇದನ್ನೂ ಓದಿರಿ: ತಿರುಪತಿ ತಿಮ್ಮಪ್ಪನ ಭಕ್ತರೇ ಗಮನಿಸಿ: 2025ರ ಜನವರಿಯಲ್ಲಿ ನಡೆಯುವ 10 ದಿನಗಳ ವೈಕುಂಠ ಏಕಾದಶಿ ದರ್ಶನದ ಟಿಕೆಟ್‌ಗಳು ಬಿಡುಗಡೆ

ಯಾರಿಗೆ ಎಲ್ಲಿ ಪ್ರವೇಶ

ದರ್ಶನ ಟೋಕನ್‌ಗಳನ್ನು ಹೊಂದಿರುವವರಿಗೆ ಮಾತ್ರ ವೈಕುಂಠ ದ್ವಾರ ದರ್ಶನಕ್ಕೆ ಅವಕಾಶ ನೀಡಲಾಗುವುದು ಎಂಬುದನ್ನು ಗಮನಿಸಬೇಕು. ಆದಾಗ್ಯೂ, ಟೋಕನ್ ಇಲ್ಲದೆ ಇರುವಂಥ ವ್ಯಕ್ತಿಗಳು ತಿರುಮಲಕ್ಕೆ ಭೇಟಿ ನೀಡಬಹುದು. ಆದರೆ ಅಂಥವರಿಗೆ ದರ್ಶನ ಸರತಿ ಸಾಲಿನಲ್ಲಿ ನಿಲ್ಲುವುದಕ್ಕೆ ಅನುಮತಿ ನೀಡುವುದಿಲ್ಲ ಎಂದು ಅಧಿಕಾರಿಗಳು ವಿವರಿಸಿದ್ದಾರೆ.

ವೈಕುಂಠ ಏಕಾದಶಿ ದಿನದಂದು (ಜನವರಿ 10, 2025), ವಿಐಪಿ ಪ್ರೋಟೋಕಾಲ್ ದರ್ಶನವು ಮುಂಜಾನೆ 4:45 ಕ್ಕೆ ಪ್ರಾರಂಭವಾಗುತ್ತದೆ, ನಂತರ ದ್ವಾದಶಿ ದಿನದಂದು (ಜನವರಿ 21, 24) ಬೆಳಿಗ್ಗೆ 9 ರಿಂದ 11 ರವರೆಗೆ ಭವ್ಯವಾದ ಸ್ವರ್ಣ ರಥ (ಚಿನ್ನದ ರಥ) ಮೆರವಣಿಗೆ ನಡೆಯಲಿದೆ. ಚಕ್ರಸ್ನಾನದ ವಿಧಿವಿಧಾನಗಳು ನಡೆಯಲಿವೆ. ದೇವಸ್ಥಾನದ ಹೊಂಡದಲ್ಲಿ, ಶ್ರೀವಾರಿ ಪುಷ್ಕರಿಣಿ ಕಾರ್ಯಕ್ರಮ ಬೆಳಿಗ್ಗೆ 5:30 ರಿಂದ 6:30 ರ ನಡುವೆ ಇರಲಿವೆ.

ಇದನ್ನೂ ಓದಿರಿ: Vaikunta Ekadashi2023: ಬೆಂಗಳೂರು,ಮೈಸೂರು, ಮಂಗಳೂರು ಸಹಿತ ಹಲವೆಡೆ ವೈಕುಂಠ ಏಕಾದಶಿ ವಿಶೇಷ ಅಲಂಕಾರ, ಪೂಜೆಯ ಸಡಗರ

ಸಂಚಾರ ದಟ್ಟಣೆ ತಡೆಗೆ ಕ್ರಮ

ಭಕ್ತಾದಿಗಳ ಹೆಚ್ಚಿನ ಒಳಹರಿವು ಹಾಗೂ ವಾಹನ ಸಂಚಾರ ನಿರ್ವಹಣೆಯನ್ನು ಖಚಿತಪಡಿಸಿಕೊಳ್ಳಲು ಟಿಟಿಡಿ ಸ್ಥಳೀಯ ಪೊಲೀಸರೊಂದಿಗೆ ಸಮನ್ವಯ ಸಾಧಿಸಿ ಚಟುವಟಿಕೆ ರೂಪಿಸಿದೆ. ಯಾತ್ರಾರ್ಥಿಗಳ ಅಗತ್ಯತೆಗಳನ್ನು ಪೂರೈಸಲು, ಅನ್ನದಾನ (ಉಚಿತ ಆಹಾರ ವಿತರಣೆ) 10 ದಿನಗಳ ಉತ್ಸವದ ಉದ್ದಕ್ಕೂ ಬೆಳಿಗ್ಗೆ 6 ರಿಂದ ಮಧ್ಯರಾತ್ರಿಯವರೆಗೆ ಅಡೆತಡೆಯಿಲ್ಲದೆ ನಡೆಯುತ್ತದೆ. ಮೆನುವು ಚಹಾ, ಕಾಫಿ, ಹಾಲು, ಉಪ್ಪಿಟ್ಟು, ಸಿಹಿ ಪೊಂಗಲ್‌ ಮತ್ತು ಪೊಂಗಲ್‌ಗಳನ್ನು ಒಳಗೊಂಡಿರುತ್ತದೆ. ಹೆಚ್ಚುವರಿಯಾಗಿ, ನಿರೀಕ್ಷಿತ ಬೇಡಿಕೆಯನ್ನು ಪೂರೈಸಲು ಟಿಟಿಡಿ 3.5 ಲಕ್ಷ ಲಡ್ಡುಗಳ ದಾಸ್ತಾನು ಇಟ್ಟುಕೊಂಡಿರಲಿದೆ ಎಂದು ಟಿಟಿಡಿ ಅಧಿಕಾರಿಗಳು ತಿಳಿಸಿದ್ದಾರೆ.

ತಿರುಪತಿಯಲ್ಲಿ ಪ್ರತಿವರ್ಷ ವೈಕುಂಠ ದ್ವಾರ ದರ್ಶನದಲ್ಲಿ ಭಾಗವಹಿಸಲು ದೇಶದಾದ್ಯಂತದ ಲಕ್ಷಾಂತರ ಭಕ್ತರು ಬೆಟ್ಟದ ದೇಗುಲಕ್ಕೆ ಆಗಮಿಸುತ್ತಾರೆ. ಈ ಬಾರಿಯೂ ಹೆಚ್ಚಿನ ಸಂಖ್ಯೆಯ ಭಕ್ತರು ಆಗಮಿಸುವ ನಿರೀಕ್ಷೆಯಿದೆ.