ಕನ್ನಡ ಸುದ್ದಿ  /  ಕ್ರೀಡೆ  /  India Vs West Indies: ಮೂರೇ ದಿನಕ್ಕೆ ಮೊದಲ ಟೆಸ್ಟ್ ಮುಕ್ತಾಯ, ಅಶ್ವಿನ್ ಸ್ಪಿನ್ ಮೋಡಿಗೆ ವಿಂಡೀಸ್​ ಉಡೀಸ್; ಭಾರತಕ್ಕೆ ಇನ್ನಿಂಗ್ಸ್ ಜಯ

India vs West Indies: ಮೂರೇ ದಿನಕ್ಕೆ ಮೊದಲ ಟೆಸ್ಟ್ ಮುಕ್ತಾಯ, ಅಶ್ವಿನ್ ಸ್ಪಿನ್ ಮೋಡಿಗೆ ವಿಂಡೀಸ್​ ಉಡೀಸ್; ಭಾರತಕ್ಕೆ ಇನ್ನಿಂಗ್ಸ್ ಜಯ

India vs West Indies 1st Test Highlights: ಡೊಮಿನಿಕಾದ ವಿಂಡ್ಸರ್​ ಪಾರ್ಕ್​ನಲ್ಲಿ ನಡೆದ ಮೊದಲ ಟೆಸ್ಟ್​ ಪಂದ್ಯದಲ್ಲಿ ವೆಸ್ಟ್​ ಇಂಡೀಸ್​ ವಿರುದ್ಧ ಟೀಂ ಇಂಡಿಯಾ ಭರ್ಜರಿ ಗೆಲುವು ದಾಖಲಿಸಿದೆ. ಇನ್ನಿಂಗ್ಸ್​ ಮತ್ತು 141 ರನ್​ಗಳಿಂದ ಅಮೋಘ ಜಯ ಸಾಧಿಸಿದ ರೋಹಿತ್ ಪಡೆ, ಸರಣಿಯಲ್ಲಿ ಮುನ್ನಡೆ ಪಡೆದಿದೆ.

ವೆಸ್ಟ್​ ಇಂಡೀಸ್​ ವಿರುದ್ಧದ ಮೊದಲ ಟೆಸ್ಟ್​ ಪಂದ್ಯದಲ್ಲಿ ಭಾರತಕ್ಕೆ ಇನ್ನಿಂಗ್ಸ್​ ಜಯ.
ವೆಸ್ಟ್​ ಇಂಡೀಸ್​ ವಿರುದ್ಧದ ಮೊದಲ ಟೆಸ್ಟ್​ ಪಂದ್ಯದಲ್ಲಿ ಭಾರತಕ್ಕೆ ಇನ್ನಿಂಗ್ಸ್​ ಜಯ.

ಭಾರತ-ವೆಸ್ಟ್​ ಇಂಡೀಸ್ (India vs West Indies)​ ನಡುವಿನ ಮೊದಲ ಟೆಸ್ಟ್​ ಪಂದ್ಯವು ಮೂರೇ ದಿನಕ್ಕೆ ಮುಕ್ತಾಯಗೊಂಡಿದೆ. ಎರಡನೇ ಇನ್ನಿಂಗ್ಸ್​​ನಲ್ಲೂ ಘರ್ಜಿಸಿದ ರವಿಚಂದ್ರನ್ ಅಶ್ವಿನ್ (Ravichandran Ashwin)​ ಅವರ ಸ್ಪಿನ್​ ದಾಳಿಗೆ ಅತಿಥೇಯ ವಿಂಡೀಸ್​ ಇನ್ಸಿಂಗ್ಸ್​​ ಮತ್ತು 141 ರನ್​​ಗಳ ಸೋಲು ಅನುಭವಿಸಿದೆ. ಬ್ಯಾಟಿಂಗ್-ಬೌಲಿಂಗ್​ ಎರಡಲ್ಲೂ ದರ್ಬಾರ್​ ನಡೆಸಿದ ಟೀಮ್​ ಇಂಡಿಯಾ ಭರ್ಜರಿ ಗೆಲುವು ದಾಖಲಿಸಿದೆ. ಐಸಿಸಿ ವಿಶ್ವ ಟೆಸ್ಟ್​ ಚಾಂಪಿಯನ್​​​​​ 3ನೇ ಆವೃತ್ತಿಯ ತಮ್ಮ ಆರಂಭಿಕ ಪಂದ್ಯದಲ್ಲೇ ದಾಖಲೆಯ ಗೆಲುವು ಸಾಧಿಸಿದ್ದಲ್ಲದೆ, 2 ಪಂದ್ಯಗಳ ಸರಣಿಯಲ್ಲಿ 1-0 ಅಂತರದಲ್ಲಿ ಮುನ್ನಡೆ ಸಾಧಿಸಿದೆ.

ಟ್ರೆಂಡಿಂಗ್​ ಸುದ್ದಿ

ಡೊಮಿನಿಕಾದ ವಿಂಡ್ಸರ್​​ ಪಾರ್ಕ್​​ನಲ್ಲಿ ನಡೆದ ಈ ಪಂದ್ಯದಲ್ಲಿ ಭಾರತವು ತನ್ನ ಮೊದಲ ಇನ್ನಿಂಗ್ಸ್​ನಲ್ಲಿ 271 ರನ್​​ಗಳ ಮುನ್ನಡೆ ಪಡೆದಿತ್ತು. ಕೆರಿಬಿಯನ್ನರ ವಿರುದ್ಧ ಭರ್ಜರಿ ಮುನ್ನಡೆ ಸಾಧಿಸಿದ್ದ ಕಾರಣ, 3ನೇ ದಿನದಾಟದಲ್ಲಿ ಭಾರತ ತನ್ನ ಪ್ರಥಮ ಇನಿಂಗ್ಸ್‌ನಲ್ಲಿ 152.2 ಓವರ್‌ಗಳಿಗೆ 5 ವಿಕೆಟ್‌ ಕಳೆದುಕೊಂಡು 421 ರನ್‌ಗಳನ್ನು ಕಲೆ ಹಾಕಿತ್ತು. ಈ ವೇಳೆ ಡಿಕ್ಲೆರ್‌ ಮಾಡಿಕೊಂಡಿತು. ಹಾಗಾಗಿ ಭಾರತ ಪಡೆದಿದ್ದ 271 ರನ್​ಗಳ ಮುನ್ನಡೆಯನ್ನು ಹಿಂಬಾಲಿಸಿದ ವೆಸ್ಟ್​ ಇಂಡೀಸ್​​, 3ನೇ ದಿನ ಮುಗಿಯುವಷ್ಟರಲ್ಲಿ ಶರಣಾಗಿದೆ.

3ನೇ ದಿನದಾಟ ಆರಂಭ

ಭಾರತ 2ನೇ ದಿನದಾಟದಲ್ಲಿ 2 ವಿಕೆಟ್​ ನಷ್ಟಕ್ಕೆ 312 ರನ್​​ಗಳಿಸಿತ್ತು. 162 ರನ್​ಗಳ ಮುನ್ನಡೆ ಪಡೆದಿತ್ತು. ಜೈಸ್ವಾಲ್ 143 ರನ್​, ವಿರಾಟ್ ಕೊಹ್ಲಿ 36 ರನ್​ ಗಳಿಸಿ ಅಜೇಯರಾಗಿದ್ದರು. ಇಲ್ಲಿಂದ 3ನೇ ದಿನವನ್ನು ಆರಂಭಿಸಿದ ಈ ಜೋಡಿ, ಉತ್ತಮ ಆರಂಭ ಪಡೆಯಿತು. ಒಟ್ಟು 283 ಎಸೆತಗಳಲ್ಲಿ 110 ರನ್​ಗಳ (2ನೇ ದಿನದಾಟದ್ದೂ ಸೇರಿ) ಜೊತೆಯಾಟವಾಡಿದರು. ಜೈಸ್ವಾಲ್​ ಚೊಚ್ಚಲ ಪಂದ್ಯದಲ್ಲೇ 150 ರನ್ ಗಳಿಸಿದರೆ, ವಿರಾಟ್​ ಕೊಹ್ಲಿ ಅರ್ಧಶತಕ ಸಿಡಿಸಿ ಮಿಂಚಿದರು. ಆದರೆ, ಜೈಸ್ವಾಲ್, 171 ರನ್​, ಕೊಹ್ಲಿ 76 ರನ್​ ಸಿಡಿಸಿ ಔಟಾದರು. ಅಜಿಂಕ್ಯ ರಹಾನೆ ನಿರಾಸೆ ಮೂಡಿಸಿದರು.

ವಿರಾಟ್ ಕೊಹ್ಲಿ ಜೊತೆಗೂಡಿ 49 ರನ್​ಗಳ ಜೊತೆಯಾಟ ಕಟ್ಟಿದ ರವೀಂದ್ರ ಜಡೇಜಾ ಅಜೇಯ 37 ರನ್‌ ಕಲೆ ಹಾಕಿದರು. ಇಶಾನ್​ ಕಿಶನ್ ಅಜೇಯ 1 ರನ್​ ಗಳಿಸಿದ್ದರು. ಈ ವೇಳೆ 271 ರನ್​ಗಳ ಮುನ್ನಡೆ ಪಡೆದಿದ್ದ ಭಾರತ ಡಿಕ್ಲೇರ್​ ಘೋಷಿಸಿತ್ತು. ಬಳಿಕ ದ್ವಿತೀಯ ಇನಿಂಗ್ಸ್ ಪ್ರಾರಂಭಿಸಿದ ವೆಸ್ಟ್ ಇಂಡೀಸ್‌ ಆರಂಭಿಕ ಆಘಾತಕ್ಕೆ ಒಳಗಾಯಿತು. ಮೊದಲ ಇನ್ನಿಂಗ್ಸ್​ನಂತೆ, ದ್ವಿತಿಯ ಇನ್ನಿಂಗ್ಸ್​​ನಲ್ಲೂ ಆರ್​ ಅಶ್ವಿನ್‌ ಹಾಗೂ ರವೀಂದ್ರ ಜಡೇಜಾ ಸ್ಪಿನ್‌ ಮೋಡಿಗೆ ವಿಂಡೀಸ್​ ನಲುಗಿತು. 50.3 ಓವರ್​​ಗಳಲ್ಲಿ 130 ರನ್​ ಗಳಿಸುವಷ್ಟರಲ್ಲಿ ಸರ್ವಪತನವಾಯಿತು. ಇದರೊಂದಿಗೆ ಇನ್ನಿಂಗ್ಸ್​​ ಜೊತೆ 141 ರನ್​ಗಳಿಂದ ಸೋಲು ಕಂಡಿತು.

ಅಶ್ವಿನ್​ಗೆ 7 ವಿಕೆಟ್​

ಪ್ರಥಮ ಇನ್ನಿಂಗ್ಸ್​ನಲ್ಲಿ ವಿಂಡೀಸ್​ ಅಲ್ಪಮೊತ್ತಕ್ಕೆ ಕುಸಿಯಲು ಕಾರಣವಾಗಿದ್ದ ಅಶ್ವಿನ್ ಮತ್ತು ಜಡೇಜಾ, ದ್ವಿತೀಯ ಇನ್ನಿಂಗ್ಸ್​ನಲ್ಲೂ ಕಾಡಿದರು. ಅದರಲ್ಲೂ ಅಶ್ವಿನ್​ ಎರಡೂ ಇನ್ನಿಂಗ್ಸ್​​ನಲ್ಲೂ ಮತ್ತೊಮ್ಮೆ 5 ವಿಕೆಟ್​​ಗಳ ಗುಚ್ಛ ಪಡೆದರು. 7 ವಿಕೆಟ್​ ಉರುಳಿಸಿದ ಆಫ್​ ಸ್ಪಿನ್ನರ್​​ ವಿಂಡೀಸ್​​ ಮಹಾ ಕುಸಿತಕ್ಕೆ ಮತ್ತೊಮ್ಮೆ ಕಾರಣರಾದರು. ಜಡ್ಡು 2, ಸಿರಾಜ್ 1 ವಿಕೆಟ್​ ಕಬಳಿಸಿದರು. ಈ ಪಂದ್ಯದಲ್ಲಿ ಒಟ್ಟು 15 ವಿಕೆಟ್​ ಪಡೆದು ಗಮನ ಸೆಳೆದರು. 2ನೇ ಇನ್ನಿಂಗ್ಸ್​ನಲ್ಲಿ ಅಲಿಕ್ ಅಥನಾಜೆ 28 ರನ್ ಗಳಿಸಿದ್ದೇ ವಿಂಡೀಸ್​ ಪರ ಗರಿಷ್ಠ ಸ್ಕೋರ್​. ಯಾರೂ ಕೂಡ ಕ್ರೀಸ್​​ ಕಚ್ಚಿ ನಿಂತು ಕೆಚ್ಚೆದೆಯ ಹೋರಾಟ ನಡೆಸಲು ಮುಂದಾಗಿಲ್ಲ. ವೆಸ್ಟ್​ ಇಂಡೀಸ್​ ಆಟಗಾರರು ದಯನೀಯ ವೈಫಲ್ಯ ಕಂಡರು. ಚೊಚ್ಚಲ ಪಂದ್ಯದಲ್ಲಿ ಶತಕ ಸಿಡಿಸಿದ ಜೈಸ್ವಾಲ್​ಗೆ ಪಂದ್ಯಶ್ರೇಷ್ಠ ಪ್ರಶಸ್ತಿ ಒಲಿಯಿತು.