ಮೀನೂಟದ ಜೊತೆ ಮೊಸರು ತಿನ್ನುವ ಅಭ್ಯಾಸ ನಿಮಗೂ ಇದ್ರೆ ಇಂದೇ ಸ್ಟಾಪ್‌ ಮಾಡಿ, ಇದ್ರಿಂದ ಆರೋಗ್ಯ ಸಮಸ್ಯೆ ತಪ್ಪಿದ್ದಲ್ಲ

ಮೊಸರು ನಮ್ಮ ದೈನಂದಿನ ಆಹಾರದ ಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದಿದೆ. ಊಟದೊಂದಿಗೆ ಮೊಸರು ಇಲ್ಲ ಅಂದ್ರೆ ಹಲವರಿಗೆ ಊಟ ಸೇರುವುದಿಲ್ಲ. ಮೊಸರು ಆರೋಗ್ಯಕ್ಕೆ ತುಂಬಾ ಒಳ್ಳೆಯದು. ಮೊಸರು ಸೇವನೆಯಿಂದ ಕರುಳಿನ ಆರೋಗ್ಯ ಸುಧಾರಿಸುತ್ತದೆ. ಇದರಲ್ಲಿರುವ ಪ್ರೋಬಯಾಟಿಕ್‌ ಅಂಶಗಳು ಕರುಳಿನಲ್ಲಿ ಉತ್ತಮ ಬ್ಯಾಕ್ಟೀರಿಯಾಗಳನ್ನು ಹೆಚ್ಚಿಸುತ್ತದೆ. ಚರ್ಮದ ಆರೋಗ್ಯಕ್ಕೂ ಮೊಸರು ಅತ್ಯಗತ್ಯ.

ಮೊಸರಿನಂತೆ ಮೀನು ಕೂಡ ಆರೋಗ್ಯಕ್ಕೆ ತುಂಬಾ ಒಳ್ಳೆಯದು. ಬೇರೆಲ್ಲಾ ಮಾಂಸಗಳಿಗಿಂತ ಮೀನು ಬೆಸ್ಟ್‌ ಎಂಬ ಮಾತು ಇದೆ. ಎಷ್ಟೇ ಮೀನು ತಿಂದರೂ ತೂಕ ಹೆಚ್ಚಾಗುವುದಿಲ್ಲ. ನೀವು ಮಾಂಸಾಹಾರ ಪ್ರಿಯರಾಗಿದ್ದು, ತೂಕ ಹೆಚ್ಚುತ್ತೆ ಅನ್ನುವ ಭಯ ಇದ್ರೆ ನೀವು ಧೈರ್ಯವಾಗಿ ಮೀನು ತಿನ್ನಬಹುದು.

ಮೊಸರು ಹಾಗೂ ಮೀನು ಎರಡರಿಂದ ಆರೋಗ್ಯಕ್ಕೆ ಇಷ್ಟೆಲ್ಲಾ ಪ್ರಯೋಜನಗಳಿರುವುದು ನಿಜವಾದ್ರೂ ಈ ಎರಡನ್ನೂ ಒಟ್ಟಾಗಿ ಸೇವಿಸಿದ್ರೆ ಆರೋಗ್ಯಕ್ಕೆ ತೊಂದರೆ ತಪ್ಪಿದ್ದಲ್ಲ. ಮೀನು ಹಾಗೂ ಮೊಸರು ಒಟ್ಟು ಸೇವಿಸಿದ್ರೆ ಹಲವು ತೊಂದರೆಗಳು ಉಂಟಾಗುತ್ತವೆ ಎಂದು ಆಯುರ್ವೇದ ಹೇಳುತ್ತದೆ. ಹಾಗಾದ್ರೆ ಈ ಎರಡರ ಸಂಯೋಜನೆಯಿಂದ ಏನೆಲ್ಲಾ ಸಮಸ್ಯೆ ಆಗುತ್ತೆ ನೋಡಿ.

ಇದನ್ನೂ ಓದಿ: ಹಾಲು-ಮೀನು, ಪಾಲಕ್‌-ಪನೀರ್‌ ಆಯುರ್ವೇದದ ಪ್ರಕಾರ ಯಾವೆಲ್ಲಾ ಪದಾರ್ಥಗಳನ್ನು ಒಟ್ಟಿಗೆ ಸೇವಿಸಬಾರದು, ಇದರ ಪರಿಣಾಮ ಏನಾಗುತ್ತೆ ನೋಡಿ

ಜೀರ್ಣಕ್ರಿಯೆ ಸಮಸ್ಯೆ

ಊಟದ ಭಾಗವಾಗಿ ಮೊಸರು ಮತ್ತು ಮೀನು ಎರಡನ್ನೂ ಒಟ್ಟಾಗಿ ತಿನ್ನುವುದು ಜೀರ್ಣಕಾರಿ ಅಸ್ವಸ್ಥತೆಗಳನ್ನು ಉಂಟು ಮಾಡುವ ಸಾಧ್ಯತೆಯಿದೆ. ಹಲವರು ಮೊದಲು ಮೀನು ಸಾರು ಹಾಕಿಕೊಂಡು ಊಟ ಮಾಡುತ್ತಾರೆ. ಊಟದ ಕೊನೆಯಲ್ಲಿ ಅನ್ನದೊಂದಿಗ ಮೊಸರು ಕಲೆಸಿಕೊಂಡು ತಿನ್ನುತ್ತಾರೆ. ಇನ್ನೂ ಕೆಲವರಿಗೆ ಮೀನು ಸಾರಿನ ಜೊತೆಗೆ ಮೊಸರು ಕಲೆಸಿಕೊಂಡು ತಿನ್ನುವ ಅಭ್ಯಾಸವೂ ಇದೆ. ಹೀಗೆ ಮೀನು ಹಾಗೂ ಮೊಸರಿನ ಸಂಯೋಜನೆಯು ಹಲವು ರೀತಿಯ ಚರ್ಮದ ಸಮಸ್ಯೆಗಳನ್ನು ಉಂಟು ಮಾಡಬಹುದು ಎನ್ನುತ್ತಾರೆ ತಜ್ಞರು.

ಕೆಲವರಿಗೆ ಜೀರ್ಣಕ್ರಿಯೆ ಸಮಸ್ಯೆ ಇರುತ್ತದೆ. ಅಂತಹವರು ಮೀನು ಮತ್ತು ಹಾಲನ್ನು ಒಟ್ಟಿಗೆ ತಿನ್ನುವುದರಿಂದ ತಿಂದ ಆಹಾರ ಜೀರ್ಣವಾಗುವುದು ಕಷ್ಟವಾಗುತ್ತದೆ. ಆದರೆ ಜೀರ್ಣಕ್ರಿಯೆಯು ವ್ಯಕ್ತಿಯಿಂದ ವ್ಯಕ್ತಿಗೆ ಬದಲಾಗುತ್ತದೆ. ಹಾಗಾಗಿ ಜೀರ್ಣ ಶಕ್ತಿ ಹೆಚ್ಚಿರುವವರೂ ಈ ಎರಡನ್ನು ಜೀರ್ಣಿಸಿಕೊಳ್ಳಬಲ್ಲರು. ಆದರೆ ಅದನ್ನು ಯಾರು ಜೀರ್ಣಿಸಿಕೊಳ್ಳುತ್ತಾರೆ ಮತ್ತು ಯಾರು ಜೀರ್ಣಿಸಿಕೊಳ್ಳುತ್ತಾರೆ ಎಂದು ಊಹಿಸುವುದು ಕಷ್ಟ. ಮೀನು ಮತ್ತು ಹಾಲಿನ ಉತ್ಪನ್ನಗಳನ್ನು ಸೇರಿಸಿ ತಿನ್ನುವುದರಿಂದ ಕೆಲವರಿಗೆ ಗ್ಯಾಸ್ಟ್ರಿಕ್, ಅಜೀರ್ಣ ಮತ್ತು ಉದರಶೂಲೆ ಸಮಸ್ಯೆಗಳು ಉಂಟಾಗಬಹುದು. ಲ್ಯಾಕ್ಟೋಸ್ ಅಸಹಿಷ್ಣುತೆ ಹೊಂದಿರುವ ಜನರು ಹಾಲು ಮತ್ತು ಮೀನನ್ನು ತಪ್ಪಿಯೂ ಒಟ್ಟಾಗಿ ಸೇವಿಸಬಾರದು.

ಪೋಷಕಾಂಶಗಳು ಹೆಚ್ಚು, ಆದ್ರೂ ಸಂಯೋಜನೆ ಸಲ್ಲ

ಮೀನು, ಮೊಸರು... ಇವೆರಡೂ ಪೌಷ್ಟಿಕಾಂಶದ ದಟ್ಟವಾದ ಆಹಾರಗಳು. ಇವು ನಿರ್ದಿಷ್ಟ ಜೀವಸತ್ವಗಳು, ಖನಿಜಗಳು ಮತ್ತು ಮ್ಯಾಕ್ರೋನ್ಯೂಟ್ರಿಯೆಂಟ್‌ಗಳಲ್ಲಿ ಸಮೃದ್ಧವಾಗಿವೆ. ದೇಹದಲ್ಲಿ ಒಮ್ಮೆಗೆ ಪೋಷಕಾಂಶಗಳ ಅತಿಯಾದ ಸೇವನೆಯು ಜೀರ್ಣಕಾರಿ ತೊಂದರೆಗಳನ್ನು ಉಂಟುಮಾಡುತ್ತದೆ. ಆದ್ದರಿಂದ ಅವುಗಳನ್ನು ಪ್ರತ್ಯೇಕವಾಗಿ ತಿನ್ನುವುದು ಮುಖ್ಯ. ತರಕಾರಿಗಳು, ಧಾನ್ಯಗಳು ಮತ್ತು ದ್ವಿದಳ ಧಾನ್ಯಗಳ ಜೊತೆಗೆ ಅವುಗಳನ್ನು ತಿನ್ನುವುದು ಆರೋಗ್ಯಕರವಾಗಿರುತ್ತದೆ.

ಇದನ್ನೂ ಓದಿ: ಪ್ರತಿದಿನ ಮೀನು ತಿನ್ನುವ ಅಭ್ಯಾಸ ನಿಮಗಿದ್ಯಾ, ಮೀನು ಪ್ರಿಯರು ತಿಳಿದಿರಲೇಬೇಕಾದ ಮಹತ್ವದ ವಿಚಾರಗಳಿವು

ಚರ್ಮದ ಸಮಸ್ಯೆ

ಕೆಲವರು ಮೀನು ಅಥವಾ ಡೈರಿ ಉತ್ಪನ್ನಗಳಿಗೆ ಅಲರ್ಜಿಯನ್ನು ಹೊಂದಿರಬಹುದು. ಅಂತಹ ಜನರು ತುರಿಕೆ, ದದ್ದುಗಳು ಮತ್ತು ಎಕ್ಸಿಮಾದಂತಹ ಚರ್ಮದ ತೊಂದರೆಗಳನ್ನು ಹೊಂದಿರುತ್ತಾರೆ. ತಿಂದ ತಕ್ಷಣ ಅಲರ್ಜಿ ಕಾಣಿಸಿಕೊಂಡರೆ, ಮೀನು ಅಥವಾ ಡೈರಿ ಉತ್ಪನ್ನಗಳನ್ನು ತ್ಯಜಿಸುವುದು ಉತ್ತಮ.

ಮೀನು ಮತ್ತು ಮೊಸರು ಒಂದೇ ಊಟದ ಭಾಗವಾಗಿರಬಾರದು. ನೀವು ಊಟಕ್ಕೆ ಮೀನು ತಿನ್ನುತ್ತಿದ್ದರೆ, ರಾತ್ರಿಯ ಊಟದಲ್ಲಿ ಸ್ವಲ್ಪ ಪ್ರಮಾಣದ ಮೊಸರು ತಿನ್ನಲು ಪ್ರಯತ್ನಿಸಿ. ಅದರ ಹೊರತಾಗಿ ಒಂದು ಹೊತ್ತಿನಲ್ಲಿ ಮೀನು ತಿಂದ ನಂತರ ಮೊಸರು ತಿನ್ನುವುದು ಅಥವಾ ಮೊಸರು ತಿಂದ ನಂತರ ಮೀನು ತಿನ್ನುವುದು ಒಳ್ಳೆಯ ಅಭ್ಯಾಸವಲ್ಲ. ಮೀನಿನಲ್ಲಿ ಹಿಸ್ಟಮೈನ್ ಇರುತ್ತದೆ. ಡೈರಿ ಉತ್ಪನ್ನಗಳು ಲ್ಯಾಕ್ಟೋಸ್ ಅನ್ನು ಹೊಂದಿರುತ್ತವೆ. ಈ ಎರಡೂ ಸೇರಿ ಚರ್ಮದ ಸಮಸ್ಯೆಗಳನ್ನು ಉಂಟು ಮಾಡಬಹುದು.

ಮೀನು ಮತ್ತು ಮೊಸರು ಒಟ್ಟಿಗೆ ಸೇವಿಸಿದರೆ, ಅಜೀರ್ಣ ಮತ್ತು ಜಠರಗರುಳಿನ ತೊಂದರೆಗಳಂತಹ ತೊಂದರೆಗಳು ಉಂಟಾಗುತ್ತವೆ. ಮೀನಿನಲ್ಲಿ ಒಮೆಗಾ ಮೂರು ಕೊಬ್ಬಿನಾಮ್ಲಗಳು ಸಮೃದ್ಧವಾಗಿವೆ. ಅಲ್ಲದೆ, ಮೊಸರು ಕೊಬ್ಬಿನ ಪದಾರ್ಥಗಳನ್ನು ಹೊಂದಿರುತ್ತದೆ. ಈ ಎರಡನ್ನೂ ಒಟ್ಟಿಗೆ ತಿನ್ನುವುದರಿಂದ ಚರ್ಮದಲ್ಲಿ ಎಣ್ಣೆಯಂಶ ಹೆಚ್ಚು ಸಂಗ್ರಹವಾಗುತ್ತದೆ, ಇದರಿಂದ ಮೊಡವೆಯಂತಹ ಸಮಸ್ಯೆಗಳು ಕಾಣಿಸುತ್ತವೆ.

ನೋಡಿದ್ರಲ್ಲ ಮೀನು ಹಾಗೂ ಹಾಲಿನ ಉತ್ಪನ್ನಗಳು ಅದರಲ್ಲೂ ಮೀನು ಹಾಗೂ ಮೊಸರನ್ನು ಒಟ್ಟಾಗಿ ತಿನ್ನುವುದರಿಂದ ಎಷ್ಟೆಲ್ಲಾ ಸಮಸ್ಯೆಗಳು ಉಂಟಾಗುತ್ತವೆ ಎಂದು. ಹಾಗಾಗಿ ಮೀನೂಟ ಮಾಡಿದ ದಿನ ಮೊಸರು ತಿನ್ನದಿರುವುದು ಒಳ್ಳೆಯದು ಅಥವಾ ಹಾಲಿನಿಂದ ತಯಾರಿಸಿದ ಯಾವುದೇ ಉತ್ಪನ್ನಗಳನ್ನು ತಿನ್ನುವುದನ್ನು ತಪ್ಪಿಸುವುದು ಉತ್ತಮ.

ಇದನ್ನೂ ಓದಿ: Fish Cleaning: ಕಾರಣ ತಿಳಿಯಿರಿ: ಮೀನು ಸ್ವಚ್ಛಗೊಳಿಸುವಾಗ ಅದನ್ನು ಉಪ್ಪು, ಅರಿಶಿನದಲ್ಲಿ ನೆನೆಸುವುದೇಕೆ?