ಭಾರತ-ಪಾಕಿಸ್ತಾನ ಟಿ20 ವಿಶ್ವಕಪ್​ ಪಂದ್ಯಕ್ಕೆ ಮಹೂರ್ತ ಫಿಕ್ಸ್; ಎಲ್ಲಿ, ಯಾವಾಗ ನಡೆಯಲಿದೆ ಹೈವೋಲ್ಟೇಜ್​ ಕದನ?

ಮುಂಬರುವ ವರ್ಷದಲ್ಲಿ ಟಿ20 ವಿಶ್ವಕಪ್ ಟೂರ್ನಿಗೆ ಭಾರತ ಸೇರಿದಂತೆ ಎಲ್ಲಾ ತಂಡಗಳು ಸಿದ್ಧತೆ ನಡೆಸುತ್ತಿವೆ. ಈ ಮೆಗಾ ಟೂರ್ನಿಗೆ ಅಮೆರಿಕ ಮತ್ತು ವೆಸ್ಟ್ ಇಂಡೀಸ್ ದೇಶಗಳು ಆತಿಥ್ಯ ವಹಿಸುತ್ತಿವೆ. ಇದರ ಮಧ್ಯೆ ಸಾಂಪ್ರದಾಯಿಕ ಎದುರಾಳಿಗಳಾದ ಭಾರತ ಮತ್ತು ಪಾಕಿಸ್ತಾನ ತಂಡಗಳ ಸೆಣಸಾಟಕ್ಕೆ ಮುಹೂರ್ತ ಮತ್ತು ಸ್ಥಳ ನಿಗದಿಯಾಗಿದೆ.

ಏಕದಿನ ವಿಶ್ವಕಪ್​ ಟೂರ್ನಿಯಲ್ಲಿ ಪರಸ್ಪರ ಮುಖಾಮುಖಿಯಾಗಿದ್ದ ಇಂಡೋ-ಪಾಕ್, ಈಗ ಟಿ20ಯಲ್ಲಿ ಎದುರಾಗಲು ಸಜ್ಜಾಗಿವೆ. ಉಭಯ ತಂಡಗಳು ಟಿ20 ಕ್ರಿಕೆಟ್​ನಲ್ಲಿ ಕೊನೆಯದಾಗಿ ಭೇಟಿಯಾಗಿದ್ದು 2022ರ ಟಿ20 ವಿಶ್ವಕಪ್​ನಲ್ಲಿ. ಅಧಿಕೃತ ವೇಳಾಪಟ್ಟಿ ಪ್ರಕಟವಾಗದಿದ್ದರೂ ಹೈವೋಲ್ಟೇಜ್ ಪಂದ್ಯದ ದಿನಾಂಕ ಬಹಿರಂಗಗೊಂಡಿದೆ.

ಜೂನ್​​ ಎರಡನೇ ವಾರದಲ್ಲಿ ಪಂದ್ಯ

ಸದ್ಯ ವರದಿಗಳ ಪ್ರಕಾರ 2024ರ ಜೂನ್ 8 ಅಥವಾ 9 ರಂದು ಇಂಡೋ-ಪಾಕ್ ಕದನ ನಡೆಯುವ ಸಾಧ್ಯತೆಯಿದೆ. 2021 ಮತ್ತು 2022ರ ಟ20 ವಿಶ್ವಕಪ್‌ನ ಮೊದಲ ಪಂದ್ಯಗಳಲ್ಲಿ ಪರಸ್ಪರ ಮುಖಾಮುಖಿಯಾಗಿದ್ದ ಉಭಯ ತಂಡಗಳು ಈ ಬಾರಿಯೂ ಒಂದೇ ಗುಂಪಿನಲ್ಲಿ ಕಾಣಿಸಿಕೊಳ್ಳಲಿವೆ ಎಂಬುದು ಖಚಿತವಾಗಿದೆ.

ಮುಂದಿನ ವರ್ಷದ ಟಿ20 ವಿಶ್ವಕಪ್‌ ಟೂರ್ನಿ ಅಧಿಕೃತ ವೇಳಾಪಟ್ಟಿಯನ್ನು ಐಸಿಸಿ ಇನ್ನೂ ಬಿಡುಗಡೆ ಮಾಡಿಲ್ಲ. ಆದರೆ RevSportz ಪ್ರಕಾರ, ಭಾರತ-ಪಾಕಿಸ್ತಾನದ T20 ವಿಶ್ವಕಪ್ ಪಂದ್ಯ ಜೂನ್ 8 ಅಥವಾ 9ರಂದು ನಡೆಯುವ ಸಾಧ್ಯತೆಯಿದೆ. ನ್ಯೂಯಾರ್ಕ್ ಆತಿಥೇಯ ಸ್ಥಳವಾಗಿದೆ ಎಂದು ವರದಿಯಾಗಿದೆ.

ಇಂಗ್ಲೆಂಡ್-ಆಸಿಸ್​ಗೆ ಬಾರ್ಬಡೋಸ್ ಆತಿಥ್ಯ

ದಿ ಟೆಲಿಗ್ರಾಫ್ ಪ್ರಕಾರ, ಸಾಂಪ್ರದಾಯಿಕ ಎದುರಾಳಿ ತಂಡಗಳನ್ನು ಹೊರತುಪಡಿಸಿ ಆಶಸ್ ಎದುರಾಳಿಗಳಾದ ಆಸ್ಟ್ರೇಲಿಯಾ ಮತ್ತು ಇಂಗ್ಲೆಂಡ್ ಕೂಡ ಅದೇ ಗುಂಪಿನಲ್ಲಿರುತ್ತವೆ. ಇಂಗ್ಲೆಂಡ್ ಮತ್ತು ಆಸ್ಟ್ರೇಲಿಯಾ ನಡುವೆ ಪಂದ್ಯಕ್ಕೆ 2010ರ ಟಿ20 ವಿಶ್ವಕಪ್ ಫೈನಲ್‌ಗೆ ಆತಿಥ್ಯ ವಹಿಸಿದ್ದ ಬಾರ್ಬಡೋಸ್​ನಲ್ಲೇ ಸಾಧ್ಯತೆ ಇದೆ.

2013 ರಿಂದ ಐಸಿಸಿ ಟೂರ್ನಿಗಳಲ್ಲಿ ಮುಖಾಮುಖಿ

ನ್ಯೂಯಾರ್ಕ್​ನ ಐಸೆನ್‌ ಹೋವರ್ ಪಾರ್ಕ್ ಭಾರತ-ಪಾಕಿಸ್ತಾನ ಪಂದ್ಯದ ಸ್ಥಳವೆಂದು ಪ್ರಮುಖ ಇಂಗ್ಲಿಷ್ ಪ್ರಕಟಣೆ ದೃಢಪಡಿಸಿದೆ. 2013 ರಿಂದ ಇಲ್ಲಿಯವರೆಗೂ ಪ್ರತಿ ಐಸಿಸಿ ಈವೆಂಟ್​​ನಲ್ಲೂ ಇಂಡೋ-ಪಾಕ್​ ಮುಖಾಮುಖಿಯಾಗುತ್ತಿರುವುದು ವಿಷೇಷ. ಆದರೆ 2021ರ ಟಿ20 ವಿಶ್ವಕಪ್ ಮತ್ತು 2017ರ ಐಸಿಸಿ ಚಾಂಪಿಯನ್ಸ್ ಟ್ರೋಫಿ ಫೈನಲ್​ನಲ್ಲಿ ಸೋತಿದ್ದು ಬಿಟ್ಟರೆ ಭಾರತವೇ ಹೆಚ್ಚು ಮೇಲುಗೈ ಸಾಧಿಸಿದೆ.

ನ್ಯೂಯಾರ್ಕ್​ನಲ್ಲಿ ಆಡಿಸಲು ಇದೆ ಕಾರಣ

ಬದ್ಧವೈರಿಗಳ ನಡುವಿನ ಪಂದ್ಯವನ್ನು ನ್ಯೂಯಾರ್ಕ್​ನಲ್ಲಿ ಆಡಿಸಲು ಒಂದು ಉದ್ದೇಶ ಇದೆ. ಅಮೆರಿಕದಲ್ಲಿ ಕ್ರಿಕೆಟ್​ಗೆ ಪ್ರೋತ್ಸಾಹ ನೀಡುವ ಸಲುವಾಗಿ ಈ ನಿರ್ಧಾರ ಕೈಗೊಳ್ಳಲಾಗಿದೆ. ಮ್ಯಾನ್‌ಹ್ಯಾಟನ್‌ನ ಪೂರ್ವಕ್ಕೆ 30 ಮೈಲಿ ದೂರದಲ್ಲಿರುವ ಐಸೆನ್‌ ಹೋವರ್ ಪಾರ್ಕ್‌ನಲ್ಲಿ ಭಾರತವು ಪಾಕಿಸ್ತಾನವನ್ನು ಎದುರಿಸಲಿದೆ.

ಭಾಗವಹಿಸಲಿವೆ 20 ತಂಡಗಳು

2024ರ ಟಿ20 ವಿಶ್ವಕಪ್​​ನಲ್ಲಿ ಒಟ್ಟು 20 ತಂಡಗಳು ಪಾಲ್ಗೊಳ್ಳಲಿವೆ. ಇದನ್ನು ತಲಾ 5 ತಂಡಗಳ 4 ಗುಂಪುಗಳಾಗಿ ವಿಂಗಡಿಸಲಾಗುತ್ತದೆ. ಪ್ರತಿ ಗುಂಪಿನಿಂದ ಅಗ್ರ ಎರಡು ತಂಡಗಳು ಸೂಪರ್ 8 ಹಂತಕ್ಕೆ ಅರ್ಹತೆ ಪಡೆಯುತ್ತವೆ. ಎರಡೂ ಸೂಪರ್-8 ಪೂಲ್‌ಗಳಲ್ಲಿ ಅಗ್ರ ಎರಡು ಸ್ಥಾನ ಪಡೆದ ತಂಡಗಳು ಸೆಮಿಫೈನಲ್‌ಗೆ ಅರ್ಹತೆ ಪಡೆಯುತ್ತವೆ.