ಇಂಡೋ-ಪಾಕ್ ತಂಡಗಳು ಏಷ್ಯಾಕಪ್ ಇತಿಹಾಸದಲ್ಲಿ ಒಂದು ಸಲವೂ ಫೈನಲ್ನಲ್ಲಿ ಒಟ್ಟಿಗೆ ಆಡಿಲ್ಲ!
Asia Cup 2023 final history: ಈವರೆಗೂ ಏಷ್ಯಾಕಪ್ನಲ್ಲಿ 16 ಆವೃತ್ತಿಗಳು ನಡೆದಿವೆ. ಆದರೆ ಭಾರತ-ಪಾಕಿಸ್ತಾನ ತಂಡಗಳು ಒಂದು ಬಾರಿಯೂ ಏಷ್ಯಾಕಪ್ ಫೈನಲ್ನಲ್ಲಿ ಮುಖಾಮುಖಿಯಾಗಿಲ್ಲ ಎಂಬುದು ಅಚ್ಚರಿಯ ಸಂಗತಿ.
ನಿಮಗಿದು ಗೊತ್ತಾ? ಏಷ್ಯಾಕಪ್ ಫೈನಲ್ನಲ್ಲಿ ಭಾರತ ಮತ್ತು ಪಾಕಿಸ್ತಾನ ತಂಡಗಳು (India vs Pakistan) ಒಂದು ಬಾರಿಯೂ ಮುಖಾಮುಖಿಯಾಗಿಲ್ಲ. ಅಚ್ಚರಿ ಎನಿಸಿದರೂ ಇದೇ ಸತ್ಯ. ಈವರೆಗೂ ಟಿ20, ಏಕದಿನ ಮಾದರಿ ಸೇರಿ ಒಟ್ಟು ಏಷ್ಯಾಕಪ್ ಟೂರ್ನಿಯಲ್ಲಿ 16 ಆವೃತ್ತಿಗಳು ನಡೆದಿವೆ. ಆದರೆ ಬದ್ಧವೈರಿ ತಂಡಗಳು ಒಂದು ಬಾರಿಯೂ ಏಷ್ಯಾಕಪ್ ಫೈನಲ್ನಲ್ಲಿ (Asia Cup 2023) ಮುಖಾಮುಖಿಯಾಗಿಲ್ಲ ಎಂಬುದು ಅಚ್ಚರಿಯ ಸಂಗತಿ.
ಭಾರತ 11ನೇ ಬಾರಿಗೆ ಫೈನಲ್ ಪ್ರವೇಶ
ಪ್ರಸಕ್ತ ಸಾಲಿನ ಏಷ್ಯಾಕಪ್ ಟೂರ್ನಿಯಲ್ಲಿ ಟೀಮ್ ಇಂಡಿಯಾ (Team India) ಫೈನಲ್ಗೆ ಅರ್ಹತೆ ಪಡೆದಿದೆ. ಸೂಪರ್-4 ಹಂತದಲ್ಲಿ ಪಾಕಿಸ್ತಾನ ವಿರುದ್ಧ ಗೆದ್ದ ನಂತರ ಮೊದಲ ತಂಡವಾಗಿ ಫೈನಲ್ಗೆ ಎಂಟ್ರಿ ಕೊಟ್ಟಿತು. ಇದು ಭಾರತಕ್ಕೆ ದಾಖಲೆಯ 11 ಫೈನಲ್ ಆಗಿದ್ದು, 8ನೇ ಪ್ರಶಸ್ತಿಯ ಮೇಲೆ ಕಣ್ಣಿಟ್ಟಿದೆ. ಈಗಾಗಲೇ 7 ಪ್ರಶಸ್ತಿಗಳನ್ನು ಭಾರತ ಗೆದ್ದುಕೊಂಡಿದೆ.
ಫೈನಲ್ ಕನಸಿನಲ್ಲಿ ಪಾಕಿಸ್ತಾನ?
ಈ ಬಾರಿಯ ಏಷ್ಯಾಕಪ್ನಲ್ಲಿ ಪಾಕಿಸ್ತಾನ ಫೈನಲ್ ಕನಸಿನಲ್ಲಿದೆ. ಇಂದು ನಡೆಯುವ ಏಷ್ಯಾಕಪ್ ಸೂಪರ್-4 ಹಂತದ ನಿರ್ಣಾಯಕ ಪಂದ್ಯದಲ್ಲಿ ಶ್ರೀಲಂಕಾ-ಪಾಕಿಸ್ತಾನ ತಂಡಗಳು ಸೆಣಸಾಟ ನಡೆಸಲಿದ್ದು, ಗೆದ್ದ ತಂಡವು ಫೈನಲ್ಗೆ ಅರ್ಹತೆ ಪಡೆದುಕೊಂಡಿದೆ. ಹಾಗೊಂದು ವೇಳೆ ಪಾಕಿಸ್ತಾನ ಗೆದ್ದರೆ ಏಷ್ಯಾಕಪ್ ಇತಿಹಾಸದಲ್ಲಿ ಇದೇ ಮೊದಲ ಬಾರಿಗೆ ಏಷ್ಯಾಕಪ್ ಫೈನಲ್ನಲ್ಲಿ ಮುಖಾಮುಖಿಯಾಗಲಿವೆ. ಲಂಕಾ ವಿರುದ್ಧ ಪಾಕ್ ಸೋತರೆ, ಭಾರತ-ಶ್ರೀಲಂಕಾ ಫೈನಲ್ನಲ್ಲಿ ಪ್ರಶಸ್ತಿಗೆ ಕಾದಾಟ ನಡೆಸಲಿವೆ.
ಫೈನಲ್ನಲ್ಲಿ ಯಾವ ತಂಡ ಎಷ್ಟು ಬಾರಿ ಮುಖಾಮುಖಿ?
ಇನ್ನು ಏಷ್ಯಾಕಪ್ ಫೈನಲ್ನಲ್ಲಿ ಭಾರತ-ಶ್ರೀಲಂಕಾ ತಂಡಗಳೇ (India vs Sri Lanka) ಹೆಚ್ಚು ಬಾರಿ ಮುಖಾಮುಖಿಯಾಗಿವೆ. ಒಟ್ಟು 8 ಬಾರಿ ಪ್ರಶಸ್ತಿ ಸುತ್ತಿನ ಹೋರಾಟದಲ್ಲಿ ಎದುರಾಳಿಯಾಗಿವೆ. ಪಾಕಿಸ್ತಾನ-ಶ್ರೀಲಂಕಾ ತಂಡಗಳು (Pakistan vs Sri Lanka) 4 ಬಾರಿ ಫೈನಲ್ನಲ್ಲಿ ಸೆಣಸಾಟ ನಡೆಸಿವೆ. ಬಾಂಗ್ಲಾದೇಶ-ಭಾರತ (Bangladesh vs India) 2 ಬಾರಿ, ಪಾಕಿಸ್ತಾನ-ಬಾಂಗ್ಲಾದೇಶ (Bangladesh vs Pakistan) 1 ಬಾರಿ ಫೈನಲ್ನಲ್ಲಿ ಆಡಿವೆ. ಆದರೆ ಭಾರತ ಒಟ್ಟು 10 ಬಾರಿ ಫೈನಲ್ ಆಡಿದ್ದು 7 ಪ್ರಶಸ್ತಿ ಗೆದ್ದಿದೆ. ಶ್ರೀಲಂಕಾ 6 ಸಲ, ಪಾಕಿಸ್ತಾನ 2 ಸಲ ಟ್ರೋಫಿಗೆ ಮುತ್ತಿಕ್ಕಿದೆ.
1984 ರಿಂದ 2023 ರವರೆಗಿನ ಏಷ್ಯಾಕಪ್ ವಿಜೇತರ ಪಟ್ಟಿ
| ವರ್ಷ | ಮಾದರಿ (ಟಿ20, ಏಕದಿನ) | ಚಾಂಪಿಯನ್ ತಂಡ | ರನ್ನರ್ಅಪ್ ತಂಡ | ಆತಿಥ್ಯ ವಹಿಸಿದ ಸ್ಥಳ |
|---|---|---|---|---|
| 1984 | ಏಕದಿನ | ಭಾರತ | ಶ್ರೀಲಂಕಾ | ಶಾರ್ಜಾ ಮೈದಾನ, ಯುಎಇ |
| 1986 | ಏಕದಿನ | ಶ್ರೀಲಂಕಾ | ಪಾಕಿಸ್ತಾನ | ಕೊಲೊಂಬೊ, ಶ್ರೀಲಂಕಾ |
| 1988 | ಏಕದಿನ | ಭಾರತ | ಶ್ರೀಲಂಕಾ | ಬಂಗಬಂಧು ರಾಷ್ಟ್ರೀಯ ಮೈದಾನ, ಬಾಂಗ್ಲಾದೇಶ |
| 1990/91 | ಏಕದಿನ | ಭಾರತ | ಶ್ರೀಲಂಕಾ | ಈಡನ್ ಗಾರ್ಡನ್, ಕೋಲ್ಕತ್ತಾ, ಭಾರತ |
| 1995 | ಏಕದಿನ | ಭಾರತ | ಶ್ರೀಲಂಕಾ | ಶಾರ್ಜಾ ಮೈದಾನ, ಯುಎಇ |
| 1997 | ಏಕದಿನ | ಶ್ರೀಲಂಕಾ | ಭಾರತ | ಪ್ರೇಮದಾಸ ಮೈದಾನ, ಕೊಲೊಂಬೊ, ಶ್ರೀಲಂಕಾ |
| 2000 | ಏಕದಿನ | ಪಾಕಿಸ್ತಾನ | ಶ್ರೀಲಂಕಾ | ಬಂಗಬಂಧು ರಾಷ್ಟ್ರೀಯ ಮೈದಾನ, ಬಾಂಗ್ಲಾದೇಶ |
| 2004 | ಏಕದಿನ | ಶ್ರೀಲಂಕಾ | ಭಾರತ | ಪ್ರೇಮದಾಸ ಸ್ಟೇಡಿಯಂ, ಕೊಲೊಂಬೊ, ಶ್ರೀಲಂಕಾ |
| 2008 | ಏಕದಿನ | ಶ್ರೀಲಂಕಾ | ಭಾರತ | ಕರಾಚಿ, ಪಾಕಿಸ್ತಾನ |
| 2010 | ಏಕದಿನ | ಭಾರತ | ಶ್ರೀಲಂಕಾ | ಡಂಬುಲ್ಲಾ ಮೈದಾನ, ಶ್ರೀಲಂಕಾ |
| 2012 | ಏಕದಿನ | ಪಾಕಿಸ್ತಾನ | ಬಾಂಗ್ಲಾದೇಶ | ಶೇರ್-ಇ-ಬಾಂಗ್ಲಾ ಮೈದಾನ, ಬಾಂಗ್ಲಾದೇಶ |
| 2014 | ಏಕದಿನ | ಶ್ರೀಲಂಕಾ | ಪಾಕಿಸ್ತಾನ | ಶೇರ್-ಇ-ಬಾಂಗ್ಲಾದ ಮೈದಾನ, ಬಾಂಗ್ಲಾದೇಶ |
| 2016 | ಟಿ20 | ಭಾರತ | ಬಾಂಗ್ಲಾದೇಶ | ಶೇರ್-ಇ-ಬಾಂಗ್ಲಾ ಮೈದಾನ, ಬಾಂಗ್ಲಾದೇಶ |
| 2018 | ಏಕದಿನ | ಭಾರತ | ಬಾಂಗ್ಲಾದೇಶ | ದುಬೈ ಕ್ರಿಕೆಟ್ ಸ್ಟೇಡಿಯಂ, ದುಬೈ |
| 2022 | ಟಿ20 | ಶ್ರೀಲಂಕಾ | ಪಾಕಿಸ್ತಾನ | ದುಬೈ ಕ್ರಿಕೆಟ್ ಸ್ಟೇಡಿಯಂ, ದುಬೈ |
