Tilak Varma: ಏಷ್ಯಾಕಪ್​ಗೆ ತಿಲಕ್ ವರ್ಮಾ ಆಯ್ಕೆ ಮಾಡಲು ಕಾರಣವೇನು? ಇಲ್ಲಿದೆ ಸಂಪೂರ್ಣ ವಿವರ

ಏಷ್ಯಾಕಪ್ ಟೂರ್ನಿಗೆ ಭಾರತದ 17 ಸದಸ್ಯರ ತಂಡ ಪ್ರಕಟಗೊಂಡಿದೆ. ನಿರೀಕ್ಷೆಯಂತೆ ಕೆಎಲ್ ರಾಹುಲ್, ಶ್ರೇಯಸ್ ಅಯ್ಯರ್ ಮರಳಿದ್ದಾರೆ. ಆದರೆ, ಸಂಜು ಸ್ಯಾಮ್ಸನ್​​ರನ್ನು ಸ್ಟ್ಯಾಂಡ್​ಬೈ ಆಟಗಾರನಾಗಿ ಆಯ್ಕೆ ಮಾಡಲಾಗಿದೆ. ತಿಲಕ್​ ವರ್ಮಾಗೆ ಚಾನ್ಸ್​​ ನೀಡಿದ್ದು ಎಲ್ಲರಿಗೂ ಅಚ್ಚರಿ ಮೂಡಿಸಿದೆ. ತಂಡ ಪ್ರಕಟವಾದ ಬೆನ್ನಲ್ಲೇ ತಿಲಕ್ ವರ್ಮಾಗೆ ಅವಕಾಶ ಕೊಟ್ಟಿದ್ದು ಯಾಕೆ ಎಂಬ ಚರ್ಚೆ ಆರಂಭವಾಗಿದೆ.

15 ಮತ್ತು 16ನೇ ಆವೃತ್ತಿಯ ಐಪಿಎಲ್​​ನಲ್ಲಿ ಮುಂಬೈ ಇಂಡಿಯನ್ಸ್​ ಪರ ಅಬ್ಬರದ ಆಟವು, ರಾಷ್ಟ್ರೀಯ ತಂಡದಲ್ಲೂ ಅವಕಾಶ ಸಿಗುವಂತೆ ಮಾಡಿತು. ವೆಸ್ಟ್​ ಇಂಡೀಸ್​ ಪ್ರವಾಸದಲ್ಲಿ ಸಿಕ್ಕ ಅವಕಾಶವನ್ನ ಎರಡೂ ಕೈಗಳಿಂದ ಬಾಚಿಕೊಂಡ ತಿಲಕ್, ಆಯ್ಕೆದಾರರ ಗಮನ ಸೆಳೆದರು. ಈವರೆಗೂ ಕೇವಲ 7 ಅಂತಾರಾಷ್ಟ್ರೀಯ ಪಂದ್ಯಗಳನ್ನಷ್ಟೇ. ಅದು ಕೂಡ ಟಿ20 ಕ್ರಿಕೆಟ್​​ ಆಡಿರುವುದಷ್ಟೇ. ಒಂದು ಏಕದಿನದಲ್ಲೂ ಕಣಕ್ಕಿಳಿದಿಲ್ಲ.

ಆದರೂ ಅವಕಾಶ ನೀಡಿದ್ದೇಕೆ? ಆಯ್ಕೆ ಸಮಿತಿಯ ನಿರ್ಧಾರ ಸರಿಯಿಲ್ಲ. ಇದು ಮುಂಬೈ ಇಂಡಿಯನ್ಸ್​​ ಕ್ಯಾಪ್ಟನ್ ರೋಹಿತ್ ಶರ್ಮಾ ಪ್ರಭಾವ, ಅನುಭವ ಇಲ್ಲದ ಆಟಗಾರನ ಬದಲಿಗೆ ಅನುಭವಿ ಆಟಗಾರನಿಗೆ ಮಣೆ ಹಾಕಬೇಕಿತ್ತು ಎಂಬ ಚರ್ಚೆಗಳು ಜೋರಾಗುತ್ತಿವೆ. ಕೆಲವರು ಸಂಜು ಸ್ಯಾಮ್ಸನ್ ಪರ ಬ್ಯಾಟ್ ಬೀಸುತ್ತಿದ್ದಾರೆ. ಆದರೆ ತಿಲಕ್​​ರನ್ನು ಆಯ್ಕೆ ಮಾಡಿದ್ದೇಕೆ? ಅದಕ್ಕೆ ಕಾರಣಗಳೇನು ಎಂಬುದನ್ನು ಈ ಮುಂದೆ ನೋಡೋಣ.

ಮಧ್ಯಮ ಕ್ರಮಾಂಕಕ್ಕೆ ಬೇಕು ಎಡಗೈ ಆಟಗಾರ

ಯುವರಾಜ್ ಸಿಂಗ್​ ಬಳಿಕ ಮಧ್ಯಮ ಕ್ರಮಾಂಕದಲ್ಲಿ ಸೂಕ್ತ ಎಡಗೈ ಆಟಗಾರನ ಕೊರತೆ ಎದುರಿಸುತ್ತಿದೆ. ತಂಡಕ್ಕೆ ಪ್ರವೇಶಿಸಿದ ಎಲ್ಲರೂ ಬಲಗೈ ಆಟಗಾರರೇ ಆದ ಕಾರಣ ತಂಡಕ್ಕೆ ಎಡಗೈ ಆಟಗಾರನ ಅವಶ್ಯಕತೆ ಇತ್ತು. ಆರಂಭಿಕರು ಬಹುಬೇಗನೇ ಔಟಾದರೂ, ಮಧ್ಯಮ ಕ್ರಮಾಂಕದಲ್ಲಿ ಎಡಗೈ-ಬಲಗೈ ಕಾಂಬಿನೇಷನ್​ ಮೂಲಕ ಬೌಲರ್​ಗಳಿಗೆ ಗೊಂದಲ ಸೃಷ್ಟಿಸಲು ಇದು ನೆರವಾಗುತ್ತದೆ.

ಎಡಗೈ-ಬಲಗೈ ಬ್ಯಾಟರ್​​ಗಳು ಬದಲಾಗುತ್ತಿದ್ದರೆ, ಬೌಲರ್​​ ತಂತ್ರವೂ ಬದಲಾಗುತ್ತದೆ. ಫೀಲ್ಡರ್​ಗಳು ಬದಲಾಗುತ್ತಾರೆ. ಬೌಲರ್​​​ಗಳ ಒಮ್ಮೆ ಎಡಗೈ, ಮತ್ತೊಮ್ಮೆ ಬಲಗೈ ಬ್ಯಾಟರ್​​​ಗೆ ಬೌಲ್ ಮಾಡುವಾಗ ಗೊಂದಲಕ್ಕೆ ಒಳಗಾಗಿ ಯಾರಿಗೆ ಯಾವ ರೀತಿಯ ಎಸೆತ ಹಾಕಬೇಕೆಂದು ರನ್​ ಬಿಟ್ಟುಕೊಡುತ್ತಾರೆ. 2011ರಲ್ಲಿ ಯುವರಾಜ್​ ಸಿಂಗ್​ ಇದೇ ರೀತಿಯ ಆಟದಿಂದ ವಿಶ್ವಕಪ್​ ಗೆದ್ದುಕೊಟ್ಟಿದ್ದು ನೆನಪಿಲ್ಲವೇ?

ಒತ್ತಡ ನಿಭಾಯಿಸುವ ಶಕ್ತಿ ತಿಲಕ್​​ಗೆ ಇದೆ!

ತಿಲಕ್ ವರ್ಮಾ ಅದ್ಭುತ ಪ್ರತಿಭಾವಂತ ಬ್ಯಾಟ್ಸ್​​ಮನ್​ ಎಂಬುದರಲ್ಲಿ ಎರಡು ಮಾತಿಲ್ಲ. ಮಧ್ಯಮ ಕ್ರಮಾಂಕದಲ್ಲಿ ಒತ್ತಡ ನಿಭಾಯಿಸುವ ಶಕ್ತಿ ಎಲ್ಲರಿಗೂ ಇರುವುದಿಲ್ಲ. ಆರಂಭದಲ್ಲಿ ವಿಕೆಟ್​​​​ ಬೇಗನೇ ಕಳೆದುಕ ಕೊಂಡರೆ, ತಂಡವನ್ನು ಒತ್ತಡ ಮಧ್ಯಮ ಕ್ರಮಾಂಕದ ಆಟಗಾರರ ಮೇಲಿರುತ್ತದೆ. ಅವರು ಕನಿಷ್ಠ 20 ಓವರ್​ಗಳ ಮೇಲಾದರೂ ಆಡಬೇಕು. ಈ ಶಕ್ತಿ ತಿಲಕ್​ ವರ್ಮಾಗೆ ಇದೆ.

ಮ್ಯಾಚ್​ ಫಿನಿಷಿಂಗ್​ ಆಟಕ್ಕೆ ಒತ್ತು

2011ರ ಏಕದಿನ ವಿಶ್ವಕಪ್​ನಲ್ಲಿ ಯುವರಾಜ್ ಸಿಂಗ್​ ನೋಡಿದ್ದೀರಾ? ಮಧ್ಯಮ ಕ್ರಮಾಂಕದಲ್ಲಿ ಕಣಕ್ಕಿಳಿದು ಹಲವು ಪಂದ್ಯಗಳನ್ನು ಏಕಾಂಗಿಯಾಗಿ ಗೆಲ್ಲಿಸಿಕೊಟ್ಟಿದ್ದರು. ಬಿರುಸಿನ ಆಟವಷ್ಟೇ ಅಲ್ಲ, ತಾಳ್ಮೆ, ಜವಾಬ್ದಾರಿಯುತ ಆಟವೂ ಮುಖ್ಯ. ಇದಕ್ಕೆ ತಿಲಕ್ ವರ್ಮಾ ಹೇಳಿ ಮಾಡಿಸಿದ್ದಾರೆ. ಅದನ್ನು ವಿಶೇಷವಾಗಿ ಹೇಳಬೇಕಿಲ್ಲ. ಮುಂಬೈ ಇಂಡಿಯನ್ಸ್ ತಂಡದಲ್ಲಿದ್ದಾಗ ಬೇಗನೇ ವಿಕೆಟ್​ ಕಳೆದುಕೊಂಡ ಸಂದರ್ಭದಲ್ಲಿ ಮ್ಯಾಚ್​ ವಿನ್ನಿಂಗ್ ಪ್ರದರ್ಶನ ನೀಡುತ್ತಿದ್ದದ್ದು ಇದೇ ತಿಲಕ್ ವರ್ಮಾ ಎಂಬುದನ್ನು ಮರೆಯುವಂತಿಲ್ಲ. ಕಡಿಮೆ ಎಸೆತಗಳಲ್ಲಿ ಹೆಚ್ಚು ರನ್​ಗಳ ಅಗತ್ಯ ಇದ್ದಾಗ ಮ್ಯಾಚ್ ಫಿನಿಷ್ ಮಾಡುವ ಸಾಮರ್ಥ್ಯವನ್ನೂ ಹೊಂದಿದ್ದಾರೆ.

ಬೌಲರ್​​ಗಳ ಮೇಲೆ ಒತ್ತಡ ಹಾಕುವ ಸಾಮರ್ಥ್ಯ

ಬೌಲರ್​​ಗಳು ಫುಲ್​ ಫಾರ್ಮ್​ನಲ್ಲಿದ್ದಾಗ ಅವರ ಬೆಂಕಿ ಚೆಂಡುಗಳನ್ನು ಎದುರಿಸುವುದು ಅಷ್ಟು ಸುಲಭವಲ್ಲ. ಆದರೆ ತಿಲಕ್​ ವರ್ಮಾ ಇಂತಹ ಸಂದರ್ಭವನ್ನು ಸುಲಭವಾಗಿ ಫೇಸ್ ಮಾಡುತ್ತಾರೆ. ಬೌಲರ್​​ಗಳ ಬೌನ್ಸ್, ಯಾರ್ಕರ್, ಸ್ವಿಂಗ್.. ವಿವಿಧ ವೇರಿಯೇಷನ್​ ಬೌಲಿಂಗ್​​ ತುಂಬಾ ಚೆನ್ನಾಗಿ ಹ್ಯಾಂಡಲ್ ಮಾಡುವ ತಾಕತ್ತು ಹೊಂದಿದ್ದಾರೆ. ಇದೆಲ್ಲವನ್ನು ವೆಸ್ಟ್​ ಇಂಡೀಸ್​​ ಸರಣಿಯಲ್ಲಿ ಕಣ್ಣಾರೆ ಕಂಡಿದ್ದೇವೆ.

ಆಡುವ ಅವಕಾಶ ಸಿಗುವುದು ಅನುಮಾನ

ಸದ್ಯ ಮಧ್ಯಮ ಕ್ರಮಾಂಕದಲ್ಲಿ ಭಾರೀ ಪೈಪೋಟಿ ಏರ್ಪಟ್ಟಿದೆ. ಮೊದಲ ಮೂರು ಸ್ಥಾನಗಳಿಗೆ ರೋಹಿತ್, ಗಿಲ್, ಕೊಹ್ಲಿ ಫಿಕ್ಸ್​ ಆಗಿದ್ದಾರೆ. ಆದರೆ ನಾಲ್ಕನೇ ಸ್ಥಾನಕ್ಕೆ ಶ್ರೇಯಸ್ ಅಯ್ಯರ್, 5ನೇ ಸ್ಥಾನಕ್ಕೆ ಕೆಎಲ್ ರಾಹುಲ್ ಆಡುವುದು ಖಚಿತ. ಆದರೆ, ಇನ್ನು 6, 7ರಲ್ಲಿ ಹಾರ್ದಿಕ್, ಜಡೇಜಾ ಇರಲಿದ್ದಾರೆ. ಹಾಗಾಗಿ ತಿಲಕ್ ವರ್ಮಾ 4-5ನೇ ಸ್ಥಾನಕ್ಕೆ ಪೈಪೋಟಿ ನಡೆಸಬೇಕಿದೆ. ಆದರೆ, ಇಲ್ಲಿ ಸೂರ್ಯಕುಮಾರ್, ಇಶಾನ್ ಕಿಶನ್ ಕೂಡ ಇದೇ ಸ್ಥಾನಕ್ಕೆ ಸ್ಪರ್ಧೆ ನಡೆಸಬೇಕಿದೆ. ಅಯ್ಯರ್​​-ರಾಹುಲ್​ರಲ್ಲಿ ಯಾರಿಗೆ ಏನೇ ಆದರೂ, ಮೊದಲ ಆಯ್ಕೆಯೂ ಸೂರ್ಯ-ಇಶಾನ್​ ಅವರೇ ಆಗಿರುತ್ತಾರೆ. ಹಾಗಾಗಿ ತಿಲಕ್ ವರ್ಮಾಗೆ ಆಡುವ ಅವಕಾಶ ಸಿಗುವುದು ಅನುಮಾನ.

ಲೀಸ್ಟ್​​ ಎನಲ್ಲಿ ತಿಲಕ್ ಭರ್ಜರಿ ಪ್ರದರ್ಶನ

ಅಂತಾರಾಷ್ಟ್ರೀಯ ಕ್ರಿಕೆಟ್​​ನಲ್ಲಿ ಒಂದೂ ಏಕದಿನ ಕ್ರಿಕೆಟ್​ ಆಡದ ತಿಲಕ್ ವರ್ಮಾ, ದೇಶೀಯ ಕ್ರಿಕೆಟ್​​ ಲೀಸ್ಟ್​​ ಎನಲ್ಲಿ ಅದ್ಭುತ, ಅಮೋಘ ಪ್ರದರ್ಶನ ನೀಡಿದ್ದಾರೆ. ಲೀಸ್ಟ್​ ಎ ಕ್ರಿಕೆಟ್​​ನಲ್ಲಿ ಆಡಿರುವ 25 ಪಂದ್ಯಗಳಲ್ಲಿ ಬರೋಬ್ಬರಿ 56.18ರ ಸರಾಸರಿಯಲ್ಲಿ 5 ಶತಕ, 5 ಅರ್ಧಶತಕಗಳ ನೆರವಿನಿಂದ 1236 ರನ್ ಗಳಿಸಿದ್ದಾರೆ. ಅವರ ಸ್ಟ್ರೈಕ್​ರೇಟ್​​ 101.64. ಏಕದಿನ ಕ್ರಿಕೆಟ್​​ನಲ್ಲಿ ಇಷ್ಟು ಸ್ಟ್ರೈಕ್​ರೇಟ್​ ಇರುವುದೇ ಅಪರೂಪ.

ಈ ಎಲ್ಲಾ ಅಂಶಗಳು, ಅವರ ಪ್ರದರ್ಶನ, ಪ್ರತಿಭೆಯನ್ನು ಗುರುತಿಸಿಯೇ ಏಷ್ಯಾಕಪ್ ತಂಡಕ್ಕೆ ಮಣೆ ಹಾಕಲಾಗಿದೆ. ಬಹುಶಃ ಇದೇ ತಂಡವನ್ನು ಏಕದಿನ ವಿಶ್ವಕಪ್​ ಟೂರ್ನಿಗೂ ಪ್ರಕಟಿಸುವ ಸಾಧ್ಯತೆ ಇದೆ. ಹಾಗಾಗಿ ವಿಶ್ವಕಪ್​ಗೂ ಆಯ್ಕೆಯಾದರೂ ಅಚ್ಚರಿ ಇಲ್ಲ. ಮತ್ತೊಂದೆಡೆ ಮುಂಬೈ ರಾಜಕೀಯ ಎಂಬ ಕೂಗು ಎದ್ದಿದೆ. ತಿಲಕ್ ವರ್ಮಾ ಹೈದರಾಬಾದ್ ಹುಡುಗನಾದರೂ ಮುಂಬೈ ತಂಡದಲ್ಲಿರುವ ಆಟಗಾರ ಎಂಬ ಕಾರಣಕ್ಕೆ ನಾಯಕ ರೋಹಿತ್​​ ಅವಕಾಶ ನೀಡಿದ್ದಾರೆ ಎಂದು ಕೆಲವರು ವಾದಿಸಿದ್ದಾರೆ. ಅದೇನೆ ಇರಲಿ, ತಿಲಕ್ ವರ್ಮಾ ಅದ್ಭುತ ಪ್ರದರ್ಶನ ತೋರಲಿ, ತಂಡದ ಗೆಲುವಿಗೆ ಶ್ರಮಿಸಲಿ ಎಂದು ಹಾರೈಸೋಣ.