ಕಲರ್ಸ್‌ ಕನ್ನಡ ಸವಿರುಚಿ ಕಾರ್ಯಕ್ರಮಕ್ಕೆ ಬಂದ ಹಂಸ ಪ್ರತಾಪ್; ಯಾವ ರೆಸಿಪಿ ಮಾಡ್ತಿದಾರೆ ಬೆಣ್ಣೆ ಶಾಂತಮ್ಮ?
ಬಿಗ್‌ಬಾಸ್‌ ಕನ್ನಡ 11 ಖ್ಯಾತಿಯ ಹಂಸ ಪ್ರತಾಪ್, ಕಲರ್ಸ್‌ ಕನ್ನಡದಲ್ಲಿ ಪ್ರಸಾರವಾಗುತ್ತಿರುವ ಸವಿರುಚಿ ದೀಪಾವಳಿ ವಿಶೇಷ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದಾರೆ. ಅಡುಗೆ ಮಾಡುತ್ತಾ ಬಿಗ್‌ಬಾಸ್‌ ಹಾಗೂ ತಮ್ಮ ಕೆರಿಯರ್‌ ಬಗ್ಗೆ ಮಾತಾನಾಡಿದ್ದಾರೆ. ಶುಕ್ರವಾರ ಮಧ್ಯಾಹ್ನ 12ಕ್ಕೆ ಕಾರ್ಯಕ್ರಮ ಪ್ರಸಾರವಾಗಲಿದೆ.
ಬಿಗ್‌ಬಾಸ್‌ ಕನ್ನಡ ಸೀಸನ್‌ 11 ಐದನೇ ವಾರಕ್ಕೆ ಕಾಲಿಟ್ಟಿದೆ. ದೊಡ್ಮನೆಯಲ್ಲಿ ಟಾಸ್ಕ್‌, ಜಗಳ, ದ್ವೇಷ, ಹತಾಶೆ ಎಲ್ಲವೂ ಹೆಚ್ಚಾಗಿದೆ. ಒಬ್ಬರನ್ನು ಕಂಡರೆ ಮತ್ತೊಬ್ಬರಿಗೆ ಆಗುವುದಿಲ್ಲ ಎನ್ನುವಂತಾಗಿದೆ. ದಿನದಿಂದ ದಿನಕ್ಕೆ ಸ್ಪರ್ಧೆ ಹೆಚ್ಚುತ್ತಿದೆ. ಇಂದು ಜೊತೆಯಾಗಿರುವರು ಮತ್ತೆ ಮನಸ್ತಾಪದಿಂದ ದೂರಾಗುತ್ತಿದ್ದಾರೆ. ಮನೆಯಿಂದ ಇದುವರೆಗೂ 4 ಸ್ಪರ್ಧಿಗಳು ಹೊರ ಹೋಗಿದ್ದಾರೆ.
ನಾಲ್ಕನೇ ವಾರ ಎಲಿಮಿನೇಟ್‌ ಆಗಿದ್ದ ಹಂಸ ಪ್ರತಾಪ್
ಮೊದಲ ವಾರ ಯಮುನಾ ಶ್ರೀನಿಧಿ, ಎರಡನೇ ವಾರ ರಂಜಿತ್‌, ಲಾಯರ್‌ ಜಗದೀಶ್‌ ಹಾಗೂ ಕಳೆದ ವಾರ ಹಂಸ ಮನೆಯಿಂದ ಎಲಿಮಿನೇಟ್‌ ಆಗಿದ್ದಾರೆ. ಹಂಸ ಮನೆಯಿಂದ ಹೊರ ಹೋಗಿದ್ದು ಮನೆಯಲ್ಲಿ ಕೆಲವರಿಗೆ ಬೇಸರವಾದರೆ ಕಾರ್ಯಕ್ರಮ ನೋಡುತ್ತಿದ್ದ ವೀಕ್ಷಕರು ಕೂಡಾ ಅವರು ಇಷ್ಟು ಬೇಗ ಎಲಿಮಿನೇಟ್‌ ಆಗಬಾರದಿತ್ತು ಎನ್ನುತ್ತಿದ್ದಾರೆ. ಬಿಗ್‌ಬಾಸ್‌ ಮನೆಯಿಂದ ಹೊರ ಬರುತ್ತಿದ್ದಂತೆ ಇನ್‌ಸ್ಟಾಗ್ರಾಮ್‌ ಲೈವ್‌ಗೆ ಬಂದಿದ್ದ ಹಂಸ ಈಗ ಸವಿರುಚಿ ಕಾರ್ಯಕ್ರಮದಲ್ಲಿ ಪಾಲ್ಗೊಂಡಿದ್ದಾರೆ. ಕಾರ್ಯಕ್ರಮವನ್ನು ನಟಿ, ನಿರೂಪಕಿ ಜಾಹ್ನವಿ ನಡೆಸಿಕೊಡುತ್ತಿದ್ದು ಹಂಸ ತಮ್ಮ ಕೈರುಚಿಯನ್ನು ಕರ್ನಾಟಕದ ಜನತೆಯೊಂದಿಗೆ ಹಂಚಿಕೊಳ್ಳುತ್ತಿದ್ದಾರೆ.
ಇದನ್ನೂ ಓದಿ: ಸಿನಿಪ್ರಿಯರಿಗೆ ರಾಜ್ಯೋತ್ಸವ, ದೀಪಾವಳಿ ಗಿಫ್ಟ್‌; ಇಬ್ಬನಿ ತಬ್ಬಿದ ಇಳೆಯಲಿ ಒಟಿಟಿ ಸ್ಟ್ರೀಮಿಂಗ್‌ ದಿನಾಂಕ ತಿಳಿಸಿದ ನಿರ್ದೇಶಕ ಚಂದ್ರಜಿತ್‌
ನವೆಂಬರ್ 1 ರಂದು ಮಧ್ಯಾಹ್ನ 12 ಗಂಟೆಗೆ ಹಂಸ ಭಾಗವಹಿಸಿರುವ ಕಲರ್ಸ್‌ ಕಿಚನ್‌ ಕಾರ್ಯಕ್ರಮ ಪ್ರಸಾರವಾಗುತ್ತಿದೆ. ಅಡುಗೆ ಮಾಡುವ ಜಾಹ್ನವಿ, ಹಂಸಗೆ ಬಿಗ್‌ಬಾಸ್‌ ಮನೆಯೊಳಗೆ ನಡೆದ ವಿಚಾರಗಳ ಬಗ್ಗೆ ಪ್ರಶ್ನಿಸುತ್ತಾರೆ. ಜಗದೀಶ್‌ ಏಕೆ ಆ ರೀತಿ ವರ್ತಿಸುತ್ತಿದ್ದರು ಎಂದು ನಿರೂಪಕಿ ಕೇಳಿದ್ದಕ್ಕೆ ಈ ಪ್ರಶ್ನೆಗೆ ಅವರ ಬಳಿಯೂ ಉತ್ತರ ಇದೆಯೋ, ಇಲ್ಲವೋ ಗೊತ್ತಿಲ್ಲ. ಅವರು ಒಂದು ಮಾತಿಗೆ ಸ್ಟಿಕ್‌ ಅನ್‌ ಅಗುತ್ತಿರಲಿಲ್ಲ. ನಿಮ್ಮ ಎಲಿಮಿನೇಷನ್‌ಗೆ ಜಗದೀಶ್‌ ಅವರೇ ಕಾರಣಾನಾ ಎಂಬ ಮತ್ತೊಂದು ಪ್ರಶ್ನೆ ಹಂಸಾಗೆ ಎದುರಾಗುತ್ತದೆ. ಇದಕ್ಕೆ ಆಕೆ ಏನು ಉತ್ತರ ನೀಡುತ್ತಾರೆ ಎಂದು ತಿಳಿಯಲು ಇಂದು ಮಧ್ಯಾಹ್ನ ಪ್ರಸಾರವಾಗಲಿರುವ ಸವಿರುಚಿ ಕಾರ್ಯಕ್ರಮವನ್ನು ನೋಡಬೇಕು.
ಪುಟ್ಟಕ್ಕನ ಮಕ್ಕಳು ಧಾರಾವಾಹಿಗೆ ವಿದಾಯ
ಹಂಸ ಪ್ರತಾಪ್ ಕಿರುತೆರೆಯಲ್ಲಿ ಸಕ್ರಿಯರಾಗಿದ್ದಾರೆ. ಧ್ರುವ, ಅಮ್ಮ, ರಾಜಾಹುಲಿ, ಭಾನು ವೆಡ್ಸ್ ಭೂಮಿ, ಜೇಮ್ಸ್, ಸೈಕಿಕ್, ಸಖತ್, ಉಂಡೆನಾಮ ಸೇರಿದಂತೆ ಕೆಲವೊಂದು ಸಿನಿಮಾಗಳಲ್ಲಿ ಹಂಸ ನಟಿಸಿದ್ದಾರೆ. ಬಿಗ್‌ಬಾಸ್‌ಗೆ ಬರುವ ಮುನ್ನ ಹಂಸ ಜೀ ಕನ್ನಡದಲ್ಲಿ ಪ್ರಸಾರವಾಗುತ್ತಿರುವ ಪುಟ್ಟಕ್ಕನ ಮಕ್ಕಳು ಧಾರಾವಾಹಿಯಲ್ಲಿ ರಾಜೇಶ್ವರಿ ಪಾತ್ರದಲ್ಲಿ ನಟಿಸುತ್ತಿದ್ದರು. ಪುಟ್ಟಕ್ಕನ ವೈರಿ ಆಗಿ ಹಂಸ ಅವರ ನಟನೆ ಎಲ್ಲರಿಗೂ ಇಷ್ಟವಾಗಿತ್ತು. ಪುಟ್ಟ ಮಕ್ಕಳು ಕೂಡಾ ಹಂಸ ಅವರನ್ನು ನೋಡಿ ರಾಜಿ ಎನ್ನುತ್ತಿದ್ದರು. ಬಿಗ್‌ಬಾಸ್‌ನಲ್ಲಿ ಅವಕಾಶ ಸಿಕ್ಕಿದ್ದರಿಂದ ಪುಟ್ಟಕ್ಕನ ಮಕ್ಕಳು ಧಾರಾವಾಹಿಗೆ ಹಂಸ ವಿದಾಯ ಹೇಳಿದ್ದರು. ಹಂಸ ಅವರ ಪತಿ ಪ್ರತಾಪ್ ಐಟಿ ಉದ್ಯೋಗಿ. ಈ ದಂಪತಿಗೆ ಮಗ ಇದ್ದಾರೆ. ಜೂನ್‌ನಲ್ಲಿ ಕಲರ್ಸ್‌ ಕನ್ನಡದಲ್ಲಿ ಪ್ರಸಾರವಾಗಿದ್ದ ರಾಜಾ ರಾಣಿ ರೀಲೋಡೆಡ್‌ ರಿಯಾಲಿಟಿ ಶೋನಲ್ಲಿ ಹಂಸ ತಮ್ಮ ಪತಿ ಪ್ರತಾಪ್ ಜೊತೆ ಭಾಗವಹಿಸಿದ್ದರು.
ಯಶ್‌, ಸತೀಶ್‌ ನೀನಾಸಂ ನಟಿಸಿರುವ ಡ್ರಾಮಾ ಚಿತ್ರದಲ್ಲಿ ಹಂಸ ಬೆಣ್ಣೆ ಮಾರುವ ಶಾಂತಮ್ಮ ಎಂಬ ಪಾತ್ರದಲ್ಲಿ ನಟಿಸಿದ್ದರು. ಅಂದಿನಿಂದ ಅವರು ಬೆಣ್ಣೆ ಶಾಂತಮ್ಮ ಅಂತಾನೇ ಫೇಮಸ್‌ ಆಗಿದ್ದಾರೆ.
