Kichcha Sudeep on Hoysala: ‘ಗುರುದೇವ್‌ ಹೊಯ್ಸಳ’ ಚಿತ್ರಕ್ಕೆ ಮೊದಲ ಪ್ರೇಕ್ಷಕನಾದ ಕಿಚ್ಚ! ಸಿನಿಮಾಕ್ಕೆ ಸುದೀಪ್ ಕೊಟ್ಟ ರೇಟಿಂಗ್‌ ಹೀಗಿದೆ
ಸಿನಿಮಾಕ್ಕೆ ಸಂಬಂಧಿಸಿದಂತೆ ಹೊಸ ಹೊಸ ಪ್ರಯತ್ನಗಳಿಗೆ ನಟ ಸುದೀಪ್ ತಮ್ಮ ಕೈಲಾದಷ್ಟು ಸಾಥ್‌ ನೀಡುತ್ತಲೇ ಇರುತ್ತಾರೆ. ಇದೀಗ ಆ ಸಹಕಾರ ಹೊಯ್ಸಳನಿಗೂ ಸಿಕ್ಕಿದೆ.
Kichcha Sudeep on Hoysala: ಡಾಲಿ ಧನಂಜಯ್ ನಟನೆಯ 25ನೇ ಸಿನಿಮಾ ಎಂಬ ವಿಶೇಷಣದೊಂದಿಗೆ ರಿಲೀಸ್‌ ಆಗುತ್ತಿದೆ ‘ಗುರುದೇವ್‌ ಹೊಯ್ಸಳ’ ಸಿನಿಮಾ. ಗಡಿ ಭಾಗದ ಸಮಸ್ಯೆಯನ್ನೇ ಪ್ರಧಾನವಾಗಿರಿಸಿಕೊಂಡು ಕಮರ್ಷಿಯಲ್ ಅಂಶದೊಂದಿಗೆ ಈ ಸಿನಿಮಾ ನಾಳೆ (ಮಾ. 30) ಬಿಡುಗಡೆ ಆಗುತ್ತಿದೆ. ಈಗಾಗಲೇ ಹಾಡು, ಟೀಸರ್‌, ಟ್ರೇಲರ್‌ ಮೂಲಕ ಕೂತೂಹಲಕ್ಕೆ ಒಂದಷ್ಟು ಒಗ್ಗರಣೆ ಹಾಕಿರುವ ಈ ಸಿನಿಮಾ ಸದ್ಯ ಪ್ರಚಾರವನ್ನೂ ಅಷ್ಟೇ ಬಿರುಸಾಗಿಯೇ ಮಾಡುತ್ತಿದೆ. ಈಗ ಹೊಸ ಅಪ್‌ಡೇಟ್‌ ಏನೆಂದರೆ, ಈ ಚಿತ್ರವನ್ನು ಕಿಚ್ಚ ಸುದೀಪ್ ವೀಕ್ಷಣೆ ಮಾಡಿದ್ದಾರೆ.
ಕೆಆರ್‌ಜಿ ಸ್ಟುಡಿಯೋಸ್‌ ಬ್ಯಾನರ್‌ನಲ್ಲಿ ನಿರ್ಮಾಣವಾಗಿರುವ ‘ಗುರುದೇವ್‌ ಹೊಯ್ಸಳ’ ಚಿತ್ರವನ್ನು ವಿಜಯ್ ಎನ್ ನಿರ್ದೇಶನ ಮಾಡಿದ್ದಾರೆ. ಧನಂಜಯ್‌ಗೆ ಈ ನಿರ್ಮಾಣ ಸಂಸ್ಥೆಯ ಜತೆಗಿದು ಎರಡನೇ ಸಿನಿಮಾ. ಈ ಹಿಂದೆ ರತ್ನನ್‌ ಪ್ರಪಂಚ ಚಿತ್ರವನ್ನೂ ಇದೇ ಕೆಆರ್‌ಜಿ ಸ್ಟುಡಿಯೋಸ್‌ ಬ್ಯಾನರ್‌ನಲ್ಲಿ ಕಾರ್ತಿಕ್‌ ಗೌಡ ಮತ್ತು ಯೋಗಿ ಜಿ ರಾಜ್‌ ನಿರ್ಮಿಸಿದ್ದರು. ಇದೀಗ ಹೊಯ್ಸಳನ ಸರದಿ. ಉತ್ತರ ಕರ್ನಾಟಕ ಭಾಗದ ಭಾಷೆಯ ಧಾಟಿಯಲ್ಲಿಯೇ ಮೂಡಿಬಂದ ಈ ಚಿತ್ರವನ್ನು ಕಿಚ್ಚ ಸುದೀಪ್ ವೀಕ್ಷಿಸಿದ್ದಾರೆ. ಅಷ್ಟೇ ಅಲ್ಲ ಸಿನಿಮಾ ನೋಡಿ ಮನತುಂಬಿ ಹರಸಿದ್ದಾರೆ.
ಹೊಯ್ಸಳನ ಮೊದಲ ವೀಕ್ಷಕನಾದ ಕಿಚ್ಚ..
ಸಿನಿಮಾಕ್ಕೆ ಸಂಬಂಧಿಸಿದಂತೆ ಹೊಸ ಹೊಸ ಪ್ರಯತ್ನಗಳಿಗೆ ನಟ ಸುದೀಪ್ ತಮ್ಮ ಕೈಲಾದಷ್ಟು ಸಾಥ್‌ ನೀಡುತ್ತಲೇ ಇರುತ್ತಾರೆ. ಇದೀಗ ಆ ಸಹಕಾರ ಹೊಯ್ಸಳನಿಗೂ ಸಿಕ್ಕಿದೆ. ಸಿನಿಮಾ ಬಿಡುಗಡೆಗೆ ಒಂದು ದಿನದ ಮೊದಲೇ ಅಂದರೆ ಇಂದು (ಮಾ. 29) ಸುದೀಪ್ ಅವರಿಗೆ ಸಿನಿಮಾ ತೋರಿಸಿದೆ ಚಿತ್ರತಂಡ. ಸಿನಿಮಾ ನೋಡಿ ಮೆಚ್ಚುಗೆ ವ್ಯಕ್ತಪಡಿಸಿದ್ದಲ್ಲದೆ, ಹಿಟ್‌ ಎಂಬ ಪಟ್ಟಿಯನ್ನೂ ನೀಡಿದ್ದಾರೆ. ಧನಂಜಯ್, ನವೀನ್ ಶಂಕರ್, ಅಮೃತಾ ಅಯ್ಯಂಗಾರ್ ಮತ್ತು ಕಾರ್ತಿಕ್‌ ಗೌಡ ಸುದೀಪ್ ಅವರಿಗೆಂದೇ ವಿಶೇಷ ಸ್ಕ್ರೀನಿಂಗ್‌ ವ್ಯವಸ್ಥೆ ಕಲ್ಪಿಸಿದ್ದರು. ಚಿತ್ರ ವೀಕ್ಷಿಸಿ ತಂಡಕ್ಕೆ ಶುಭಾಶಯವನ್ನೂ ಹೇಳಿದ್ದಾರೆ ಸುದೀಪ್.
ಸೋಷಿಯಲ್ ಮೆಸೇಜ್ ಹೊತ್ತಿರುವ ಪಕ್ಕಾ ಕಮರ್ಷಿಯಲ್ ಸಿನಿಮಾ ಇದಾಗಿದ್ದು, ನಿರ್ದೇಶಕ ವಿಜಯ್. ಎನ್ ಚಿತ್ರ ನಿರ್ದೇಶಿಸಿದ್ದಾರೆ. ಅಜನೀಶ್ ಲೋಕನಾಥ್ ಅವರ ಸಂಗೀತ ನಿರ್ದೇಶನ ಈ ಚಿತ್ರಕ್ಕಿದೆ. ಹೊಯ್ಸಳನಿಗೆ ಜೋಡಿಯಾಗಿ ಅಮೃತಾ ಅಯ್ಯಂಗಾರ್ ಕಾಣಿಸಿಕೊಂಡಿದ್ದು, ಅಚ್ಯುತ್ ಕುಮಾರ್, ನವೀನ್ ಶಂಕರ್, ಅವಿನಾಶ್, ಪ್ರತಾಪ್ ನಾರಾಯಣ್, ರಾಜೇಶ್ ನಟರಂಗ, ನಾಗಭೂಷಣ್ ಹಾಗೂ ಮುಂತಾದವರು ಈ ಚಿತ್ರದಲ್ಲಿ ನಟಿಸಿದ್ದಾರೆ.
ಧನಂಜಯ್- ಅಮೃತಾ ಜೋಡಿಯ ಕಾಲೆಳೆದ ಕಿಚ್ಚ
ಇತ್ತೀಚೆಗೆ ಹೊಯ್ಸಳ ಟ್ರೇಲರ್‌ ಬಿಡುಗಡೆ ಕಾರ್ಯಕ್ರಮದಲ್ಲಿ ಧನಂಜಯ್ ಮತ್ತು ಅಮೃತಾ ಬಗ್ಗೆ ಕಿಚ್ಚ ಸುದೀಪ್ ಹೀಗೆ ಮಾತನಾಡಿದ್ದರು. "ಅಮೃತಾ ಅವ್ರು ವೇದಿಕೆ ಮೇಲೆ ಬಂದು ಸಿನಿಮಾ ಬಗ್ಗೆ ಹೆಚ್ಚು ಮಾತನಾಡದೆ, ಧನಂಜಯ್ ಬಗ್ಗೆ ಮಾತನಾಡಿದ್ರಿ. ಪಾತ್ರಕ್ಕೆ ಹೊಗಳುತ್ತಿದ್ರೋ, ವೈಯಕ್ತಿಕವಾಗಿ ಹೊಗಳುತ್ತಿದ್ರೋ ಗೊತ್ತಿಲ್ಲ. ಆದ್ರೆ ನೀವು ಮಾತ್ರ ತುಂಬ ಖುಷಿಯಲ್ಲಿದ್ರಿ. ಇಷ್ಟೆಲ್ಲ ನೀವು ಹೇಳಿದರೂ ನಿಮ್ಮ ಬಗ್ಗೆ ಧನಂಜಯ್ ಏನೂ ಹೇಳಲಿಲ್ಲ. ನನಗಿದು ಕೊಂಚ ಬೇಸರ ಅನಿಸಿತು. ಈ ವೇದಿಕೆ ಮೇಲೆ ಧನಂಜಯ್ ಚೆನ್ನಾಗಿ ಕಾಣ್ತಿದ್ದಾರೆ, ಲುಕ್‌ ಚೆನ್ನಾಗಿದೆ.. ಎಂದು ಅಮೃತಾ ನಾಲ್ಕು ಸಲ ಮೆನ್ಷನ್‌ ಮಾಡಿದ್ರು. ಆದ್ರೆ, ಧನಂಜಯ್ ಮಾತ್ರ ಹೆಚ್ಚೆನೂ ಹೊಗಳಲಿಲ್ಲʼ ಎಂದರು.
ಇದಕ್ಕೆ ಪ್ರತಿಯಾಗಿ ಪ್ರತಿಕ್ರಿಯೆ ನೀಡಿದ ಧನಂಜಯ್, “ನಾನೂ ಮತ್ತು ಅಮೃತಾ ಒಟ್ಟಿಗೆ ಮೂರು ಸಿನಿಮಾ ಮಾಡಿದ್ದೇವೆ. ಅದ್ಬುತವಾಗಿ ಅಭಿನಯಿಸಿದ್ದಾರೆ.. ಎನ್ನುತ್ತಿದ್ದಂತೆ, ಮತ್ತೆ ಮಧ್ಯೆ ಪ್ರವೇಶಿಸಿದ ಸುದೀಪ್, ”ನೀವೇಕೆ ಬರೀ ಧನಂಜಯ್ ಜತೆ ನಟಿಸ್ತೀರಾ? ಎಂದು ಅಮೃತಾಗೆ ಪ್ರಶ್ನಿಸಿದರು. ಇದಕ್ಕೆ ಪ್ರತಿಯಾಗಿ, ಸರ್‌.. ಅದನ್ನು ನಿರ್ದೇಶಕರು ಮತ್ತು ನಿರ್ಮಾಪಕರಿಗೆ ಕೇಳಿ" ಎಂದರು ಧನಂಜಯ್.
"ಬೇರೆ ಕಲಾವಿದರಿಗೂ ಡೇಟ್ಸ್‌ ಕೊಡಿ, ಬೇರೆಯವರ ಜತೆಗೂ ಸಿನಿಮಾ ಮಾಡಿ. ಮೂರ್ಮೂರು ಸಿನಿಮಾ ಧನಂಜಯ್ ಜತೆಗೆ ಮಾಡಿದ್ರೆ, ಬೇರೆಯವ್ರಿಗೆ ನಿಮ್ಮ ಡೇಟ್ಸ್‌ ಹೇಗೆ ಸಿಗಬೇಕು? ಅಲ್ವಾ. ಇಷ್ಟೆಲ್ಲ ಆದ್ರೂ ನಿಮ್ಮ ಬಗ್ಗೆ ಧನಂಜಯ್ ಹೊಗಳುತ್ತಿಲ್ಲ. ನಮ್ಮೊಟ್ಟಿಗೆ ಕೆಲಸ ಮಾಡಿದ್ರೆ, ಅರ್ಧ ಗಂಟೆ ಹೊಗಳುತ್ತಿದ್ವಿ" ಎಂದು ಕಿಚ್ಚ ಸುದೀಪ್ ಹೇಳಿದ್ದಾರೆ.
