Nayanthara Controversy: ನಯನತಾರಾ ಬೆಂಬಿಡದ ವಿವಾದಗಳು, 3 ಸ್ಟಾರ್‌ ನಟಿಯರ ಜತೆ ಜಗಳ, ಇಬ್ಬರು ನಟರ ಜತೆ ಬ್ರೇಕಪ್‌
Nayanthara: Beyond The Fairytale: ನಯನತಾರಾ ಬದುಕಿನ ಕಥೆಯನ್ನು ಒಳಗೊಂಡ ಸಾಕ್ಷ್ಯಚಿತ್ರ ಬಿಡುಗಡೆಯಾಗಿದೆ. ಈ ಡಾಕ್ಯುಮೆಂಟರಿಯಲ್ಲಿ ಬಳಸಿರುವ ಮೂರು ಸೆಕೆಂಡ್‌ನ ಕ್ಲಿಪ್‌ ವಿರುದ್ಧ ಧನುಷ್ ನೋಟಿಸ್‌ ಕಳುಹಿಸಿದ್ದರು. ಇದೇ ಸಮಯದಲ್ಲಿ ನಯನತಾರಾ ಬದುಕಿನಲ್ಲಿ ಬಹಿರಂಗಗೊಂಡ ಕೆಲವು ವಿವಾದಗಳು, ನಡೆದ ಪ್ರಮುಖ ಘಟನೆಗಳ ವಿವರ ಇಲ್ಲಿ ನೀಡಲಾಗಿದೆ.
Nayanthara: Beyond The Fairytale: ದಕ್ಷಿಣ ಭಾರತದ ಚಿತ್ರರಂಗದ ಲೇಡಿ ಸೂಪರ್‌ಸ್ಟಾರ್‌ ಎಂದೇ ಖ್ಯಾತಿ ಪಡೆದಿರುವ ನಯನತಾರಾ ಬದುಕಿನಲ್ಲಿ ಹಲವು ವಿವಾದಗಳು, ಸವಾಲುಗಳು ಎದುರಾಗಿವೆ. ವೃತ್ತಿ ಬದುಕಿನ ಆರಂಭದಿಂದಲೂ ನಾಯಕರು ಮಾತ್ರವಲ್ಲದೆ ನಾಯಕಿಯರು, ನಿರ್ಮಾಪಕರ ಜತೆಯೂ ಸಂಘರ್ಷ ನಡೆದಿತ್ತು. ಕಳೆದ ಒಂದು ವಾರದಿಂದ ತಮಿಳು ನಟ ಧನುಷ್ ಮತ್ತು ನಯನತಾರಾ ನಡುವಿನ "ನಾನುಮ್‌ ರೌಡಿ ಧಾನ್‌" ವಿಡಿಯೋ ಕ್ಲಿಪ್‌ ಕಾಪಿರೈಟ್‌ ವಿವಾದ ತಾರಕಕ್ಕೆ ಏರಿತ್ತು. "ನಯನತಾರಾ: ಬಿಯಾಂಡ್ ದಿ ಫೇರಿ ಟೇಲ್"ನಲ್ಲಿ ಆ ಸಿನಿಮಾದ ಮೂರು ಸೆಕೆಂಡ್‌ ವಿಡಿಯೋ ಬಳಸಿದ್ದಕ್ಕೆ ಧನುಷ್ 10 ಕೋಟಿ ಪರಿಹಾರದ ಜತೆಗೆ ಲೀಗಲ್‌ ನೋಟೀಸ್‌ ಕಳುಹಿಸಿರುವ ಕುರಿತು ನಯನತಾರ ಟ್ವಿಟ್ಟರ್‌ನಲ್ಲಿ ಮೂರು ಪುಟಗಳ ಸುದೀರ್ಘ ಪತ್ರ ಹಂಚಿಕೊಂಡಿದ್ದರು. ಧನುಷ್‌ಗೆ ನಯನತಾರ ಮತ್ತು ಆಕೆಯ ಪತಿ ವಿಘ್ನೇಶ್‌ ಶಿವಂ ಕುರಿತು ಇರುವ ದ್ವೇಷವೂ ಈ ಕಾಪಿರೈಟ್‌ ದೂರಿನ ಹಿಂದಿದೆ.
3 ಸೆಕೆಂಡುಗಳ ಕ್ಲಿಪ್‌ಗೆ ಕಾಪಿರೈಟ್‌ ಸಂಕಷ್ಟ
ನೆಟ್‌ಫ್ಲಿಕ್ಸ್‌ನಲ್ಲಿ ಬಿಡುಗಡೆಯಾಗಿರುವ 'ನಯನತಾರಾ: ಬಿಯಾಂಡ್ ದಿ ಫೇರಿ ಟೇಲ್' ಸಾಕ್ಷ್ಯಚಿತ್ರದಲ್ಲಿ "ನಾನುಮ್‌ ರೌಡಿ ಧಾನ್‌" ಸಿನಿಮಾದ ಮೂರು ಸೆಕೆಂಡ್‌ನ ವಿಡಿಯೋ ಬಳಸಿರುವುದಕ್ಕೆ ಚಿತ್ರದ ನಿರ್ಮಾಪಕ ಧನುಷ್ 10 ಕೋಟಿ ಪರಿಹಾರದ ಜೊತೆಗೆ ನೋಟಿಸ್‌ ನೀಡಿದ್ದರು. ನೋಟಿಸ್‌ಗೆ ಕಟುವಾದ ಬಹಿರಂಗ ಪತ್ರದ ಮೂಲಕ ಪ್ರತಿಕ್ರಿಯಿಸಿದ ನಯನತಾರಾ ಅದನ್ನು ದೊಡ್ಡ ವಿವಾದಕ್ಕೆ ತಿರುಗಿಸಿದರು. ದಕ್ಷಿಣ ಭಾರತದ ನಟ ನಟಿಯರು ಈ ವಿವಾದದ ಕುರಿತು ಪ್ರತಿಕ್ರಿಯಿಸಿದ್ದರು. ಧನುಷ್ ಮತ್ತು ನಯನತಾರಾ ಪರವಾಗಿ, ವಿರುದ್ಧವಾಗಿ ಸೋಷಿಯಲ್‌ ಮೀಡಿಯಾದಲ್ಲಿ ಅಭಿಪ್ರಾಯಗಳು ಸೃಷ್ಟಿಯಾಗಿದ್ದವು.
ಮೂವರು ನಾಯಕಿಯರೊಂದಿಗೆ ಘರ್ಷಣೆ
ನಯನತಾರಾಗೆ ವಿವಾದಗಳು ಹೊಸದಲ್ಲ. ಈ ಹಿಂದೆ ಅಜಿತ್ ಜೊತೆ ಬಿಲ್ಲಾ ಸಿನಿಮಾ ಮಾಡುವಾಗ ನಾಯಕಿ ನಮಿತಾ ಜೊತೆ ಜಗಳವಾಡಿದ್ದರು. ಇಬ್ಬರೂ ಒಟ್ಟಿಗೆ ಕೆಲವು ದೃಶ್ಯಗಳನ್ನು ಮಾಡಿದರೂ ಸೆಟ್‌ನಲ್ಲಿ ಇಬ್ಬರು ಮಾತನಾಡುತ್ತಿರಲಿಲ್ಲ ಎಂದು ಸ್ವತಃ ನಯನತಾರಾ ಸಂದರ್ಶನವೊಂದರಲ್ಲಿ ಬಹಿರಂಗಪಡಿಸಿದ್ದಾರೆ. ಅದೇ ರೀತಿ ಅಂದು ನಂ.1 ಸ್ಥಾನಕ್ಕೆ ನಯನತಾರಾ ಜೊತೆ ಪೈಪೋಟಿ ನಡೆಸಿದ್ದ ತ್ರಿಷಾ ಹಾಗೂ ಶ್ರಿಯಾ ಅವರ ಜತೆಗೂ ಭಿನ್ನಾಭಿಪ್ರಾಯಗಳಿದ್ದವು ಎಂದು ನಯನತಾರಾ ಹೇಳಿದ್ದಾರೆ.
ಸಿಂಬು ಜತೆ ಪ್ರೇಮ
ನಾಯಕ ನಟರ ವಿಚಾರಕ್ಕೆ ಬಂದರೆ, ಇವರಿಗೆ ಮೊದಲು ಸಿಂಬು ಜತೆ ಲವ್ ಅಫೇರ್ ಇತ್ತಂತೆ. ಇವರಿಬ್ಬರ ವೈಯಕ್ತಿಕ ಫೋಟೋಗಳು ಸೋಷಿಯಲ್‌ ಮೀಡಿಯಾದಲ್ಲಿ ಶೇರ್‌ ಆಗಿದ್ದವು. ಆದರೆ, ಭಿನ್ನಾಭಿಪ್ರಾಯದ ಬಳಿಕ ಇಬ್ಬರು ದೂರವಾಗಿದ್ದರು.
ಪ್ರಭುದೇವ ಜತೆಗೆ ಡೇಟಿಂಗ್
ಸಿಂಬು ಜತೆ ಬ್ರೇಕ್ ಅಪ್ ಆದ ನಂತರ ನಯನತಾರಾ ಪ್ರಭುದೇವ ಜೊತೆ ಡೇಟಿಂಗ್ ಮಾಡುತ್ತಿದ್ದಾರೆ ಎಂದು ವದಂತಿ ಇತ್ತು. ಇಬ್ಬರೂ ಮದುವೆಯಾಗಲಿದ್ದಾರೆ ಎಂಬ ಸುದ್ದಿ ಹಬ್ಬಿತ್ತು. ಆದರೆ, ಪ್ರಭುದೇವ ಪತ್ನಿ ಕಾನೂನು ಕ್ರಮಕ್ಕೆ ಮುಂದಾದ ಬಳಿಕ ಇವರಿಬ್ಬರು ದೂರವಾಗಿದ್ದರು.
ನಿರ್ಮಾಪಕರ ದೂರುಗಳು
ದಕ್ಷಿಣ ಭಾರತದ ಸಿನಿಮಾಗಳಿಗೆ ಭಾರಿ ಸಂಭಾವನೆ ಪಡೆಯುವ ನಯನತಾರಾ ಸಿನಿಮಾ ಪ್ರಚಾರಕ್ಕೆ ಹಾಜರಾಗುತ್ತಿಲ್ಲ. ಈ ವಿಷಯದಲ್ಲಿ ನಿರ್ಮಾಪಕರು ಈಕೆಯ ಬಗ್ಗೆ ದೂರಿದ್ದಾರೆ. "ನಾನುಮ್‌ ರೌಡಿ ಧಾನ್‌" ಚಿತ್ರದ ಬಜೆಟ್‌ ಭಾರೀ ಏರಿಕೆಯಾಗಲು ನಯನತಾರಾ ಕಾರಣ ಎಂದು ಧನುಷ್ ಆರೋಪಿಸಿದ್ದಾರೆ. ಇದೀಗ ಆ ಚಿತ್ರದ ಕ್ಲಿಪ್ಪಿಂಗ್ ಅನ್ನು ಧನುಷ್ ಅನುಮತಿಯಿಲ್ಲದೆ ಬಳಸಿಕೊಂಡಿರುವುದರಿಂದ ಧನುಷ್ ನೋಟಿಸ್‌ ಕಳುಹಿಸಿದ್ದಾರೆ.
