Rajinikanth Stories: ದೇಗುಲದ ಕಂಬದ ಪಕ್ಕ ಕುಳಿತಿದ್ದ ಸೂಪರ್‌ಸ್ಟಾರ್‌ ರಜನಿಕಾಂತ್‌, ಭಿಕ್ಷುಕನೆಂದು 10 ರೂಪಾಯಿ ನೀಡಿದ ಮಹಿಳೆ

ತೆರೆಯ ಮೇಲೆ ಜೈಲರ್‌ ಆಗಿ, ರೋಬೊ ಆಗಿ, ಶಿವಾಜಿಯಾಗಿ, ನಾಗವಲ್ಲಿಗೆ ಭಯ ಹುಟ್ಟಿಸುವಂತೆ ಲಕಲಕ ವಿಜ್ಞಾನಿಯಾಗಿ, ಲವರ್‌ ಬಾಯ್‌ ಆಗಿ ಮೆರೆಯುವ ಸೂಪರ್‌ಸ್ಟಾರ್‌ ರಜನಿಕಾಂತ್‌ ತನ್ನ ದೈನಂದಿನ ಜೀವನದಲ್ಲಿ ಸರಳವಾಗಿರುತ್ತಾರೆ ಎನ್ನುವ ಸಂಗತಿ ಎಲ್ಲರಿಗೂ ಗೊತ್ತು. ಬೆಳ್ಳಿ ತೆರೆಯ ಮೇಲೆ ಸುಂದರ ಹೀರೋ ಆಗಿ ಕಾಣಿಸುವ ರಜನಿಕಾಂತ್‌ ಹೊರಗಡೆ ತಮ್ಮ ಎಂದಿನ ರೂಪದಲ್ಲಿಯೇ ಇರುತ್ತಾರೆ. ತಲೆಯ ಮೇಲೆ ಕೂದಲು ಇರೋದಿಲ್ಲ, ಯಾವುದೇ ಮೇಕಪ್‌ ಮಾಡುವುದಿಲ್ಲ, ಸಿಂಪಲ್‌ ಆಗಿ ಪಂಚೆ ಸುತ್ತಿಕೊಂಡು, ಸಾಧಾರಣ ಅಂಗಿ ಧರಿಸಿ ಇವರು ಹೊರನಡೆದರೆ ಇವರಾ ಸೂಪರ್‌ ಸ್ಟಾರ್‌ ಎಂದು ಸಾಕಷ್ಟು ಜನರು ಅಚ್ಚರಿಪಡಬಹುದು.

ರಜನಿಕಾಂತ್‌ ತಮ್ಮ ಚಿತ್ರ ಸೂಪರ್‌ಹಿಟ್‌ ಆದಾಗ ಹಿಮಾಲಯಕ್ಕೆ ಹೋಗಿ ಬರುವುದು ವಾಡಿಕೆ. ಇತ್ತೀಚೆಗೆ ಜೈಲರ್‌ ಬಿಡುಗಡೆಯಾದ ಸಂದರ್ಭದಲ್ಲೂ ಅವರು ಹಿಮಾಲಯ ಪ್ರವಾಸ ಕೈಗೊಂಡಿದ್ದರು. ಇಲ್ಲಿ ಅವರ ಜೀವನದ ಸ್ವಾರಸ್ಯಕರ ಘಟನೆಗಳಲ್ಲಿ ಒಂದಾದ "ಭಿಕ್ಷುಕನೆಂದು ತಿಳಿದು ರಜನಿಕಾಂತ್‌ಗೆ ಮಹಿಳೆಯೊಬ್ಬರು 10 ರೂಪಾಯಿ ನೀಡಿದ" ವಿಚಾರವನ್ನು ನೆನಪಿಸಿಕೊಳ್ಳೋಣ.

ರಜನಿಕಾಂತ್‌ಗೆ 10 ರೂಪಾಯಿ ಭಿಕ್ಷೆ ನೀಡಿದ ಮಹಿಳೆ

ಹಿಂದೊಮ್ಮೆ ತಮ್ಮ ಸಿನಿಮಾ ಸಕ್ಸಸ್‌ ಆದ ಬಳಿಕ ಶಿವಾಜಿ ರಾವ್‌ ಗಾಯಕ್ವಾಡ್‌ ಅಂದರೆ ರಜನಿಕಾಂತ್‌ ಹಿಮಾಲಯದ ಪ್ರವಾಸದಲ್ಲಿದ್ದರು. ಆ ಸಂದರ್ಭದಲ್ಲಿ ಅವರು ಅಲ್ಲಿನ ದೇವಸ್ಥಾನಕ್ಕೆ ಭೇಟಿ ನೀಡಿದ್ದರು. ದೇವಸ್ಥಾನದ ಕಂಬದ ಬಳಿ ಕುಳಿತಿದ್ದರು. ಅವರು ಎಂದಿನಂತೆ ಸರಳ ಉಡುಗೆ ತೊಟ್ಟಿದ್ದರು. ಮೊದಲ ನೋಟಕ್ಕೆ ಯಾರಿಗೂ ಇದು ಸೂಪರ್‌ಸ್ಟಾರ್‌ ರಜನಿಕಾಂತ್‌ ಎಂದು ತಿಳಿಯುತ್ತಿರಲಿಲ್ಲ. ಆಗ ಆ ದೇವಾಲಯಕ್ಕೆ ಭೇಟಿ ನೀಡಿದ ಮಹಿಳೆಯೊಬ್ಬರು ದೇಗುಲದ ಕಂಬದ ಪಕ್ಕ ಕುಳಿತಿರುವ ಇವರನ್ನು ಭಿಕ್ಷುಕ ಎಂದು ಭಾವಿಸಿದರು.

ಆ ಮಹಿಳೆಯು ರಜನಿಕಾಂತ್‌ ಬಳಿಗೆ ಹೋಗಿ 10 ರೂಪಾಯಿ ಭಿಕ್ಷೆ ನೀಡಿದರು. ಇದು ರಜನಿಕಾಂತ್‌ ಹೇಳಿದ ಕಥೆಯಲ್ಲ. ಅಲ್ಲೇ ದೇವಾಲಯದಲ್ಲಿ ಈ ಘಟನೆಯನ್ನು ನೋಡಿರುವ ಯುವತಿಯೊಬ್ಬರು ಬಹಿರಂಗಪಡಿಸಿದ ಕಥೆ. ಈ ಸಂದರ್ಭದಲ್ಲಿ ತನಗೆ ಭಿಕ್ಷೆ ನೀಡಿದ ಮಹಿಳೆಯನ್ನು ರಜನಿಕಾಂತ್‌ ನೋಡುತ್ತಾರೆ. ಬೇರೆ ಯಾರಾದರೂ ಆಗಿದ್ದರೆ ಕೋಪಗೊಳ್ಳುತ್ತಿದ್ದರು. ಆ ಹತ್ತು ರೂಪಾಯಿ ಸ್ವೀಕರಿಸಿದ ನಟ ಬಳಿಕ ಸ್ವಲ್ಪ ಹೊತ್ತು ಅಲ್ಲಿಯೇ ಕುಳಿತಿದ್ದರು. ಬಳಿಕ ತಮ್ಮ ಕಾರಿನತ್ತ ಹೊರಟರು. ಆಗ ಭಿಕ್ಷೆ ನೀಡಿದ ಮಹಿಳೆಗೆ ಈ ವ್ಯಕ್ತಿ ಭಿಕ್ಷುಕ ಅಲ್ಲ ಎಂದು ತಿಳಿಯಿತು. ಇದು ಸೂಪರ್‌ ಸ್ಟಾರ್‌ ರಜನಿಕಾಂತ್‌ ಎಂದು ತಿಳಿಯಿತು.

ಈ ಸಂದರ್ಭದಲ್ಲಿ ತನ್ನ ತಪ್ಪಿನ ಅರಿವಾದ ಮಹಿಳೆಯು ನೇರವಾಗಿ ಕಾರಿನತ್ತ ಓಡುತ್ತ ಸಾಗಿದ್ದಾರೆ. ರಜನಿಕಾಂತ್‌ ಬಳಿಗೆ ತೆರಳಿ ಕ್ಷಮೆ ಯಾಚಿಸಿದ್ದಾರೆ. ರಜನಿಕಾಂತ್‌ ಅದಕ್ಕೆ ಸಹಜ ನಗುವಿನ ಮೂಲಕವೇ ಪ್ರತಿಕ್ರಿಯೆ ನೀಡಿದ್ದರು. ಇದು ರಜನಿಕಾಂತ್‌ ಸರಳತೆಯನ್ನು ನೆನಪಿಸುವಂತಹ ಸತ್ಯಕತೆ ಎನ್ನಲಾಗಿದೆ.

ಚಂದ್ರಮುಖಿ 3ರಲ್ಲಿ ನಟಿಸಲು ಸೂಪರ್‌ಸ್ಟಾರ್‌ ರಜನಿಕಾಂತ್‌ 3 ಷರತ್ತು

ಚಂದ್ರಮುಖಿ 2 ಎಂಬ ಸೀಕ್ವೆಲ್‌ನಲ್ಲಿ ರಾಘವ ಲಾರೆನ್ಸ್‌ ಮತ್ತು ಕಂಗನಾ ರಣಾವತ್‌ ನಟಿಸಿದ್ದಾರೆ. ಚಂದ್ರಮುಖಿ 3 ನಿರ್ಮಿಸುವ ಸಾಧ್ಯತೆ ಕುರಿತು ನಿರ್ದೇಶಕ ಪಿ ವಾಸು ಅವರು ಹಿಂಟ್‌ ನೀಡಿದ್ದಾರೆ ಎಂದು ಗುಲ್ಟೆ.ಕಾಂ ವರದಿ ಮಾಡಿದೆ. ಮುಂದಿನ ಸೀಕ್ವೆಲ್‌ಗೆ ಚಂದ್ರಮುಖಿ 3 ಎಂದೇ ಹೆಸರಿಡುವ ಸಾಧ್ಯತೆಯಿದೆ. ಆದರೆ, ಚಂದ್ರಮುಖಿ 3ಯಲ್ಲಿ ಸೂಪರ್‌ಸ್ಟಾರ್‌ ರಜನಿಕಾಂತ್‌ ನಟಿಸುವ ಕುರಿತು ಈಗಲೇ ಸ್ಪಷ್ಟವಾಗಿ ತಿಳಿಸಲು ಸಾಧ್ಯವಿಲ್ಲ. ಮೂಲಗಳ ಪ್ರಕಾರ ಕೆಲವೊಂದು ಷರತ್ತುಗಳ ಆಧಾರದಲ್ಲಿ ಅವರು ನಟಿಸಬಹುದು. ಚಂದ್ರಮುಖಿ 3ರಲ್ಲಿ ನಟಿಸಲು ಸೂಪರ್‌ಸ್ಟಾರ್‌ ರಜನಿಕಾಂತ್‌ ಕೆಲವೊಂದು ಕಂಡಿಷನ್‌ಗಳನ್ನು ಹಾಕಿದ್ದಾರೆ ಎನ್ನಲಾಗುತ್ತಿದೆ. ಈ ಕುರಿತ ವರದಿ ಇಲ್ಲಿದೆ ಓದಿ.