ಒಟಿಟಿಗೆ ಬಂತು ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಬಿ, ಮನೆಯಲ್ಲೇ ನೋಡಿ ಮನು- ಪ್ರಿಯಾ ಪ್ರೇಮಕಥೆ
Sapta Sagaradaache ello Side B OTT: ರಕ್ಷಿತ್‌ ಶೆಟ್ಟಿ- ರುಕ್ಮಿಣಿ ವಸಂತ್‌ ಅಭಿನಯದ ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಬಿ ಅಮೆಜಾನ್‌ ಪ್ರೈಮ್‌ನಲ್ಲಿ ಸ್ಟ್ರೀಮ್‌ ಆಗುತ್ತಿದೆ. ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಎಯ ಮುಂದುವರೆದ ಭಾಗದಲ್ಲಿ ಮನು ರುಕ್ಮಿಣಿ ಪ್ರೇಮಕಥೆ ಯಾವ ದಡಕ್ಕೆ ತಲುಪುತ್ತದೆ ಎಂಬ ವಿವರ ಪಡೆಯಬಹುದು.
ಬೆಂಗಳೂರು: ಒಟಿಟಿ ಸಿನಿಮಾ ಪ್ರಿಯರು ಬಹುನಿರೀಕ್ಷೆಯಿಂದ ಕಾಯುತ್ತಿದ್ದ ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಬಿ ಇದೀಗ ಒಟಿಟಿಯಲ್ಲಿ ಬಿಡುಗಡೆಯಾಗಿದೆ. ರಕ್ಷಿತ್‌ ಶೆಟ್ಟಿ- ರುಕ್ಮಿಣಿ ವಸಂತ್‌ ಅಭಿನಯದ ಮನು ಮತ್ತು ರುಕ್ಮಿಣಿ ಪ್ರೇಮಕಥೆಯನ್ನು ಈಗ ಮನೆಯಲ್ಲಿಯೇ ನೋಡಬಹುದು. ಅಮೆಜಾನ್‌ ಪ್ರೈಮ್‌ನಲ್ಲಿ ಗಣರಾಜ್ಯೋತ್ಸವದ ಸಮಯದಲ್ಲಿ ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಬಿ ಸ್ಟ್ರೀಮಿಂಗ್‌ ಆಗುತ್ತಿದೆ.
ಹೇಮಂತ್‌ ಎಂ ರಾವ್‌ ನಿರ್ದೇಶನದ ಸಪ್ತ ಸಾಗರದಾಚೆ ಎಲ್ಲೋ ಸಿನಿಮಾದ ಎರಡನೇ ಭಾಗವು ಚಿತ್ರಮಂದಿರಗಳಲ್ಲಿ ನವೆಂಬರ್‌ 17ಕ್ಕೆ ಬಿಡುಗಡೆಯಾಗಬೇಕಿತ್ತು. ಆದರೆ, ಬಳಿಕ ಇದು ಅಕ್ಟೋಬರ್‌ 20ರಂದು ಬಿಡುಗಡೆ ಮಾಡಲು ನಿರ್ಧರಿಸಲಾಗಿತ್ತು. ಬಳಿಕ ಅಕ್ಟೋಬರ್‌ 27ರಂದು ಬಿಡುಗಡೆ ಮಾಡಲಾಗಿತ್ತು. ಚಿತ್ರಮಂದಿರದಿಂದ ಒಟಿಟಿಗೆ ಯಾವಾಗ ಬರುತ್ತದೆ ಎಂದು ಸಾಕಷ್ಟು ಜನರು ಚಾತಕಪಕ್ಷಿಯಂತೆ ಕಾಯುತ್ತಿದ್ದರು.
ಒಟಿಟಿ ಜತೆ ಬಿಸ್ನೆಸ್‌ ಡೀಲ್‌ ಸರಿಯಾಗಿ ಆಗಲಿಲ್ಲವೋ ಅಥವಾ ಇತರೆ ಕಾರಣದಿಂದ ಅಮೆಜಾನ್‌ ಪ್ರೈಮ್‌ಗೆ 2 ತಿಂಗಳಾದರೂ ಸೈಡ್‌ ಬಿ ಆಗಮಿಸಿರಲಿಲ್ಲ. ಇದೀಗ ಜನವರಿ 25ರಂದು ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಬಿ ಆಗಮಿಸಿದೆ. ಈ ಗಣರಾಜ್ಯೋತ್ಸವದ ರಜಾ ದಿನದಲ್ಲಿ ಅಥವಾ ವೀಕೆಂಡ್‌ನಲ್ಲಿ ಮನೆಯಲ್ಲಿ ಅಥವಾ ಎಲ್ಲಿ ಬೇಕಾದರೂ ಒಟಿಟಿಯಲ್ಲಿ ಈ ಸಿನಿಮಾ ನೋಡಬಹುದು.
ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಬಿ ಬಿಡುಗಡೆ ಕುರಿತು ಸಾಕಷ್ಟು ಗೊಂದಲಗಳು ಇದ್ದವು. ರಕ್ಷಿತ್‌ ಶೆಟ್ಟಿ ಈ ಸಿನಿಮಾವನ್ನು ಆರಂಭದಲ್ಲಿ ರೆಂಟಲ್‌ಗೆ ಬಿಡುಗಡೆ ಮಾಡಬಹುದು ಎಂಬ ಗುಸುಗುಸು ಇದ್ದವು. ಅಮೆಜಾನ್‌ ಪ್ರೈಮ್‌ ವಿಡಿಯೋ ಬದಲು ಝೀ 5ನಲ್ಲಿ ಬಿಡುಗಡೆ ಮಾಡಬಹುದು ಎಂದುಕೊಳ್ಳಲಾಗಿತ್ತು. ಆದರೆ, ಇಂತಹ ಗೊಂದಲಗಳು ನಿವಾರಣೆಯಾಗಿದ್ದು, ಅಕ್ಟೋಬರ್‌ 25ರಂದು ಅಮೆಜಾನ್‌ ಪ್ರೈಮ್‌ನಲ್ಲಿ ಬಿಡುಗಡೆಯಾಗಿದೆ.
ಹೇಮಂತ್‌ ರಾವ್‌ ನಿರ್ದೇಶನದ ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಬಿ ಸಿನಿಮಾದ ಕುರಿತು ಸಾಕಷ್ಟು ಜನರಿಗೆ ಕುತೂಹಲವಿದೆ. ಸೈಡ್‌ ಎ ನೋಡಿದವರಂತೂ ಸೈಡ್‌ ಬಿ ನೋಡಲು ಕಾಯುತ್ತಿದ್ದಾರೆ. ಸಾಕಷ್ಟು ಜನರು ಥಿಯೇಟರ್‌ನಲ್ಲಿ ನೋಡಿ ಕುತೂಹಲ ತಣಿಸಿಕೊಂಡಿರಬಹುದು. ಆದರೆ, ಥಿಯೇಟರ್‌ನಲ್ಲಿ ನೋಡಲಾಗದೆ ಇರುವವರು ಇದೀಗ ಒಟಿಟಿಯಲ್ಲಿ ನೋಡಬಹುದು. ಈ ಚಿತ್ರದಲ್ಲಿ ದಕ್ಷಿಣ ಭಾರತದ ಸೂಪರ್‌ಸ್ಟಾರ್‌ ರಕ್ಷಿತ್‌ ಶೆಟ್ಟಿ ಅಭಿನಯಸಿದ್ದಾರೆ. ರುಕ್ಮಿಣಿ ವಸಂತ್‌, ಚೈತ್ರಾ ಜೆ ಆಚಾರ್‌ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.
ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಎಯಲ್ಲಿ ಮನು ಮತ್ತು ಪ್ರಿಯರ ಪ್ರೇಮಕಥೆ ಸಿನಿಪ್ರೇಕ್ಷಕರ ಕಣ್ಣಂಚಿನಲ್ಲಿ ನೀರು ತಂದಿತ್ತು. ಮನು ಜೈಲಿನಲ್ಲಿಯೇ ಉಳಿದರೆ, ಪ್ರಿಯಾ ಬೇರೆಯವನ ಮದುವೆಯಾಗಿ ಜೀವನ ಮುಂದುವರಿಸಿದ್ದಳು. ಇದರ ಕಥೆ ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಬಿಯಲ್ಲಿ ಮುಂದುವರೆದಿದೆ. ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಎನಲ್ಲಿ ಆರು ಹಾಡುಗಳು ಕಾಡಿದ್ದವು. ಸಪ್ತ ಸಾಗರದಾಚೆ ಎಲ್ಲೋ ಸೈಡ್‌ ಬಿಯ ಹಾಡುಗಳೂ ಕಾಡುತ್ತಿವೆ. ಕಡಲನು ಕಾನಾ ಹೊರಟಿರೊ ಹಾಡಂತೂ ಸಾಕಷ್ಟು ವೈರಲ್‌ ಆಗಿದೆ. ಈ ಹಾಡಿನ ಕನ್ನಡ ಲಿರಿಕ್ಸ್‌ ಇಲ್ಲಿದೆ.
