ಕಾಂತಾರ ಪ್ರೀಕ್ವೆಲ್‌ನಲ್ಲಿ ನನಗೂ ಛಾನ್ಸ್‌ ಕೊಡಿ ಎಂದ ಖ್ಯಾತ ನಟಿ; ಸ್ವಲ್ಪನೂ ಅಹಂ ಇಲ್ಲದ ಪ್ರತಿಭಾನ್ವಿತೆಯ ಬೇಡಿಕೆಗೆ ಕರಗಿದ್ರು ಫ್ಯಾನ್ಸ್‌
Kantara prequel audition: ಕಾಂತಾರ ಸಿನಿಮಾಕ್ಕೆ ಕಲಾವಿದರು ಬೇಕಾಗಿದ್ದಾರೆ ಎಂದು ರಿಷಬ್‌ ಶೆಟ್ಟಿ ಈಗಾಗಲೇ ಪ್ರಕಟಣೆ ಹೊರಡಿಸಿದ್ದಾರೆ. ಈ ಸಿನಿಮಾದ ಅಡಿಷನ್‌ನಲ್ಲಿ ಪಾಲ್ಗೊಳ್ಳಲು ಬಯಸುವುದಾಗಿ ಮಂಗಳವಾರಂ ನಟಿ ಪಾಯಲ್‌ ರಜಪೂತ್‌ ಹೇಳಿದ್ದಾರೆ.
ಕಾಂತಾರ ಪ್ರೀಕ್ವೆಲ್‌ಗೆ ಕಲಾವಿದರು ಬೇಕಾಗಿದ್ದಾರೆ ಎಂದು ರಿಷಬ್‌ ಶೆಟ್ಟಿ ಈಗಾಗಲೇ ಪ್ರಕಟಣೆ ಹೊರಡಿಸಿದ್ದು, ಭಾರತದ ಸಾಕಷ್ಟು ಕಲಾವಿದರು ಆನ್‌ಲೈನ್‌ ಮೂಲಕ ಅರ್ಜಿ ಸಲ್ಲಿಸುತ್ತಿದ್ದಾರೆ. ಕಾಂತಾರ ಚಾಪ್ಟರ್‌ 1ರಲ್ಲಿ ನಟಿಸುವ ಆಸಕ್ತಿಯನ್ನು ಪ್ಯಾನ್‌ ಇಂಡಿಯಾ ಸಿನಿಮಾ ಮಂಗಳವಾರಂನಲ್ಲಿ ನಟಿಸಿದ್ದ ಪಾಯಲ್‌ ರಜಪೂತ್‌ ವ್ಯಕ್ತಪಡಿಸಿದ್ದಾರೆ. ಮಂಗಳವಾರಂ ಸಿನಿಮಾದಲ್ಲಿ ಇವರು ಹಾರರ್‌ ಮತ್ತು ಮಾದಕ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದರು.
ಕಾಂತಾರ ಸಿನಿಮಾಕ್ಕೆ ಕಲಾವಿದರು ಬೇಕಾಗಿದ್ದಾರೆ ಎಂಬ ಪ್ರಕಟಣೆಗೆ ಮಾರುತ್ತರವಾಗಿ ಪಾಯಲ್‌ ರಜಪೂತ್‌ ಅವರು ಟ್ವೀಟ್‌ ಮಾಡಿದ್ದಾರೆ. "30ರಿಂದ 60 ವರ್ಷ ವಯಸ್ಸಿನ ಪುರುಷರು ಬೇಕಾಗಿದ್ದಾರೆ. 18ರಿಂದ 60 ವರ್ಷ ವಯಸ್ಸಿನ ಮಹಿಳೆಯರು ಬೇಕಾಗಿದ್ದಾರೆ" ಎಂದು ರಿಷಬ್‌ ಶೆಟ್ಟಿ ಟ್ವೀಟ್‌ ಮಾಡಿದ್ದರು. ಇದಕ್ಕೆ ಪ್ರತಿಯಾಗಿ ಪಾಯಲ್‌ ಟ್ವೀಟ್‌ ಮಾಡಿದ್ದಾರೆ.
ಕಾಂತಾರದಲ್ಲಿ ಅವಕಾಶ ಕೊಡಿ ಎಂದ ಪಾಯಲ್‌
ರಿಷಬ್‌ ಶೆಟ್ಟಿ ಮತ್ತು ಹೊಂಬಾಳೆ ಫಿಲ್ಮ್ಸ್‌ ಟ್ವಿಟ್ಟರ್‌ ಹ್ಯಾಂಡಲ್‌ಗೆ ಟ್ಯಾಗ್‌ ಮಾಡಿರುವ ಪಾಯಲ್‌ ರಜಪೂತ್‌ ಅವರು ಈ ರೀತಿ ವಿನಂತಿ ಮಾಡಿದ್ದಾರೆ. "ಕಾಂತಾರ ಚಾಪ್ಟರ್‌ 1ಕ್ಕೆ ಅಡಿಷನ್‌ ಆರಂಭವಾಗುತ್ತಿರುವುದಾಗಿ ನನಗೆ ತಿಳಿಯಿತು. ಈ ಪ್ರಾಜೆಕ್ಟ್‌ಗೆ ಕೊಡುಗೆ ನೀಡಲು ನಾನು ಆಸಕ್ತಿ ಹೊಂದಿದ್ದೇನೆ. ನಾನು ಇತ್ತೀಚೆಗೆ ಮಂಗಳವಾರಂ ಸಿನಿಮಾದಲ್ಲಿ ನಟಿಸಿದ್ದೇನೆ. ಈ ಸಿನಿಮಾದಲ್ಲಿ ನನ್ನ ನಟನೆಗೆ ಸಾಕಷ್ಟು ಮೆಚ್ಚುಗೆ ವ್ಯಕ್ತವಾಗಿದೆ. ನೀವು ಈ ಸಿನಿಮಾ ನೋಡಲು ಕೊಂಚ ಸಮಯ ಮಾಡಿಕೊಂಡರೆ ನನಗೆ ಖುಷಿಯಾಗುತ್ತದೆ. ಈ ಪ್ರಾಜೆಕ್ಟ್‌ಗೆ ಅಡಿಷನ್‌ ಪ್ರಕ್ರಿಯೆ ಕುರಿತು ನನಗೆ ಸಲಹೆ ನೀಡಿ. ಈ ಸಿನಿಮಾದಲ್ಲಿ ನಟಿಸುವಂತೆ ನನ್ನನ್ನು ಪ್ರೋತ್ಸಾಹಿಸಿದ ಅಭಿಮಾನಿಗಳಿಗೆ ಮತ್ತು ನನ್ನ ಹೆಸರನ್ನು ಸೂಚಿಸುತ್ತಿರುವ ಅಭಿಮಾನಿಗಳಿಗೆ ಚಿರಋಣಿ" ಎಂದು ಪಾಯಲ್‌ ರಜಪೂತ್‌ ಟ್ವೀಟ್‌ ಮಾಡಿದ್ದಾರೆ.
ಪಾಯಲ್‌ ಬೇಡಿಕೆಗೆ ಅಭಿಮಾನಿಗಳ ಪ್ರತಿಕ್ರಿಯೆ
"ಈ ನಟಿ ಎಷ್ಟು ಡೌನ್‌ ಟು ಅರ್ಥ್‌ ಇದ್ದಾರೆ. ಕೊಂಚ ಕೂಡ ಆಹಂಕಾರ ಇಲ್ಲ. ದಯವಿಟ್ಟು ಈ ನಟಿಗೆ ಅವಕಾಶ ಕೊಡಿ" ಎಂದು ಶಾಲೂ ಎಂಬವರು ರಿಷಬ್‌ ಶೆಟ್ಟಿಗೆ ಟ್ಯಾಗ್‌ ಮಾಡಿದ್ದಾರೆ. "ಯೋಚಿಸಬೇಡಿ ಮೇಡಂ, ನಿಮಗೆ ಪ್ರಭಾಸ್‌ ಸಿನಿಮಾದಲ್ಲೂ ಅವಕಾಶ ದೊರಕಲಿದೆ" ಎಂದು ಚರಣ್‌ ವರ್ಮಾ ಎಂಬವರು ಮಾರುತ್ತರ ನೀಡಿದ್ದಾರೆ. "ದಯವಿಟ್ಟು ಇವರಿಗೆ ಅವಕಾಶ ನೀಡಿ, ಇವರು ಅದ್ಭುತ ಪ್ರತಿಭೆ ಹೊಂದಿದ್ದಾರೆ" "ಶುಭವಾಗಲಿ" "ಇವರು ತಮ್ಮ ಪ್ರತಿಭೆಯನ್ನು ಮಂಗಳವಾರಂ ಸಿನಿಮಾದಲ್ಲಿ ತೋರಿಸಿದ್ದಾರೆ. ಪ್ರಭಾಸ್‌ ಅಭಿಮಾನಿಗಳಾದ ನಾವೆಲ್ಲರೂ ಇವರಿಗೆ ಅವಕಾಶ ನೀಡಬೇಕೆಂದು ಹೊಂಬಾಳೆ ಫಿಲ್ಮ್ಸ್‌ನಲ್ಲಿ ವಿನಂತಿಸುತ್ತಿದ್ದೇವೆ" ಇತ್ಯಾದಿ ನೂರಾರು ಕಾಮೆಂಟ್‌ಗಳು ಬಂದಿವೆ.
ಸಾಕಷ್ಟು ಜನರು ಪಾಯಲ್‌ ಮತ್ತು ಹೊಂಬಾಳೆ ಫಿಲ್ಮ್ಸ್‌ನ ಕಲಾವಿದರು ಬೇಕಾಗಿದ್ದಾರೆ ಎಂಬ ಫೋಟೋಗಳನ್ನು ಜೋಡಿಸಿ ಶೇರ್‌ ಮಾಡುತ್ತಿದ್ದಾರೆ. ಮಂಗಳವಾರಂ ಸಿನಿಮಾದಲ್ಲಿ ತೆಲುಗು ಪ್ರೇಕ್ಷಕರ ಮನಗೆದ್ದ ಪಾಯಲ್‌ ರಜಪೂತ್‌ಗೆ ಕಾಂತಾರದಲ್ಲೂ ಅವಕಾಶ ದೊರಕಲಿ ಎಂದು ಸಾಕಷ್ಟು ಜನರು ಹಾರೈಸಿದ್ದಾರೆ.
