ಕೋರ್ಟ್ ಮೆಟ್ಟಿಲೇರಿದ ರಾಧಿಕಾ ಪಂಡಿತ್‌, ಆಬ್ಜೆಕ್ಷನ್‌ ಎಂದು ಅಬ್ಬರಿಸಿದ ಯಶ್, ತಗಡಿಗೂ ಚಿನ್ನಕ್ಕೂ ವ್ಯತ್ಯಾಸ ಇದೆ ಎಂದ ರಾಕಿಂಗ್‌ ಸ್ಟಾರ್‌
Rocking Star Yash and Radhika Pandit: ಕನ್ನಡ ನಟಿ ರಾಧಿಕಾ ಪಂಡಿತ್‌ ಮತ್ತು ಯಶ್ ನಟನೆಯ ಜಾಹೀರಾತೊಂದು ಸೋಷಿಯಲ್‌ ಮೀಡಿಯಾದಲ್ಲಿ ವೈರಲ್‌ ಆಗಿದೆ. ಸೂರ್ಯಕಾಂತಿ ಉತ್ಪನ್ನವೊಂದರಲ್ಲಿ ಮೋಸ ಹೋದ ಗ್ರಾಹಕಿಯ ಪಾತ್ರದಲ್ಲಿ ರಾಧಿಕಾ ಪಂಡಿತ್‌ ನಟನಿಸಿದ್ದಾರೆ. ಮತ್ತೆ ರಾಧಿಕಾ ಪಂಡಿತ್‌ ನಟನೆಯತ್ತ ಮುಖ ಮಾಡುವ ಸೂಚನೆ ಇದಾಗಿರಬಹುದೇ?
Rocking Star Yash and Radhika Pandit: ಕನ್ನಡದ ಪ್ರತಿಭಾನ್ವಿತ ನಟಿ ರಾಧಿಕಾ ಪಂಡಿತ್‌ ಅವರನ್ನು ತೆರೆಮೇಲೆ ನೋಡದೆ ಸಾಕಷ್ಟು ಸಮಯವಾಗಿದೆ. ಯಶ್ ಜತೆ ಸಪ್ತಪದಿ ತುಳಿದ ಬಳಿಕ ಯಾಕೋ ಇವರು ಶೂಟಿಂಗ್‌ನಿಂದ ದೂರ ಉಳಿದಿದ್ದರು. ಒಂದೆಡೆ ಯಶ್ ಯಶಸ್ಸು ಮುಗಿಲೆತ್ತರಕ್ಕೆ ವ್ಯಾಪಿಸುತ್ತಿದ್ದರೆ, ರಾಧಿಕಾ ಪಂಡಿತ್‌ ತನ್ನ ಮಕ್ಕಳು, ಪತಿ ಜತೆ ಹ್ಯಾಪಿಯಾಗಿ ಇದ್ದಾರೆ. ಇಬ್ಬರೂ ನಟಿಸಿದರೆ ಮಕ್ಕಳ ಕಾಳಜಿ ವಹಿಸುವುದು ಕಷ್ಟವಾಗಬಹುದು, ಕುಟುಂಬಕ್ಕೆ ಸಮಯ ನೀಡಲು ಕಷ್ಟವಾಗಬಹುದು ಎಂಬ ಕಾರಣ ಇದರ ಹಿಂದೆ ಇರಬಹುದು. ಬೇರೆಯೂ ಕಾರಣ ಇರಬಹುದು. ಹೀಗಿದ್ದರೂ ರಾಧಿಕಾ ಪಂಡಿತ್‌ ಅಭಿಮಾನಿಗಳು ಇವರ ಅಭಿನಯ ನೋಡಲು ಕಾಯುತ್ತಿರುವುದು ಸುಳ್ಳಲ್ಲ.
ಮತ್ತೆ ನಟನೆಗಿಳಿದ ರಾಧಿಕಾ ಪಂಡಿತ್‌
ಹೌದು, ರಾಧಿಕಾ ಪಂಡಿತ್‌ ಮತ್ತೆ ಆಕ್ಟಿಂಗ್‌ ಮಾಡಿದ್ದಾರೆ. ಅದು ಕೋರ್ಟ್ ದೃಶ್ಯ. ಇಲ್ಲಿ ಇವರು ಕಳಪೆ ಪ್ರಾಡಕ್ಟ್‌ವೊಂದರ ವಿರುದ್ಧ ಕೋರ್ಟ್ ಮೆಟ್ಟಿಲೇರಿದ್ದಾರೆ. ಇವರ ಪರವಾಗಿ ವಾದ ಮಾಡಲು ಬಂದವರು ಬೇರಾರು ಅಲ್ಲ. ಕೆಜಿಎಫ್‌ ಮೂಲಕ ದೇಶ-ವಿದೇಶದ ಚಿತ್ರರಂಗದ ಗಮನ ಸೆಳೆದ ರಾಕಿಂಗ್‌ ಸ್ಟಾರ್‌ ಯಶ್. ಕೋರ್ಟ್‌ನಲ್ಲಿ "ಆಬ್ಜೆಕ್ಷನ್‌ ಯುವರ್‌ ಆನರ್‌" ಎಂದು ಯಶ್ ಅಬ್ಬರಿಸುತ್ತಾರೆ. "ಇವರು ಸೂರ್ಯಕಾಂತಿಯ ಉತ್ಪನ್ನ ಕೇಳಿದ್ರು, ಈ ಕಂಪನಿಯವರು ಅದನ್ನೇ ಕೊಟ್ಟಿದ್ದಾರೆ" ಎಂದು ನ್ಯಾಯಾಧೀಶರು ಹೇಳುತ್ತಾರೆ. "ಮೈ ಲಾರ್ಡ್‌ ನನ್ನ ಕ್ಲಯೆಂಟ್‌ ಕೇಳಿದ್ದು ಪ್ಯೂರ್‌ ಸೂರ್ಯಕಾಂತಿ ಪ್ರಾಡಕ್ಟ್‌. ಆದರೆ, ಇವರು ನೀಡಿದ್ದು" ಎಂದು ಯಶ್ ಹೇಳಿದಾಗ ರಾಧಿಕಾ ಪಂಡಿತ್‌ ಡಬ್ಬಾ ಡಕೋಟಾ ಪ್ರಾಡಕ್ಟ್‌" ಎನ್ನುತ್ತಾರೆ. "ನಮ್ಮ ಪ್ರಾಡಕ್ಟ್‌ ಕವರ್‌ನಲ್ಲೂ ಸೂರ್ಯಕಾಂತಿ ಚಿತ್ರ ಇದೆ, ಅದಕ್ಕೂ ಇದಕ್ಕೂ ಏನಿದೆ ವ್ಯತ್ಯಾಸ" ಎಂದು ಮತ್ತೊಬ್ಬರು ವಾದಿಸುತ್ತಾರೆ. "ವ್ಯತ್ಯಾಸ ಇದೆ ಯುವರ್‌ ಆನರ್‌, ಸತ್ಯಕ್ಕೂ ಸುಳ್ಳಿಗೂ ಇರುವ ವ್ಯತ್ಯಾಸ. ಕಳ್ಳನಿಗೂ ಪೊಲೀಸ್‌ಗೂ ಇರುವ ವ್ಯತ್ಯಾಸ, ತಗಡಿಗೂ ಚಿನ್ನಕ್ಕೂ ಇರುವ ವ್ಯತ್ಯಾಸ" ಎಂದು ಯಶ್ ಹೇಳುತ್ತಾರೆ. ರಾಧಿಕಾ ಪಂಡಿತ್‌ ಕೂಡ "ಡೂಪ್ಲಿಕೇಟ್‌ಗೂ.. ಹೀರೋಗೂ ಇರುವ ವ್ಯತ್ಯಾಸ" ಎಂದು ಹೇಳುತ್ತಾರೆ.
ಸದ್ಯ ರಾಧಿಕಾ ಪಂಡಿತ್‌ ಬಣ್ಣ ಹಚ್ಚಿದ್ದು ಜಾಹೀರಾತಿಗಾದರೂ ಅಭಿಮಾನಿಗಳು ಖುಷಿಯಾಗಿದ್ದಾರೆ. ಈ ರೂಪದಲ್ಲಿಯಾದರೂ ತಮ್ಮ ಮೆಚ್ಚಿನ ನಟಿಯನ್ನು ನೋಡಲಾಯ್ತಲ್ವ ಎಂದು ಖುಷಿ ವ್ಯಕ್ತಪಡಿಸಿದ್ದಾರೆ. "ನಮ್ಮ ಯಶ್ ಬಾಸ್ ಹಾಗೂ ನಮ್ಮ ಅತ್ತಿಗೆ" ಎಂದೆಲ್ಲ ಫ್ಯಾನ್ಸ್‌ ಕಾಮೆಂಟ್‌ ಮಾಡಿದ್ದಾರೆ.
ರಾಧಿಕಾ ಪಂಡಿತ್‌ ಸಿನಿ ಜಗತ್ತು
ರಾಧಿಕಾ ಪಂಡಿತ್‌ ಒಂದು ಸಮಯದಲ್ಲಿ ಕನ್ನಡದ ಜನಪ್ರಿಯ ನಟಿಯಾಗಿ ಅಪಾರ ಅಭಿಮಾನಿಗಳ ಪ್ರೀತಿ ಪಡೆದಿದ್ದರು. ಮೂರು ಫಿಲ್ಮ್‌ಫೆರ್‌ ಅವಾರ್ಡ್‌ ಸೌತ್‌, ಒಂದು ಕರ್ನಾಟಕ ರಾಜ್ಯ ಸಿನಿಮಾ ಪ್ರಶಸ್ತಿ, ಒಂದು ಸೌತ್‌ ಇಂಡಿಯನ್‌ ಇಂಟರ್‌ನ್ಯಾಷನಲ್‌ ಮೂವಿ ಅವಾರ್ಡ್‌ ಪಡೆದಿದ್ದರು. ನಂದಗೋಕುಲ, ಸುಮಂಗಲಿ ಸೀರಿಯಲ್‌ಗಳಲ್ಲಿ ನಟಿಸಿದ ಬಳಿಕ ಇವರು 2008ರಲ್ಲಿ ಮೊಗ್ಗಿನ ಮನಸು ಮೂಲಕ ಕನ್ನಡ ಚಿತ್ರರಂಗಕ್ಕೆ ಪ್ರವೇಶಿಸಿದರು. ಈ ಸಿನಿಮಾದ ನಟನೆಗೆ ಇವರಿಗೆ ಕರ್ನಾಟಕ ರಾಜ್ಯ ಸಿನಿಮಾ ಪ್ರಶಸ್ತಿ "ಅತ್ಯುತ್ತಮ ನಟಿ", ಕನ್ನಡ ಅತ್ಯುತ್ತಮ ನಟಿ ಫಿಲ್ಮ್‌ಫೇರ್‌ ಅವರ್ಡ್‌ ದೊರಕಿತ್ತು. ಇದಾದ ಬಳಿಕ ಲವ್‌ ಗುರು ಮತ್ತು ಕೃಷ್ಣನ್‌ ಲವ್‌ ಸ್ಟೋರಿ ಸಿನಿಮಾದ ನಟನೆಗೂ ಇವರಿಗೆ ಎರಡು ಬಾರಿ ಫಿಲ್ಮ್‌ಫೇರ್‌ ಅತ್ಯುತ್ತಮ ನಟಿ ಪ್ರಶಸ್ತಿ ದೊರಕಿತ್ತು.
ಮತ್ತೆ ನಟಿಸ್ತಾರ ರಾಧಿಕಾ ಪಂಡಿತ್‌?
ಇದಾದ ಬಳಿಕ ಹುಡುಗರು, ಅದ್ಧೂರಿ, ಡ್ರಾಮಾ, ಬಹದ್ಧೂರ್‌, ಮಿಸ್ಟರ್‌ ಆಂಡ್‌ ಮಿಸ್ಸೆಸ್‌ ರಾಮಚಾರಿ, ದೊಡ್ಮನೆ ಹುಡುಗ, ಆದಿ ಲಕ್ಷ್ಮಿ ಪುರಾಣ ಮಮುಂತಾದ ಸಿನಿಮಾಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಮಿಸ್ಟರ್‌ ಆಂಡ್‌ ಮಿಸ್ಸೆಸ್‌ ರಾಮಚಾರಿ ಸಿನಿಮಾದ ನಟನೆಗೆ ಸೈಮಾ ಅವಾರ್ಡ್‌ ಅತ್ಯುತ್ತಮ ನಟಿ- ಕನ್ನಡ ಪ್ರಶಸ್ತಿ ಪಡೆದಿದ್ದರು. ಆದಿ ಲಕ್ಷ್ಮಿ ಪುರಾಣದ ಬಳಿಕ ಇವರು ಯಾವುದೇ ಸಿನಿಮಾಗಳಲ್ಲಿ ಕಾಣಿಸಿಕೊಂಡಿರಲಿಲ್ಲ. ಯಶ್ ಜತೆ ವಿವಾಹವಾದ ಬಳಿಕ ಇವರು ನಟನೆಯಿಂದ ದೂರ ಉಳಿದಿದ್ದರು. ಇದೀಗ ಸೂರ್ಯಕಾಂತಿ ವಿಷಯದಲ್ಲಿ ಕೋರ್ಟ್ ಮೆಟ್ಟಿಲೇರಿದ್ದಾರೆ. ಇವರಿಗೆ ಯಶ್ ಸಾಥ್‌ ನೀಡಿದ್ದಾರೆ. ಮುಂದಿನ ದಿನಗಳಲ್ಲಿ ಇವರು ಮತ್ತೆ ನಟನೆಗೆ ಮುಂದಾಗುವ ಸೂಚನೆ ಇದಾಗಿರುವುದೇ ಎಂಬ ಕುತೂಹಲ ಮೂಡಿದೆ.
