ರಾಮ್‌ ಚರಣ್‌ ಮುಂದಿನ ಸಿನಿಮಾದಲ್ಲಿ ಹ್ಯಾಟ್ರಿಕ್‌ ಹೀರೋ ಶಿವರಾಜ್‌ ಕುಮಾರ್‌ಗೆ ಪ್ರಮುಖ ಪಾತ್ರ; ಟಾಲಿವುಡ್‌ನಿಂದಲೂ ಶಿವಣ್ಣನಿಗೆ ಬೇಡಿಕೆ
ಜೈಲರ್‌ ಸಿನಿಮಾದ ನಟನೆ ಮೂಲಕ ದೇಶದ ಗಮನ ಸೆಳೆದ ಕರುನಾಡ ಚಕ್ರವರ್ತಿ ಶಿವರಾಜ್‌ ಕುಮಾರ್‌ಗೆ ತೆಲುಗು ಚಿತ್ರರಂಗದಿಂದಲೂ ಬೇಡಿಕೆ ಬಂದಿದೆ. ರಾಮ್‌ ಚರಣ್‌ ಮುಂದಿನ ಚಿತ್ರದಲ್ಲಿ ಪ್ರಮುಖ ಪಾತ್ರವೊಂದರಲ್ಲಿ ನಟಿಸುವ ಕುರಿತು ಚಿತ್ರತಂಡ ಮಾತುಕತೆ ನಡೆಸಿದೆ ಎಂದು ಸ್ವತಃ ಶಿವಣ್ಣ ಖಚಿತಪಡಿಸಿದ್ದಾರೆ.
ಬೆಂಗಳೂರು: ಇತ್ತೀಚೆಗೆ ಜೈಲರ್‌ ಸಿನಿಮಾದಲ್ಲಿ ಕೆಲವೇ ನಿಮಿಷಗಳ ಪಾತ್ರದಲ್ಲಿ ಪ್ಯಾನ್‌ ಇಂಡಿಯಾ ಪ್ರೇಕ್ಷಕರ ಗಮನ ಸೆಳೆದಿದ್ದ ಕರುನಾಡ ಚಕ್ರವರ್ತಿ ಶಿವರಾಜ್‌ ಕುಮಾರ್‌ಗೆ ಇದೀಗ ಟಾಲಿವುಡ್‌ನಿಂದಲೂ ಬೇಡಿಕೆ ಬಂದಿದೆ. ಮಗಧೀರ ಹೀರೋ ರಾಮ್‌ ಚರಣ್‌ ಸಿನಿಮಾದಲ್ಲಿ ಶಿವಣ್ಣನಿಗೆ ಪ್ರಮುಖ ಪಾತ್ರವೊಂದು ದೊರಕಿರುವುದು ಖಚಿತವಾಗಿದೆ. ಸ್ವತಃ ಈ ಕುರಿತು ಸಂದರ್ಶನವೊಂದರಲ್ಲಿ ಶಿವ ರಾಜ್‌ಕುಮಾರ್‌ ಖಚಿತಪಡಿಸಿದ್ದಾರೆ. ಎಲ್ಲಾದರೂ ಕೊನೆ ಕ್ಷಣದಲ್ಲಿ ಎಲ್ಲಾದರೂ ಬದಲಾವಣೆಯಾದರೆ ಅಭಿಮಾನಿಗಳಿಗೆ ನಿರಾಶೆಯಾಗುವುದು ಬೇಡವೆಂದು ಸದ್ಯಕ್ಕೆ ಈ ಕುರಿತು ಹೆಚ್ಚಿನ ವಿವರವನ್ನು ಅವರು ನೀಡಿಲ್ಲ.
ರಾಮ್‌ ಚರಣ್‌ ಸದ್ಯ ಗೇಮ್‌ ಚೇಂಜರ್‌ ಸಿನಿಮಾದ ಶೂಟಿಂಗ್‌ನಲ್ಲಿ ನಿರತರಾಗಿದ್ದಾರೆ. ಇದು ಎಸ್‌. ಶಂಕರ್‌ ನಿರ್ದೇಶನದ ಸಿನಿಮಾ. ಈ ಸಿನಿಮಾದ ಮೂಲಕ ಶಂಕರ್‌ ಮೊದಲ ತೆಲುಗು ಸಿನಿಮಾ ನಿರ್ದೇಶನಕ್ಕೆ ಕೈ ಹಾಕುತ್ತಿದ್ದಾರೆ. ಇವರು ತಮಿಳು ಚಿತ್ರರಂಗದ ಜನಪ್ರಿಯ ಚಿತ್ರ ನಿರ್ದೇಶಕ. ಗೇಮ್‌ ಚೇಂಜರ್‌ ಸಂಪೂರ್ಣಗೊಂಡು ಬಿಡುಗಡೆಯಾದ ಬಳಿಕ ಆರ್‌ಆರ್‌ಆರ್‌ ನಟ ರಾಮ್‌ ಚರಣ್‌ ಅವರು ಬುಚ್ಚಿ ಬಾಬು ಸನಾ ಅವರ ಮುಂದಿನ ಸಿನಿಮಾದಲ್ಲಿ ನಟಿಸಲಿದ್ದಾರೆ. ಸದ್ಯಕ್ಕೆ ಈ ಚಿತ್ರಕ್ಕೆ ಆರ್‌ಸಿ 16 ಎಂದು ಹೆಸರಿಡಲಾಗಿದೆ. ಅಂದರೆ, ರಾಮ್‌ ಚರಣ್‌ 16ನೇ ಸಿನಿಮಾ.
ರಾಮ್‌ ಚರಣ್‌ ಸಿನಿಮಾದಲ್ಲಿ ಶಿವಣ್ಣ ನಟನೆ
ಈ ಸ್ಪೋರ್ಟ್ಸ್‌ ಡ್ರಾಮಾದಲ್ಲಿ ಶಿವರಾಜ್‌ ಕುಮಾರ್‌ ನಟಿಸಲಿದ್ದಾರೆ. ಇತ್ತೀಚೆಗೆ ಸಂದರ್ಶನವೊಂದರಲ್ಲಿ ಶಿವರಾಜ್‌ ಕುಮಾರ್‌ ಈ ಕುರಿತು ಖಚಿತ ಪಡಿಸಿದ್ದಾರೆ. ಈ ಸಿನಿಮಾದಲ್ಲಿ ಶಿವಣ್ಣನಿಗೆ ಪ್ರಮುಖ ಪಾತ್ರವೊಂದು ನಿಗದಿಯಾಗಿದೆಯಂತೆ. ಈ ಕುರಿತು ನಿರ್ದೇಶಕರು ಶಿವಣ್ಣನ ಜತೆ ಮಾತುಕತೆಯನ್ನೂ ನಡೆಸಿದ್ದಾರೆ. ಈ ಚಿತ್ರದ ಶೂಟಿಂಗ್‌ ಆರಂಭವಾಗಲು ಇನ್ನೂ ಸಾಕಷ್ಟು ಸಮಯವಿದೆ. ಹೀಗಾಗಿ ಚಿತ್ರತಂಡವೇ ಮಾಹಿತಿ ನೀಡಲಿ ಎಂದು ಶಿವಣ್ಣ ಕಾಯುತ್ತಿದ್ದರು.
ಧನುಷ್‌ ನಟನೆಯ ಪ್ಯಾನ್‌ ಇಂಡಿಯಾ ಸಿನಿಮಾ "ಕ್ಯಾಪ್ಟನ್‌ ಮಿಲ್ಲರ್‌"ನಲ್ಲಿ ಈಗಾಗಲೇ ಶಿವಣ್ಣ ನಟಿಸಿದ್ದು, ಸದ್ಯ ಸಿನಿಮಾ ಪ್ರಚಾರದಲ್ಲಿ ಬ್ಯುಸಿಯಾಗಿದ್ದಾರೆ. ಧನುಷ್‌ ಶಿವಣ್ಣ ನಟನೆಯ ಕ್ಯಾಪ್ಟನ್‌ ಮಿಲ್ಲರ್‌ ಜನವರಿ 12ರಂದು ಕನ್ನಡ, ತೆಲುಗು, ತಮಿಳು, ಮಲಯಾಳಂ, ಹಿಂದೆ ಸೇರಿದಂತೆ ಪ್ಯಾನ್‌ ಇಂಡಿಯಾದಲ್ಲಿ ಬಿಡುಗಡೆ ಕಾಣಲಿದೆ.
ಬುಚ್ಚಿ ಬಾಬು ನಿರ್ದೇಶನದ ರಾಮ್‌ ಚರಣ್‌ ಸಿನಿಮಾದ ಕುರಿತು ಹೆಚ್ಚಿನ ವಿವರ ಇನ್ನೂ ಲಭ್ಯವಾಗಿಲ್ಲ. ಇದು ಗ್ರಾಮೀಣ ಭಾಗದವೊಂದರಲ್ಲಿ ನಡೆಯುವ ಸ್ಪೋರ್ಟ್ಸ್‌ ಡ್ರಾಮಾ ಎನ್ನಲಾಗಿದೆ. ಕಳೆದ ನಾಲ್ಕು ವರ್ಷಗಳಿಂದ ಈ ಸಿನಿಮಾದ ಸ್ಕ್ರಿಪ್ಟ್‌ ಮೇಲೆ ಕೆಲಸ ಮಾಡುತ್ತಿರುವುದಾಗಿ ಬುಚ್ಚಿ ಬಾಬು ಸನಾ ಹೇಳಿದ್ದಾರೆ. ಈ ಸಿನಿಮಾ ಬ್ಲಾಕ್‌ಬಸ್ಟರ್‌ ಆಗಲಿದೆ ಎಂದು ಭರವಸೆಯಿಂದ ಅವರು ಈ ಹಿಂದೆ ಮಾತನಾಡಿದ್ದರು.
ಸಾಯಿ ಪಲ್ಲವಿ ಮತ್ತು ವಿಜಯ್‌ ಸೇತುಪತಿಗೂ ಅವಕಾಶ
ವರದಿಗಳ ಪ್ರಕಾರ ರಾಮ್‌ ಚರಣ್‌ ಮುಂದಿನ ಸಿನಿಮಾ ಆರ್‌ಸಿ 16ನಲ್ಲಿ ಸ್ಯಾಂಡಲ್‌ವುಡ್‌ನ ಹ್ಯಾಟ್ರಿಕ್‌ ಹೀರೋ ಶಿವರಾಜ್‌ ಕುಮಾರ್‌ ಮಾತ್ರವಲ್ಲದೆ ಸಾಯಿ ಪಲ್ಲವಿ ಮತ್ತು ವಿಜಯ್‌ ಸೇತುಪತಿ ಕೂಡ ಪ್ರಮುಖ ಪಾತ್ರದಲ್ಲಿ ನಟಿಸಲಿದ್ದಾರೆ ಎಂದು ಹೇಳಲಾಗಿದೆ. ಆದರೆ, ಈ ಕುರಿತು ಚಿತ್ರತಂಡದಿಂದ ಅಧಿಕೃತ ಮಾಹಿತಿ ಹೊರಬಿದ್ದಿಲ್ಲ. ಈ ಸಿನಿಮಾಕ್ಕೆ ಎಆರ್‌ ರೆಹಮಾನ್‌ ಸಂಗೀತವಿದೆ ಈಗಾಗಲೇ ಚಿತ್ರತಂಡ ಖಚಿತಪಡಿಸಿದೆ. ಈ ಸಿನಿಮಾದಲ್ಲಿ ರಾಮ್‌ ಚರಣ್‌ ರಗಡ್‌ ಲುಕ್‌ನಲ್ಲಿ ಕಾಣಿಸಲಿದ್ದಾರೆ.
ಸದ್ಯ ರಾಮ್‌ ಚರಣ್‌ ಅವರು ರಾಜಕೀಯ ಸಾಹಸ ಪ್ರಧಾನ ಸಿನಿಮಾ ಗೇಮ್‌ ಚೇಂಜರ್‌ ಶೂಟಿಂಗ್‌ನಲ್ಲಿ ನಿರತರಾಗಿದ್ದಾರೆ. ಈ ಸಿನಿಮಾಕ್ಕೆ ಕಾರ್ತಿಕ್‌ ಸುಬ್ಬರಾಜ್‌ ಕಥೆ ಬರೆದಿದ್ದಾರೆ. ಚಿತ್ರದ ಸಂಭಾಷಣೆಯನ್ನು ಸ್ವತಃ ಶಂಕರ್‌ ಬರೆದಿದ್ದಾರೆ.
