ವಿಶೇಷ ದಿನದಂದೇ ಪ್ರಭಾಸ್‌ ‘ಕಲ್ಕಿ 2898 ಎಡಿ’ ಚಿತ್ರ ಬಿಡುಗಡೆ; ಹೀಗಿದೆ ದಿನಾಂಕ

Kalki 2898 AD Release Date: ಸಲಾರ್‌ ಸಿನಿಮಾ ಯಶಸ್ಸಿನ ಬಳಿಕ ನಟ ಪ್ರಭಾಸ್‌, ಇದೀಗ ತಮ್ಮ ಮುಂದಿನ ಸಿನಿಮಾದ ಬಿಡುಗಡೆ ದಿನಾಂಕವನ್ನು ಘೋಷಣೆ ಮಾಡಿದ್ದಾರೆ. ಪ್ರಭಾಸ್ ಅಭಿನಯದ ಕಲ್ಕಿ 2898 ಎಡಿ ಸಿನಿಮಾದ ರಿಲೀಸ್‌ ಡೇಟ್‌ ಅಧಿಕೃತವಾಗಿದೆ. ಈ ಚಿತ್ರ ಇದೇ ವರ್ಷದ ಮೇ 9 ರಂದು ಬಿಡುಗಡೆಯಾಗಲಿದೆ. ಸಂಕ್ರಾಂತಿ ಪ್ರಯುಕ್ತ ಚಿತ್ರಮಂದಿರಗಳಲ್ಲಿ ಈ ವಿಚಾರವನ್ನು ಚಿತ್ರದ ನಿರ್ಮಾಪಕರು ಅನೌನ್ಸ್‌ ಮಾಡಿದ್ದಾರೆ.

ಸಲಾರ್‌ಗಾಗಿ ಕಾದು ಕುಳಿತಿದ್ದ ಅಭಿಮಾನಿಗಳಿಗೆ, ಆ ಚಿತ್ರ ಸಲಾರ್‌ ಭರ್ಜರಿ ಬಾಡೂಟವನ್ನೇ ಬಡಿಸಿದೆ. ಇದೀಗ ಕಲ್ಕಿ 2898 AD ಚಿತ್ರದ ಸರದಿ. ಅಚ್ಚರಿಯ ರೀತಿಯಲ್ಲಿ ಯಾವುದೇ ಸುಳಿವು ನೀಡದೆ, ನೇರವಾಗಿ ಚಿತ್ರಮಂದಿರದಲ್ಲಿಯೇ ರಿಲೀಸ್‌ ದಿನಾಂಕ್‌ ಘೋಷಣೆ ಮಾಡಿದೆ ನಿರ್ಮಾಣ ಸಂಸ್ಥೆ ವೈಜಯಂತಿ ಮೂವೀಸ್‌. ಇಷ್ಟು ಬೇಗ ಈ ಸಿನಿಮಾ ಬಿಡುಗಡೆ ಆಗುತ್ತದೆ ಎಂದು ನಾವು ನಿಜಕ್ಕೂ ಊಹಿಸಿರಲಿಲ್ಲ ಎಂದು ಅಭಿಮಾನಿ ವಲಯದಲ್ಲೂ ಸಂಭ್ರಮ ಮನೆ ಮಾಡಿದೆ.

ಇದನ್ನೂ ಓದಿ: ಸಂಗೀತದಲ್ಲಿ ಧಮ್‌ ಇಲ್ಲ, ಸಂಭಾಷಣೆಯಲ್ಲಿ ಸೊಗಡಿಲ್ಲ, ಅಷ್ಟಕ್ಕೂ ‘ಗುಂಟೂರು ಖಾರಂ’ ತ್ರಿವಿಕ್ರಮ್‌ ಸಿನಿಮಾನಾ?

ಮೇ 9ರಂದೇ ಏಕೆ ರಿಲೀಸ್‌?

ವೈಜಯಂತಿ ಮೂವೀಸ್‌ ಬ್ಯಾನರ್‌ನಲ್ಲಿ ಈ ಹಿಂದೆ ಜಗದೇಕ ವೀರುಡು ಅತಿಲೋಕ ಸುಂದರಿ ಮತ್ತು ಮಹಾನಟಿ ಸಿನಿಮಾಗಳು ಮೂಡಿಬಂದಿದ್ದವು. ಮೇ 9 ರಂದೇ ಈ ಸಿನಿಮಾಗಳು ಬಿಡುಗಡೆಯಾಗಿ ದೊಡ್ಡ ಹಿಟ್ ಪಟ್ಟಿ ಸೇರಿದ್ದವು. ಇದೀಗ ಅದೇ ದಿನ ಬಿಡುಗಡೆ ಮಾಡಲು ನಿರ್ಧರಿಸಿದ್ದಾರೆ ನಿರ್ಮಾಪಕ ಅಶ್ವಿನಿ ದತ್. "ಆರು ಸಾವಿರ ವರ್ಷಗಳ ಹಿಂದೆ ಪೂರ್ಣಗೊಂಡ ಕಥೆಯು 2024ರ ಮೇ 9ರಂದು ಪ್ರಾರಂಭವಾಗಲಿದೆ" ಎಂಬ ಶೀರ್ಷಿಕೆಯೊಂದಿಗೆ ಬಿಡುಗಡೆ ದಿನಾಂಕ ರಿವೀಲ್‌ ಮಾಡಲಾಗಿದೆ.ಚ

ಈ ಬಗ್ಗೆ ಸೋಷಿಯಲ್‌ ಮೀಡಿಯಾದಲ್ಲಿ ಪೋಸ್ಟ್‌ ಹಂಚಿಕೊಂಡಿರುವ ನಿರ್ಮಾಪಕ ಅಶ್ವಿನಿ ದತ್‌, "ವೈಜಯಂತಿ ಮೂವೀಸ್‌ 50 ವರ್ಷಗಳನ್ನು ಪೂರೈಸಿದೆ. ಅದರಲ್ಲೂ ಮೇ 9 ಬಹಳ ಮುಖ್ಯವಾದ ದಿನ. ಜಗದೇಕ ವೀರುಡು ಅತಿಲೋಕ ಸುಂದರಿ, ಮಹಾನಟಿ ಮತ್ತು ಮಹರ್ಷಿ ಚಿತ್ರಗಳು ಇದೇ ದಿನಾಂಕದಂದು ಬಿಡುಗಡೆಯಾಗಿವೆ. ಈಗ ಕಲ್ಕಿ 2898 AD ಸಹ ಅದೇ ದಿನ ಬರುತ್ತಿದೆ" ಎಂದಿದ್ದಾರೆ ಅಶ್ವಿನಿದತ್. ಅಂದಹಾಗೆ, ಎಲ್ಲ ಅಂದುಕೊಂಡಂತೆ ಆಗಿದ್ದರೆ ಈ ಸಿನಿಮಾ ಇಂದು (ಜ. 12) ಬಿಡುಗಡೆ ಆಗಬೇಕಿತ್ತು.

ಇದನ್ನೂ ಓದಿ: ಕ್ಯಾಪ್ಟನ್‌ ಮಿಲ್ಲರ್‌ ವಿಮರ್ಶೆ: ಕ್ರಾಂತಿಕಾರಿ ಕಥೆಗೆ ಜೀವ ತುಂಬಿದ ಧನುಷ್‌; ಅತಿಥಿ ಪಾತ್ರದಲ್ಲಿ ಅಬ್ಬರಿಸಿದ ಶಿವಣ್ಣ

ಈ ಸಿನಿಮಾದಲ್ಲಿ ಪ್ರಭಾಸ್ ಜೊತೆ ದೀಪಿಕಾ ಪಡುಕೋಣೆ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಅಮಿತಾಬ್ ಬಚ್ಚನ್, ಕಮಲ್ ಹಾಸನ್ ಸಹ ಈ ಸಿನಿಮಾದಲ್ಲಿದ್ದಾರೆ. 600 ಕೋಟಿ ಬಜೆಟ್‌ನಲ್ಲಿ ಕಲ್ಕಿ 2898 ಎಡಿ ನಿರ್ಮಾಣವಾಗುತ್ತಿರುವುದಕ್ಕೂ ನಿರೀಕ್ಷೆಯ ಮಹಾಪೂರವೇ ಇದೆ. ಈ ಚಿತ್ರದ ವಿಎಫ್‌ಎಕ್ಸ್‌ಗೆ ಹಣವನ್ನು ನೀರಿನಂತ ಸುರಿಯುತ್ತಿದ್ದಾರೆ ನಿರ್ಮಾಪಕರು.

ಸದ್ಯ ಸಲಾರ್ ಚಿತ್ರದ ಯಶಸ್ಸಿನ ಖುಷಿಯಲ್ಲಿರುವ ಪ್ರಭಾಸ್ ಅಭಿಮಾನಿಗಳಿಗೆ, ಕಲ್ಕಿಯಿಂದಲೂ ಬಿಗ್‌ ಅಪ್‌ಡೇಟ್‌ ಸಿಕ್ಕಿದೆ. ಈ ನಡುವೆ ನಿರ್ದೇಶಕ ಮಾರುತಿ ಅವರ ಜತೆಗೂ ಪ್ರಭಾಸ್‌ ಸಿನಿಮಾ ಮಾಡಲಿದ್ದಾರೆ. ಅದರ ಬಗ್ಗೆ ಮುಂದಿನ ದಿನಗಳಲ್ಲಿ ಅಪ್‌ಡೇಟ್‌ ಸಿಗಲಿದೆ.