ರಶ್ಮಿಕಾ ಮಂದಣ್ಣ- ವಿಜಯ್ ದೇವರಕೊಂಡ ಸೀಕ್ರೆಟ್ ಡೇಟಿಂಗ್; ಸೋಷಿಯಲ್ ಮೀಡಿಯಾದಲ್ಲಿ ನೆಟ್ಟಿಗರ ಕೈಗೆ ಸಿಕ್ಕಿಬಿದ್ದ ಜೋಡಿ
ವಿಜಯ್ ದೇವರಕೊಂಡ, ರಶ್ಮಿಕಾ ಮಂದಣ್ಣ ಜೋಡಿಯ ರಹಸ್ಯ ಡೇಟಿಂಗ್ ಮತ್ತೊಮ್ಮೆ ಸೋಷಿಯಲ್ ಮೀಡಿಯಾದಲ್ಲಿ ಬಹಿರಂಗಗೊಂಡಿದೆ. ಇತ್ತೀಚೆಗಷ್ಟೇ ನಾನೂ ಡೇಟ್‌ ಮಾಡುತ್ತಿದ್ದೇನೆ ಎಂದು ವಿಜಯ್ ಹೇಳಿಕೊಂಡ ಬೆನ್ನಲ್ಲೇ ಈ ಫೋಟೋ ವೈರಲ್ ಆಗಿದೆ.
Rashmika Mandanna Vijay Deverakonda: ನ್ಯಾಷನಲ್ ಕ್ರಶ್ ರಶ್ಮಿಕಾ ಮಂದಣ್ಣ ಮತ್ತು ಟಾಲಿವುಡ್ ನಟ ವಿಜಯ್ ದೇವರಕೊಂಡ ಜೋಡಿಯ ನಡುವಿನ ಸಂಬಂಧ ರಹಸ್ಯವಾಗಿ ಉಳಿದಿಲ್ಲ. ಇಬ್ಬರೂ ಡೇಟಿಂಗ್ ಮಾಡುತ್ತಿದ್ದಾರೆ ಎಂದು ಈ ಹಿಂದಿನಿಂದಲೂ ವದಂತಿಗಳು ಹರಿದಾಡುತ್ತಲೇ ಇವೆ. ಜತೆಗೆ ಈ ಜೋಡಿಯ ಫೋಟೋಗಳೂ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆದ ಉದಾಹರಣೆಗಳೂ ಇವೆ. ಈಗ ಇದೇ ಜೋಡಿಯ ಸೀಕ್ರೆಟ್ ಡೇಟಿಂಗ್ ಮತ್ತೊಮ್ಮೆ ಬಹಿರಂಗವಾಗಿದೆ.
ವಿದೇಶಗಳಲ್ಲೂ ಈ ಜೋಡಿ ಒಟ್ಟಿಗೆ ಕಾಣಿಸಿಕೊಂಡರೂ, ಸಿಂಗಲ್‌ ಫೋಟೋ ಶೇರ್‌ ಮಾಡಿ, ನೆಟ್ಟಿಗರ ತಲೆಗೆ ಹುಳ ಬಿಡುತ್ತಿತ್ತು. ಆದರೆ, ಇಬ್ಬರೂ ಡೇಟಿಂಗ್‌ನಲ್ಲಿದ್ದೇವೆ ಎಂದು ನೇರ ನೇರವಾಗಿ ಎಲ್ಲಿಯೂ ಹೇಳಿಲ್ಲ. ಈ ನಡುವೆ ಮೊನ್ನೆಯಷ್ಟೇ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಿ, ನಾನು ಡೇಟ್‌ ಮಾಡುತ್ತಿದ್ದೇನೆ ಎಂಬ ಸುಳಿವು ನೀಡಿದ್ದರು ವಿಜಯ್ ದೇವರಕೊಂಡ.
ವಿಜಯ್ ಜತೆ ರಶ್ಮಿಕಾ ಪ್ರತ್ಯಕ್ಷ
ವಿಜಯ್ ತಾವು ಡೇಟ್‌ ಮಾಡುತ್ತಿರುವ ವಿಚಾರದ ಬಗ್ಗೆ ಹೇಳಿಕೊಳ್ಳುತ್ತಿದ್ದಂತೆ, ರಶ್ಮಿಕಾ ಅವರ ಹೆಸರು ಮತ್ತೆ ಮುನ್ನಲೆಗೆ ಬಂದಿತ್ತು. ಈಗ ಒಂದು ಹೆಜ್ಜೆ ಮುಂದೆ ಹೋಗಿ ಈ ಜೋಡಿ ಜತೆಯಲ್ಲಿರುವ ಫೋಟೋ ವೈರಲ್ ಆಗಿದೆ. ರೆಸ್ಟೋರಂಟ್‌ವೊಂದರಲ್ಲಿ ಇಬ್ಬರೂ ಲಂಚ್‌ಗೆ ತೆರಳಿದ ಸಂದರ್ಭದ ಫೋಟೋ ಅದಾಗಿದೆ.
ಈ ಪೋಟೋ ಹೊರಬೀಳುತ್ತಿದ್ದಂತೆ, ರಶ್ಮಿಕಾ ಮಂದಣ್ಣ ಮತ್ತು ವಿಜಯ್ ದೇವರಕೊಂಡ ಅವರ ರಹಸ್ಯ ಡೇಟಿಂಗ್ ಮತ್ತೊಮ್ಮೆ ಬಹಿರಂಗವಾಗಿದೆ ಎಂದು ನೆಟ್ಟಿಗರು ಕಾಮೆಂಟ್ ಮಾಡುತ್ತಿದ್ದಾರೆ. ಅಷ್ಟಕ್ಕೂ ಹೀಗೆ ಒಟ್ಟಿಗೆ ಕೂತು ಖಾದ್ಯ ಸೇವಿಸುತ್ತಿರುವ ಫೋಟೋ ಈಗಿನದಲ್ಲ. ಈ ಫೋಟೋ ಹೊರಬರುವುದಕ್ಕೂ ಮುನ್ನ, ವಿಜಯ್ ಜತೆಗಿದ್ದಾಗಲೇ, ತಮ್ಮದೊಂದು ಫೋಟೋವನ್ನಷ್ಟೇ ಸೋಷಿಯಲ್ ಮೀಡಿಯಾದಲ್ಲಿ ಪೋಸ್ಟ್‌ ಮಾಡಿದ್ದರು ರಶ್ಮಿಕಾ. ಈಗ ವೈರಲ್ ಆಗುತ್ತಿರುವ ಫೋಟೋಕ್ಕೂ, ರಶ್ಮಿಕಾ ಶೇರ್‌ ಮಾಡಿದ್ದ ಪೋಸ್ಟ್‌ಗೂ ನೆಟ್ಟಿಗರು ಹೋಲಿಕೆ ಮಾಡಿ, ಡೇಟಿಂಗ್ ಬಗ್ಗೆ ಮಾತು ಮುಂದುವರಿಸಿದ್ದಾರೆ.
ರೆಸ್ಟೋರಂಟ್‌ನಲ್ಲಿ ಲವ್‌ ಬರ್ಡ್ಸ್‌
ರೆಸ್ಟೋರೆಂಟ್‌ನಲ್ಲಿ ಖಾದ್ಯ ಸವಿಯುವಾಗ ವಿಜಯ್ ದೇವರಕೊಂಡ ನೀಲಿ ಬಣ್ಣದ ಜಾಕೆಟ್‌, ಬಿಳಿ ಟೀ ಶರ್ಟ್‌ ಧರಿಸಿದ್ದರು. ಇತ್ತ ರಶ್ಮಿಕಾ ಸ್ಲೀವ್ ಲೆಸ್ ಕ್ರಾಪ್ಡ್ ಬ್ಲೂ ಟಾಪ್ ಮತ್ತು ನೀಲಿ ಡೆನಿಮ್ ಧರಿಸಿದ್ದರು. ಹೀಗೆ ನೋಡಿದರೆ, ರಶ್ಮಿಕಾ ಪೋಸ್ಟ್‌ ಮಾಡಿದ್ದ ಫೋಟೋ ಮತ್ತು, ವೈರಲ್ ಆದ ಫೋಟೋ ಎರಡೂ ಒಂದೇ ಸ್ಥಳದ್ದೇ ಎಂಬುದು ಕನ್ಫರ್ಮ್‌ ಆಗಿದೆ. ಇತ್ತ ನೆಟ್ಟಗರು ಈ ಜೋಡಿಯ ಸೀಕ್ರೆಟ್ ಡೇಟಿಂಗ್ ಬಗ್ಗೆ ಅದೇ ಹಳೇ ಮಾತುಗಳನ್ನೇ ಮುಂದುವರಿಸಿದ್ದಾರೆ. ಓಡಾಟ ಸಾಕು, ಆದಷ್ಟು ಬೇಗ ಅಧಿಕೃತವಾಗಿ ಘೋಷಣೆ ಮಾಡಿ ಎಂದೂ ಹೇಳುತ್ತಿದ್ದಾರೆ.
