Mangaluru News: ಮಂಗಳೂರು ಏರ್‌ಪೋರ್ಟ್ ರನ್‌ವೇ ಸುಧಾರಣೆ ಕಾಮಗಾರಿ; ವಿಮಾನ ಹಾರಾಟ ಸಮಯದಲ್ಲಿ ಬದಲಾವಣೆ
ವಿಮಾನಯಾನ ಸಂಸ್ಥೆಗಳು ತಮ್ಮ ವಿಮಾನ ಹಾರಾಟದ ವೇಳಾಪಟ್ಟಿಯನ್ನು ಬೆಳಗ್ಗೆ 9.30 ಕ್ಕಿಂತ ಮೊದಲು ಮತ್ತು ಸಂಜೆ 6ರ ನಂತರದ ಅವಧಿಯಲ್ಲಿ ನಿರ್ವಹಿಸುತ್ತವೆ ಎಂದು MIA ತಿಳಿಸಿದೆ.
ರಾಜ್ಯದ ಎರಡನೇ ಅತಿದೊಡ್ಡ ಹಾಗೂ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣವಾದ ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ(Mangaluru International Airport)ದ ರನ್‌ವೇ ಮತ್ತಷ್ಟು ಸುಧಾರಣೆಯಾಗಲಿದೆ. ಜನವರಿ 27ರಿಂದ ರನ್‌ವೇ ವಿಸ್ತರಣೆ ಕಾಮಗಾರಿ ಆರಂಭವಾಗಲಿದ್ದು, ನಾಲ್ಕು ತಿಂಗಳ ಅವಧಿಗೆ ರನ್‌ವೇಯಲ್ಲಿ ಪ್ರಮುಖ ಪುನರ್ವಸತಿ ಮತ್ತು ರಿಕಾರ್ಪೆಟಿಂಗ್ ಕಾರ್ಯ ನಡೆಯಲಿದೆ.
ಭಾನುವಾರ ಮತ್ತು ರಾಷ್ಟ್ರೀಯ ರಜಾದಿನಗಳನ್ನು ಹೊರತುಪಡಿಸಿ ಎಲ್ಲಾ ದಿನಗಳಲ್ಲಿ ಸೋಮವಾರದಿಂದ ಶನಿವಾರದವರೆಗೂ ಈ ಕಾಮಗಾರಿ ನಡೆಯಲಿದೆ. ಪ್ರತಿದಿನ ಬೆಳಗ್ಗೆ 9.30 ರಿಂದ ಸಂಜೆ 6 ರವರೆಗೆ ಕೆಲಸ ನಡೆಯಲಿದೆ. ಈ ಕಾಮಗಾರಿ ಜನವರಿ 27ರಿಂದ ಆರಂಭವಾಗಿ, 2023ರ ಮೇ 31ರವರೆಗೆ ನಡೆಯಲಿದೆ. ಅಲ್ಲಿಯವರೆಗೂ ವಿಮಾನ ಹಾರಾಟದಲ್ಲಿ ವ್ಯತ್ಯಯವಾಗಲಿದೆ.
ವಿಮಾನ ಹಾರಾಟ ಸಮಯದಲ್ಲಿ ಬದಲಾವಣೆ
ವಿಮಾನಯಾನ ಸಂಸ್ಥೆಗಳು ತಮ್ಮ ವಿಮಾನ ಹಾರಾಟದ ವೇಳಾಪಟ್ಟಿಯನ್ನು ಬೆಳಗ್ಗೆ 9.30 ಕ್ಕಿಂತ ಮೊದಲು ಮತ್ತು ಸಂಜೆ 6ರ ನಂತರದ ಅವಧಿಯಲ್ಲಿ ನಿರ್ವಹಿಸುತ್ತವೆ ಎಂದು MIA ಭಾನುವಾರ ಪ್ರಕಟಣೆಯಲ್ಲಿ ತಿಳಿಸಿದೆ. ಹೀಗಾಗಿ ಕಾಮಗಾರಿ ನಡೆಯುವ ವೇಳೆ ರನ್‌ವೇಯಲ್ಲಿ ವಿಮಾನಗಳು ಇಳಿಯುವುದಿಲ್ಲ.
ಮಂಗಳೂರು ವಿಮಾನ ನಿಲ್ದಾಣದ 2,450 ಮೀಟರ್ ಉದ್ದ ಮತ್ತು 45 ಮೀಟರ್ ಅಗಲದ ಕಾಂಕ್ರೀಟ್ ರನ್‌ವೇಯನ್ನು ಮೇ 2006ರಲ್ಲಿ ಸಂಚಾರಕ್ಕಾಗಿ ತೆರೆಯಲಾಯಿತು. MIA ಎರಡು ರನ್‌ವೇಗಳನ್ನು ಹೊಂದಿರುವ ಕರ್ನಾಟಕದ ಮೊದಲ ವಿಮಾನ ನಿಲ್ದಾಣವಾಗಿದೆ. ಅಲ್ಲದೆ ಕಟ್ಟುನಿಟ್ಟಾದ ಪಾದಚಾರಿ ಅಥವಾ ಕಾಂಕ್ರೀಟ್ ರನ್‌ವೇ ಹೊಂದಿರುವ ಮೊದಲ ವಿಮಾನ ನಿಲ್ದಾಣವಾಗಿದೆ. ಅಂದಿನಿಂದ ಈ ಗಟ್ಟಿಯಾದ ಪಾದಚಾರಿ ಓಡುದಾರಿಯು ಆಗಾಗ ನಿರ್ವಹಣೆಗೆ ಒಳಗಾಗಿದೆ.
ನಿಗದಿತ ಪುನರ್ನಿರ್ಮಾಣ ಮತ್ತು ಮರುಕಾರ್ಪೆಟಿಂಗ್‌ ಕಾಮಗಾರಿಯು ವಿಮಾನ ನಿಲ್ದಾಣ ಪ್ರಾಧಿಕಾರದ ನಿರ್ದಿಷ್ಟ ಮಾನದಂಡಗಳಿಗನುಸಾರವಾಗಿ ರನ್‌ವೇಯಲ್ಲಿ ಡಾಂಬರು ಅಥವಾ ಬ್ಲ್ಯಾಕ್‌ಟಾಪ್ ಮಾಡಲಾಗುತ್ತದೆ. ರನ್‌ವೇಯನ್ನು ಅದರ ಸೂಕ್ಷ್ಮ ಮತ್ತು ಮ್ಯಾಕ್ರೋ ವಿನ್ಯಾಸವನ್ನು ಸುಧಾರಿಸಲು ಮರುಕಾರ್ಪೆಟ್ ಮಾಡಲಾಗುವುದು ಎಂದು ವಿಮಾನ ನಿಲ್ದಾಣದ ಪ್ರಕಟಣೆ ತಿಳಿಸಿದೆ.
ರೀಕಾರ್ಪೆಟಿಂಗ್ ಕೆಲಸವು ರನ್‌ವೇ ಸೆಂಟರ್‌ಲೈನ್ ಲೈಟ್‌ಗಳ ಅಳವಡಿಕೆಯನ್ನು ಸಹ ಒಳಗೊಂಡಿದೆ. ಇದು ರಾತ್ರಿ ವೇಳೆ ಮತ್ತು ಕಡಿಮೆ ಗೋಚರತೆಯ ಪರಿಸ್ಥಿತಿಗಳಲ್ಲೂ ವಿಮಾನಗಳ ಸರಾಗ ಕಾರ್ಯಾಚರಣೆಗಳಿಗೆ ಸಹಾಯ ಮಾಡುತ್ತದೆ. ಅಲ್ಲದೆ ರನ್‌ವೇ ಎಂಡ್ ಸೇಫ್ಟಿ ಏರಿಯಾಗಳ (RESA) ಸುಧಾರಣೆ ಮಾಡಲಾಗುತ್ತದೆ. ಕೇರಳದ ಕೋಝಿಕ್ಕೋಡ್‌ನಲ್ಲಿ IX 1344 ವಿಮಾನ ಅಪಘಾತದ ತನಿಖೆಯ ಸಮಿತಿಯು ಸೂಚಿಸಿದಂತೆ ಇದು ಸುರಕ್ಷತೆಯನ್ನು ಹೆಚ್ಚಿಸುತ್ತದೆ.
ವಿಮಾನಗಳನ್ನು ರದ್ದು ಮಾಡಲಾಗುತ್ತದೆಯೇ?
ಕಾಮಗಾರಿಗೆ ಅನುಮೋದನೆಗಳನ್ನು ಪಡೆಯುವ ಮೊದಲು MIA ರಿಕಾರ್ಪೆಟಿಂಗ್ ಯೋಜನೆಯನ್ನು ವಿಮಾನಯಾನ ಸಂಸ್ಥೆ ಮತ್ತು ಮಧ್ಯಸ್ಥಗಾರರೊಂದಿಗೆ ಚರ್ಚಿಸಿದೆ.
ಎಲ್ಲಾ ಪ್ರಮುಖ ರನ್‌ವೇ ರಿಕಾರ್ಪೆಟಿಂಗ್ ಕೆಲಸಕ್ಕೆ ಸರಿಹೊಂದುವಂತೆ ವಿಮಾನದ ಸಮಯವನ್ನು ಬದಲಾಯಿಸಲಾಗಿದ್ದರೂ, ಅಂತಾರರಾಷ್ಟ್ರೀಯ ಮತ್ತು ದೇಶೀಯ ಯಾವುದೇ ಗಮ್ಯಸ್ಥಾನಕ್ಕೆ ಯಾವುದೇ ವಿಮಾನವನ್ನು ರದ್ದುಗೊಳಿಸುವುದಿಲ್ಲ ಎಂದು ಖಚಿತಪಡಿಸಿಕೊಳ್ಳಲು ವಿಮಾನ ನಿಲ್ದಾಣವು ಏರ್‌ಲೈನ್ ಪಾಲುದಾರರೊಂದಿಗೆ ಮಾತನಾಡಿದೆ ಎಂದು ಪ್ರಕಟಣೆ ತಿಳಿಸಿದೆ. ಹೀಗಾಗಿ ಕಾಮಗಾರಿ ನಡುವೆ ವಿಮಾನಗಳಲ್ಲಿ ಓಡಾಡುವವರ ಪ್ರಯಾಣಕ್ಕೆ ಯಾವುದೇ ಸಮಸ್ಯೆಯಾಗದಂತೆ ನೋಡಿಕೊಳ್ಳಲಾಗುತ್ತಿದೆ.
