ಕೆಟ್ಟ ಕ್ರೆಡಿಟ್ ಸ್ಕೋರ್ ಕಾರಣಕ್ಕೆ ಸಾಲವೇ ಸಿಗ್ತಿಲ್ವಾ? ಸಾಲ ಸಿಗೋಕೆ ಇದೆ ಛಾನ್ಸ್, ಹೇಗೆ ಅಂತ ತಿಳ್ಕೊಳಿ
ಪರ್ಸನಲ್ ಲೋನ್ ಬೇಕು ಎಂದು ಬ್ಯಾಂಕಿಗೆ ಹೋದಾಗ ಮೊದಲು ನೋಡುವುದು ಕ್ರೆಡಿಟ್ ಸ್ಕೋರ್ ಅಥವಾ ಸಿಬಿಲ್ ಸ್ಕೋರ್. ಕೆಟ್ಟ ಕ್ರೆಡಿಟ್ ಸ್ಕೋರ್ ಕಾರಣಕ್ಕೆ ಸಾಲವೇ ಸಿಗ್ತಿಲ್ವಾ? ಸಾಲ ಸಿಗೋಕೆ ಇದೆ ಛಾನ್ಸ್, ಹೇಗೆ ಅನ್ನೋದನ್ನು ಇದನ್ನು ಓದಿ ತಿಳ್ಕೊಳ್ಳಿ.
ಬಹುತೇಕರು ಹಣದ ಕೊರತೆ ಎದುರಾದಾಗ ಸಾಮಾನ್ಯಾವಾಗಿ ಕೈ ಸಾಲ ಅಥವಾ ಪರ್ಸನಲ್ ಲೋನ್‌ಗೆ ಮೊರೆ ಹೋಗುವುದು ವಾಡಿಕೆ. ದೇಶದ ಸಣ್ಣ ಮತ್ತು ದೊಡ್ಡ ಬ್ಯಾಂಕುಗಳು ಮತ್ತು ಬ್ಯಾಂಕಿಂಗೇತರ ಹಣಕಾಸು ಕಂಪನಿಗಳು ವೈಯಕ್ತಿಕ ಸಾಲಗಳನ್ನು ಸುಲಭವಾಗಿ ಒದಗಿಸುತ್ತವೆ. ಇವು ಸಾಲ ಒದಗಿಸುವುದಕ್ಕೆ ಕೆಲವೊಂದು ಮಾನದಂಡಗಳನ್ನು ಅನುಸರಿಸುತ್ತವೆ. ಈ ಪೈಕಿ ಮುಖ್ಯವಾಗಿ ಗಮನಿಸುವುದು ಸಾಲ ಕೇಳಿ ಬಂದವರ ಕ್ರೆಡಿಟ್ ಸ್ಕೋರ್.
ಕೆಟ್ಟ ಅಥವಾ ಕಳಪೆ ಕ್ರೆಡಿಟ್ ಸ್ಕೋರ್ ಹೊಂದಿದ್ದರೆ ನಿರೀಕ್ಷಿತ ಮಟ್ಟದ ಸಾಲ ಸಿಗುವುದು ಕಷ್ಟ ಅಥವಾ ಸಾಲ ಸಿಗದೇ ಹೋಗಬಹುದು. ಆದ್ದರಿಂದ ಕೆಟ್ಟ ಕ್ರೆಡಿಟ್ ಸ್ಕೋರ್ ಹೊಂದಿರುವ ಗ್ರಾಹಕರು ಬಹಳಷ್ಟು ಸವಾಲುಗಳನ್ನು ಎದುರಿಸುತ್ತಾರೆ.
ಕಳಪೆ ಸಿಬಿಲ್ ಸ್ಕೋರ್‌ನೊಂದಿಗೆ ವೈಯಕ್ತಿಕ ಸಾಲವನ್ನು ಪಡೆಯುವುದು ಸ್ವಲ್ಪ ಕಷ್ಟ. ಆದರೆ ಸಾಲ ಪಡೆಯುವ ನಿಮ್ಮ ಅವಕಾಶಗಳನ್ನು ಹೆಚ್ಚಿಸಲು ಮತ್ತು ಸಾಲದ ಮೊತ್ತವನ್ನು ಹೆಚ್ಚಿಸುವುದಕ್ಕೆ ಬೇಕಾದಂತೆ ಸಂಭಾವ್ಯವಾಗಿ ಪ್ರಭಾವಿಸಲು ಮಾರ್ಗಗಳಿವೆ. ಆ ಪ್ರಕ್ರಿಯೆಯನ್ನು ಗಮನಿಸುವುದಕ್ಕೆ ಅಗತ್ಯವಾದ ಕಿರು ಮಾರ್ಗದರ್ಶಿ ಇಲ್ಲಿದೆ.
ಕೆಟ್ಟ ಕ್ರೆಡಿಟ್ ಸ್ಕೋರ್‌ನ ಸವಾಲುಗಳು
ಕೆಟ್ಟ ಕ್ರೆಡಿಟ್ ಸ್ಕೋರ್ ಹೊಂದಿರುವ ಗ್ರಾಹಕರು ವೈಯಕ್ತಿಕ ಸಾಲ ಪಡೆಯುವಲ್ಲಿ ಅನೇಕ ಸಮಸ್ಯೆಗಳನ್ನು ಎದುರಿಸುತ್ತಾರೆ. ಆದಾಗ್ಯೂ, ಕೆಟ್ಟ ಕ್ರೆಡಿಟ್ ಸ್ಕೋರ್‌ಗಳನ್ನು ಹೊಂದಿರುವ ಗ್ರಾಹಕರು ವೈಯಕ್ತಿಕ ಸಾಲಗಳನ್ನು ಪಡೆಯಲು ಸಾಧ್ಯವಿಲ್ಲ ಎಂದಲ್ಲ. ಅಂತಹ ಗ್ರಾಹಕರು ಸಾಲವನ್ನು ಪಡೆಯುತ್ತಾರೆ. ಆದರೆ ಬಡ್ಡಿ ತುಂಬಾ ಹೆಚ್ಚು. ಇದಲ್ಲದೆ, ಸಾಲದ ಮೊತ್ತವೂ ಕಡಿಮೆ.
ವಾಸ್ತವವಾಗಿ, ಸಾಲದಾತರು ಕಡಿಮೆ ಕ್ರೆಡಿಟ್ ಸ್ಕೋರ್‌ಗಳನ್ನು (ಸಾಮಾನ್ಯವಾಗಿ 620 ಕ್ಕಿಂತ ಕಡಿಮೆ) ಡಿಫಾಲ್ಟರ್‌ಗಳು ಅಥವಾ ಸಾಲ ಮರುಪಾವತಿಸದವರು ಎಂದು ಪರಿಗಣಿಸುತ್ತಾರೆ. ಸೀಮಿತ ಸಾಲದ ಆಯ್ಕೆಗಳು ಲಭ್ಯವಾಗಲು ಇದು ಕಾರಣವಾಗಿದೆ. ಅದೇ ಸಮಯದಲ್ಲಿ, ಹೆಚ್ಚಿನ ದೊಡ್ಡ ಬ್ಯಾಂಕ್‌ಗಳು ಅಂತಹ ಗ್ರಾಹಕರಿಗೆ ಸಾಲ ನೀಡಲು ನಿರಾಕರಿಸುತ್ತವೆ. ಸಾಲವನ್ನು ಅನುಮೋದಿಸಿದರೂ ಸಹ, ಉತ್ತಮ ಕ್ರೆಡಿಟ್ ಸ್ಕೋರ್‌ಗಳನ್ನು ಹೊಂದಿರುವ ಗ್ರಾಹಕರಿಗೆ ಹೋಲಿಸಿದರೆ ಹೆಚ್ಚಿನ ಬಡ್ಡಿಯನ್ನು ವಿಧಿಸಲಾಗುತ್ತದೆ.
ಕ್ರೆಡಿಟ್ ಸ್ಕೋರ್ ಇಲ್ಲದಿದ್ದರೂ ಸಮಸ್ಯೆ
ಗ್ರಾಹಕರು ಕ್ರೆಡಿಟ್ ಸ್ಕೋರ್ ಅಥವಾ ಕ್ರೆಡಿಟ್ ಹಿಸ್ಟರಿ ಹೊಂದಿಲ್ಲದಿದ್ದರೂ, ವೈಯಕ್ತಿಕ ಸಾಲವನ್ನು ಪಡೆಯುವಲ್ಲಿ ತೊಂದರೆ ಉಂಟಾಗಬಹುದು. ಅಂತಹ ಪರಿಸ್ಥಿತಿಯಲ್ಲಿ, ಸಾಲದಾತರು ನಿಮ್ಮ ಕ್ರೆಡಿಟ್ ಅರ್ಹತೆ ಮತ್ತು ಮರುಪಾವತಿ ಅಭ್ಯಾಸಗಳನ್ನು ನಿರ್ಣಯಿಸಲು ಅಗತ್ಯ ಡೇಟಾವನ್ನು ಹೊಂದಿರುವುದಿಲ್ಲ. ಹೀಗಾಗಿ ನಿಮ್ಮ ಸಾಲದ ಅರ್ಜಿಯನ್ನು ಪರಿಗಣಿಸುವಾಗ ಸಾಲದಾತರಿಗೆ ಗ್ರಾಹಕರ ಪ್ರೊಫೈಲ್ ಅನ್ನು ಪತ್ತೆಹಚ್ಚಲಾಗದು. ಇದು ಸವಾಲಾಗಿದೆ.
ಅಂತಹ ಗ್ರಾಹಕರು ಸೀಮಿತ ಸಾಲದ ಆಯ್ಕೆಗಳನ್ನು ಎದುರಿಸಬಹುದು ಅಥವಾ ಅನುಮೋದಿಸಿದರೆ ಸಂಭಾವ್ಯವಾಗಿ ಹೆಚ್ಚಿದ ಬಡ್ಡಿದರ ಪಾವತಿಸಬೇಕಾಗಬಹುದು. ಅನೇಕ ಬಾರಿ ಸಾಲದಾತರು ನಿಮ್ಮ ಕ್ರೆಡಿಟ್ ಸ್ಕೋರ್ ಅನ್ನು ಅವಲಂಬಿಸಿರುವ ಬದಲು ಆದಾಯದ ಸ್ಥಿರತೆ ಇತ್ಯಾದಿ ಪರ್ಯಾಯ ಮಾನದಂಡಗಳನ್ನು ಮೌಲ್ಯಮಾಪನ ಮಾಡುತ್ತಾರೆ. ಅದೇನೇ ಇದ್ದರೂ, ಅವರು ಹೆಚ್ಚಾಗಿ ಹೆಚ್ಚಿದ ಬಡ್ಡಿದರ ವಿಧಿಸುತ್ತಾರೆ.
ಇದನ್ನೂ ಓದಿ| ಸಾಲಕ್ಕೆ ಕೈ ಒಡ್ಡುವ ಮೊದಲು ತಿಳಿದಿರಲೇಬೇಕಾದ 8 ಅಂಶ
ಪರಿಹಾರವೇನು?:
ನಿಮ್ಮ ಕ್ರೆಡಿಟ್ ಸ್ಕೋರ್ ಅಥವಾ ಸಿಬಿಲ್ ಸ್ಕೋರ್ ಅನ್ನು ಅರ್ಥಮಾಡಿಕೊಳ್ಳುವುದು. ಕಳಪೆ ಅಥವಾ ಕೆಟ್ಟದಾಗಿದ್ದರೆ ಅದನ್ನು ಸುಧಾರಿಸುವುದಕ್ಕೆ ಅಗತ್ಯ ಕ್ರಮ ತೆಗೆದುಕೊಳ್ಳುವುದು. ಆ ಮೂಲಕ ಉತ್ತಮ ಕ್ರೆಡಿಟ್ ಸ್ಕೋರ್ ಪ್ರೊಫೈಲ್ ಹೊಂದುವುದು. ಕ್ರೆಡಿಟ್ ಕಾರ್ಡ್ ಇದ್ದರೆ ಅದರಲ್ಲಿ ನಿಮಗೆ ಮೀಸಲಾದ ಹಣದ ಶೇಕಡ 30 ಮಾತ್ರ ಬಳಸುವುದು. ಸಮಯಕ್ಕೆ ಸರಿಯಾಗಿ ಸಾಲ ಮರುಪಾವತಿಸುವುದು.
ಇನ್ನು ಇಂತಹ ಸಂದರ್ಭದಲ್ಲಿ ಸಾಲದ ಮೊತ್ತ ಹೆಚ್ಚಿಸುವುದಕ್ಕೆ ಸಾಲಕ್ಕೆ ಸಹ ಅರ್ಜಿದಾರರನ್ನು ಸೇರಿಸುವುದು. ಆಗ ಅವರ ಆದಾಯದ ಮೇಲಿನ ಮತ್ತು ಅವರ ಭರವಸೆಯ ಮೇರೆಗೆ ಸಾಲದ ಮೊತ್ತ ಹೆಚ್ಚಳವಾಗುತ್ತದೆ. ವಿವಿಧ ಸಾಲದಾತರ ಮಾನದಂಡಗಳನ್ನು ಪರಿಶೀಲಿಸಿ. ನಂತರ ಸಾಲ ಪಡೆಯಲು ಅರ್ಜಿ ಸಲ್ಲಿಸಿ.
