ಮೊಹಮ್ಮದ್‌ ಸಿರಾಜ್‌ಗೆ ನಟಿ ಶ್ರದ್ಧಾ ಕಪೂರ್‌ ಕೇಳಿದ್ರು ತುಂಟ ಪ್ರಶ್ನೆ, ಏಷ್ಯಾ ಕಪ್‌ ಗೆಲುವಿನ ಬಳಿಕ ಸಿರಾಜ್‌ಗೆ ಡಿಮ್ಯಾಂಡಪ್ಪೋ ಡಿಮ್ಯಾಂಡು

ಏಷ್ಯಾಕಪ್‌ ಕ್ರಿಕೆಟ್‌ನಲ್ಲಿ ಭಾರತದ ವೇಗಿ ಮೊಹಮ್ಮದ್‌ ಸಿರಾಜ್‌ ಶ್ರೀಲಂಕಾವನ್ನು ಧೂಳಿಪಟ ಮಾಡಿದ ಬಳಿಕ ಎಲ್ಲೆಡೆ ಅವರ ಗುಣಗಾನ ನಡೆಯುತ್ತಿದೆ. ಬಾಲಿವುಡ್‌ ಸೆಲೆಬ್ರಿಟಿಗಳಂತೂ ಸಿರಾಜ್‌ ಧ್ಯಾನದಲ್ಲಿದ್ದಾರೆ ಎಂದು ತಪ್ಪಾಗದು. ಬಾಲಿವುಡ್‌ ನಟಿ ಶ್ರದ್ಧಾ ಕಪೂರ್‌ ಅವರು ಸೋಷಿಯಲ್‌ ಮೀಡಿಯಾದಲ್ಲಿ ಈ ಸಂದರ್ಭದಲ್ಲಿ ತುಂಟ ಪ್ರಶ್ನೆಯೊಂದನ್ನು ಕೇಳಿದ್ದು ವೈರಲ್‌ ಆಗಿದೆ. ಒಟ್ಟಾರೆ, ಎಲ್ಲೆಡೆ ಸಿರಾಜ್‌ ಫಿವರ್‌ ಕಾಣಿಸಿಕೊಂಡಿದ್ದು, ಅವರ ಅಮೋಘ ಸಾಧನೆಗೆ ಬಹುಪರಾಕ್‌ ಕೇಳಿಸುತ್ತಿದೆ.

ಏಳು ಓವರ್‌ ಎಸೆತದಲ್ಲಿ ಒಂದು ಮೇಡನ್‌ ಸಹಿತ 21 ರನ್‌ ನೀಡಿ 6 ವಿಕೆಟ್‌ ಕಬಳಿಸಿದ ಇವರ ಸಾಧನೆಗೆ ಎಲ್ಲೆಡೆ ಮೆಚ್ಚುಗೆ ಕೇಳಿಬರುತ್ತಿದೆ. ಇಷ್ಟು ಮಾತ್ರವಲ್ಲ ಪಂದ್ಯದಲ್ಲಿ ಗೆದ್ದ ಮೊತ್ತವನ್ನು ಕ್ರಿಕೆಟ್‌ ಮೈದಾನದ ಸಿಬ್ಬಂದಿಗೆ ನೀಡಿ ಕ್ರಿಕೆಟ್‌ ಅಭಿಮಾನಿಗಳ ಮನಸ್ಸು ಕದ್ದಿದ್ದಾರೆ. ಇದೀಗ ಇವರ ಹೃದಯ ಕದಿಯಲು ಸಾಕಷ್ಟು ಸುಂದರಿಯರು ಪ್ರಯತ್ನಿಸುತ್ತಿದ್ದಾರೆ. ಮೊಹಮ್ಮದ್‌ ಸಿರಾಜ್‌ಗೆ ಮದುವೆಯಾಗಿದ್ಯಾ, ಮೊಹಮ್ಮದ್‌ ಸಿರಾಜ್‌ ಹೆಂಡತಿ ಯಾರು, ಮೊಹಮ್ಮದ್‌ ಸಿರಾಜ್‌ ಗರ್ಲ್‌ ಫ್ರೆಂಡ್‌ ಯಾರು ಇತ್ಯಾದಿ ಪ್ರಶ್ನೆಗಳ ಹುಡುಕಾಟ ಆರಂಭವಾಗಿದೆ. ಅವಿವಾಹಿತರಾಗಿರುವ ಸಿರಾಜ್‌ಗೆ ಈಗ ಡಿಮ್ಯಾಂಡಪ್ಪೊ ಡಿಮ್ಯಾಂಡ್‌ ಎಂದರೆ ತಪ್ಪಾಗದು.

ಆರು ವಿಕೆಟ್‌ ಕಬಳಿಸಿದ ಮೊಹಮ್ಮದ್‌ ಸಿರಾಜ್‌ ಅವರ ಅಮೋಘ ಬೌಲಿಂಗ್‌ಗೆ ಎಲ್ಲರೂ ಫಿದಾ ಆಗಿದಾರೆ. ಭಾರತದ ಗೆಲುವಿಗೆ ಕಾರಣರಾದ ಇವರಿಗೆ ಪಂದ್ಯಶ್ರೇಷ್ಠ ಪ್ರಶಸ್ತಿ ನೀಡಲಾಗಿದೆ. ಈ ಬಹುಮಾನದ ಹಣವನ್ನು ಮೈದಾನದ ಸಿಬ್ಬಂದಿಗೆ ನೀಡಿದ್ದಾರೆ. ಸುಮಾರು 4 ಲಕ್ಷ ರೂಪಾಯಿಗೂ ಅಧಿಕ ಮೊತ್ತವನ್ನು ಇವರು ನೀಡಿದ್ದಾರೆ. ಕೊಲೊಂಬೊದ ಆರ್​ ಪ್ರೇಮದಾಸ ಅಂತಾರಾಷ್ಟ್ರೀಯ ಕ್ರಿಕೆಟ್ ಮೈದಾನದಲ್ಲಿ ನಡೆದ ಪ್ರಶಸ್ತಿ ಸುತ್ತಿನ ಪಂದ್ಯದಲ್ಲಿ ಟಾಸ್ ಗೆದ್ದ ಶ್ರೀಲಂಕಾ, ಮೊದಲು ಬ್ಯಾಟಿಂಗ್ ನಡೆಸಿತು. ಭಾರತ ತಂಡದ ಅದ್ಭುತ ಬೌಲಿಂಗ್​​ಗೆ ಶ್ರೀಲಂಕಾ ತತ್ತರಿಸಿತು. ಕಳಪೆ ಬ್ಯಾಟಿಂಗ್ ಪ್ರದರ್ಶನ ನೀಡಿ 15.2 ಓವರ್​ಗಳಲ್ಲಿ ಕೇವಲ 50 ರನ್​ಗಳಿಗೆ ಸರ್ವಪತನ ಕಂಡಿತು. ಈ ಸಣ್ಣ ಗುರಿಯನ್ನು ಬೆನ್ನತ್ತಿದ ಭಾರತ ತಂಡ 6.1 ಓವರ್​ಗಳಲ್ಲಿ ಅಂದರೆ ಪವರ್​ ಪ್ಲೇ ಮುಗಿಯುವುದರೊಂದಿಗೆ ವಿಕೆಟ್ ನಷ್ಟವಿಲ್ಲದೆ ಗೆಲುವಿನ ಗೆರೆ ದಾಟಿತು. ಇದರೊಂದಿಗೆ 10 ವಿಕೆಟ್​​ಗಳ ಗೆಲುವು ಸಾಧಿಸಿ ಟ್ರೋಫಿಗೆ ಮುತ್ತಿಕ್ಕಿತು.

ಶ್ರದ್ಧಾ ಕಪೂರ್‌ ತುಂಟ ಪ್ರಶ್ನೆ

ಕ್ರಿಕೆಟ್‌ ಪ್ರೇಮಿಗಳ ಮನ ಗೆದ್ದ ಮೊಹಮ್ಮದ್‌ ಸಿರಾಜ್‌ಗೆ ಶ್ರದ್ಧಾ ಕಪೂರ್‌ ಅವರು ಕೇಳಿದ ಪ್ರಶ್ನೆ ವೈರಲ್‌ ಆಗಿದೆ. "ಅಬ್‌ ಸಿರಾಜ್‌ ಸೇ ಹೈ ಪುಚೊ ಕಿ ಇಸ್‌ ಫ್ರೀ ಟೈಮ್‌ ಎ ಸಾಥ್‌ ಕ್ಯಾ ಕರೆನ್‌" ಎಂದು ಅವರು ಕೇಳಿದ್ದರು. "ಸಿರಾಜ್‌ನಲ್ಲಿ ಮಾತ್ರ ಒಂದು ಪ್ರಶ್ನೆ ಕೇಳೊಕ್ಕೆ ಇದೆ. ನೀವು ಇಷ್ಟೊಂದು ಬಿಡುವಿನ ವೇಳೆಯಲ್ಲಿ ಏನು ಮಾಡುವಿರಿ" ಎಂದು ಅವರು ಇನ್‌ಸ್ಟಾಗ್ರಾಂನಲ್ಲಿ ಪೋಸ್ಟ್‌ ಮಾಡಿದ್ದಾರೆ. ಈ ಮೂಲಕ ಸಿರಾಜ್‌ಗೆ ಶ್ರದ್ಧಾ ಕಪೂರ್‌ ಕಣ್ಣು ಹೊಡೆದಿದ್ದಾರೆ ಎಂದು ನೆಟ್ಟಿಗರು ಮಾತನಾಡಿಕೊಳ್ಳುತ್ತಿದ್ದಾರೆ.

ಶ್ರದ್ಧಾ ಕಪೂರ್‌ ಮಾತ್ರವಲ್ಲದೆ ಬಹುತೇಕ ಸೆಲೆಬ್ರಿಟಿಗಳು, ಜನಸಾಮಾನ್ಯರು ಸೇರಿದಂತೆ ಕ್ರಿಕೆಟ್‌ ಅಭಿಮಾನಿಗಳು ಮೊಹಮ್ಮದ್‌ ಸಿರಾಜ್‌ ಬೌಲಿಂಗ್‌ ಕುರಿತು ಮೆಚ್ಚುಗೆಯ ಆಟಗಳನ್ನು ಆಡುತ್ತಿದ್ದಾರೆ. ಕನ್ನಡದಲ್ಲಿ ತಾಜಾ ಕ್ರಿಕೆಟ್‌ ಸುದ್ದಿಗಳನ್ನು ಪಡೆಯಲು, ಕ್ಷಣ ಕ್ಷಣದ ಸ್ಕೋರ್‌ ವಿವರ ಪಡೆಯಲು ಹಿಂದೂಸ್ತಾನ್‌ ಟೈಮ್ಸ್‌ ಕನ್ನಡ ವೆಬ್‌ಸೈಟ್‌ಗೆ ಭೀಟಿ ನೀಡಿ.