Watch: ಡೊನಾಲ್ಡ್‌ ಟ್ರಂಪ್ ಜೊತೆ‌ ಗಾಲ್ಫ್ ಆಡಿದ ಎಂಎಸ್ ಧೋನಿ; ಅಮೆರಿಕದಲ್ಲೂ ತಲಾ ಹವಾ ಎಂದ ನೆಟ್ಟಿಗರು

ಚಾಣಾಕ್ಷ ಕ್ರಿಕೆಟ್‌ ಆಟಗಾರ ಹಾಗೂ ಭಾರತ ಕ್ರಿಕೆಟ್‌ ತಂಡದ ಮಾಜಿ ನಾಯಕ ಎಂಎಸ್‌ ಧೋನಿ (MS Dhoni), ಗಾಲ್ಫ್‌ ಮೈದಾನದಲ್ಲಿ ಕಾಣಿಸಿಕೊಂಡಿದ್ದಾರೆ. ಅದು ಕೂಡಾ ಅಮೆರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ (Donald Trump) ಅವರೊಂದಿಗೆ.

ಸದ್ಯ ಅಮೆರಿಕ ಪ್ರವಾಸದಲ್ಲಿರುವ ಎಂಎಸ್‌ಡಿ, ಯುಎಸ್ಎ ಮಾಜಿ ಅಧ್ಯಕ್ಷರ ಆಹ್ವಾನದ ಮೇರೆಗೆ, ಅವರ ಮನೆಗೆ ಭೇಟಿ ನೀಡಿದ್ದರು ಎಂದು ವರದಿಗಳು ತಿಳಿಸಿವೆ. ಉಭಯ ಕುಶಲೋಪರಿ ಮಾತನಾಡಿದ ಎರಡು ವಿಭಿನ್ನ ಕ್ಷೇತ್ರದ ನಾಯಕರು, ಆ ಬಳಿಕ ಸ್ನೇಹಪರವಾಗಿ ಗಾಲ್ಫ್‌ ಆಡಿದ್ದಾರೆ. ಈ ಫೋಟೋ ಹಾಗೂ ವಿಡಿಯೋಗಳು ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಸಖತ್‌ ಸದ್ದು ಮಾಡುತ್ತಿವೆ.

ಅಮೆರಿಕದಲ್ಲಿ ಸದ್ಯ ಯುಎಸ್‌ ಓಪನ್‌ ಟೆನಿಸ್‌ ಟೂರ್ನಿಯ ಸಂಭ್ರಮ ಮನೆ ಮಾಡಿದೆ. ಈಗಾಗಲೇ ಯುಎಸ್ ಓಪನ್ 2023ರ ಪುರುಷರ ಸಿಂಗಲ್ಸ್‌‌ ಕ್ವಾರ್ಟರ್-ಫೈನಲ್‌ ಪಂದ್ಯವನ್ನು ಧೋನಿ (MS Dhoni) ಮೈದಾನಕ್ಕೆ ತೆರಳಿ ವೀಕ್ಷಿಸಿದ್ದರು. ಕಿಕ್ಕಿರಿದು ತುಂಬಿದ್ದ ಮೈದಾನದಲ್ಲಿ ಕಾರ್ಲೊಸ್ ಅಲ್ಕರಾಜ್ ಹಾಗೂ ಜ್ವೆರೆವ್ ನಡುವಿನ ರೋಚಕ ಪಂದ್ಯವನ್ನು ಮಾಹಿ ಕಣ್ತುಂಬಿಕೊಂಡಿದ್ದರು. ಟೆನ್ನಿಸ್‌ ಕ್ರೀಡೆ ಕಡೆಗಿನ ತಮ್ಮ ಒಲು ತೋರಿಸಿದ ಬೆನ್ನಲ್ಲೇ, ಇದೀಗ ಗಾಲ್ಫ್‌ ಆಟದತ್ತ ಮಾಹಿ ಒಲವು ತೋರಿಸಿಕೊಂಡಿದ್ದಾರೆ.

ಉದ್ದ ಕೂದಲು ಬಿಟ್ಟಿರುವ ಮಾಹಿ, ಟ್ರಂಪ್‌ ಜೊತೆಗೆ ಫೋಟೋಗೆ ಪೋಸ್‌ ಕೊಟ್ಟಿದ್ದಾರೆ. ಅತ್ತ ಟ್ರಂಪ್‌ ಕೂಡಾ ಕೆಂಪು ಬಣ್ಣದ MAGA ಕ್ಯಾಪ್‌ನೊಂದಿಗೆ ಕಾಣಿಸಿಕೊಂಡಿದ್ದಾರೆ. ಇಬ್ಬರೂ ಗಾಲ್ಫಿಂಗ್ ಉಡುಪಿನಲ್ಲಿ ಮೈದಾನಕ್ಕಿಳಿದಿದ್ದಾರೆ. ಇಬ್ಬರು ಜಾಗತಿಕ ನಾಯಕರ ಫೋಟೋಗಳು ಸಾಮಾಜಿಕ ಮಾಧ್ಯಮದಲ್ಲಿ ವ್ಯಾಪಕವಾಗಿ ವೈರಲ್‌ ಆಗಿವೆ. ಟೀಮ್‌ ಇಂಡಿಯಾ ಮಾಜಿ ನಾಯಕನ ಜೊತೆಗೆ ಟ್ರಂಪ್ ಗಾಲ್ಫ್ ಆಡುತ್ತಿರುವ ವಿಡಿಯೋ ಸಖತ್‌ ಸದ್ದು ಮಾಡುತ್ತಿದೆ.

ಕೂಲ್‌ ಕ್ಯಾಪ್ಟನ್‌ ಎಂದೇ ಕರೆಸಿಕೊಳ್ಳುವ ಧೋನಿ, ಅಮೆರಿಕ ರಾಜಕಾರಣದಲ್ಲಿ ಪ್ರಭಾವಿ ವ್ಯಕ್ತಿಯಾಗಿರುವ ಟ್ರಂಪ್ ಅವರೊಂದಿಗಿನ ಭೇಟಿ ಸಾಮಾಜಿಕ ಮಾಧ್ಯಮದಲ್ಲಿ ಹೊಸ ಚರ್ಚೆಯ ವಸ್ತುವಾಗಿದೆ. ನಡೆ ನುಡಿಯಲ್ಲಿ ಈ ಇಬ್ಬರೂ ತದ್ವಿರುದ್ಧ. ಹೀಗಾಗಿ ನೆಟ್ಟಿಗರ ಬಿಸಿಬಿಸಿ ಚರ್ಚೆಗೆ ಹೊಸ ವಿಷಯ ಸಿಕ್ಕಂತಾಗಿದೆ.

ಕಾರ್ಲೊಸ್ ಅಲ್ಕರಾಜ್ ಮತ್ತು ಅಲೆಕ್ಸಾಂಡರ್ ಜ್ವೆರೆವ್ ನಡುವಿನ ಯುಎಸ್ ಓಪನ್ 2023ರ ಕ್ವಾರ್ಟರ್ ಫೈನಲ್ ಪಂದ್ಯವನ್ನು ಮಾಹಿ ಮೈದಾನದಲ್ಲೇ ವೀಕ್ಷಿಸಿದ್ದರು. ಅದಾದ ಒಂದು ದಿನದ ನಂತರ ಈ ಫೋಟೋ ಸೋಷಿಯಲ್‌ ಮೀಡಿಯಾದಲ್ಲಿ ಕಾಣಿಸಿಕೊಂಡಿದೆ. ಪಂದ್ಯದ ನಡುವೆ ವಿರಾಮದ ಸಮಯದಲ್ಲಿ, ಕ್ಯಾಮೆರಾ ಕಣ್ಣಿಗೆ ಧೋನಿ ಸೆರೆಯಾಗಿದ್ದರು.

ಯುಎಸ್​ ಓಪನ್ ಫೈನಲ್ ಪ್ರವೇಶಿಸಿದ ರೋಹನ್ ಬೋಪಣ್ಣ ಜೋಡಿ; ವಿಶ್ವದಾಖಲೆ ಬರೆದ ಕನ್ನಡಿಗ

ಭಾರತದ ರೋಹನ್ ಬೋಪಣ್ಣ 2023ರ ಯುಎಸ್ ಓಪನ್‌ ಪುರುಷರ ಡಬಲ್ಸ್‌ನಲ್ಲಿ ಪ್ರಶಸ್ತಿ ಸುತ್ತಿಗೇರಿದ್ದಾರೆ. ಆ ಮೂಲಕ ಗ್ರ್ಯಾಂಡ್ ಸ್ಲಾಮ್‌ನ ಫೈನಲ್ ತಲುಪಿದ ಅತ್ಯಂತ ಹಿರಿಯ ವ್ಯಕ್ತಿ ಎಂಬ ವಿಶ್ವದಾಖಲೆ ಬರೆದಿದ್ದಾರೆ. ಲೂಯಿಸ್ ಆರ್ಮ್‌ಸ್ಟ್ರಾಂಗ್ ಸ್ಟೇಡಿಯಂನಲ್ಲಿ ನಡೆದ ಸೆಮಿಫೈನಲ್‌ನಲ್ಲಿ ಬೋಪಣ್ಣ ಮತ್ತು ಅವರ ಆಸ್ಟ್ರೇಲಿಯನ್ ಜೊತೆಗಾರ ಮ್ಯಾಥ್ಯೂ ಎಬ್ಡೆನ್ (Matthew Ebden) 7-6 (7-3), 6-2 ಸೆಟ್​ಗಳ ಅಂತರದಲ್ಲಿ ಗೆದ್ದು ಫೈನಲ್ ಪ್ರವೇಶಿಸಿದ್ದಾರೆ.

ಟೆನ್ನಿಸ್‌ ಕುರಿತ ಇತರ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್‌ ಮಾಡಿ