Ind vs Pak: ಭಾರತ ತಂಡವನ್ನ 6 ವಿಕೆಟ್​ಗಳಿಂದ ಸೋಲಿಸಿದ ಪಾಕಿಸ್ತಾನ; ಐದೇ ಓವರ್‌ಗಳಲ್ಲಿ 120 ರನ್‌ ಗುರಿ ಬೆನ್ನಟ್ಟಿದ ಪಾಕ್ ಪಡೆ

ಹಾಂಕಾಂಗ್​​ನಲ್ಲಿ ನಡೆಯುತ್ತಿರುವ ಹಾಂಕಾಂಗ್​ ಅಂತಾರಾಷ್ಟ್ರೀಯ ಸಿಕ್ಸರ್ ಟೂರ್ನಮೆಂಟ್​ನಲ್ಲಿ (Hong Kong International Sixes) ತನ್ನ ಮೊದಲ ಪಂದ್ಯದಲ್ಲೇ ಟೀಮ್ ಇಂಡಿಯಾ ಸೋಲಿಗೆ ಶರಣಾಗಿದೆ. ಅದು ಕೂಡ ಬದ್ಧವೈರಿ ಪಾಕಿಸ್ತಾನ ವಿರುದ್ಧ (India vs Pakistan Match Result). ಇದು ಆರು ಓವರ್​​ ಪಂದ್ಯಗಳ ಟೂರ್ನಿಯಾಗಿದೆ. ಮೊದಲು ಬ್ಯಾಟಿಂಗ್ ಮಾಡಿದ ಭಾರತ ತಂಡ, ತನ್ನ ನಿಗದಿತ 6 ಓವರ್​​ಗಳಲ್ಲಿ 119 ರನ್​ಗಳ ಕಲೆ ಹಾಕಿತು. ಆದರೆ, ಇದರ ಹೊರತಾಗಿಯೂ ಪಾಕಿಸ್ತಾನ ಕೇವಲ 30 ಎಸೆತಗಳಲ್ಲೇ ಗೆಲುವಿನ ನಗೆ ಬೀರಿತು. ಒಂದು ವಿಕೆಟ್ ಕಳೆದುಕೊಳ್ಳದೆಯೇ ಈ ಗುರಿ ತಲುಪಿದ್ದು ವಿಶೇಷ.

ಶಕ್ತಿ ಪ್ರದರ್ಶಿಸಿದ ಭರತ್ ಚಿಪ್ಲಿ-ಉತ್ತಪ್ಪ

ಮೊದಲು ಬ್ಯಾಟ್ ಮಾಡಿದ ಭಾರತ ತಂಡದ ಪರ ಭರತ್ ಚಿಪ್ಲಿ ಮತ್ತು ರಾಬಿನ್ ಉತ್ತಮ ಅತ್ಯುತ್ತಮ ಪ್ರದರ್ಶನ ನೀಡಿದರು. ಚಿಪ್ಲಿ 16 ಎಸೆತಗಳಲ್ಲಿ 53 ರನ್‌ ಸಿಡಿಸಿ ಗರಿಷ್ಠ ಸ್ಕೋರರ್​ ಆದರು. ಅವರ ಇನ್ನಿಂಗ್ಸ್​​ನಲ್ಲಿ 6 ಬೌಂಡರಿ ಹಾಗೂ 4 ಸಿಕ್ಸರ್​​ಗಳಿದ್ದವು. ನಾಯಕ ರಾಬಿನ್ ಉತ್ತಪ್ಪ ಕೇವಲ 8 ಎಸೆತಗಳಲ್ಲಿ 3 ಸಿಕ್ಸರ್ ಮತ್ತು 3 ಬೌಂಡರಿ ಸಹಿತ 31 ರನ್ ಗಳಿಸಿದರು. ಅವರ ಸ್ಟ್ರೈಕ್ ರೇಟ್ 387.50 ಇದೆ. ಮನೋಜ್ ತಿವಾರಿ 7 ಎಸೆತಗಳಲ್ಲಿ 17 ರನ್ ಗಳಿಸಿ ಅಜೇಯ ಇನ್ನಿಂಗ್ಸ್ ಆಡಿದರು. ಟೂರ್ನಿ ನಿಯಮಗಳ ಪ್ರಕಾರ, ಒಂದು ಪಂದ್ಯದಲ್ಲಿ 6 ಆಟಗಾರರು ಆಡಬಹುದು. ಪಂದ್ಯವೂ ತಲಾ 6 ಓವರ್‌ಗಳದ್ದಾಗಿದೆ.

ಪಾಕ್ ಪರ ಅಬ್ಬರಿಸಿದ ಆಸಿಫ್-ಅಖ್ಲಾಕ್

120 ರನ್​​ಗಳ ಗುರಿ ನೀಡಿದ ಪಾಕ್​ 5 ಓವರ್​ಗಳಲ್ಲೇ ಗೆಲುವಿನ ಗೆರೆ ದಾಟಿತು. ಆಸಿಫ್ ಅಲಿ 14 ಎಸೆತಗಳಲ್ಲಿ 55 ರನ್ ಗಳಿಸಿದರೆ, ಅಖ್ಲಾಕ್ 12 ಎಸೆತಗಳಲ್ಲಿ 40 ರನ್ ಗಳಿಸಿ ಭರ್ಜರಿ ಗೆಲುವಿಗೆ ಕಾರಣರಾದರು. ಆ ಮೂಲಕ ಭಾರತ ತಂಡವನ್ನು ಸೋಲಿಸಿದರು. ಇಬ್ಬರು ಸೇರಿ 14 ಸಿಕ್ಸರ್​, 6 ಬೌಂಡರಿ ಬಾರಿಸಿದರು. ಅಂದರೆ ಬೌಂಡರಿ-ಸಿಕ್ಸರ್​ಗಳ ಮೂಲಕವೇ 108 ರನ್​ ಹರಿದು ಬಂದಿವೆ.

ಭಾರತ ತಂಡದ ಇನ್ನಿಂಗ್ಸ್

ಮೊದಲ ಓವರ್: ಭಾರತ 27 ರನ್ ಗಳಿಸಿತು. ಅಮೀರ್ ಯಾಮಿನ್ ಬೌಲಿಂಗ್​​ನ ಮೊದಲ 5 ಎಸೆತಗಳಲ್ಲಿ ರಾಬಿನ್ ಉತ್ತಪ್ಪ 3 ಬೌಂಡರಿ ಮತ್ತು 2 ಸಿಕ್ಸರ್ ಬಾರಿಸಿದರು.

ಎರಡನೇ ಓವರ್: ಫಹೀಮ್ ಅಶ್ರಫ್ ಬೌಲಿಂಗ್​ನ ಮೊದಲ ಎಸೆತದಲ್ಲಿ ರಾಬಿನ್ ಉತ್ತಪ್ಪ ಸಿಕ್ಸರ್ ಹೊಡೆದರು. ಆದರೆ 2ನೇ ಎಸೆತದಲ್ಲಿ ಬೌಲ್ಡ್ ಆದರು. ಇದರ ನಂತರ ಕೇದಾರ್ ಜಾಧವ್ ಸತತ 2 ಬೌಂಡರಿಗಳನ್ನು ಬಾರಿಸಿದರು. ಬಳಿಕ ಮನೋಜ್ ತಿವಾರಿ ಔಟಾದರು. ಈ ಓವರ್‌ನಲ್ಲಿ 18 ರನ್ ಹರಿದು ಬಂದವು.

ಮೂರನೇ ಓವರ್: ಪಾಕಿಸ್ತಾನದ ಲೆಗ್ ಸ್ಪಿನ್ನರ್ ಶಾದಾಬ್ ಖಾನ್ ಅತ್ಯುತ್ತಮವಾಗಿ ಬೌಲಿಂಗ್ ಮಾಡಿ ಕೇವಲ 8 ರನ್ ನೀಡಿದರು.

ನಾಲ್ಕನೇ ಓವರ್: ಫಹೀಮ್ ಅಶ್ರಫ್ ಅವರ ಓವರ್‌ನಲ್ಲಿ 32 ರನ್ ಗಳಿಸಲಾಯಿತು. ಈ ಓವರ್‌ನಲ್ಲಿ ಭರತ್ ಚಿಪ್ಲಿ 4 ಸಿಕ್ಸರ್ ಮತ್ತು ಬೌಂಡರಿ ಬಾರಿಸಿದರು.

ಐದನೇ ಓವರ್: ಹುಸೇನ್ ತಲಾತ್ ಅವರ ಬೌಲಿಂಗ್​​ನಲ್ಲಿ 14 ರನ್ ಬಂದವು. ಮನೋಜ್ ತಿವಾರಿ ಮೊದಲ 2 ಎಸೆತಗಳಲ್ಲಿ ಒಂದು ಬೌಂಡರಿ ಮತ್ತು ಸಿಕ್ಸರ್ ಬಾರಿಸಿದರು. ಆದರೆ ನಂತರದ ನಾಲ್ಕು ಎಸೆತಗಳಲ್ಲಿ ಯಾವುದೇ ಬೌಂಡರಿ ಬರಲಿಲ್ಲ.

ಆರನೇ ಓವರ್: ಆಸಿಫ್ ಅಲಿ ಬೌಲಿಂಗ್​​ನ ಮೊದಲ 3 ಎಸೆತಗಳಲ್ಲಿ 3 ಬೌಂಡರಿಗಳು ಬಂದವು. ಭರತ್ ಚಿಪ್ಲಿ ಹ್ಯಾಟ್ರಿಕ್ ಬೌಂಡರಿ ಬಾರಿಸಿ 16 ಎಸೆತಗಳಲ್ಲಿ ಅರ್ಧಶತಕ ಪೂರೈಸಿದರು. ಕೊನೆಯ ಓವರ್‌ನಲ್ಲಿ ಭಾರತ 20 ರನ್ ಗಳಿಸಿತು. ಭಾರತ ನಿಗದಿತ 6 ಓವರ್‌ಗಳಲ್ಲಿ 119 ರನ್ ಗಳಿಸಿತು.

ಪಾಕಿಸ್ತಾನದ ಬ್ಯಾಟ್ಸ್‌ಮನ್‌ಗಳ ಪ್ರದರ್ಶನ

ಮೊದಲ ಓವರ್: ಸ್ಟುವರ್ಟ್ ಬಿನ್ನಿ ಅವರ ಬೌಲಿಂಗ್​ನಲ್ಲಿ 21 ರನ್ ಗಳಿಸುವ ಮೂಲಕ ವೇಗದ ಆರಂಭ ಪಡೆಯಿತು. ಆಸಿಫ್ ಅಲಿ ಎರಡು ಸಿಕ್ಸರ್ ಬಾರಿಸಿದರೆ, ಅಖ್ಲಾಕ್ ಬೌಂಡರಿ ಬಾರಿಸಿದರು.

ಎರಡನೇ ಓವರ್: ಪಾಕಿಸ್ತಾನ 2ನೇ ಓವರ್‌ನಲ್ಲಿ 23 ರನ್ ಗಳಿಸಿತು. ಕೇದಾರ್ ಜಾಧವ್ ಅವರ ಓವರ್‌ನಲ್ಲಿ ಆಸಿಫ್ ಅಲಿ 3 ಸಿಕ್ಸರ್ ಸಿಡಿಸಿದರು.

ಮೂರನೇ ಓವರ್: ಶಹಬಾಜ್ ನದೀಮ್ ಅವರ ಬೌಲಿಂಗ್​ನಲ್ಲಿ ಪಾಕಿಸ್ತಾನಿ ಬ್ಯಾಟ್ಸ್‌ಮನ್‌ಗಳು 24 ರನ್ ಚಚ್ಚಿದರು. ಮೊಹಮ್ಮದ್ ಅಖ್ಲಾಕ್ ಈ ಓವರ್‌ನಲ್ಲಿ 3 ಸಿಕ್ಸರ್, 1 ಬೌಂಡರಿ ಬಾರಿಸಿದರು.

ನಾಲ್ಕನೇ ಓವರ್: ಮನೋಜ್ ತಿವಾರಿ ಕೂಡ ಒಂದು ಓವರ್‌ನಲ್ಲಿ 20 ರನ್ ನೀಡಿದರು. ಈ ವೇಳೆ ಆಸಿಫ್ ಅಲಿ ಮತ್ತು ಅಖ್ಲಾಕ್ ತಲಾ 2 ಸಿಕ್ಸರ್ ಮತ್ತು 1 ಬೌಂಡರಿ ಬಾರಿಸಿದರು.

ಐದನೇ ಓವರ್: ಶಹಬಾಜ್ ನದೀಮ್ ಬೌಲಿಂಗ್​​ನಲ್ಲಿ ಆಸಿಫ್ ಅಲಿ 4 ಸಿಕ್ಸರ್ ಮತ್ತು 2 ಬೌಂಡರಿಗಳನ್ನು ಬಾರಿಸಿದರು. 14 ಎಸೆತಗಳಲ್ಲಿ 55 ರನ್ ಗಳಿಸಿದರು. ಈ ಓವರ್‌ನಲ್ಲಿ ಶಹಬಾಜ್ 33 ರನ್ ಬಿಟ್ಟುಕೊಟ್ಟು ಭಾರತದ ಸೋಲಿಗೆ ಕಾರಣರಾದರು.

ಇದನ್ನೂ ಓದಿ: ಮೈದಾನದಲ್ಲಿ ಅಭಿಮಾನಿಗಳು ಹಾಡಿದ ‘ಮೈ ನೇಮ್ ಈಸ್ ಲಖನ್’ ಹಾಡಿಗೆ ಹುಕ್ ಸ್ಟೆಪ್ ಹಾಕಿದ ವಿರಾಟ್ ಕೊಹ್ಲಿ, ವಿಡಿಯೋ

ಇದನ್ನೂ ಓದಿ: ಐದು ವಿಕೆಟ್ ಪಡೆದು ದಿಗ್ಗಜರ ದಾಖಲೆ ಮುರಿದ ಜಡೇಜಾ

ಇದನ್ನೂ ಓದಿ: ಬೌಲಿಂಗ್​ನಲ್ಲಿ ಮಿಂಚಿದರೂ ಬ್ಯಾಟಿಂಗ್​ನಲ್ಲಿ ಮತ್ತೆ ಅದೇ ರಾಗ, ಅದೇ ಹಾಡು; ಕಿವೀಸ್ 235ಕ್ಕೆ ಆಲೌಟ್,​ ಭಾರತ 86ಕ್ಕೆ 4